2025ರ ಐದು ತಿಂಗಳು ಈಗಾಗಲೇ ಮುಗಿದು ಹೋಗಿದೆ. ಇನ್ನೇನು ಜೂನ್ ಗೆ ಕಾಲಿಡುತ್ತಿರುವಾಗಲೇ ಅತ್ತ ಭಾರತೀಯ ಚಿತ್ರರಂಗ ಮುಂದಿನ ವರ್ಷಕ್ಕೆ ಲಗ್ಗೆಯಿಟ್ಟಾಗಿದೆ.
ಅರೆ ಇದೇನಪ್ಪಾ, ಇನ್ನೂ ಈ ವರ್ಷ ಮುಗಿಯೋಕೆ ಇನ್ನಾರು ತಿಂಗಳಿದೆ. ಅದೇನು ಮುಂದಿನ ವರ್ಷದ ಲೆಕ್ಕ ಅಂದ್ರಾ? ಹೌದು, ಸಹಜವಾಗಿ ಚಿತ್ರರಂಗ ಈ ವರ್ಷ ಚಿತ್ರೀಕರಣದಲ್ಲಿರುವ ಸಿನಿಮಾಗಳು ಮುಂದಿನ ವರ್ಷದ ಪ್ಲ್ಯಾನಿಂಗ್ ಮಾಡಿಕೊಂಡಿರುತ್ತವೆ.
ಹೀಗೆ ಮುಂದಿನ ವರ್ಷ ಜನವರಿಯಿಂದ ಡಿಸೆಂಬರ್ ವರೆಗೂ ತೆರೆಗೆ ಬರುವ ಹಿಂದಿ, ತೆಲುಗು, ತಮಿಳು, ಕನ್ನಡ ಸಿನಿಮಾಗಳ ಕ್ಯಾಲೆಂಡರ್ ಪುಲ್ ತುಂಬಿ ತುಳುಕುತ್ತಿದೆ.. ಅದು ಕೂಡಾ ಅತಿರಥ ನಾಯಕರ ಬಹು ನಿರೀಕ್ಷಿತ ಸಿನಿಮಾಗಳೇ ಎನ್ನುವುದು ವಿಶೇಷ. ಮುಂದಿನ ವರ್ಷದ ಶುಭಾರಂಭವನ್ನು ತಮಿಳು ಚಿತ್ರರಂಗ ಮಾಡುತ್ತಿದೆ. ಜನವರಿ 14ರ ಹಬ್ಬದ ದಿನದಂದೇ ವಿಜಯ್ ನಟನೆಯ ಜನನಾಯಗನ್ ತೆರೆಗೆ ಅಪ್ಪಳಿಸಲಿದೆ. ನಂತರ ಬಾಲಿವುಡ್ ತನ್ನ ಬಹುನಿರೀಕ್ಷಿತ ಬಾರ್ಡರ್ ಪಾರ್ಟ್ 2 ಸಿನಿಮಾ ಮೂಲಕ ಖಾತೆ ತೆರೆಯಲಿದೆ. ಸನ್ನಿ ಡಿಯೋಲ್, ವರುಣ್ ಧವನ್ ನಟನೆಯ ಸಿನಿಮಾ ಜನವರಿ 26ರ ಗಣರಾಜ್ಯೋತ್ಸವಕ್ಕೆ ತೆರೆಗೆ ಬರ್ತಿದೆ. ಇದರ ಬೆನ್ನಲ್ಲೇ ಅಂದ್ರೆ ಪ್ರೇಮಿಗಳ ದಿನದಂದು ಕಾರ್ತಿಕ್ ಆರ್ಯನ್, ಅನನ್ಯಾ ಪಾಂಡೆ ನಟನೆಯ ರೊಮ್ಯಾಂಟಿಕ್ ಸಿನಿಮಾ ತು ಮೇರಿ ಮೇ ತೇರಿ ಸಿನಿಮಾ ರಿಲೀಸ್ ಆಗಲಿದೆ.
ಈದ್ ಹಬ್ಬದ ವಾರಾಂತ್ಯಕ್ಕೆ ಕನ್ನಡದ ಯಶ್ ನಟನೆಯ ಅತ್ಯಂತ ನಿರೀಕ್ಷಿತ ಸಿನಿಮಾ ಟಾಕ್ಸಿಕ್ ತೆರೆಗಪ್ಪಳಿಸಲಿದೆ. ಇದಕ್ಕೆ ಟಕ್ಕರ್ ನೀಡಲು ಅಜಯ್ ದೇವಗನ್ ಧಮಾಲ್ ಪಾರ್ಟ್ 4 ಮೂಲಕ ರಂಗ ಪ್ರವೇಶಿಸಲಿದ್ದಾರೆ. ನಂತರ ಗುಡ್ ಫ್ರೈಡೆಯಂದು ಎರಡು ದೊಡ್ಡ ಸಿನಿಮಾಗಳ ಹಣಾಹಣಿ ನಡೆಯಲಿದೆ. ಅಕ್ಷಯ್ ಕುಮಾರ್ ನಟನೆಯ ಭೂತ್ ಬಂಗ್ಲಾ ಮತ್ತು ಇಮ್ರಾನ್ ಹಶ್ಮಿಯ ಆವಾರಪನ್ ಮುಂದುವರಿದ ಭಾಗ ಬಿಡುಗಡೆಯಾಗಲಿದೆ.
ಇದರ ಮುಂದಿನ ವಾರ ವರುಣ್ ಧವನ್-ಪೂಜಾ ಹೆಗ್ಡೆ, ಮೃಣಾಲ್ ಠಾಕೂರ್ ನಟನೆಯ ಯೇ ಜಮಾನಿ ತೋ ಇಶ್ಕ್ ಹೋನಾ ಹೈ ರಿಲೀಸ್ ಆಗಲಿದೆ. ಇನ್ನು ಮೇ ಮೊದಲ ವಾರದಲ್ಲಿ ರಿತೇಶ್ ದೇಶ್ ಮುಖ್ ರ ಕನಸಿನ ಕೂಸ್ ರಾಜಾ ಶಿವಾಜಿ ಬೆಳ್ಳಿತೆರೆಗೆ ಅಪ್ಪಳಿಸಲಿದೆ.
ಉಳಿದಂತೆ ಜೂನ್ 25ಕ್ಕೆ ಜೂನಿಯರ್ ಎನ್ ಟಿಆರ್ ಪ್ರಶಾಂತ್ ನೀಲ್ ಕಾಂಬಿನೇಷನ್ ಸಿನಿಮಾ ಬಿಡುಗಡೆಯಾಗಲಿದೆ. ಜುಲೈನಲ್ಲಿ ಹಾಲಿವುಡ್ ಹಂಗಾಮ ಸೃಷ್ಟಿಯಾಗಲಿದೆ. ಈ ವೇಳೆ ಸ್ಪೈಡರ್ ಮ್ಯಾನ್ ಚಿತ್ರ ರಿಲೀಸ್ ಆಗಲಿದೆ. ಆಗಸ್ಟ್ 15ಕ್ಕೆ ಕಾರ್ತಿಕ್ ಆರ್ಯನ್ ನಟನೆಯ ನಗ್ಜಿಲ್ಲಾ ಒಂದೆಡೆಯಾದರೆ, ರಜನಿಕಾಂತ್ ನಟನೆಯ ಜೈಲರ್-2 ಕೂಡಾ ಸ್ವಾತಂತ್ರೋತ್ಸವಕ್ಕೆ ಬರೋ ಪ್ಲ್ಯಾನ್ ಮಾಡ್ತಿದೆ. ಅಕ್ಟೋಬರ್ ನಲ್ಲಿ ಅಜಯ್ ದೇವಗನ್ ರ ದೃಶ್ಯ-2, ದೀಪಾವಳಿ ಹೊತ್ತಿಗೆ ಯಶ್ ನಟನೆಯ ರಾಮಾಯಣ-1 ತೆರೆಗೆ ಬರುವ ಸಾಧ್ಯತೆಗಳಿವೆ. ಇನ್ನು ಕ್ರಿಸ್ ಮಸ್ ಸಂಭ್ರಮಕ್ಕೆ ಹಾಲಿವುಡ್ ನ ಅವೆಂಜರ್ಸ್ ಅಬ್ಬರಿಸಲಿದೆ. ರಾಜ್ ಕುಮಾರ್ ಹಿರಾನಿ ನಿರ್ದೇಶನದ ದಾದಾಸಾಹೇಬ್ ಫಾಲ್ಕೆ ಜೀವನ ಚರಿತ್ರೆ ಮತ್ತು ಅಮರ್ ಕೌಶಿಕ್ ನಿರ್ದೇಶನದ ಮಹಾವತಾರ್ ಮುಂದಿನ ವರ್ಷಾಂತ್ಯಕ್ಕೆ ಪ್ರೇಕ್ಷಕರೆದುರು ಬರೋ ನಿರೀಕ್ಷೆಗಳಿವೆ. ಇದರೊಟ್ಟಿಗೆ ಶಾರುಖ್ ನಟನೆಯ ಕಿಂಗ್, ರಣವೀರ್ ಸಿಂಗ್ ರ ಧುರಂಧರ್, ಕಾಂತರ-2 ಸಿನಿಮಾಗಳೂ ಮುಂದಿನ ವರ್ಷವೇ ಚಿತ್ರಮಂದಿರದ ದರ್ಶನ ಮಾಡಬೇಕಿದೆ.
