ಬೆಂಗಳೂರು: ಇಂಗ್ಲೆಂಡ್ ತಂಡದ ನಾಯಕ ಮೈಕಲ್ ಅಥರ್ಟನ್ ವಿರಾಟ್ ಕೊಹ್ಲಿಯನ್ನು ಶ್ರೇಷ್ಠ ಏಕದಿನ ಬ್ಯಾಟ್ಸ್ಮನ್ ಎಂದು ಪ್ರಶಂಸಿಸಿದ್ದಾರೆ. ಕೊಹ್ಲಿ ಏಕದಿನ ಪಂದ್ಯದಲ್ಲಿ ಚೇಸಿಂಗ್ನಲ್ಲಿ 28 ಶತಕಗಳನ್ನು ಬಾರಿಸಿದ್ದಾರೆ. ಈ ಮೂಲಕ ಸಚಿನ್ ತೆಂಡೂಲ್ಕರ್ (17) ಮತ್ತು ರೋಹಿತ್ ಶರ್ಮಾ (16)ಅವರಿಗಿಂತ ತುಂಬಾ ಮುಂದೆ ಇದ್ದಾರೆ. ಕೊಹ್ಲಿಯು ಐಸಿಸಿ ಚಾಂಪಿಯನ್ಸ್ ಟ್ರೋಫಿ 2025ರಲ್ಲಿ ಪಾಕಿಸ್ತಾನ ವಿರುದ್ಧ ತಮ್ಮ 51ನೇ ಏಕದಿನ ಶತಕ ಬಾರಿಸಿದ್ದಾರೆ. ಅಜೇಯವಾಗಿ ಉಳಿದಿದ್ದ ಅವರು ಭಾರತಕ್ಕೆ ಪಾಕ್ ವಿರುದ್ಧ ಆರು ವಿಕೆಟ್ ಗೆಲುವು ತಂದುಕೊಟ್ಟಿದ್ದರು.
ಕೊಹ್ಲಿ 14,000 ಏಕದಿನ ರನ್ಗಳನ್ನು ತುಂಬಾ ವೇಗವಾಗಿ ಮುಟ್ಟಿದ ಬ್ಯಾಟ್ಸ್ಮನ್ ಎಂಬ ದಾಖಲೆ ಮಾಡಿದ್ದಾರೆ. ಅವರು ಸಚಿನ್ ತೆಂಡೂಲ್ಕರ್ ಮತ್ತು ಕುಮಾರ್ ಸಂಗಕ್ಕಾರ ಅವರ ದಾಖಲೆಯನ್ನು ದೊಡ್ಡ ಅಂತರದಿಂದ ಮುರಿದಿದ್ದಾರೆ.
ಈ ಎಲ್ಲ ಕಾರಣಕ್ಕೆ ಅಥರ್ಟನ್. ಕೊಹ್ಲಿಯ ಏಕದಿನ ಕ್ರಿಕೆಟ್ನಲ್ಲಿ ಅಧಿಪತ್ಯವನ್ನು ಮೆಚ್ಚಿಕೊಂಡಿದ್ದಾರೆ. ಚೇಸಿಂಗ್ನಲ್ಲಿ ಕೊಹ್ಲಿಯು ಇತಿಹಾಸದಲ್ಲಿ ಅತ್ಯುತ್ತಮ ಆಟಗಾರ ಎಂದು ಹೇಳಿದ್ದಾರೆ. ಅಥರ್ಟನ್ ಅವರ ಪ್ರಕಾರ, ಕೊಹ್ಲಿಯ ಒತ್ತಡವನ್ನು ನಿರ್ವಹಿಸುವ ಸಾಮರ್ಥ್ಯವು ಅವರನ್ನು ಚೇಸಿಂಗ್ ಮಾಸ್ಟರ್ ಆಗಿ ಮಾಡಿದೆ. ಅವರು ಕೊಹ್ಲಿಯ ಏಕದಿನ ದಾಖಲೆಗಳು ಅವರನ್ನು ಕ್ರಿಕೆಟ್ನ ಮಹಾನ್ ಬ್ಯಾಟ್ಸ್ಮನ್ಗಳಲ್ಲಿ ಒಬ್ಬರಾಗಿಸಿದೆ ಎಂದು ಹೇಳಿದರು.
ಮೈಕಲ್ ಅಥರ್ಟನ್ Sky Sports Cricket Podcast ನಲ್ಲಿ ಮಾತನಾಡುತ್ತಾ,ವ ಕೊಹ್ಲಿಯ 51 ಶತಕಗಳು ಅಸಾಧಾರಣ ಸಾಧನೆ ಎಂದು ಹೇಳಿದರು. ತೆಂಡೂಲ್ಕರ್ಗಿಂತ 60 ಇನಿಂಗ್ಸ್ ಹಾಗೂ ಸಂಗಕ್ಕಾರನಿಗಿಂತ 90 ಇನಿಂಗ್ಸ್ ಬೇಗ 14,000 ಏಕದಿನ ರನ್ಗಳನ್ನು ಮುಟ್ಟಿ ದ್ದಾರೆ. ಅಥರ್ಟನ್ ಪ್ರಕಾರ, ಕೊಹ್ಲಿ ಎಲ್ಲಾ ಫಾರ್ಮ್ಯಾಟ್ಗಳಲ್ಲಿ ಶ್ರೇಷ್ಠ ಆಟಗಾರರಾಗಿದ್ದರೂ, ಏಕದಿನ ಕ್ರಿಕೆಟ್ ಅವರ ಅತ್ಯುತ್ತಮ ಫಾರ್ಮ್ಯಾಟ್ ಎಂದು ಹೇಳಿದ್ದಾರೆ.
ಮಾಜಿ ಇಂಗ್ಲೆಂಡ್ ನಾಯಕ ನಾಸರ್ ಹುಸೇನ್ ಕೂಡ ವಿರಾಟ್ ಕೊಹ್ಲಿಯನ್ನು ಶ್ಲಾಘಿಸಿದ್ದಾರೆ. ಅವರು ಕೊಹ್ಲಿಯನ್ನು ಸಚಿನ್ ತೆಂಡೂಲ್ಕರ್, ಎಬಿ ಡಿವಿಲಿಯರ್ಸ್, ಮತ್ತು ಕುಮಾರ್ ಸಂಗಕ್ಕಾರನಿಗಿಂತ ಉತ್ತಮ ಆಟಗಾರ ಎಂದಿದ್ದಾರೆ. ಕೊಹ್ಲಿ ಎಲ್ಲ ಸರ್ವಕಾಲದ ಅತ್ಯುತ್ತಮ ಏಕದಿನ ಬ್ಯಾಟ್ಸ್ಮನ್ ಎಂದು ಅವರು ಹೇಳಿದ್ದಾರೆ. ಹುಸೇನ್ ಪ್ರಕಾರ, ಕೊಹ್ಲಿಯ ರನ್ಗಳು ಅವರನ್ನು ಅಗ್ರ ಸ್ಥಾನಕ್ಕೆ ಕೊಂಡೊಯ್ದಿದೆ.
ಆಸ್ಟ್ರೇಲಿಯಾದ ಲೆಜೆಂಡ್ ರಿಕಿ ಪಾಂಟಿಂಗ್ ಸಹ ಕೊಹ್ಲಿಯನ್ನು ಪ್ರಶಂಸಿಸಿದ್ದಾರೆ. ಅವರು ಕೊಹ್ಲಿಯನ್ನು ತಾವು ನೋಡಿದ ಅತ್ಯುತ್ತಮ ಏಕದಿನ ಬ್ಯಾಟ್ಸ್ಮನ್ ಎಂದು ಕರೆದಿದ್ದಾರೆ. ಪಾಂಟಿಂಗ್ ಪ್ರಕಾರ, ಕೊಹ್ಲಿ ತಮ್ಮ ಫಿಟ್ನೆಸ್ ಮತ್ತು ರನ್ ಮಾಡಲು ಇರುವ ಛಲವನ್ನು ಮುಂದುವರಿಸಿದರೆ ಸಚಿನ್ ತೆಂಡೂಲ್ಕರ್ ಅವರ ಶತಕಗಳ ದಾಖಲೆ ಮುರಿಯಬಹುದು ಎಂದು ಹೇಳಿದರು.
ವಿರಾಟ್ ಕೊಹ್ಲಿ ಮಾರ್ಚ್ 2 ರಂದು ದುಬೈನಲ್ಲಿ ನ್ಯೂಜಿಲೆಂಡ್ ವಿರುದ್ಧ ತಮ್ಮ ಮುಂದಿನ ಪಂದ್ಯವನ್ನು ಆಡಲಿದ್ದಾರೆ. ಇದು ಐಸಿಸಿ ಚಾಂಪಿಯನ್ಸ್ ಟ್ರೋಫಿ 2025 ರಲ್ಲಿ ಭಾರತದ ಕೊನೆಯ ಗುಂಪು ಪಂದ್ಯ. ಭಾರತ ಮತ್ತು ನ್ಯೂಜಿಲೆಂಡ್ ಈಗಾಗಲೇ ಸೆಮಿಫೈನಲ್ಗೆ ಅರ್ಹತೆ ಪಡೆದಿದ್ದಾರೆ.
