ವೈರಲ್ ವಿಡಿಯೋ: ತಿಂಗಳಿಗೆ 5-8 ಲಕ್ಷ ರೂಪಾಯಿ ದುಡಿವ ಬುದ್ಧಿವಂತ ಆಟೋ ಚಾಲಕನ ಸಿಕ್ರೆಟ್!
ಮುಂಬೈ, : ಸಾಮಾನ್ಯವಾಗಿ ದಿನಕ್ಕೆ 200-300 ರೂಪಾಯಿ ಅಥವಾ ಗರಿಷ್ಠ 1000 ರೂಪಾಯಿ ಗಳಿಸುವ ಆಟೋ ಚಾಲಕರ ಮಧ್ಯೆ, ಮುಂಬೈನಲ್ಲಿ ಒಬ್ಬ ಆಟೋ ಚಾಲಕ ತಿಂಗಳಿಗೆ 5 ರಿಂದ 8 ಲಕ್ಷ ರೂಪಾಯಿವರೆಗೆ ಸಂಪಾದಿಸುತ್ತಿದ್ದಾನೆ ಎಂಬ ಸುದ್ದಿ ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ವೈರಲ್ ಆಗಿದೆ. ಆಟೋ ಓಡಿಸದೆ ಇಷ್ಟು ಹಣ ಹೇಗೆ ಗಳಿಸುತ್ತಾನೆ ಎಂಬ ಪ್ರಶ್ನೆಗೆ ಉತ್ತರ ಆತನ ಬುದ್ಧಿವಂತಿಕೆಯಲ್ಲಿ ಅಡಗಿದೆ. ಈತ ಅಮೆರಿಕದ ಕಾನ್ಸುಲೇಟ್ ಬಳಿ ತನ್ನ ಆಟೋರಿಕ್ಷಾ ಪಾರ್ಕ್ ಮಾಡಿ, ವೀಸಾ ಅರ್ಜಿದಾರರಿಗೆ ಬ್ಯಾಗ್ಗಳನ್ನು ಸುರಕ್ಷಿತವಾಗಿ ಇಡುವ ಸೌಲಭ್ಯ ಒದಗಿಸುವ ಮೂಲಕ ಈ ಆದಾಯ ಗಳಿಸುತ್ತಾನಂತೆ.
ಲೆನ್ಸ್ಕಾರ್ಟ್ನ ಪ್ರೊಡಕ್ಟ್ ಲೀಡರ್ ರಾಹುಲ್ ರೂಪಾನಿ ಅವರ ಗಮನ ಸೆಳೆದ ಈ ಅಸಾಮಾನ್ಯ ಆದಾಯದ ಮೂಲವನ್ನು ಅವರು ತಮ್ಮ ಸಾಮಾಜಿಕ ಮಾಧ್ಯಮ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಇತ್ತೀಚೆಗೆ ಅವರು ವೀಸಾ ಅಪಾಯಿಂಟ್ಮೆಂಟ್ಗಾಗಿ ದೆಹಲಿಯ ಅಮೆರಿಕ ಕಾನ್ಸುಲೇಟ್ಗೆ ಭೇಟಿ ನೀಡಿದಾಗ ತಮಗಾದ ಅನುಭವವನ್ನು ರೂಪಾನಿ ವಿವರಿಸಿದ್ದಾರೆ. ಸೆಕ್ಯುರಿಟಿ ಗಾರ್ಡ್ಗಳು ತಮ್ಮ ಬ್ಯಾಗ್ಗಳನ್ನು ಒಳಗೆ ಕೊಂಡೊಯ್ಯಲು ಬಿಡಲಿಲ್ಲ.
ಬ್ಯಾಗ್ಗಳನ್ನು ಇಡಲು ಯಾವುದೇ ಸೌಲಭ್ಯವಿಲ್ಲದೆ ದಾರಿ ಕಾಣದೆ ಫುಟ್ಪಾತ್ನಲ್ಲಿ ನಿಂತಿದ್ದಾಗ, ಒಬ್ಬ ಆಟೋ ಚಾಲಕ ಇವರತ್ತ ಕೈ ಬೀಸಿ, “ಸರ್, ಬ್ಯಾಗ್ ನೀಡಿ. ಅದನ್ನು ಸುರಕ್ಷಿತವಾಗಿ ಇಡುತ್ತೇನೆ. ಕೇವಲ 1,000 ರೂಪಾಯಿ” ಎಂದು ಹೇಳಿದ್ದಾನಂತೆ. ಮೊದಲು ಈ ಶುಲ್ಕ ದುಬಾರಿ ಎಂದೆನಿಸಿದರೂ, ತಮ್ಮ ಕೆಲಸ ಆಗಬೇಕಾಗಿರುವುದರಿಂದ ಅನಿವಾರ್ಯವಾಗಿ ಒಪ್ಪಿಕೊಳ್ಳಬೇಕಾಯಿತು ಎಂದು ರೂಪಾನಿ ಪೋಸ್ಟ್ನಲ್ಲಿ ಬರೆದಿದ್ದಾರೆ.
ಈ ಆಟೋ ಚಾಲಕ ಪ್ರತಿದಿನ ಕಾನ್ಸುಲೇಟ್ ಹೊರಗೆ ಕಾಯುತ್ತಾನಂತೆ ಮತ್ತು ತನ್ನ “ಬ್ಯಾಗ್ ಸ್ಟೋರೇಜ್” ಸೇವೆಯ ಅಗತ್ಯವಿರುವ ಸುಮಾರು 20-30 ಗ್ರಾಹಕರನ್ನು ಪ್ರತಿದಿನ ಹುಡುಕುತ್ತಾನಂತೆ. ಈ ಮೂಲಕ ಅವನು ಪ್ರತಿದಿನ 20,000 ರೂಪಾಯಿ 30,000 ರೂಪಾಯಿ. ಇದು ಅನೇಕ ಕಾರ್ಪೊರೇಟ್ ವೃತ್ತಿಪರರ ಆದಾಯಕ್ಕಿಂತಲೂ ಹೆಚ್ಚಿನದು. ಈ ಹಣ ಗಳಿಸಲು ಅವನು ಹೆಚ್ಚು ಸಮಯ ವಾಹನ ಓಡಿಸಬೇಕಾಗಿಲ್ಲ ಮತ್ತು ಯಾವುದೇ ನೂಕುನುಗ್ಗಲು ಇಲ್ಲ ಎಂದು ರೂಪಾನಿ ಹೇಳಿದ್ದಾರೆ.
ಆಟೋ ಚಾಲಕನು ತನ್ನ ಆಟೋದಲ್ಲಿ ಕಾನೂನುಬದ್ಧವಾಗಿ 30 ಬ್ಯಾಗ್ಗಳನ್ನು ಇಟ್ಟುಕೊಳ್ಳಲು ಸಾಧ್ಯವಿಲ್ಲದ ಕಾರಣ, ಅವನು ಹತ್ತಿರದ ಸಣ್ಣ ಲಾಕರ್ ಜಾಗವನ್ನು ಹೊಂದಿರುವ ಸ್ಥಳೀಯ ಪೊಲೀಸ್ ಅಧಿಕಾರಿಯೊಂದಿಗೆ ಪಾಲುದಾರಿಕೆ ಹೊಂದಿದ್ದಾನೆ ಎಂದೂ ರೂಪಾನಿ ತಮ್ಮ ಪೋಸ್ಟ್ನಲ್ಲಿ ಉಲ್ಲೇಖಿಸಿದ್ದಾರೆ.
ಈ ಆಟೋ ಚಾಲಕ ಯಾವುದೇ ಪದವಿ ಇಲ್ಲದೆ, ಯಾವುದೇ ಅಪ್ಲಿಕೇಶನ್ ಅಥವಾ ದೊಡ್ಡ ಹೂಡಿಕೆ ಮಾಡದೆ, ತಂತ್ರಜ್ಞಾನವನ್ನು ಬಳಸದೆ, ಸರಿಯಾದ ಸಮಯದಲ್ಲಿ ಸರಿಯಾದ ಸ್ಥಳದಲ್ಲಿ ತನ್ನ ಆಟೋ ಪಾರ್ಕ್ ಮಾಡಿ, ಜನರ ನಂಬಿಕೆ ಮತ್ತು ವಿಶ್ವಾಸ ಗಳಿಸುವ ಮೂಲಕ ಪ್ರತಿದಿನ 20-30 ಸಾವಿರದಂತೆ ತಿಂಗಳಿಗೆ 5-8 ಲಕ್ಷ ರೂಪಾಯಿವರೆಗೆ ಸಂಪಾದಿಸುತ್ತಿದ್ದಾನೆ. ಈ ಬುದ್ಧಿವಂತಿಕೆಯು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲ್ಪಟ್ಟಿದೆ ಮತ್ತು ಅನೇಕರಿಗೆ ಸ್ಫೂರ್ತಿಯಾಗಿದೆ.
