ಬೆಂಗಳೂರು: ಟಿಸಿಎಸ್ ವರ್ಲ್ಡ್ 10ಕೆ ಬೆಂಗಳೂರು 2025ರ ಆವೃತ್ತಿಯು ಸಮಾಜ ಸೇವೆಗೆ ಮಹತ್ವದ ಕೊಡುಗೆ ನೀಡಿದೆ. ಏಡ್ಬೀಸ್ ಸಹಭಾಗಿತ್ವದಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ವಿವಿಧ ಎನ್‌ಜಿಒಗಳು, ವೈಯಕ್ತಿಕ ನಿಧಿ ಸಂಗ್ರಾಹಕರು, ಓಟಗಾರರು ಮತ್ತು ಕಾರ್ಪೊರೇಟ್ ಸಂಸ್ಥೆಗಳ ಬೆಂಬಲದಿಂದ 3.83 ಕೋಟಿ ರೂಪಾಯಿ ಸಂಗ್ರಹವಾಯಿತು. 2008ರಿಂದ ಇಲ್ಲಿಯವರೆಗೆ, ಈ ವಿಶ್ವ ಅಥ್ಲೆಟಿಕ್ಸ್ ಗೋಲ್ಡ್ ಲೇಬಲ್ ಓಟದ ಮೂಲಕ ಒಟ್ಟು 59.20 ಕೋಟಿ ರೂಪಾಯಿ ದತ್ತಿ ನಿಧಿ ಸಂಗ್ರಹವಾಗಿದೆ.
ಈ ವರ್ಷ, 75ಕ್ಕೂ ಹೆಚ್ಚು ಎನ್‌ಜಿಒಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದವು. ಇವು ಆರೋಗ್ಯ, ಶಿಕ್ಷಣ, ಪ್ರಾಣಿ ಕಲ್ಯಾಣ, ಪರಿಸರ, ಮಹಿಳಾ ಸಬಲೀಕರಣ, ಜೀವನೋಪಾಯ ಸೃಷ್ಟಿ ಮತ್ತು ಸಮುದಾಯ ಅಭಿವೃದ್ಧಿ ಕ್ಷೇತ್ರಗಳಲ್ಲಿ ಕೆಲಸ ಮಾಡುತ್ತಿವೆ. ಈ ಎನ್‌ಜಿಒಗಳಿಗೆ ಬೆಂಬಲವಾಗಿ 250ಕ್ಕೂ ಹೆಚ್ಚು ವೈಯಕ್ತಿಕ ನಿಧಿ ಸಂಗ್ರಾಹಕರು ಮತ್ತು 35ಕ್ಕೂ ಹೆಚ್ಚು ಕಾರ್ಪೊರೇಟ್ ಸಂಸ್ಥೆಗಳು ಒಟ್ಟಾಗಿ ಶ್ರಮಿಸಿದವು.
ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್‌ನ ಬೆಂಗಳೂರು ಪ್ರಾದೇಶಿಕ ಮುಖ್ಯಸ್ಥ ಸುನಿಲ್ ದೇಶಪಾಂಡೆ ಮಾತನಾಡಿ, “ಟಿ.ಸಿ.ಎಸ್. ವರ್ಲ್ಡ್ 10ಕೆ ಬೆಂಗಳೂರು ಸದಾ ಸಾಮಾಜಿಕ ಬದಲಾವಣೆಯ ಪ್ರತೀಕವಾಗಿದೆ. ಇದು ಕೇವಲ ಒಂದು ಓಟವಲ್ಲ, ಬದಲಿಗೆ ಸಮುದಾಯವನ್ನು, ಹೊಸ ಆಲೋಚನೆಗಳನ್ನು ಮತ್ತು ಸಹಾಯ ಮಾಡುವ ಮನೋಭಾವವನ್ನು ಒಟ್ಟುಗೂಡಿಸುವ ವೇದಿಕೆಯಾಗಿದೆ. ದಕ್ಷಿಣ ಭಾರತದ ಅತಿದೊಡ್ಡ ಲೋಕೋಪಕಾರಿ ಕ್ರೀಡಾಕೂಟಗಳಲ್ಲಿ ಒಂದಾಗಿ, ಟಿ.ಸಿ.ಎಸ್. ವರ್ಲ್ಡ್ 10ಕೆ ವ್ಯವಹಾರ ಮತ್ತು ಸಮಾಜದಲ್ಲಿ ಶಾಶ್ವತವಾದ ಸಕಾರಾತ್ಮಕ ಪರಿಣಾಮ ಬೀರಲು ನಮ್ಮ ಬದ್ಧತೆಯನ್ನು ತೋರಿಸುತ್ತದೆ” ಎಂದು ಹೇಳಿದರು.
ಪ್ರಮುಖ ಸಾಧನೆಗಳು ಮತ್ತು ಪ್ರಶಸ್ತಿಗಳು
ಏಡ್ಬೀಸ್‌ನ ಸಿಇಒ ಜಮ್ರೂದಾ ಖಾಂಡೆ ಅವರು ಮಾತನಾಡಿ, “ಈ ವರ್ಷ ಬೆಂಬಲಿಸಿದ ವೈವಿಧ್ಯಮಯ ಯೋಜನೆಗಳು ನಿಜಕ್ಕೂ ಸ್ಫೂರ್ತಿದಾಯಕವಾಗಿವೆ. ಭಾರತದ ಮೊದಲ ಅಂಧರ ಟಿ-20 ವಿಶ್ವಕಪ್‌ಗೆ ನಿಧಿ ಸಂಗ್ರಹಿಸಿದ ಎನ್‌ಜಿಒಗಳಿಂದ ಹಿಡಿದು, ತಮ್ಮ ಸಂಸ್ಥೆಗಳ ಫಲಾನುಭವಿಗಳಾಗಿದ್ದ ಮೊದಲ ಬಾರಿಯ ನಿಧಿ ಸಂಗ್ರಾಹಕರವರೆಗೆ, ಸಮಾಜಕ್ಕೆ ಸಹಾಯ ಮಾಡುವ ಇವರ ಮನಸ್ಸು ಎಲ್ಲರನ್ನೂ ತಲುಪಿದೆ” ಎಂದರು. ಈ ವರ್ಷ 13 ಎನ್‌ಜಿಒಗಳು 10 ಲಕ್ಷ ರೂಪಾಯಿ ನಿಧಿ ಸಂಗ್ರಹದ ಗಡಿಯನ್ನು ದಾಟಿವೆ. ಚಾರಿಟಿ ಬಿಬ್ ಉಪಕ್ರಮದ ಮೂಲಕ ಭಾಗವಹಿಸುವವರ ಟಾಪ್-ಅಪ್ ದೇಣಿಗೆಗಳಿಂದ 5.45 ಲಕ್ಷ ರೂಪಾಯಿ ಮತ್ತು ಅತಿ ಹೆಚ್ಚು ಮಾರಾಟವಾದ ಚಾರಿಟಿ ಬಿಬ್‌ನಿಂದ 30,000 ರೂಪಾಯಿ ಸಂಗ್ರಹವಾಯಿತು. ಗುಬ್ಬಚ್ಚಿ ಲರ್ನಿಂಗ್ ಕಮ್ಯುನಿಟಿ ಈ ಉಪಕ್ರಮವನ್ನು ಮುನ್ನಡೆಸಿತು.
ಕಾರ್ಪೊರೇಟ್ ವಲಯದಲ್ಲಿ, 35ಕ್ಕೂ ಹೆಚ್ಚು ಕಂಪನಿಗಳು 1,500ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ನಿಯೋಜಿಸಿದ್ದವು. ಇವರು ವಿವಿಧ ಸಾಮಾಜಿಕ ಉದ್ದೇಶಗಳಿಗಾಗಿ ಒಟ್ಟು 1.86 ಕೋಟಿ ರೂಪಾಯಿ ಸಂಗ್ರಹಿಸಿದ್ದಾರೆ. ವೈಯಕ್ತಿಕ ನಿಧಿ ಸಂಗ್ರಾಹಕರಲ್ಲಿ, ಬೆಂಗಳೂರು ಕಿಡ್ನಿ ಫೌಂಡೇಶನ್‌ಗಾಗಿ ಉಷಾ ಬಾಳಿಗಾ ಅವರು 17 ಲಕ್ಷ ರೂಪಾಯಿ ಸಂಗ್ರಹಿಸಿ ಅಗ್ರಸ್ಥಾನದಲ್ಲಿದ್ದಾರೆ. ಯುವ ನಿಧಿ ಸಂಗ್ರಾಹಕರಲ್ಲಿ (18 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು), 15 ಮಂದಿ ಸೇರಿ ಒಟ್ಟಾಗಿ 28 ಲಕ್ಷ ರೂಪಾಯಿಗೂ ಹೆಚ್ಚು ಹಣ ಸಂಗ್ರಹಿಸಿದ್ದಾರೆ.
16 ವರ್ಷದ ಟಿಯಾ ಬಾಲಿ 5,00,929 ರೂಪಾಯಿ ಮತ್ತು 6 ವರ್ಷದ ಅಬೀಗೈಲ್ ಜೋಶುವಾ ಲಿಸಾ 3,27,255 ರೂಪಾಯಿ ಸಂಗ್ರಹಿಸಿ ಗಮನ ಸೆಳೆದರು. ಅಂಗವಿಕಲರನ್ನು ಒಳಗೊಳ್ಳುವ ನಿಟ್ಟಿನಲ್ಲಿ, ಅಸೋಸಿಯೇಷನ್ ಆಫ್ ಪೀಪಲ್ ವಿತ್ ಡಿಸೆಬಿಲಿಟಿಸ್, ಅಡ್ವೆಂಚರ್ಸ್ ಬಿಯಾಂಡ್ ಬ್ಯಾರಿಯರ್ಸ್ ಮತ್ತು ಪ್ರೊವಿಷನ್ ಏಷ್ಯಾ ಎನ್‌ಜಿಒಗಳು ತಮ್ಮ ಒಂದು ಡಜನ್‌ಗೂ ಹೆಚ್ಚು ಫಲಾನುಭವಿಗಳನ್ನು ‘ಚಾಂಪಿಯನ್ಸ್ ವಿತ್ ಡಿಸೆಬಿಲಿಟಿ’ ವಿಭಾಗದಲ್ಲಿ ಭಾಗವಹಿಸಲು ಕರೆತಂದವು.
2025ರ ಪರಿಣಾಮ
ಟಿ.ಸಿ.ಎಸ್. ವರ್ಲ್ಡ್ 10ಕೆ ಬೆಂಗಳೂರು 2025ರಲ್ಲಿ ಸಂಗ್ರಹಿಸಿದ ನಿಧಿಯ ಮೂಲಕ 1.05 ಲಕ್ಷಕ್ಕೂ ಹೆಚ್ಚು ಜನರ ಜೀವನಕ್ಕೆ ನೆರವಾಗಿದೆ. ಈ ಹಣವನ್ನು ಆರೋಗ್ಯ, ಪ್ರಾಣಿ ಕಲ್ಯಾಣ, ಕಲೆ, ಸಂಸ್ಕೃತಿ ಮತ್ತು ಕ್ರೀಡೆ, ಶಿಕ್ಷಣ, ಮಕ್ಕಳ ಅಭಿವೃದ್ಧಿ, ಮಹಿಳಾ ಸಬಲೀಕರಣ ಮತ್ತು ಅಂಗವಿಕಲರ ಸಬಲೀಕರಣ ಮುಂತಾದ ಕ್ಷೇತ್ರಗಳಲ್ಲಿ ಬಳಸಲಾಗುತ್ತಿದೆ. ಪ್ರೊಕ್ಯಾಮ್ ಇಂಟರ್‌ನ್ಯಾಷನಲ್‌ನ ಜಂಟಿ ವ್ಯವಸ್ಥಾಪಕ ನಿರ್ದೇಶಕ ವಿವೇಕ್ ಸಿಂಗ್ ಮಾತನಾಡಿ, “ಟಿ.ಸಿ.ಎಸ್. ವರ್ಲ್ಡ್ 10ಕೆ ಬೆಂಗಳೂರು ಕೇವಲ ಒಂದು ಓಟವಲ್ಲ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ಇದು ಸಮುದಾಯ, ಕರುಣೆ ಮತ್ತು ಸಾಮೂಹಿಕ ಪ್ರಯತ್ನದ ಹಬ್ಬವಾಗಿದೆ” ಎಂದರು.
