ಪುನೀತ್ ರಾಜಕುಮಾರ್ (Puneeth Rajkumar) 50ನೇ ವರ್ಷದ ಹುಟ್ಟು ಹಬ್ಬದ ಹಿನ್ನೆಲೆಯಲ್ಲಿ ಕಂಠೀರವ ಸ್ಟುಡಿಯೋದಲ್ಲಿನ ಅಪ್ಪು ಸ್ಮಾರಕಕ್ಕೆ ಕುಟುಂಬಸ್ಥರೊಂದಿಗೆ ಶಿವಣ್ಣ(Shivarajkumar) ಭೇಟಿ ನೀಡಿ ಪೂಜೆ ಸಲ್ಲಿಸಿದ್ದಾರೆ.
ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ‘ಅಪ್ಪು’ ಸಿನಿಮಾ ನೋಡಲು ನನಗೆ ಧೈರ್ಯ ಇಲ್ಲ ಎಂದಿದ್ದಾರೆ. ಅವನಿಲ್ಲ ಅಂತ ನೆನಪು ಮಾಡಿಕೊಂಡ್ರೆ ದುಃಖ ಆಗುತ್ತಿದೆ. ಆದರೆ ಅಭಿಮಾನಿಗಳ ಮನಸ್ಸಿನಲ್ಲಿ ಅಪ್ಪು ಉಳಿದಿದ್ದಾನೆ. ಅವನ ಕೆಲಸಗಳಿಂದ, ವ್ಯಕ್ತಿತ್ವದಿಂದ ಇನ್ನೂ ಅಜರಾಮರ ಆಗಿದ್ದಾನೆ. ಅಪ್ಪು ಇಲ್ಲೇ ನಮ್ಮ ಜೊತೆ ಎಲ್ಲೋ ಇದ್ದಾನೆ ಅನಿಸುತ್ತಿದೆ ಎಂದು ಭಾವುಕವಾಗಿ ಹೇಳಿದ್ದಾರೆ.
‘ಅಪ್ಪು’ ರೀ-ರಿಲೀಸ್ ವೇಳೆ, ಯಾಕೆ ನೀವು ಅಪ್ಪು ಚಿತ್ರ ನೋಡಿಲ್ಲ ಅಂತ ಕೇಳಿದ್ದರು. ಅಪ್ಪು ಸಿನಿಮಾ ನೋಡಲು ನನಗೆ ಧೈರ್ಯ ಇಲ್ಲ. ಸಿನಿಮಾಗೆ ‘ಅಪ್ಪು’ ಅಂತ ಟೈಟಲ್ ಕೊಟ್ಟಿದ್ದೆ ನಾನು, ಈಗ ಆ ಹಳೆಯ ನೆನಪುಗಳೆಲ್ಲ ಕಾಡುತ್ತದೆ. ಪುರಿ ಜಗನ್ನಾಥ್ ಜೊತೆ ಸೇರಿ ಮಾಡಿದ ಸಿನಿಮಾವಿದು. ಈಗಲೂ ‘ಅಪ್ಪು’ ಸಿನಿಮಾನ ಜನ ಹೊಗಳುತ್ತಿದ್ದಾರೆ. 100% ಅಪ್ಪು ಇದ್ದಾನೆ. ಆತ ಎಲ್ಲೂ ಹೋಗಿಲ್ಲ ಎಂದಿದ್ದಾರೆ.
ಅಪ್ಪು ಬರ್ತ್ಡೇ ನೆನಪು ಅಂದರೆ ಸಾಕಷ್ಟಿದೆ. ಚಿಕ್ಕ ವಯಸ್ಸಿನಿಂದ ಸಾಕಷ್ಟು ಸೆಲೆಬ್ರೇಷನ್ ಮಾಡಿದ್ದೀವಿ. ಚಿಕ್ಕವಯಸ್ಸಿನಲ್ಲೇ ಅಪ್ಪು ಸ್ಟಾರ್ ಡಮ್ ತಗೊಂಡು ಬಂದವನು ಅವನು ಎಂದು ಹೆಮ್ಮೆಯಿಂದ ಹೇಳಿದ್ದಾರೆ.
