ಬೆಂಗಳೂರು: ಆರ್ಸಿಬಿ (RCB) ಹಾಗೂ ಗುಜರಾತ್ ಟೈಟನ್ಸ್ (GT) ಮಧ್ಯೆ ನಡೆದ ರೋಚಕ ಪಂದ್ಯದಲ್ಲಿ ಬೆಂಗಳೂರು ತಂಡ 4 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿದೆ.
ಟಾಸ್ ಗೆದ್ದ ಆರ್ಸಿಬಿ ಬೌಲಿಂಗ್ ಆಯ್ದುಕೊಂಡಿದ್ದ ಬೆಂಗಳೂರು ಗುಜರಾತ್ ತಂಡವನ್ನು 19.3 ಓವರ್ ಗಳಿಗೆ 147 ರನ್ ಗಳಿಸುವಷ್ಟರಲ್ಲಿ ಸರ್ವಪತನವಾಗುವಂತೆ ಮಾಡಿತು. ಈ ಮೂಲಕ 148 ರನ್ಗಳ ಗುರಿ ಬೆನ್ನತ್ತಿದ ಆರ್ಸಿಬಿ ತಂಡ ಭರ್ಜರಿ ಆರಂಭ ಪಡೆಯಿತು. ಆದರೆ, ನಂತರ ನಾಟಕೀಯ ಕುಸಿತ ಕಂಡಿತು. ಆರಂಭದಿಂದಲೇ ಸಿಕ್ಸ್, ಫೋರ್ ಸಿಡಿಸಿದ ಡೂ ಪ್ಲೆಸಿಸ್ ಹಾಗೂ ಕೊಹ್ಲಿ ಜೊತೆಯಾಟವನ್ನು ಕಂಡು ಅಭಿಮಾನಿಗಳು ಹುಚ್ಚೆದ್ದು ಕುಣಿದರು. 18 ಎಸೆತಗಳಿಗೆ ಅರ್ಧ ಶತಕ ಸಿಡಿಸಿದ ಡು ಪ್ಲೆಸಿಸ್ 23 ಎಸೆತಗಳಿಗೆ 64 ರನ್ ಸಿಡಿಸಿದರು.
ಕೊಹ್ಲಿ ಹಾಗೂ ಡು ಪ್ಲೆಸಿಸ್ ಜೊತೆಯಾಟವಾಡಿ 92 ರನ್ ಗಳಿಸಿದರು. ಮೊದಲ ವಿಕೆಟ್ ಹೋಗುತ್ತಿದ್ದಂತೆ ಅಂಗಳಕ್ಕೆ ಬಂದ ವಿಲ್ ಜಾಕ್ಸ್ 1 ರನ್ ಗಳಿಸಿದರು. ಗ್ಲೆನ್ ಮ್ಯಾಕ್ಸ್ವೆಲ್ ಕೇವಲ 3 ಎಸೆತಗಳಿಗೆ 4 ರನ್ ಗಳಿಸಿ ಔಟಾದರು. ರಜತ್ ಪಾಟಿದಾರ್ ಬಳಿಕ ಕ್ರೀಸ್ಗೆ ಬಂದ ಕ್ಯಾಮರೂನ್ ಗ್ರೀನ್ 2 ಬಾಲ್ಗೆ 1 ರನ್ ಗಳಿಸಿದರು. ನಂತರ 27 ಎಸೆತಗಳಿಗೆ 42 ರನ್ ಸಿಡಿಸಿ ವಿರಾಟ್ ಕೊಹ್ಲಿ ಪೆವಿಲಿಯನ್ಗೆ ಮರಳಿದರು. ಕೊಹ್ಲಿ ಬಳಿಕ ದಿನೇಶ್ ಕಾರ್ತಿಕ್ ಹಾಗೂ ಸ್ವಪ್ನಿಲ್ ಔಟಾಗದೇ ಆಟ ಮುಂದುವರಿಸಿ ತಂಡವನ್ನು ದಡ ಸೇರಿಸಿದರು.
ಗುಜರಾತ್ ಪರ ವೃದ್ದಿಮಾನ್ ಸಾಹಾ 7 ಎಸೆತಗಳಿಗೆ ಕೇವಲ 1 ರನ್ ಗಳಿಸಿ ಔಟಾದರೆ, ಶುಭಮನ್ ಗಿಲ್ 2 ರನ್ ಗಳಿಗೆ ಔಟ್ ಆದರು. ಸಾಯಿ ಸುದರ್ಶನ್ 14 ಎಸೆತಗಳಿಗೆ 6 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಡೇವಿಡ್ ಮಿಲ್ಲರ್ 20 ಬಾಲ್ಗಳಿಗೆ 30 ರನ್ ಗಳಿಸಿದರು. ಶಾರುಖ್ ಖಾನ್ 37 ರನ್, ರಶೀದ್ ಖಾನ್ 18 ಗಳಿಸಿದರು. ಸೀರಾಜ್ ಗುಜರಾತ್ ನ ಆರಂಭದ ದಿಕ್ಕು ತಪ್ಪಿಸಿದ್ದಕ್ಕೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.
