1,000 ಅಡಿ ಎತ್ತರದ ‘ಮೆಗಾ-ಸುನಾಮಿ’ ಅಮೆರಿಕದ ಪಶ್ಚಿಮ ಕರಾವಳಿಯನ್ನು ನಿರ್ನಾಮ ಮಾಡಲಿದೆಯೇ?

ವಾಷಿಂಗ್ಟನ್: ಅಮೆರಿಕದ ಪಶ್ಚಿಮ ಕರಾವಳಿ, ಅಲಾಸ್ಕಾ ಮತ್ತು ಹವಾಯಿಗೆ ಬರೋಬ್ಬರಿ 1,000 ಅಡಿ ಎತ್ತರದ ‘ಮೆಗಾ-ಸುನಾಮಿ’ ಅಪ್ಪಳಿಸುವ ಆತಂಕವಿದೆ ಎಂದು ವಿಜ್ಞಾನಿಗಳು ಎಚ್ಚರಿಕೆ ನೀಡಿದ್ದಾರೆ. ವರ್ಜೀನಿಯಾ ಟೆಕ್ ಭೂವಿಜ್ಞಾನಿಗಳ ಇತ್ತೀಚಿನ ಅಧ್ಯಯನವು, ಮುಂದಿನ 50 ವರ್ಷಗಳಲ್ಲಿ ಕ್ಯಾಸ್ಕೇಡಿಯಾ ಸಬ್‌ಡಕ್ಷನ್ ಝೋನ್‌ನಲ್ಲಿ 8.0 ತೀವ್ರತೆಯ ಭೂಕಂಪ ಸಂಭವಿಸುವ ಸಾಧ್ಯತೆ ಶೇ,15ರಷ್ಚಿದೆ ಎಂದು ಅಂದಾಜಿಸಿದೆ. ಈ ಭೂಕಂಪವು ಸೀಟಲ್ ಮತ್ತು ಪೋರ್ಟ್‌ಲ್ಯಾಂಡ್‌ನಂತಹ ನಗರಗಳನ್ನು ಸಂಪೂರ್ಣವಾಗಿ ನಾಶಪಡಿಸಬಹುದು ಮತ್ತು ಕರಾವಳಿ ಪ್ರದೇಶಗಳನ್ನು 6.5 ಅಡಿಗಳಷ್ಟು ಕುಸಿಯುವಂತೆ ಮಾಡಬಹುದು ಎಂದು ‘ಪ್ರೊಸೀಡಿಂಗ್ಸ್ ಆಫ್ ದಿ ನ್ಯಾಷನಲ್ ಅಕಾಡೆಮಿ ಆಫ್ ಸೈನ್ಸಸ್’ನಲ್ಲಿ ಪ್ರಕಟವಾದ ಅಧ್ಯಯನ ತಿಳಿಸಿದೆ.

ಕ್ಯಾಸ್ಕೇಡಿಯಾ ಸಬ್‌ಡಕ್ಷನ್ ಝೋನ್ ಎಂದರೇನು?
ಕ್ಯಾಸ್ಕೇಡಿಯಾ ಸಬ್‌ಡಕ್ಷನ್ ಝೋನ್ ಎಂಬುದು ಉತ್ತರ ಕೆನಡಾದ ವ್ಯಾಂಕೋವರ್ ದ್ವೀಪದಿಂದ ಕ್ಯಾಲಿಫೋರ್ನಿಯಾದ ಕೇಪ್ ಮೆಂಡೊಸಿನೊವರೆಗಿನ 600 ಮೈಲಿ ಉದ್ದದ ಭೂಕಂಪನ ಫಾಲ್ಟ್ ಲೈನ್ ಆಗಿದೆ. ಈ ಪ್ರದೇಶವು ಎರಡು ಟೆಕ್ಟಾನಿಕ್ ಪ್ಲೇಟ್‌ಗಳು(ಭೂ ಫಲಕಗಳು) ಒಂದಕ್ಕೊಂದು ಡಿಕ್ಕಿಹೊಡೆಯುವ ಸ್ಥಳವಾಗಿದ್ದು, ಇದರಿಂದ ಭಾರೀ ಭೂಕಂಪಗಳು ಮತ್ತು ಸುನಾಮಿಗಳು ಸಂಭವಿಸಬಹುದು. ಕೊನೆಯದಾಗಿ 1700ನೇ ಇಸವಿಯಲ್ಲಿ ಈ ಪ್ರದೇಶದಲ್ಲಿ 9.0 ತೀವ್ರತೆಯ ಭೂಕಂಪ ಸಂಭವಿಸಿತ್ತು, ಇದು 100 ಅಡಿ ಎತ್ತರದ ಸುನಾಮಿಯನ್ನು ಉಂಟುಮಾಡಿತ್ತು.

ಮೆಗಾ-ಸುನಾಮಿಯ ಭೀತಿ
ಸಾಮಾನ್ಯ ಸುನಾಮಿಗಳು ಕೆಲವೇ ಅಡಿ ಎತ್ತರದ ಅಲೆಗಳನ್ನು ಉಂಟುಮಾಡಿದರೆ, ಮೆಗಾ-ಸುನಾಮಿಗಳು ನೂರಾರು ಅಡಿ ಎತ್ತರದ ಅಲೆಗಳನ್ನು ಉಂಟುಮಾಡುತ್ತವೆ. ಇವು ಭೂಕಂಪ, ಭೂಕುಸಿತ, ಜ್ವಾಲಾಮುಖಿ ಸ್ಫೋಟ ಅಥವಾ ಉಲ್ಕಾಪಾತದಂತಹ ದೊಡ್ಡ ಪ್ರಮಾಣದ ಸಮುದ್ರ ಆಧಾರಿತ ಚಲನೆಗಳಿಂದ ಉಂಟಾಗುತ್ತವೆ. ಕ್ಯಾಸ್ಕೇಡಿಯಾ ಭೂಕಂಪವು ಕರಾವಳಿಯನ್ನು ಕುಸಿಯುವಂತೆ ಮಾಡಿದರೆ, 1,000 ಅಡಿ ಎತ್ತರದ ಅಲೆಗಳು ದೂರದ ಅಲಾಸ್ಕಾ ಮತ್ತು ಹವಾಯಿಯವರೆಗೂ ತಲುಪಬಹುದು, ಇದರಿಂದ ಲಕ್ಷಾಂತರ ಜನರ ಜೀವಕ್ಕೆ ಅಪಾಯ ಒಡ್ಡಬಹುದು.

ಅಪಾಯದ ಪ್ರದೇಶಗಳು
ಅಧ್ಯಯನದ ಪ್ರಕಾರ, ದಕ್ಷಿಣ ವಾಷಿಂಗ್ಟನ್, ಉತ್ತರ ಒರೆಗಾನ್ ಮತ್ತು ಉತ್ತರ ಕ್ಯಾಲಿಫೋರ್ನಿಯಾದ ಕರಾವಳಿ ಪ್ರದೇಶಗಳು ಅತ್ಯಂತ ತೀವ್ರವಾದ ಪರಿಣಾಮಕ್ಕೆ ಒಳಗಾಗಬಹುದು. ಅಲಾಸ್ಕಾ ಮತ್ತು ಹವಾಯಿಯೂ ಸಹ ತಮ್ಮ ಭೂಕಂಪನ ಮತ್ತು ಜ್ವಾಲಾಮುಖಿ ಚಟುವಟಿಕೆಯಿಂದಾಗಿ ಈ ಅಪಾಯಕ್ಕೆ ಒಳಪಡಲಿವೆ. ಹವಾಯಿಯಲ್ಲಿ ಸುಮಾರು 1,05,000 ವರ್ಷಗಳ ಹಿಂದೆ ಜ್ವಾಲಾಮುಖಿ ಕುಸಿತದಿಂದ 1,000 ಅಡಿ ಎತ್ತರದ ಸುನಾಮಿ ಲಾನೈ ದ್ವೀಪವನ್ನು ತಾಕಿತ್ತು. ಅಲಾಸ್ಕಾದಲ್ಲಿ ಕರಗುತ್ತಿರುವ ಹಿಮನದಿಗಳಿಂದ ಭೂಕುಸಿತದ ಸಾಧ್ಯತೆ ಹೆಚ್ಚಾಗಿದೆ, ಇದು ಸುನಾಮಿಯನ್ನು ಉಂಟುಮಾಡಬಹುದು.

ಪರಿಣಾಮ ಮತ್ತು ಸಿದ್ಧತೆ
ಈ ಭೂಕಂಪವು ಸಂಭವಿಸಿದರೆ, ಫೆಡರಲ್ ಎಮರ್ಜೆನ್ಸಿ ಮ್ಯಾನೇಜ್‌ಮೆಂಟ್ ಏಜೆನ್ಸಿ (FEMA) ಪ್ರಕಾರ, 13,000ಕ್ಕೂ ಹೆಚ್ಚು ಜನರು ಸಾಯಬಹುದು. 10 ಲಕ್ಷಕ್ಕೂ ಹೆಚ್ಚು ಜನರು ಸ್ಥಳಾಂತರಗೊಳ್ಳಬಹುದು. ಸುನಾಮಿಯ ಅಲೆಗಳು ಕೆಲವೇ ನಿಮಿಷಗಳಲ್ಲಿ ಕರಾವಳಿಯನ್ನು ತಲುಪಬಹುದು, ಇದರಿಂದ ಸ್ಥಳಾಂತರಕ್ಕೆ ಕೇವಲ 10 ನಿಮಿಷಗಳಷ್ಟೇ ಸಮಯ ಇರಬಹುದು. ಕರಾವಳಿ ಪ್ರದೇಶಗಳಲ್ಲಿ ಶಾಲೆಗಳು, ಆಸ್ಪತ್ರೆಗಳು ಮತ್ತು ಸಾರಿಗೆ ಜಾಲವನ್ನು ಎಲ್ಲಿ ನಿರ್ಮಿಸಬೇಕು ಎಂಬುದನ್ನು ಯೋಜಿಸುವುದು ಈಗ ಮಹತ್ವದ್ದಾಗಿದೆ.

ವಿಜ್ಞಾನಿಗಳ ಎಚ್ಚರಿಕೆ
ಅಧ್ಯಯನದ ಮುಖ್ಯ ಲೇಖಕಿ ಟೀನಾ ದುರಾ, “ಕ್ಯಾಸ್ಕೇಡಿಯಾ ಭೂಕಂಪದ ನಂತರ ಕರಾವಳಿ ಪ್ರದೇಶದ ವಿಸ್ತಾರವು ಗಮನಾರ್ಹವಾಗಿ ಬದಲಾಗಬಹುದು, ಇದು ಚೇತರಿಕೆಯ ಸಮಯವನ್ನು ಗಣನೀಯವಾಗಿ ಹೆಚ್ಚಿಸಬಹುದು,” ಎಂದು ಹೇಳಿದ್ದಾರೆ. ಈ ಭೂಕಂಪದಿಂದ ಉಂಟಾಗುವ ಶಾಶ್ವತ ಭೂಮಟ್ಟದ ಬದಲಾವಣೆಯು ದಶಕಗಳಿಂದ ಶತಮಾನಗಳವರೆಗೆ ಪರಿಣಾಮ ಬೀರಬಹುದು. ಆದ್ದರಿಂದ, ತುರ್ತು ಯೋಜನೆಗಳು ಮತ್ತು ಸಾರ್ವಜನಿಕ ಜಾಗೃತಿಯ ಅಗತ್ಯವಿದೆ ಎಂದು ವಿಜ್ಞಾನಿಗಳು ಒತ್ತಾಯಿಸುತ್ತಾರೆ.