ಬೆಂಗಳೂರು: ಪ್ರತಿ ತಿಂಗಳ 1ನೇ ತಾರೀಖಿನಂದು ಹಣಕಾಸು ನಿಯಮಗಳು ಬದಲಾಗುತ್ತಲೇ ಇರುತ್ತವೆ. ಹಾಗಾಗಿ, ಗ್ರಾಹಕರು ಪ್ರತಿ ತಿಂಗಳು ಕೂಡ ಹಣಕಾಸು ನಿಯಮಗಳಲ್ಲಿ ಆಗುವ ಬದಲಾವಣೆಗಳ ಮೇಲೆ ನಿಗಾ ಇರಿಸುವುದು ಪ್ರಮುಖ ಸಂಗತಿಯಾಗಿದೆ. ಹೀಗೆ ಆಗಸ್ಟ್ 1ರಿಂದಲೂ ಯುಪಿಐ ಬ್ಯಾಲೆನ್ಸ್ ಚೆಕ್, ಆಟೋಡೆಬಿಟ್ ಸೇರಿ ಹಲವು ನಿಯಮಗಳು ಬದಲಾಗುತ್ತಿವೆ. ಅವುಗಳು ಯಾವವು ಎಂಬುದರ ಮಾಹಿತಿ ಇಲ್ಲಿದೆ.
ಯುಪಿಐ ನಿಯಮಗಳಲ್ಲಿ ಭಾರಿ ಬದಲಾವಣೆ ಆಗಲಿವೆ. ಯುಪಿಐ ಬಳಕೆದಾರರು ದಿನಕ್ಕೆ ಗರಿಷ್ಠ 50 ಬಾರಿ ಮಾತ್ರ ತಮ್ಮ ಬ್ಯಾಲೆನ್ಸ್ ಅನ್ನು ಪರಿಶೀಲಿಸಬಹುದು. ಒಬ್ಬ ಬಳಕೆದಾರನು ಒಂದಕ್ಕಿಂತ ಹೆಚ್ಚು ಯುಪಿಐ ಅಪ್ಲಿಕೇಶನ್ ಗಳನ್ನು ಹೊಂದಿದ್ದರೆ, ಅವರು ಪ್ರತಿ ಅಪ್ಲಿಕೇಶನ್ ನಲ್ಲಿ 50 ಬಾರಿ ತಮ್ಮ ಬ್ಯಾಲೆನ್ಸ್ ಅನ್ನು ಪರಿಶೀಲಿಸಬಹುದು. ಯುಪಿಐ ಪೇಮೆಂಟ್ ವ್ಯವಸ್ಥೆಯಲ್ಲಿ ಇತ್ತೀಚೆಗೆ ಸರ್ವರ್ ಸಮಸ್ಯೆ ಉಂಟಾದ ಕಾರಣ ರಾಷ್ಟ್ರೀಯ ಪಾವತಿ ನಿಗಮವು ಹೊಸ ನಿಯಮ ಜಾರಿಗೆ ತಂದಿದೆ.
ಹಾಗೆಯೇ, ಆಟೋ-ಡೆಬಿಟ್ ವಹಿವಾಟುಗಳ ನಿಯಮವೂ ಬದಲಾವಣೆಯಾಗಲಿದೆ. ಉದಾಹರಣೆಗೆ ಎಸ್ಐಪಿಗಳು ಮತ್ತು ಒಟಿಟಿ ಚಂದಾದಾರಿಕೆಗಳಿಗೆ ಪಾವತಿಗಳನ್ನು ಪೀಕ್ ಅವರ್ ನಲ್ಲಿ ಪ್ರಕ್ರಿಯೆಗೊಳಿಸಲಾಗುವುದಿಲ್ಲ. ಬೆಳಗ್ಗೆ 10 ರಿಂದ ಮಧ್ಯಾಹ್ನ 1 ರವರೆಗೆ ಮತ್ತು ಸಂಜೆ 5 ರಿಂದ ರಾತ್ರಿ 9.30 ರವರೆಗೆ ಇರುತ್ತವೆ. ಪ್ರತಿ ವಹಿವಾಟಿನೊಂದಿಗೆ ಬ್ಯಾಂಕುಗಳು ಕಡ್ಡಾಯವಾಗಿ ಬ್ಯಾಲೆನ್ಸ್ ನವೀಕರಣಗಳನ್ನು ಕಳುಹಿಸಬೇಕು. ಇದರಿಂದ ಬಳಕೆದಾರರು ಪ್ರತಿ ಬಾರಿ ಹಸ್ತಚಾಲಿತವಾಗಿ ಪರಿಶೀಲಿಸುವ ಅಗತ್ಯವಿರುವುದಿಲ್ಲ. ಪೀಕ್ ಅವರ್ ನಲ್ಲಿ ಮಾತ್ರ ನಿಮ್ಮ ಖಾತೆಯಿಂದ ಹಣ ಕಡಿತವಾಗುವುದಿಲ್ಲ.
ಇವುಗಳ ಜತೆಗೆ, ಆಗಸ್ಟ್ 1ರಂದು ಗೃಹ ಬಳಕೆ ಹಾಗೂ ವಾಣಿಜ್ಯ ಬಳಕೆ ಸಿಲಿಂಡರ್ ಗಳ ಬೆಲೆಯು ಕೂಡ ಬದಲಾವಣೆಯಾಗುವ ಸಾಧ್ಯತೆ ಇದೆ. ಅಲ್ಲದೆ, ಎಸ್ ಬಿ ಐ ಕಾರ್ಡ್ ಹೊಂದಿದವರಿಗೆ ವಿಮಾನ ಅಪಘಾತದಲ್ಲಿ ಮೃತಪಟ್ಟರೆ 1 ಕೋಟಿ ರೂಪಾಯಿವರೆಗೆ ವಿಮೆ ಸುರಕ್ಷತೆ ಇತ್ತು. ಅದನ್ನು ಬ್ಯಾಂಕ್ ರದ್ದುಗೊಳಿಸಿದ್ದು, ಆಗಸ್ಟ್ 1ರಿಂದ ಜಾರಿಗೆ ಬರಲಿದೆ.
