ಬೆಂಗಳೂರು: ಭಾರತೀಯ ಷೇರು ಮಾರುಕಟ್ಟೆ ಸಂಸ್ಥೆಯಾದ ಸೆಬಿಯು ಮ್ಯೂಚುವಲ್ ಫಂಡ್ ಹೂಡಿಕೆದಾರರಿಗೆ ಸಿಹಿ ಸುದ್ದಿ ನೀಡಿದೆ. ಮ್ಯೂಚುವಲ್ ಫಂಡ್ ಹೂಡಿಕೆಗಳ ಮೇಲಿನ ಬೇಸ್ ಎಕ್ಸ್ ಪೆನ್ಸ್ ರೇಷಿಯೋದಲ್ಲಿ ಸೆಬಿಯು 10-15 ಬೇಸಿಸ್ ಪಾಯಿಂಟ್ ಗಳನ್ನು ಇಳಿಕೆ ಮಾಡಿದೆ. ಇದರಿಂದಾಗಿ, ಹೂಡಿಕೆದಾರರಿಗೆ ಹಣದ ಉಳಿತಾಯವಾಗಲಿದೆ. ಇನ್ನುಮುಂದೆ, ಮ್ಯೂಚುವಲ್ ಫಂಡ್ ಹೂಡಿಕೆಯು ಅಗ್ಗವಾಗಲಿದ್ದು (Mutual Fund Expense Ratios), ದೀರ್ಘಾವಧಿಯಲ್ಲಿ ಹೂಡಿಕೆದಾರರ ಉಳಿತಾಯ ಜಾಸ್ತಿಯಾಗುವುದು ನಿಶ್ಚಿತ ಎಂದು ಹೇಳಲಾಗುತ್ತಿದೆ.
ಇದುವರೆಗೆ ಇಂಡೆಕ್ಸ್, ಈಕ್ವಿಟಿ, ಇಟಿಎಫ್ ಗಳ ಮೇಲಿನ ಬೇಸ್ ಎಕ್ಸ್ ಪೆನ್ಸ್ ರೇಷಿಯೋ ಶೇ.1ರಷ್ಟಿತ್ತು. ಈಗ ಅದನ್ನು ಸೆಬಿಯು ಶೇ.0.90ಕ್ಕೆ ಇಳಿಕೆ ಮಾಡಿದೆ. ಅಂದರೆ, ಮ್ಯೂಚುವಲ್ ಫಂಡ್ ಅಸೆಟ್ ಮ್ಯಾನೇಜ್ ಮಾಡುವ ಕಂಪನಿಗಳು ಈಗ ಹೂಡಿಕೆದಾರರಿಗೆ ಶೇ.0.90ರಷ್ಟು ಎಕ್ಸ್ ಪೆನ್ಸ್ ರೇಷಿಯೋ ಅನ್ವಯ ಕಡಿತ ಮಾಡಬೇಕಿದೆ. ಇದರಿಂದಾಗಿ ಹೂಡಿಕೆದಾರರಿಗೆ ಅನುಕೂಲವಾಗಲಿದೆ.
ಬೇಸ್ ಎಕ್ಸ್ ಪೆನ್ಸ್ ರೇಷಿಯೋದಲ್ಲಿ ಫಂಡ್ ನಿರ್ವಹಣೆ ಶುಲ್ಕ, ವಿತರಕರ ಕಮಿಷನ್, ತೆರಿಗೆಯೂ ಬರುತ್ತದೆ. ಜಿಎಸ್ ಟಿ, ಸ್ಟ್ಯಾಂಪ್ ಡ್ಯೂಟಿಗಳು ಈ ಎಕ್ಸ್ ಪೆನ್ಸ್ ರೇಷಿಯೋ ವ್ಯಾಪ್ತಿಗೆ ಬರುವುದಿಲ್ಲ. ಇವುಗಳನ್ನು ಪ್ರತ್ಯೇಕವಾಗಿ ನಮೂದಿಸುವುದರಿಂದ ಹೂಡಿಕೆದಾರರಿಗೆ ತಮ್ಮ ಹೂಡಿಕೆ, ಲಾಭದ ಮೇಲೆ ಎಷ್ಟು ಶುಲ್ಕವನ್ನು ಕಡಿತಗೊಳಿಸಲಾಗುತ್ತದೆ ಎಂಬುದರ ಸ್ಪಷ್ಟ ಮಾಹಿತಿ ಲಭಿಸುತ್ತದೆ.
10 ಬೇಸಿಸ್ ಪಾಯಿಂಟ್ ಗಳ ಕಡಿತವು ಅಲ್ಪ ಪ್ರಮಾಣದ ಕಡಿತ ಎನಿಸಿದರೂ ದೀರ್ಘಾವಧಿಯಲ್ಲಿ ಲಾಭವಾಗುತ್ತದೆ ಎಂದು ವಿಶ್ಲೇಷಿಸಲಾಗುತ್ತದೆ. ಉದಾಹರಣೆಗೆ, ಒಬ್ಬ ವ್ಯಕ್ತಿಯು ಮ್ಯೂಚುವಲ್ ಫಂಡ್ ನಲ್ಲಿ 10 ಲಕ್ಷ ರೂಪಾಯಿಗಳನ್ನು 20 ವರ್ಷಗಳ ಅವಧಿಗೆ ಹೂಡಿಕೆ ಮಾಡಿದ್ದಾರೆ ಎಂದು ಭಾವಿಸೋಣ. ಅಂದಾಜು, ವಾರ್ಷಿಕ ಶೇ.12ರಷ್ಟು ರಿಟರ್ನ್ಸ್ ಎಂದು ಭಾವಿಸೋಣ. ಆಗ ಕನಿಷ್ಠ ಶೇ.20 ಬೇಸಿಸ್ ಪಾಯಿಂಟ್ ಗಳ ಕಡಿತ ಎಂದರೂ 2.95 ಲಕ್ಷ ರೂಪಾಯಿ ಉಳಿತಾಯವಾಗಲಿದೆ.
ಇದನ್ನೂ ಓದಿ: ರೈಲು ಪ್ರಯಾಣಿಕರಿಗೆ ಗುಡ್ ನ್ಯೂಸ್ : ಚಾರ್ಟ್ ಪ್ರಿಪೇರ್ ಆಗುವ ಸಮಯದಲ್ಲಿ ಮಹತ್ವದ ಅಪ್ ಡೇಟ್
