ಬೆಂಗಳೂರು: ಜಾಗತಿಕ ಮಾರುಕಟ್ಟೆಯಲ್ಲಿ ಇಂಧನ ಬೆಲೆಗಳ ಏರಿಳಿತ ಮತ್ತು ಪರಿಸರ ಕಾಳಜಿಯ ಹಿನ್ನೆಲೆಯಲ್ಲಿ, ಪ್ರಮುಖ ಎಲೆಕ್ಟ್ರಿಕ್ ವಾಹನ (EV) ತಯಾರಕ ಸಂಸ್ಥೆಯಾದ ವಿನ್ಫಾಸ್ಟ್ (Vinfast) ಗ್ರಾಹಕರಿಗಾಗಿ ಆಕರ್ಷಕ ‘ಟ್ರೇಡ್ ಗ್ಯಾಸ್ ಫಾರ್ ಎಲೆಕ್ಟ್ರಿಕ್’ ಯೋಜನೆಯನ್ನು ಪ್ರಕಟಿಸಿದೆ. ಈ ಯೋಜನೆಯಡಿ, ತಮ್ಮ ಹಳೆಯ ಪೆಟ್ರೋಲ್ ಅಥವಾ ಡೀಸೆಲ್ (ICE) ವಾಹನಗಳನ್ನು ಮಾರಿ ವಿನ್ಫಾಸ್ಟ್ನ ಹೊಸ ಎಲೆಕ್ಟ್ರಿಕ್ ಕಾರುಗಳಿಗೆ ಅಪ್ಗ್ರೇಡ್ ಆಗುವ ಗ್ರಾಹಕರಿಗೆ ಶೇಕಡಾ 3 ರಷ್ಟು ಹೆಚ್ಚುವರಿ ರಿಯಾಯಿತಿಯನ್ನು ನೀಡುವುದಾಗಿ ಕಂಪನಿ ತಿಳಿಸಿದೆ.
VF6 ಮತ್ತು VF7 ಮಾದರಿಗಳ ಮೇಲೆ ಬಂಪರ್ ಉಳಿತಾಯ
ವಿನ್ಫಾಸ್ಟ್ ಪ್ರಸ್ತುತ ತನ್ನ ಜನಪ್ರಿಯ ಇ-ಎಸ್ಯುವಿಗಳಾದ (eSUV) VF6 ಮತ್ತು VF7 ಮಾದರಿಗಳ ಮೇಲೆ ಈ ರಿಯಾಯಿತಿಯನ್ನು ನೀಡುತ್ತಿದೆ. ಶೇಕಡಾ 3 ರಷ್ಟು ರಿಯಾಯಿತಿಯ ಅನ್ವಯ, VF6 ಖರೀದಿದಾರರು ಸುಮಾರು 57,570 ರೂಪಾಯಿಗಳವರೆಗೆ ಮತ್ತು VF7 ಖರೀದಿದಾರರು ಸುಮಾರು 80,370 ರೂಪಾಯಿಗಳವರೆಗೆ ನೇರ ಲಾಭವನ್ನು ಪಡೆಯಬಹುದಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇಂಧನ ಬೆಲೆಗಳ ಬದಲಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಈ ಯೋಜನೆಯನ್ನು ದೀರ್ಘಕಾಲದವರೆಗೆ ಮುಂದುವರಿಸುವ ಇಂಗಿತವನ್ನು ಕಂಪನಿ ವ್ಯಕ್ತಪಡಿಸಿದೆ.
ಹಳೆಯ ಆಫರ್ಗಳ ಜೊತೆಗೆ ಹೊಸ ಲಾಭಗಳ ಸುರಿಮಳೆ
ಈ ಹೊಸ 3% ರಿಯಾಯಿತಿಯು ಕಂಪನಿಯು ಈಗಾಗಲೇ ನೀಡುತ್ತಿರುವ ಇತರ ಕೊಡುಗೆಗಳಿಗಿಂತ ಹೆಚ್ಚುವರಿಯಾಗಿ ಸಿಗಲಿದೆ ಎಂಬುದು ಗಮನಾರ್ಹ. ಫೆಬ್ರವರಿ 2026 ರಲ್ಲಿ ವಿನ್ಫಾಸ್ಟ್ ‘ವ್ಯಾಲ್ಯೂ ಅಶ್ಯೂರ್ಡ್’ (Value Assured) ಎಂಬ ಕಾರ್ಯಕ್ರಮವನ್ನು ಘೋಷಿಸಿತ್ತು. ಇದರ ಅಡಿಯಲ್ಲಿ ಪೆಟ್ರೋಲ್ ಅಥವಾ ಡೀಸೆಲ್ ಕಾರುಗಳನ್ನು ಎಲೆಕ್ಟ್ರಿಕ್ ಕಾರಿಗೆ ವಿನಿಮಯ ಮಾಡಿಕೊಳ್ಳುವವರಿಗೆ 1.30 ಲಕ್ಷ ರೂಪಾಯಿಗಳವರೆಗೆ ಪ್ರಯೋಜನಗಳನ್ನು ನೀಡಲಾಗುತ್ತಿತ್ತು. ಇದರ ಜೊತೆಗೆ, ಹಳೆಯ ಗ್ರಾಹಕರಿಗೆ ಶೇಕಡಾ 3 ರಷ್ಟು ಲಾಯಲ್ಟಿ ಬೆನಿಫಿಟ್ (Loyalty Benefit) ಕೂಡ ಲಭ್ಯವಿದೆ. ಈ ಎಲ್ಲಾ ಕೊಡುಗೆಗಳನ್ನು ಒಟ್ಟುಗೂಡಿಸಿದರೆ, ಹೊಸ ಎಲೆಕ್ಟ್ರಿಕ್ ಕಾರು ಖರೀದಿಸುವುದು ಈಗ ಗ್ರಾಹಕರಿಗೆ ಅತ್ಯಂತ ಲಾಭದಾಯಕವಾಗಲಿದೆ.
ಮರುಖರೀದಿ ಯೋಜನೆ ಮತ್ತು ಬ್ಯಾಟರಿ ಸಾಮರ್ಥ್ಯ
ಗ್ರಾಹಕರ ವಿಶ್ವಾಸವನ್ನು ಹೆಚ್ಚಿಸಲು ವಿನ್ಫಾಸ್ಟ್ ಕಂಪನಿಯು ‘ಬೈಬ್ಯಾಕ್’ (Buyback) ಯೋಜನೆಯನ್ನು ಸಹ ಪರಿಚಯಿಸಿದೆ. ಇದರಲ್ಲಿ 2 ರಿಂದ 5 ವರ್ಷಗಳವರೆಗೆ ಕಾರು ಹೊಂದಿರುವ ಮಾಲೀಕರಿಗೆ ಎಕ್ಸ್-ಶೋರೂಮ್ ಬೆಲೆಯ ಶೇಕಡಾ 75 ರಷ್ಟು ಮರುಖರೀದಿ ಮೌಲ್ಯದ ಭರವಸೆಯನ್ನು ನೀಡಲಾಗುತ್ತಿದೆ.
ತಾಂತ್ರಿಕವಾಗಿ ನೋಡುವುದಾದರೆ, VF6 ಮಾದರಿಯು 17.29 ಲಕ್ಷದಿಂದ 19.19 ಲಕ್ಷ ರೂಪಾಯಿ ಬೆಲೆ ಹೊಂದಿದ್ದು, 59.6kWh ಬ್ಯಾಟರಿ ಪ್ಯಾಕ್ನೊಂದಿಗೆ ಬರುತ್ತದೆ. ಇದು ಒಂದು ಬಾರಿ ಚಾರ್ಜ್ ಮಾಡಿದರೆ 468 ಕಿಮೀ ವ್ಯಾಪ್ತಿ (Range) ನೀಡುತ್ತದೆ. ಇನ್ನು VF7 ಮಾದರಿಯು 21.89 ಲಕ್ಷದಿಂದ 26.79 ಲಕ್ಷ ರೂಪಾಯಿ ಬೆಲೆ ಹೊಂದಿದ್ದು, ಇದರಲ್ಲಿ 70kWh ನ ದೊಡ್ಡ ಬ್ಯಾಟರಿ ಪ್ಯಾಕ್ ಆಯ್ಕೆಯೂ ಇದೆ. ಇದು ಬರೋಬ್ಬರಿ 532 ಕಿಮೀ ವ್ಯಾಪ್ತಿಯನ್ನು ನೀಡುತ್ತದೆ ಎಂದು ಕಂಪನಿ ತಿಳಿಸಿದೆ.
ಕಡಿಮೆ ನಿರ್ವಹಣಾ ವೆಚ್ಚ ಮತ್ತು ಆಕರ್ಷಕ ರಿಯಾಯಿತಿಗಳ ಮೂಲಕ ವಿನ್ಫಾಸ್ಟ್ ಭಾರತೀಯ ಮಾರುಕಟ್ಟೆಯಲ್ಲಿ ತನ್ನ ನೆಲೆಯನ್ನು ಗಟ್ಟಿಗೊಳಿಸಲು ಮುಂದಾಗಿದೆ.
ಇದನ್ನೂ ಓದಿ : ಮಾರ್ಚ್ 17ಕ್ಕೆ ಸ್ಯಾಮ್ಸಂಗ್ ಗ್ಯಾಲಕ್ಸಿ M17e 5G ಬಿಡುಗಡೆ : ಬಜೆಟ್ ಬೆಲೆಯಲ್ಲಿ ಸಿಗಲಿದೆ ಪ್ರೀಮಿಯಂ ಫೀಚರ್ಸ್! /
