ಆಹಾ ನನ್ನ ಮದುವೆಯಂತೆ… ಎಂದು ಸಂಭ್ರಮಿಸಿ, ಎಲ್ಲ ಸಿದ್ಧತೆಗಳನ್ನು ನಡೆಸಿ, ಹಸೆಮಣೆಯಲ್ಲಿ ಕುಳಿತ ಉತ್ತರಪ್ರದೇಶದ ವರನಿಗೆ ಶಾಕ್ ಕಾದಿತ್ತು.
ಅದು ಅಂತಿಂಥಾ ಶಾಕ್ ಅಲ್ಲ… ಪಕ್ಕದಲ್ಲಿ 21 ವರ್ಷದ ಮದುಮಗಳ ಬದಲಿಗೆ, ವಧುವಿನ ತಾಯಿಯೇ ಕುಳಿತಿದ್ದಳು. ಸ್ವಲ್ಪ ಯಾಮಾರಿಬಿಟ್ಟಿದ್ದರೂ 22 ವರ್ಷದ ಯುವಕನ ಮದುವೆ 45 ವರ್ಷದ ಮಹಿಳೆಯೊಂದಿಗೆ ನಡೆದೇ ಬಿಡುತ್ತಿತ್ತು!
ಈ ಘಟನೆ ನಡೆದಿರುವುದು ಉತ್ತರಪ್ರದೇಶದ ಮೀರತ್ನಲ್ಲಿ. 21ರ ಯುವತಿಯನ್ನು ತೋರಿಸಿ ಆಕೆಯ ಅಮ್ಮನೊಂದಿಗೆ ನನ್ನನ್ನು ಮದುವೆ ಮಾಡಿಸಲು ಹೊರಟಿದ್ದರು ಎಂದು ಮೊಹಮ್ಮದ್ ಅಜೀಂ (22) ಎಂಬಾತ ತನ್ನ ಅಣ್ಣ ನದೀಮ್ ಮತ್ತು ಅತ್ತಿಗೆ ಶಾಯಿದಾ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದಾನೆ.
ಬ್ರಹ್ಮಪುರಿಯ ಅಜೀಂ ವಿವಾಹವು ಶಾಮ್ಲಿ ಜಿಲ್ಲೆಯ 21 ವರ್ಷದ ಯುವತಿ ಮನ್ತಾಷಾ ಜತೆ ನಿಶ್ಚಯವಾಗಿತ್ತು. ಅದರಂತೆ, ಮದುವೆಗೆ ಎಲ್ಲ ಸಿದ್ಧತೆಗಳೂ ಆರಂಭವಾಗಿದ್ದವು. ಮದುವೆ ದಿನ ವರ ಮತ್ತು ವಧು ಅಕ್ಕಪಕ್ಕದಲ್ಲೇ ಕುಳಿತಿದ್ದರು. ಮದುವೆ ಮಾಡಿಸುತ್ತಿದ್ದ ಮೌಲ್ವಿಯು ನಿಕಾಹ್ ವೇಳೆ ವಧುವಿನ ಹೆಸರನ್ನು ತಾಹಿರಾ ಎಂದು ಉಲ್ಲೇಖಿಸುತ್ತಿದ್ದಂತೆ, ಮದುಮಗ ಅಜೀಂಗೆ ಗೊಂದಲ ಶುರುವಾಗಿದೆ. ನಾನು ಮದುವೆಯಾಗಬೇಕಿರುವ ಹುಡುಗಿಯ ಹೆಸರು ಮನ್ತಾಷಾ ಅಲ್ಲವೇ, ಇಲ್ಲಿ ಆಕೆಯ ಹೆಸರನ್ನು ತಾಹಿರಾ ಎಂದು ಉಲ್ಲೇಖಿಸುತ್ತಿದ್ದಾರಲ್ಲವೇ ಎಂಬ ಪ್ರಶ್ನೆ ಮೂಡಿದೆ. ಕೂಡಲೇ ಆತ, ಪಕ್ಕದಲ್ಲಿ ಕುಳಿತಿದ್ದ ಮದುಮಗಳ ಮುಖಮುಚ್ಚಿದ್ದ ಶಾಲನ್ನು ಮೇಲಕ್ಕೆತ್ತಿ ನೋಡಿ, ಬೆಚ್ಚಿಬಿದ್ದಿದ್ದಾಾನೆ. ಮನ್ತಾಷಾ ಇರಬೇಕಾದ ಜಾಗದಲ್ಲಿ ಅವಳ ತಾಯಿ, ವಿಧವೆ ತಾಹಿರಾ ಕುಳಿತಿದ್ದರು.
ಕೂಡಲೇ ಅಜೀಂ ಮದುವೆಯನ್ನು ರದ್ದುಮಾಡಿದ್ದಾನೆ. ಅಣ್ಣ ಮತ್ತು ಅತ್ತಿಗೆ ಸೇರಿ ನನ್ನನ್ನು ವಿಧವೆಯೊಬ್ಬರಿಗೆ ಮದುವೆ ಮಾಡಿಸಲು ಮುಂದಾಗಿದ್ದರು. 5 ಲಕ್ಷ ರೂ.ಗಳ ವಹಿವಾಟು ಕೂಡ ನಡೆದಿತ್ತು ಎಂದು ಅಜೀಂ ಪೊಲೀಸರಿಗೆ ದೂರು ನೀಡಿದ್ದಾನೆ. ಅಲ್ಲದೆ, ಈ ವಂಚನೆ ಬಗ್ಗೆ ಧ್ವನಿಯೆತ್ತಿದ್ದಕ್ಕೆ ಅಣ್ಣ-ಅತ್ತಿಗೆ ಸೇರಿ ನನ್ನ ಮೇಲೆ ಅತ್ಯಾಚಾರ ದೂರು ದಾಖಲಿಸುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದೂ ದೂರಿನಲ್ಲಿ ತಿಳಿಸಿದ್ದಾನೆ.
