ಬೆಂಗಳೂರು: ದೇಶದ ಪ್ರಮುಖ ಯುಪಿಐ ಪೇಮೆಂಟ್ ಆ್ಯಪ್ ಆಗಿರುವ ಫೋನ್ ಪೇ (PhonePe) ಕಂಪನಿಯು ಯುಪಿಐ ಸರ್ಕಲ್ ಎಂಬ ಹೊಸ ಫೀಚರ್ ಬಿಡುಗಡೆಗೊಳಿಸಿದೆ. ಫೋನ್ ಪೇ ಆ್ಯಪ್ ನಲ್ಲಿ ಜನರು ತಮ್ಮ ಕುಟುಂಬಸ್ಥರು, ಗೆಳೆಯರದ್ದು ಒಂದು ವಲಯವನ್ನು ರಚಿಸಬಹುದಾಗಿದ್ದು, ಇದರಿಂದ ಒಂದು ಗ್ರೂಪ್ ನ ಸದಸ್ಯರು ಕೂಡ ಅದೇ ತಂಡದ ಸದಸ್ಯರ ಪರವಾಗಿ ಪೇಮೆಂಟ್ ಮಾಡಬಹುದಾಗಿದೆ. ಬ್ಯಾಂಕ್ ಖಾತೆ ಇಲ್ಲದವರಿಗೂ ಯುಪಿಐ ಸರ್ಕಲ್ ಸಹಾಯ ಮಾಡುತ್ತದೆ. ಗೂಗಲ್ ಪೇನಲ್ಲಿ ಈ ಫೀಚರ್ ಈಗಾಗಲೇ ಲಭ್ಯವಿದೆ.
ಯುಪಿಐ ಸರ್ಕಲ್ ಬಳಕೆದಾರರಿಗೆ ಒಂದು ಗ್ರೂಪ್ ಅಥವಾ ವಲಯವನ್ನು ರಚಿಸಲು ಇದು ಅನುವು ಮಾಡಿಕೊಡುತ್ತದೆ. ಅದರಲ್ಲಿ ಕುಟುಂಬದ ಸದಸ್ಯರು ಅಥವಾ ಆಪ್ತ ಸ್ನೇಹಿತರನ್ನು ಸೇರಿಸಬಹುದು. ಮುಖ್ಯ ಬಳಕೆದಾರರು ಇತರ ಬಳಕೆದಾರರನ್ನು ಸೇರಿಸಲು ಅವರ ಯುಪಿಐ ಐಡಿ ಅಥವಾ ಕ್ಯೂಆರ್ ಕೋಡ್ ಅನ್ನು ಹಂಚಿಕೊಳ್ಳಬಹುದು. ಒಮ್ಮೆ ಸೇರಿಸಿದ ನಂತರ, ಮುಖ್ಯ ಬಳಕೆದಾರರು ಇತರ ಬಳಕೆದಾರರ ಪರವಾಗಿ ಪೇಮೆಂಟ್ ಮಾಡಬಹುದು.
ಯುಪಿಐ ಸರ್ಕಲ್ ನ ಮುಖ್ಯ ಅಂಶವೆಂದರೆ, ಮುಖ್ಯ ಬಳಕೆದಾರರು ವಹಿವಾಟುಗಳ ಮೇಲೆ ಸಂಪೂರ್ಣ ನಿಯಂತ್ರಣ ಹೊಂದಿರುತ್ತಾರೆ. ಅವರು ಪಾವತಿ ರಿಕ್ವೆಸ್ಟ್ ಗಳನ್ನು ಪರಿಶೀಲಿಸಬಹುದು. ಪೇಮೆಂಟ್ ಗಳನ್ನು ಟ್ರ್ಯಾಕ್ ಮಾಡಬಹುದು. ಸುರಕ್ಷಿತವಾಗಿ ಪಾವತಿ ಹಿಸ್ಟರಿಯನ್ನು ನೋಡಬಹುದು. ಅಗತ್ಯವಿದ್ದರೆ, ಮುಖ್ಯ ಬಳಕೆದಾರರು ಬೇರೆ ಬಳಕೆದಾರರನ್ನು ವಲಯದಿಂದ ತೆಗೆದುಹಾಕಬಹುದು.
ಫೋನ್ ಪೇ ಗ್ರೂಪ್ ಭಾರತದ ಫಿನ್ ಟೆಕ್ ಕಂಪನಿಯಾಗಿದೆ. ಮಾರ್ಚ್ 2025ರ ವೇಳೆಗೆ, ಇದು 60 ಕೋಟಿ ಬಳಕೆದಾರರನ್ನು ಹೊಂದಿದೆ. 4 ಕೋಟಿ ವ್ಯಾಪಾರಿಗಳ ಜಾಲವನ್ನು ಹೊಂದಿದೆ. ಕಂಪನಿಯು ಪ್ರತಿದಿನ 33 ಕೋಟಿ ವಹಿವಾಟುಗಳನ್ನು ನಡೆಸುತ್ತದೆ.
ನೀವೂ ಸರ್ಕಲ್ ರಚಿಸುವುದು ಹೇಗೆ?
- PhonePe ಆ್ಯಪ್ ತೆರೆಯಿರಿ. ಹೋಮ್ ಸ್ಕ್ರೀನ್ ನಲ್ಲಿUPI ಸರ್ಕಲ್ ಅನ್ನು ಸಕ್ರಿಯಗೊಳಿಸಲು ಆಯ್ಕೆ ಕಾಣಿಸುತ್ತದೆ.
- ಬೇರೆ ಬಳಕೆದಾರರನ್ನು ಸೇರಿಸಲು, ‘Invite Secondary Contact’ ಮೇಲೆ ಕ್ಲಿಕ್ ಮಾಡಿ. ಬಳಕೆದಾರರು QR ಕೋಡ್ ಅನ್ನು ಸ್ಕ್ಯಾನ್ ಮಾಡಬಹುದು ಅಥವಾ ಯುಪಿಐ ಐಡಿ ನಮೂದಿಸಬಹುದು.
- ಇದಾದ ನಂತರ ಬೇರೆ ಬಳಕೆದಾರರು ಆಹ್ವಾನವನ್ನು ಸ್ವೀಕರಿಸಬೇಕು. ಆಗ ಮಾತ್ರ ಅವರು UPI ಸರ್ಕಲ್ ಸೇರಲು ಸಾಧ್ಯವಾಗುತ್ತದೆ.
- ಒಮ್ಮೆ ಸೇರಿಸಿದ ನಂತರ, ಬೇರೆ ಬಳಕೆದಾರರು ಮುಖ್ಯ ಬಳಕೆದಾರರ ಖಾತೆಯನ್ನು ಪಾವತಿ ಆಯ್ಕೆಯಾಗಿ ಆಯ್ಕೆ ಮಾಡಬಹುದು. ಅವರ ಪರವಾಗಿ ಪೇಮೆಂಟ್ ಮಾಡಬಹುದು.
