ಪಾಕ್ ವಿರುದ್ಧದ ಹೈವೋಲ್ಟೇಜ್ ಪಂದ್ಯಕ್ಕೂ ಮುನ್ನ ವರುಣ್ ಚಕ್ರವರ್ತಿ ಮಾತಿನ ಚಕಮಕಿ | ಪಾರ್ಥಿವ್ ಪಟೇಲ್‌ಗೆ ‘ವರ್ಬಲ್ ಗೂಗ್ಲಿ’

ನವದೆಹಲಿ : 2026ರ ಟಿ20 ವಿಶ್ವಕಪ್‌ನಲ್ಲಿ ಸತತ ಗೆಲುವಿನ ನಾಗಾಲೋಟದಲ್ಲಿರುವ ಟೀಮ್ ಇಂಡಿಯಾ, ಭಾನುವಾರ (ಫೆ. 15) ತನ್ನ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನವನ್ನು ಎದುರಿಸಲು ಸಜ್ಜಾಗಿದೆ. ಕೊಲಂಬೊದ ಆರ್. ಪ್ರೇಮದಾಸ ಕ್ರೀಡಾಂಗಣದಲ್ಲಿ ನಡೆಯಲಿರುವ ಈ ಹೈವೋಲ್ಟೇಜ್ ಪಂದ್ಯಕ್ಕೂ ಮುನ್ನ, ಭಾರತದ ಸ್ಪಿನ್ನರ್ ವರುಣ್ ಚಕ್ರವರ್ತಿ ಅವರು ಎದುರಾಳಿ ಪಾಕ್ ತಂಡಕ್ಕೆ ಮಾತಿನ ಮೂಲಕ ಎಚ್ಚರಿಕೆ ರವಾನಿಸಿದ್ದಾರೆ.

ಸ್ಪಿನ್ ಅಸ್ತ್ರದ ಬಗ್ಗೆ ಪಾರ್ಥಿವ್ ಪ್ರಶ್ನೆ, ವರುಣ್ ಖಡಕ್ ಉತ್ತರ

ಪಾಕಿಸ್ತಾನ ತಂಡವು ಇತ್ತೀಚೆಗೆ ಅಮೆರಿಕ ವಿರುದ್ಧದ ಪಂದ್ಯದಲ್ಲಿ ಪ್ರಬಲ ಸ್ಪಿನ್ ದಾಳಿ ನಡೆಸಿತ್ತು. ಶಾಹೀನ್ ಅಫ್ರಿದಿ ಹೊರತುಪಡಿಸಿ, ಉಳಿದ ಓವರ್‌ಗಳನ್ನು ಸೈಮ್ ಅಯೂಬ್, ಅಬ್ರಾರ್ ಅಹ್ಮದ್, ಮೊಹಮ್ಮದ್ ನವಾಜ್, ಶಾದಾಬ್ ಖಾನ್ ಮತ್ತು ಉಸ್ಮಾನ್ ತಾರಿಕ್ ಅವರಂತಹ ಸ್ಪಿನ್ನರ್‌ಗಳು ನಿರ್ವಹಿಸಿದ್ದರು. ಈ ಐವರು ಸ್ಪಿನ್ನರ್‌ಗಳು ಸೇರಿ 7 ವಿಕೆಟ್‌ಗಳನ್ನು ಕಬಳಿಸಿದ್ದರು.

ಈ ಹಿನ್ನೆಲೆಯಲ್ಲಿ, ವೀಕ್ಷಕ ವಿವರಣೆಗಾರ ಪಾರ್ಥಿವ್ ಪಟೇಲ್, ಪಾಕ್ ಸ್ಪಿನ್ ದಾಳಿಯ ಬಗ್ಗೆ ವರುಣ್ ಚಕ್ರವರ್ತಿ ಅವರನ್ನು ಪ್ರಶ್ನಿಸಿದರು. ಇದಕ್ಕೆ ಖಡಕ್ ಆಗಿ ಉತ್ತರಿಸಿದ ವರುಣ್, “ವಿಶ್ವಕಪ್‌ನಲ್ಲಿ ಪ್ರತಿಯೊಂದು ಪಂದ್ಯವೂ ಮುಖ್ಯ. ನಾವೂ ಕೂಡ ಸ್ಪಿನ್ ಬೌಲಿಂಗ್‌ನಲ್ಲಿ ಬಲಿಷ್ಠರಾಗಿದ್ದೇವೆ. ನಮ್ಮ ಸ್ಪಿನ್ ವಿಭಾಗವು ಪಾಕಿಸ್ತಾನಕ್ಕಿಂತ ಮೇಲುಗೈ ಸಾಧಿಸುವ ವಿಶ್ವಾಸವಿದೆ. ಅವರು ಒಂದೇ ರೀತಿಯ ವಾತಾವರಣದಲ್ಲಿ ಸತತವಾಗಿ ಆಡುತ್ತಿರುವುದು ಅವರಿಗೆ ಅಲ್ಪ ಲಾಭ ನೀಡಬಹುದು. ಆದರೆ, ಒಂದು ತಂಡವಾಗಿ ನಾವು ಅವರಿಗಿಂತ ಉತ್ತಮ ಸಿದ್ಧತೆ ನಡೆಸಿದ್ದೇವೆ,” ಎಂದು ತಿರುಗೇಟು ನೀಡಿದರು.

ಉಸ್ಮಾನ್ ತಾರಿಕ್ v/s ಟೀಮ್ ಇಂಡಿಯಾ

ಈ ಪಂದ್ಯದಲ್ಲಿ ಪಾಕಿಸ್ತಾನದ ರಹಸ್ಯ ಅಸ್ತ್ರವಾಗಿ ಆಫ್‌ಸ್ಪಿನ್ನರ್ ಉಸ್ಮಾನ್ ತಾರಿಕ್ (Usman Tariq) ಕಣಕ್ಕಿಳಿಯುವ ನಿರೀಕ್ಷೆಯಿದೆ. ತಮ್ಮ ವಿಭಿನ್ನ ಬೌಲಿಂಗ್ ಶೈಲಿಯಿಂದ ಗಮನ ಸೆಳೆದಿರುವ ತಾರಿಕ್, ಇದುವರೆಗೆ 4 ಇನ್ನಿಂಗ್ಸ್‌ಗಳಲ್ಲಿ 11 ವಿಕೆಟ್ ಪಡೆದು ಮಿಂಚಿದ್ದಾರೆ. ಅವರ ಬೌಲಿಂಗ್ ಶೈಲಿ (Action) ಮತ್ತು ಚೆಂಡನ್ನು ಬಿಡುಗಡೆ ಮಾಡುವ ರೀತಿ (Release Point) ಬ್ಯಾಟರ್‌ಗಳಿಗೆ ಸವಾಲಾಗಿ ಪರಿಣಮಿಸಿದೆ. ಆದರೆ, ಈ ಬಗ್ಗೆ ಪ್ರತಿಕ್ರಿಯಿಸಿರುವ ಭಾರತದ ವಿಕೆಟ್ ಕೀಪರ್ ಬ್ಯಾಟರ್ ಇಶಾನ್ ಕಿಶನ್, “ಬೌಲರ್ ಯಾರೇ ಆದರೂ ನಾವು ಚೆಂಡಿನ ಮೇಲೆ ಗಮನ ಕೇಂದ್ರೀಕರಿಸುತ್ತೇವೆ. ಚೆಂಡು ನಮ್ಮ ವಲಯದಲ್ಲಿ (Slot) ಬಂದರೆ ಅದನ್ನು ಬೌಂಡರಿಗಟ್ಟುವುದೇ ನಮ್ಮ ಗುರಿ,” ಎಂದು ಆತ್ಮವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಇತಿಹಾಸದ ಒಲವು ಭಾರತದ ಕಡೆಗೆ

ಭಾರತ ಮತ್ತು ಪಾಕಿಸ್ತಾನ ನಡುವಿನ ಮುಖಾಮುಖಿಯಲ್ಲಿ ಇತಿಹಾಸವು ಭಾರತದ ಪರವಾಗಿಯೇ ಇದೆ. ಕಳೆದ 9 ಪಂದ್ಯಗಳಲ್ಲಿ ಭಾರತ 8 ಬಾರಿ ಜಯ ಸಾಧಿಸಿದೆ (ಒಂದು ಪಂದ್ಯ ಫಲಿತಾಂಶವಿಲ್ಲ). 2022ರ ಏಷ್ಯಾ ಕಪ್ ನಂತರ ಪಾಕಿಸ್ತಾನಕ್ಕೆ ಭಾರತದ ವಿರುದ್ಧ ಗೆಲ್ಲಲು ಸಾಧ್ಯವಾಗಿಲ್ಲ. ಈ ಹಿನ್ನೆಲೆಯಲ್ಲಿ ಪಾಕ್ ಪಡೆ ತೀವ್ರ ಒತ್ತಡದಲ್ಲಿ ಕಣಕ್ಕಿಳಿಯಲಿದ್ದು, ಗೆಲುವಿನ ಹಾದಿಗೆ ಮರಳಲು ಹಾತೊರೆಯುತ್ತಿದೆ.

ಇದನ್ನೂ ಓದಿ : ಮಹದೇಶ್ವರ ಬೆಟ್ಟದ ತಿರುವಿನಲ್ಲಿ ಭೀಕರ ಅಪಘಾತ | ಎರಡು ಬಸ್ಸುಗಳು​ ಮುಖಾಮುಖಿ ಡಿಕ್ಕಿ, ಹಲವರಿಗೆ ಗಾಯ!