ಮುಂಬೈ : ಸುಮಾರು 140 ಕೋಟಿ ಭಾರತೀಯರ ನಿರೀಕ್ಷೆಯ ಭಾರವನ್ನು ಹೊತ್ತು ಟಿ20 ವಿಶ್ವಕಪ್ 2026ರ ಕಣಕ್ಕಿಳಿಯುತ್ತಿರುವ ಟೀಮ್ ಇಂಡಿಯಾ ನಾಯಕ ಸೂರ್ಯಕುಮಾರ್ ಯಾದವ್, ಈ ಒತ್ತಡವನ್ನು ನಗುತ್ತಲೇ ಎದುರಿಸಲು ಸಜ್ಜಾಗಿದ್ದಾರೆ. ಫೆಬ್ರವರಿ 7 ರಿಂದ ಆರಂಭವಾಗುವ ಟೂರ್ನಿಯಲ್ಲಿ ಭಾರತ ತಂಡ ತನ್ನ ತವರಿನಲ್ಲಿ ಪ್ರಶಸ್ತಿ ಉಳಿಸಿಕೊಳ್ಳುವ ಸವಾಲನ್ನು ಹೊಂದಿದೆ. ಆದರೆ, ನಾಯಕ ಸೂರ್ಯಕುಮಾರ್ ಮಾತ್ರ ಮೈದಾನದಲ್ಲಿ ಮತ್ತು ಹೊರಗೆ ಅಷ್ಟೇ ಶಾಂತಚಿತ್ತರಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ.
ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಅವರಂತಹ ದಿಗ್ಗಜ ನಾಯಕರು ಎದುರಿಸಿದ ಒತ್ತಡಕ್ಕಿಂತ ಭಿನ್ನವಾಗಿದ್ದರೂ, ಸೂರ್ಯಕುಮಾರ್ ಅವರ ಮೇಲಿನ ಜವಾಬ್ದಾರಿ ಕಡಿಮೆಯೇನಲ್ಲ. ವಿಶ್ವಕಪ್ಗೆ ಮುನ್ನ, ನಾಯಕತ್ವ ಅವರ ಬ್ಯಾಟಿಂಗ್ ಮೇಲೆ ಪರಿಣಾಮ ಬೀರಬಹುದೇ ಎಂಬ ಪ್ರಶ್ನೆಗಳು ಎದ್ದಿದ್ದವು. ಆದರೆ ನ್ಯೂಜಿಲೆಂಡ್ ಸರಣಿಯಲ್ಲಿ ಅವರು ತಮ್ಮ ಬ್ಯಾಟಿಂಗ್ ಮತ್ತು ನಾಯಕತ್ವದ ಮೂಲಕ ಸ್ಪಷ್ಟ ಉತ್ತರ ನೀಡಿದ್ದರು.
“ಮೈದಾನದಲ್ಲಿ ಮತ್ತು ಹೊರಗೆ ಸಾಕಷ್ಟು ವಿಷಯಗಳು ನಡೆಯುತ್ತಿರುತ್ತವೆ. ನಾವು ಮೈದಾನಕ್ಕಿಳಿದಾಗ ಶಾಂತವಾಗಿರಬೇಕು. ನಮ್ಮ ತಯಾರಿ ಚೆನ್ನಾಗಿದ್ದರೆ, ಮೈದಾನದಲ್ಲಿ ಎಲ್ಲವೂ ‘ಆಟೋಪೈಲಟ್’ ಮೋಡ್ನಲ್ಲಿ ನಡೆಯುತ್ತದೆ. ಭಾವನೆಗಳನ್ನು ಹರಿಯಬಿಟ್ಟು, ಆ ಕ್ಷಣದಲ್ಲಿ ತಂಡಕ್ಕೆ ಬೇಕಾದ ನಿರ್ಧಾರ ತೆಗೆದುಕೊಳ್ಳುವುದಷ್ಟೇ ಮುಖ್ಯ,” ಎಂದು ಸೂರ್ಯಕುಮಾರ್ ಹೇಳುತ್ತಾರೆ. ಅವರ ಪ್ರಕಾರ, 75-80 ನಿಮಿಷಗಳ ಫೀಲ್ಡಿಂಗ್ ಅವಧಿಯಲ್ಲಿ ತಂಡದ ಸದಸ್ಯರೊಂದಿಗೆ ಕ್ಷಣಗಳನ್ನು ಆನಂದಿಸುವುದು ನಾಯಕತ್ವದ ಭಾಗವಾಗಿದೆ.
ತವರಿನ ಪ್ರೇಕ್ಷಕರ ನಿರೀಕ್ಷೆ
ಫೆಬ್ರವರಿ 7 ರಂದು ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ಅಮೆರಿಕ ವಿರುದ್ಧ ಭಾರತ ತನ್ನ ಅಭಿಯಾನ ಆರಂಭಿಸಲಿದೆ. ತವರಿನಲ್ಲಿ ಆಡುವುದು ಯಾವಾಗಲೂ ವಿಶೇಷ ಎಂದಿರುವ ಸೂರ್ಯಕುಮಾರ್, “2023ರ ಏಕದಿನ ವಿಶ್ವಕಪ್ ಸಂದರ್ಭದಲ್ಲೂ ನಾವು ಇದನ್ನು ಅನುಭವಿಸಿದ್ದೆವು. ವಿಮಾನ ನಿಲ್ದಾಣಗಳಲ್ಲಿ, ರಸ್ತೆಗಳಲ್ಲಿ ಜನ ನಮ್ಮನ್ನು ಮಾತನಾಡಿಸುವ ರೀತಿ, ಅವರ ಬೆಂಬಲ ನಮಗೆ ಸದಾ ಪ್ರೇರಣೆ ನೀಡುತ್ತದೆ. ಆದರೆ ಅದೇ ಸಮಯದಲ್ಲಿ ಇದು ದೊಡ್ಡ ಜವಾಬ್ದಾರಿಯನ್ನೂ ತರುತ್ತದೆ,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಟಿ20 ಮಾದರಿ ಬೌಲರ್ಗಳಿಗೆ ಮತ್ತು ಬ್ಯಾಟರ್ಗಳಿಗೆ ಕಠಿಣವಾಗಿರುತ್ತದೆ. ಇಂತಹ ಸಂದರ್ಭದಲ್ಲಿ ಸಹ ಆಟಗಾರರಿಗೆ ಧೈರ್ಯ ತುಂಬಿ, ಅವರನ್ನು ರಿಲ್ಯಾಕ್ಸ್ ಮಾಡುವುದು ನಾಯಕನ ಕೆಲಸ ಎಂದು ಅವರು ನಂಬಿದ್ದಾರೆ. ಎಷ್ಟೇ ಒತ್ತಡವಿದ್ದರೂ, ತಮ್ಮ ತಯಾರಿ ಮತ್ತು ಜನರ ಮೇಲಿನ ನಂಬಿಕೆಯಿಂದಾಗಿ ಸೂರ್ಯಕುಮಾರ್ ಯಾದವ್ ಮುಖದಲ್ಲಿನ ನಗು ಮಾಸಿಲ್ಲ.
ಇದನ್ನೂ ಓದಿ : ಬೆಂಗಳೂರು ಏರ್ಪೋರ್ಟ್ನಲ್ಲಿ 2.97 ಕೋಟಿ ರೂ. ಮೌಲ್ಯದ ಗಾಂಜಾ ಜಪ್ತಿ – ಮೂವರು ವಶಕ್ಕೆ
