ನವದೆಹಲಿ: ಖೋ ಖೋ ವಿಶ್ವಕಪ್ನ ಉದ್ಘಾಟನಾ ಆವೃತ್ತಿಗೆ ಅಭೂತಪೂರ್ವ ಚಾಲನೆ ದೊರಕಿದೆ. ಜನವರಿ 13ರರಂದು ನವದೆಹಲಿಯಲ್ಲಿ ಟೂರ್ನಿ ಆರಂಭಗೊಂಡಿದ್ದು ಮೊದಲ ಪಂದ್ಯದಲ್ಲಿ ಆತಿಥೇಯ ಭಾರತ ಪುರುಷರ ತಂಡವು ನೆರೆಯ ನೇಪಾಳ ತಂಡವನ್ನು 5 ಅಂಕಗಳಿಂದ ಮಣಿಸಿದೆ.
ಇದು ವಿಶ್ವದ ಎರಡು ಬಲಿಷ್ಠ ತಂಡಗಳ ನಡುವಿನ ರೋಚಕ ಹಣಾಹಣಿಯಾಗಿತ್ತು. ಅಂತಿಮವಾಗಿ ಭಾರತ 42-37 ಅಂಕಗಳ ಅಂತರದಿಂದ ಗೆದ್ದು ಬೀಗಿದೆ. ಆರಂಭದಿಂದಲೂ ಉಭಯ ತಂಡಗಳ ಯುವ ಆಟಗಾರರು ಪೈಪೋಟಿ ನಡೆಸಿದರು. ಮೊದಲ ಸುತ್ತಿನಿಂದಲೇ ಅಂತರ ಕಾಯ್ದುಕೊಂಡ ಭಾರತ, ಕೊನೆಗೂ ರೋಚಕವಾಗಿ ಗೆಲುವು ತನ್ನದಾಗಿಸಿಕೊಂಡಿತು.
ಟಾಸ್ ಗೆದ್ದ ಭಾರತ ತಂಡವು ಅಟ್ಯಾಕಿಂಗ್ ಆಯ್ಕೆ ಮಾಡಿಕೊಂಡಿತು. ಆರಂಭದಿಂಲೇ ನೇಪಾಳ(nepal) ತಂಡದ ಆಟಗಾರರನ್ನು ಬೇಗನೆ ಔಟ್ ಮಾಡುತ್ತಾ ಸಾಗಿತು. ಭಾರತ ಮೊದಲ ಸುತ್ತಿನಲ್ಲೇ 24 ಅಂಕಗಳನ್ನು ಕಲೆ ಹಾಕಿತು. ಪ್ರತಿಯಾಗಿ ನೇಪಾಳ ಕೂಡಾ ಬಿರುಸಿನ ಆಟವಾಡಿತು. ಅಮೋಘ ಸ್ಕೈ ಡೈವ್ ಮೂಲಕ ಅಂಕಗಳನ್ನು ಒಟ್ಟುಗೂಡಿಸಿದ ತಂಡವು 20 ಅಂಕಗಳನ್ನು ಕಲೆ ಹಾಕಿತು.
ಮೊದಲ ಬ್ಯಾಚ್ ಬಳಿಕ ಭಾರತವು 4 ಅಂಕಗಳ ಮುನ್ನಡೆಯೊಂದಿಗೆ ಎರಡನೇ ಬ್ಯಾಚ್ ಶುರು ಮಾಡಿತು. ಎರಡನೇ ಬ್ಯಾಚ್ನಲ್ಲಿ ದಾಳಿ ನಡೆಸಿದ ಭಾರತ 18 ಅಂಕಗಳನ್ನು ಕಲೆ ಹಾಕಿತು. ಅಂತಿಮ ಸುತ್ತಿನಲ್ಲಿ ನೇಪಾಳ 16 ಅಂಕಗಳನ್ನು ಗಳಿಸುವ ಮೂಲಕ ಕೂದಲೆಳೆ ಅಂತರದಲ್ಲಿ ಪಂದ್ಯ ಕಳೆದುಕೊಂಡಿತು.
ಉಪರಾಷ್ಟ್ರಪತಿ ಜಗದೀಪ್ ಧನಕರ್ ಉದ್ಘಾಟನೆ
ಇದು ಚೊಚ್ಚಲ ಖೋ ಖೋ ವಿಶ್ವಕಪ್ ಆಗಿದ್ದು, ವಿಶ್ವದ ಖೋ ಖೋ ಪವರ್ ಹೌಸ್ ಆಗಿರುವ ಭಾರತದ ಆತಿಥ್ಯದಲ್ಲೇ ನಡೆಯುತ್ತಿದೆ. ನವದೆಹಲಿಯ ಇಂದಿರಾ ಗಾಂಧಿ ಕ್ರೀಡಾಂಗಣದಲ್ಲಿ(Indira Gandhi Stadium) ಉಪರಾಷ್ಟ್ರಪತಿ ಜಗದೀಪ್ ಧನಕರ್ ಅವರು ಜ್ಯೋತಿ ಬೆಳಗಿಸುವ ಮೂಲಕ ಉದ್ಘಾಟನಾ ಸಮಾರಂಭಕ್ಕೆ ಅಧಿಕೃತ ಚಾಲನೆ ನೀಡಿದರು. ಈ ವೇಳೆ ಕ್ರೀಡಾ ಸಚಿವ ಮಾನ್ಸುಖ್ ಮಾಂಡವಿಯಾ ಮತ್ತು ಭಾರತೀಯ ಒಲಿಂಪಿಕ್ ಅಸೋಸಿಯೇಷನ್ (ಐಒಎ) ಅಧ್ಯಕ್ಷೆ ಪಿಟಿ ಉಷಾ ಸೇರಿದಂತೆ ಸಾವಿರಾರು ಅಭಿಮಾನಿಗಳು ಕ್ರೀಡಾಂಗಣದಲ್ಲಿ ನೆರೆದಿದ್ದರು.
ಪಂದ್ಯಾವಳಿಯ ಅಧಿಕೃತ ಉದ್ಘಾಟನೆಗೆ ಮುಂಚಿತವಾಗಿ ವರ್ಣರಂಜಿತ ಸಾಂಸ್ಕೃತಿಕ ಪ್ರದರ್ಶನ ನಡೆಯಿತು. ಖೋ ಖೋ ಫೆಡರೇಶನ್ ಆಫ್ ಇಂಡಿಯಾ (ಕೆಕೆಎಫ್ಐ) ಪುರುಷರ ಮತ್ತು ಮಹಿಳಾ ಪಂದ್ಯಾವಳಿಯ ವಿಶ್ವಕಪ್ ಟ್ರೋಫಿಯನ್ನು ಅನಾವರಣಗೊಳಿಸಲಾಯ್ತು.
23 ದೇಶಗಳು ಭಾಗಿ
ವಿಶ್ವಕಪ್ನಲ್ಲಿ ಪುರುಷರ ಮತ್ತು ಮಹಿಳೆಯರ ಎರಡೂ ಪ್ರತ್ಯೇಕ ವಿಭಾಗಗಳ ಸ್ಪರ್ಧೆ ನಡೆಯಲಿದ್ದು, ಒಟ್ಟು 23 ದೇಶಗಳ ಆಟಗಾರರು ಭಾಗವಹಿಸುತ್ತಿದ್ದಾರೆ. ಜನವರಿ 13ರಿಂದ 19ರವರೆಗೆ ನಡೆಯಲಿರುವ ಪಂದ್ಯಾವಳಿಯಲ್ಲಿ ಪುರುಷರ ಮತ್ತು ಮಹಿಳೆಯರ ವಿಭಾಗಗಳಲ್ಲಿ ಒಟ್ಟಾರೆ 39 ತಂಡಗಳು ಭಾಗವಹಿಸಲಿವೆ. ಪುರುಷರ ಸ್ಪರ್ಧೆಯಲ್ಲಿ ಭಾಗವಹಿಸುವ 20 ತಂಡಗಳನ್ನು ನಾಲ್ಕು ಗುಂಪುಗಳಾಗಿ ವಿಂಗಡಿಸಲಾಗಿದೆ. ಮಹಿಳೆಯರ ವಿಭಾಗದಲ್ಲಿ ಭಾಗವಹಿಸುವ 19 ತಂಡಗಳನ್ನೂ 4 ಗುಂಪುಗಳಾಗಿ ಮಾಡಲಾಗಿದೆ. ಗುಂಪು ಹಂತವು ಜನವರಿ 16ರಂದು ಕೊನೆಗೊಳ್ಳಲಿದೆ. ಪ್ಲೇಆಫ್ ಪಂದ್ಯಗಳು ಜನವರಿ 17ರಂದು ಆರಂಭವಾಗುತ್ತವೆ. ಪುರುಷರ ಮತ್ತು ಮಹಿಳಾ ವಿಭಾಗದ ಫೈನಲ್ ಪಂದ್ಯ ಜನವರಿ 19ರಂದು ನಡೆಯಲಿದೆ.
