ನವದೆಹಲಿ: ಭಾರತ ಮತ್ತು ಪಾಕಿಸ್ತಾನದ ನಡುವಿನ ಗಡಿ ಘರ್ಷಣೆ ವೇಳೆ ಪಾಕಿಸ್ತಾನವು ಟರ್ಕಿ ನಿರ್ಮಿತ ಅಸಿಸ್‌ಗಾರ್ಡ್ ಸೋನ್ಗರ್ (Asisguard Songar) ಡ್ರೋನ್‌ಗಳನ್ನು ಬಳಸಿದೆ ಎಂದು ಭಾರತದ ವಿದೇಶಾಂಗ ಕಾರ್ಯದರ್ಶಿ ವಿಕ್ರಂ ಮಿಸ್ರಿ ಅವರು ಆರೋಪಿಸಿದ್ದಾರೆ. ಲಡಾಖ್‌ನ ಲೇಹ್‌ನಿಂದ ಗುಜರಾತ್‌ನ ಸರ್ ಕ್ರೀಕ್‌ವರೆಗೆ ಹರಡಿರುವ ಉತ್ತರ ಮತ್ತು ಪಶ್ಚಿಮ ಗಡಿಯುದ್ದಕ್ಕೂ 36 ಸ್ಥಳಗಳಲ್ಲಿ ಪಾಕ್ ಈ ಡ್ರೋನ್‌ಗಳನ್ನು ದಾಳಿಗೆ ಬಳಸಿದೆ ಎಂದು ಅವರು ಶುಕ್ರವಾರದ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ. ಹಾಗಿದ್ದರೆ ಈ ಸೋನ್ಗರ್ ಡ್ರೋನ್ ಸಾಮರ್ಥ್ಯವೇನು, ಭಾರತ-ಪಾಕಿಸ್ತಾನ ಸಂಘರ್ಷದಲ್ಲಿ ಅವುಗಳ ಸಂಭಾವ್ಯ ಪರಿಣಾಮಗಳು ಏನು, ಅವುಗಳನ್ನು ಭಾರತ ಹೊಡೆದುರುಳಿಸಿದ್ದು ಹೇಗೆ ಎಂಬ ಮಾಹಿತಿ ಇಲ್ಲಿದೆ.
ಅಸಿಸ್‌ಗಾರ್ಡ್ ಸೋನ್ಗರ್ ಡ್ರೋನ್?
ಸೋನ್ಗರ್ ಡ್ರೋನ್ ಟರ್ಕಿಯ ರಕ್ಷಣಾ ಉತ್ಪಾದಕ ಸಂಸ್ಥೆ ಅಸಿಸ್‌ಗಾರ್ಡ್‌ನಿಂದ ಅಭಿವೃದ್ಧಿಪಡಿಸಲಾದ ಒಂದು ಮಾನವರಹಿತ ವೈಮಾನಿಕ ವ್ಯವಸ್ಥೆ (UAS) ಆಗಿದೆ. ಏಪ್ರಿಲ್ 2019ರಲ್ಲಿ ಅನಾವರಣಗೊಂಡ ಇದು, ಫೆಬ್ರವರಿ 2020ರಲ್ಲಿ ಟರ್ಕಿ ಸಶಸ್ತ್ರ ಪಡೆಗಳ (TAF) ದಾಸ್ತಾನಿಗೆ ಸೇರ್ಪಡೆಗೊಂಡಿತು. ಕಡಿಮೆ-ತೀವ್ರತೆಯ ಸಂಘರ್ಷ ಸನ್ನಿವೇಶಗಳಿಗೆ ಪೂರಕವಾಗಿ ಇದನ್ನು ವಿನ್ಯಾಸಗೊಳಿಸಲಾಗಿದೆ. ಗುಪ್ತಚರ ಕಣ್ಗಾವಲು, ಗುರಿ ಗುರುತಿಸುವಿಕೆ ಮತ್ತು ದಾಳಿ ಕಾರ್ಯಾಚರಣೆಗಳಿಗೆ ಸೂಕ್ತವಾಗಿದೆ.
ತಾಂತ್ರಿಕ ವೈಶಿಷ್ಟ್ಯಗಳು
ಸೋನ್ಗರ್ ಡ್ರೋನ್ ಅನ್ನು ಆಧುನಿಕ ಯುದ್ಧಭೂಮಿಯಲ್ಲಿ ಪರಿಣಾಮಕಾರಿಯಾಗಿ ಬಳಸಲು ಸಾಧ್ಯವಾಗುವಂತೆ ವಿನ್ಯಾಸಗೊಳಿಸಲಾಗಿದೆ. ಇದರ ಕೆಲವು ಪ್ರಮುಖ ತಾಂತ್ರಿಕ ವಿವರಗಳು ಹೀಗಿವೆ…
ಆಯಾಮಗಳು ಮತ್ತು ತೂಕ: ರೋಟರ್‌ನಿಂದ ರೋಟರ್‌ಗೆ ಸುಮಾರು 145 ಸೆಂ.ಮೀ ಅಗಲ ಮತ್ತು 70 ಸೆಂ.ಮೀ ಎತ್ತರವನ್ನು ಹೊಂದಿದೆ. ಇದರ ಗರಿಷ್ಠ ಟೇಕ್‌ಆಫ್ ತೂಕ 45 ಕೆ.ಜಿ.
ಕಾರ್ಯಾಚರಣಾ ವ್ಯಾಪ್ತಿ ಮತ್ತು ಎತ್ತರ: ಮಾದರಿಯನ್ನು ಅವಲಂಬಿಸಿ 5-10 ಕಿ.ಮೀ ವರೆಗೆ ಕಾರ್ಯಾಚರಣೆ ನಡೆಸಬಲ್ಲದು. ಸಮುದ್ರ ಮಟ್ಟದಿಂದ 3,000 ಮೀಟರ್‌ಗಳವರೆಗೆ ಮತ್ತು ನೆಲದಿಂದ 300 ಮೀಟರ್‌ಗಳವರೆಗೆ ಹಾರಾಟ ನಡೆಸುವ ಸಾಮರ್ಥ್ಯ ಹೊಂದಿದೆ.
ಹಾರಾಟದ ಅವಧಿ: ಯಾವುದೇ ಪೇಲೋಡ್ ಇಲ್ಲದೆ ಸುಮಾರು 35 ನಿಮಿಷಗಳವರೆಗೆ ಹಾರಾಟ ನಡೆಸಬಹುದು (ಕೆಲವು ವರದಿಗಳು 25-27 ನಿಮಿಷ ಎಂದು ಹೇಳುತ್ತವೆ).
ಶಸ್ತ್ರಾಸ್ತ್ರ ಆಯ್ಕೆಗಳು: 5.56 ಎಂಎಂ ನ್ಯಾಟೋ ಗುಣಮಟ್ಟದ ಅಸಾಲ್ಟ್ ರೈಫಲ್ ಅನ್ನು ಸ್ವಯಂಚಾಲಿತ ಶೂಟಿಂಗ್ ಸ್ಟೆಬಿಲೈಸೇಶನ್‌ನೊಂದಿಗೆ ಅಳವಡಿಸಬಹುದಾಗಿದೆ. ಗ್ರನೇಡ್ ಲಾಂಚರ್‌ಗಳು ಮತ್ತು ಮಾರ್ಗದರ್ಶಿ ಮಿನಿ-ಕ್ಷಿಪಣಿಗಳನ್ನು ಸಹ ಸಾಗಿಸುವ ಸಾಮರ್ಥ್ಯ ಹೊಂದಿದೆ.
ಗುರಿ ಛಿದ್ರಗೊಳಿಸುವಿಕೆ: ಸ್ವಯಂಚಾಲಿತ ಗುರಿ ಪತ್ತೆ ಮತ್ತು ಟ್ರ್ಯಾಕಿಂಗ್ ವ್ಯವಸ್ಥೆಯನ್ನು ಹೊಂದಿದ್ದು, ರಿಯಲ್-ಟೈಮ್ ವೀಡಿಯೊ ಫೀಡ್ ಅನ್ನು ಕಮಾಂಡ್ ಸೆಂಟರ್‌ಗೆ ರವಾನಿಸುತ್ತದೆ. ಇದು ಗುರಿಗಳ ಮೇಲೆ ನಿಖರವಾದ ಫೈರಿಂಗ್ ಅನ್ನು ಶಕ್ತಗೊಳಿಸುತ್ತದೆ.
ಇತರ ವೈಶಿಷ್ಟ್ಯಗಳು: ಹಗಲು ಮತ್ತು ರಾತ್ರಿಯ ಕಾರ್ಯಾಚರಣೆಗಳಿಗಾಗಿ ಇನ್‌ಫ್ರಾರೆಡ್ ಮತ್ತು ಆಪ್ಟಿಕಲ್ ಕ್ಯಾಮೆರಾಗಳನ್ನು ಹೊಂದಿದೆ. ಸ್ವಯಂಚಾಲಿತ ಟೇಕ್‌ಆಫ್ ಮತ್ತು ಲ್ಯಾಂಡಿಂಗ್, ಸಂಪರ್ಕ ಕಡಿತಗೊಂಡಾಗ ಅಥವಾ ಬ್ಯಾಟರಿ ಕಡಿಮೆಯಾದಾಗ ‘ರಿಟರ್ನ್-ಟು-ಹೋಮ್’ ಕಾರ್ಯಚಟುವಟಿಕೆಗಳನ್ನು ಒಳಗೊಂಡಿದೆ. 4×4 ಮಿಲಿಟರಿ ವಾಹನಗಳೊಂದಿಗೆ ಸಂಯೋಜನೆಗೊಂಡು ಗುರಿಗಳನ್ನು ಗುರುತಿಸಲು ಮತ್ತು ತೊಡಗಿಸಿಕೊಳ್ಳಲು ಸಹಾಯ ಮಾಡುತ್ತದೆ.
ಕಾರ್ಯಾಚರಣಾ ಸಾಮರ್ಥ್ಯಗಳು: ಗುಪ್ತಚರ ಸಂಗ್ರಹಣೆ, ಬೆದರಿಕೆಗಳನ್ನು ನಿಷ್ಕ್ರಿಯಗೊಳಿಸುವುದು, ದಾಳಿಯ ನಂತರದ ಹಾನಿ ಮೌಲ್ಯಮಾಪನ ಮತ್ತು ಏಕ ಅಥವಾ ಬಹು ಡ್ರೋನ್‌ಗಳೊಂದಿಗೆ ಸಂಯೋಜಿತ ದಾಳಿಗಳನ್ನು ನಡೆಸುವ ಸಾಮರ್ಥ್ಯ ಹೊಂದಿದೆ.
ಭಾರತ-ಪಾಕಿಸ್ತಾನ ಘರ್ಷಣೆಯಲ್ಲಿ ಸೋನ್ಗರ್ ಡ್ರೋನ್‌ಗಳ ಬಳಕೆ
ಮೇ 8-9ರ ರಾತ್ರಿ, ಪಾಕಿಸ್ತಾನ ಸೇನೆಯು ಸುಮಾರು 300-400 ಸೋನ್ಗರ್ ಡ್ರೋನ್‌ಗಳನ್ನು ಭಾರತದ ಗಡಿಯುದ್ದಕ್ಕೂ ದಾಳಿಗೆ ಕಳುಹಿಸಿತ್ತು ಎಂದು ಭಾರತದ ವಿದೇಶಾಂಗ ಸಚಿವಾಲಯದ ವಕ್ತಾರರು ತಿಳಿಸಿದ್ದಾರೆ. ಈ ದಾಳಿಗಳು ಜಮ್ಮು, ಪಂಜಾಬ್, ರಾಜಸ್ಥಾನ, ಮತ್ತು ಗುಜರಾತ್ ರಾಜ್ಯಗಳಲ್ಲಿನ 36 ಸ್ಥಳಗಳನ್ನು ಗುರಿಯಾಗಿಸಿಕೊಂಡಿದ್ದವು. ಪ್ರಮುಖವಾಗಿ ಸೈನಿಕ ನೆಲೆಗಳು, ವಿಮಾನ ನಿಲ್ದಾಣಗಳು ಮತ್ತು ವಾಯು ರಕ್ಷಣಾ ವ್ಯವಸ್ಥೆಗಳನ್ನು ಗುರಿಯಾಗಿಸಲಾಗಿತ್ತು. ಈ ದೊಡ್ಡ ಪ್ರಮಾಣದ ವೈಮಾನಿಕ ಅತಿಕ್ರಮಣಗಳ ಹಿಂದಿನ ಉದ್ದೇಶವು ಭಾರತದ ವಾಯು ರಕ್ಷಣಾ ವ್ಯವಸ್ಥೆಗಳನ್ನು ಪರೀಕ್ಷಿಸುವುದು ಮತ್ತು ಗುಪ್ತಚರ ಮಾಹಿತಿಯನ್ನು ಸಂಗ್ರಹಿಸುವುದಾಗಿತ್ತು ಎಂದೂ ಭಾರತ ತಿಳಿಸಿದೆ.
ಟರ್ಕಿ ಸೋನ್ಗರ್ ಗಾಳಿಯಲ್ಲೇ ಉಡೀಸ್
ಭಾರತೀಯ ಸಶಸ್ತ್ರ ಪಡೆಗಳು ಕೈನೆಟಿಕ್ (ಭೌತಿಕ) ಮತ್ತು ನಾನ್-ಕೈನೆಟಿಕ್ (ಎಲೆಕ್ಟ್ರಾನಿಕ್) ವಿಧಾನಗಳನ್ನು ಬಳಸಿಕೊಂಡು ಈ ಎಲ್ಲಾ ಡ್ರೋನ್‌ಗಳನ್ನು ಯಶಸ್ವಿಯಾಗಿ ನಿಷ್ಕ್ರಿಯಗೊಳಿಸಿವೆ. ಜಮ್ಮು, ಉಧಮ್‌ಪುರ, ಪಠಾಣ್‌ಕೋಟ್ ಮತ್ತು ಫಿರೋಜ್‌ಪುರದಂತಹ ಪ್ರದೇಶಗಳಲ್ಲಿ ಡ್ರೋನ್‌ಗಳನ್ನು ಗುಂಡಿಕ್ಕಿ ಕೆಡವಲಾಗಿದೆ. ಫಿರೋಜ್‌ಪುರದಲ್ಲಿ ಒಂದು ಡ್ರೋನ್‌ನ ಅವಶೇಷಗಳು ನಾಗರಿಕ ಪ್ರದೇಶದ ಮೇಲೆ ಬಿದ್ದು ಮೂವರು ನಾಗರಿಕರು ಗಾಯಗೊಂಡಿದ್ದಾರೆ. ಶ್ರೀನಗರ ವಿಮಾನ ನಿಲ್ದಾಣ ಮತ್ತು ಅವಂತಿಪೊರಾದ ವಾಯುಪಡೆ ನೆಲೆಯ ಮೇಲಿನ ದಾಳಿಗಳನ್ನು ಭಾರತದ ವಾಯು ರಕ್ಷಣಾ ವ್ಯವಸ್ಥೆಗಳು ಪರಿಣಾಮಕಾರಿಯಾಗಿ ತಡೆದಿವೆ.
ಟರ್ಕಿ-ಪಾಕಿಸ್ತಾನ ರಕ್ಷಣಾ ಸಹಕಾರ ಮತ್ತು ಡ್ರೋನ್‌ಗಳ ಸಂಪಾದನೆ
ಪಾಕಿಸ್ತಾನವು ಸೋನ್ಗರ್ ಡ್ರೋನ್‌ಗಳನ್ನು ಖರೀದಿಸಿರುವುದು ಟರ್ಕಿ ಮತ್ತು ಪಾಕಿಸ್ತಾನದ ನಡುವಿನ ಆಳವಾದ ರಕ್ಷಣಾ ಸಹಕಾರಕ್ಕೆ ಸಾಕ್ಷಿ. 1988 ರಲ್ಲಿ ಸ್ಥಾಪನೆಯಾದ ಮಿಲಿಟರಿ ಕನ್ಸಲ್ಟೇಟಿವ್ ಗ್ರೂಪ್ ಸೇರಿದಂತೆ ವಿವಿಧ ವೇದಿಕೆಗಳ ಮೂಲಕ ಎರಡೂ ದೇಶಗಳು ನಿಕಟ ರಕ್ಷಣಾ ಸಂಬಂಧಗಳನ್ನು ಹೊಂದಿವೆ. ಪಾಕಿಸ್ತಾನವು ಇತ್ತೀಚೆಗೆ ಟರ್ಕಿಯಿಂದ ಬೈರಕ್ತಾರ್ ಟಿಬಿ-2 ಡ್ರೋನ್‌ಗಳು ಮತ್ತು ಕೆಮಾಂಕೆಸ್ ಕ್ರೂಸ್ ಕ್ಷಿಪಣಿಗಳಂತಹ ರಕ್ಷಣಾ ಸಾಧನಗಳನ್ನು ಖರೀದಿಸಿದೆ. ಸೋನ್ಗರ್ ಡ್ರೋನ್‌ಗಳ ಖರೀದಿಯು ಸಾರ್ವಜನಿಕವಾಗಿ ವರದಿಯಾಗಿರದಿದ್ದರೂ, ಭಾರತದ ಮೇಲೆ ದಾಳಿ ಘಟನೆಯ ಮೂಲಕ ಅದರ ಬಳಕೆಯು ಸಾಬೀತಾಗಿದೆ.
