ಫುಟ್‌ಪಾತ್ ಮೇಲೆ ಸ್ಕೂಟರ್ ಓಡಿಸಿದ ಸವಾರ | ಕಾಲಿಟ್ಟು ತಡೆದ ಕೇರಳದ ಅಜ್ಜಿಯ ‘ದಬಾಂಗ್’ ಅವತಾರಕ್ಕೆ ಭಾರೀ ಮೆಚ್ಚುಗೆ!

ಕೋಯಿಕ್ಕೋಡ್ : ಸರ್ಕಾರದ ನಿಯಮಗಳನ್ನು ಗಾಳಿಗೆ ತೂರುವವರಿಗೆ ಬುದ್ಧಿ ಕಲಿಸಲು ವಯಸ್ಸು ಅಡ್ಡಿಯಾಗುವುದಿಲ್ಲ ಎಂಬುದನ್ನು ಕೇರಳದ ಅಜ್ಜಿಯೊಬ್ಬರು ಸಾಬೀತುಪಡಿಸಿದ್ದಾರೆ. ರಸ್ತೆಯ ಟ್ರಾಫಿಕ್ ಜಾಮ್‌ನಿಂದ ತಪ್ಪಿಸಿಕೊಳ್ಳಲು ಫುಟ್‌ಪಾತ್ ಮೇಲೆ ಸ್ಕೂಟರ್ ಚಲಾಯಿಸಿಕೊಂಡು ಬಂದ ಸವಾರನಿಗೆ ದಾರಿ ಬಿಡದೆ, ಆತನನ್ನು ಮರಳಿ ರಸ್ತೆಗೆ ಕಳುಹಿಸುವ ಮೂಲಕ ಈ ‘ಅಮ್ಮಚ್ಚಿ’ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಪ್ರಶಂಸೆಗೆ ಪಾತ್ರರಾಗಿದ್ದಾರೆ.

ನಡುರಸ್ತೆಯಲ್ಲೇ ಅಜ್ಜಿಯ ಪಾಠ

ಈ ಘಟನೆಯು ಕೇರಳದ ಕೋಯಿಕ್ಕೋಡ್‌ನ ಎಂಜಿಪಾಲಂ ಟ್ರಾಫಿಕ್ ಸಿಗ್ನಲ್ ಸಮೀಪ ನಡೆದಿದೆ. ರಸ್ತೆಯಲ್ಲಿ ವಾಹನಗಳ ದಟ್ಟಣೆ ಹೆಚ್ಚಿದ್ದರಿಂದ ಸವಾರನೊಬ್ಬ ತನ್ನ ಸ್ಕೂಟರ್ ಅನ್ನು ಪಾದಚಾರಿ ಮಾರ್ಗದ (ಫುಟ್‌ಪಾತ್) ಮೇಲೆ ಚಲಾಯಿಸಲು ಯತ್ನಿಸಿದ್ದಾನೆ. ಅದೇ ಸಮಯದಲ್ಲಿ ಅಲ್ಲಿ ನಡೆದುಕೊಂಡು ಹೋಗುತ್ತಿದ್ದ ವೃದ್ಧೆ, ಸವಾರನ ಅಡ್ಡಾದಿಡ್ಡಿ ವರ್ತನೆಯನ್ನು ಕಂಡು ಕಿಂಚಿತ್ತೂ ಹೆದರದೆ ಸ್ಕೂಟರ್‌ನ ಮುಂದೆಯೇ ಕಾಲಿಟ್ಟು ದಾರಿ ತಡೆದಿದ್ದಾರೆ. ಇದು ಪಾದಚಾರಿಗಳಿಗಾಗಿ ಇರುವ ಜಾಗ, ಇಲ್ಲಿ ವಾಹನ ತರುವಂತಿಲ್ಲ ಎಂದು ಖಡಕ್ ಆಗಿ ಎಚ್ಚರಿಸಿದ್ದಾರೆ.

ಸೆಲ್ಫೋನ್ ಅಸ್ತ್ರ ಬಳಸಿದ ಧೀರ ಮಹಿಳೆ

ಆರಂಭದಲ್ಲಿ ಸ್ಕೂಟರ್ ಸವಾರ ಅಜ್ಜಿಯ ಜೊತೆ ವಾಗ್ವಾದಕ್ಕಿಳಿದು ದಾರಿ ಬಿಡುವಂತೆ ಒತ್ತಾಯಿಸಿದ್ದಾನೆ. ಆದರೆ, ಅದಕ್ಕೆ ಮಣಿಯದ ಅವರು ತಕ್ಷಣವೇ ತಮ್ಮ ಮೊಬೈಲ್ ಫೋನ್ ಹೊರತೆಗೆದು ಆತನ ಉಲ್ಲಂಘನೆಯನ್ನು ಚಿತ್ರೀಕರಿಸಲು ಮುಂದಾಗಿದ್ದಾರೆ. ಪೊಲೀಸರಿಗೆ ದೂರು ನೀಡುವ ಅಜ್ಜಿಯ ಈ ಧೈರ್ಯದ ನಡೆಯನ್ನು ಕಂಡು ಕಂಗೆಟ್ಟ ಸವಾರ, ಅನಿವಾರ್ಯವಾಗಿ ತನ್ನ ಸ್ಕೂಟರ್ ಅನ್ನು ಹಿಂದಕ್ಕೆ ತಿರುಗಿಸಿ ಮರಳಿ ಮುಖ್ಯ ರಸ್ತೆಯ ಟ್ರಾಫಿಕ್ ನಡುವೆಯೇ ಸೇರಿಕೊಂಡಿದ್ದಾನೆ. ಈ ವಿಡಿಯೋ ಈಗ “ಅಮ್ಮಚ್ಚಿ ಸಾಕು ಅಂದ ಮೇಲೆ ಸಾಕು!” ಎಂಬ ಅಡಿಬರಹದೊಂದಿಗೆ ವೈರಲ್ ಆಗಿದೆ.

ವೈರಲ್ ವಿಡಿಯೋ ನೋಡಿದ ಹಲವು ನೆಟ್ಟಿಗರು ಈ ಮಹಿಳೆಯನ್ನು ಕ್ಯಾಪ್ಟನ್ ಲಕ್ಷ್ಮಿ ಹಾಸ್ಟೆಲ್‌ನ ಮಾಜಿ ವಾರ್ಡನ್ ‘ಪ್ರಭಾ ಆಂಟಿ’ ಎಂದು ಗುರುತಿಸಿದ್ದಾರೆ. “ಅವರು ಅಂದು ನಮಗೆ ವಾರ್ಡನ್ ಆಗಿದ್ದಾಗಲೂ ಹೀಗೆಯೇ ಶಿಸ್ತು ಪಾಲಿಸುತ್ತಿದ್ದರು. ಅವರ ಗದರಿಕೆಯ ಹಿಂದೆ ತಾಯಿಯ ಪ್ರೀತಿ ಇರುತ್ತಿತ್ತು,” ಎಂದು ಅವರ ಹಳೆಯ ವಿದ್ಯಾರ್ಥಿನಿಯೊಬ್ಬರು ಸಾಮಾಜಿಕ ಜಾಲತಾಣದಲ್ಲಿ ಭಾವುಕರಾಗಿ ಕಾಮೆಂಟ್ ಮಾಡಿದ್ದಾರೆ. ಹೊರನೋಟಕ್ಕೆ ಕಟ್ಟುನಿಟ್ಟಿನ ಸ್ವಭಾವದವರಂತೆ ಕಂಡರೂ, ಅವರು ಅತ್ಯಂತ ದಯಾಳು ಎಂಬ ಮೆಚ್ಚುಗೆಯ ಮಾತುಗಳು ಕೇಳಿಬರುತ್ತಿವೆ.

ನಾಗರಿಕ ಪ್ರಜ್ಞೆಗೆ ಸಾಕ್ಷಿಯಾದ ವಿಡಿಯೋ

ಇತ್ತೀಚಿನ ದಿನಗಳಲ್ಲಿ ನಗರ ಪ್ರದೇಶಗಳಲ್ಲಿ ದ್ವಿಚಕ್ರ ವಾಹನ ಸವಾರರು ಟ್ರಾಫಿಕ್‌ನಿಂದ ಪಾರಾಗಲು ಫುಟ್‌ಪಾತ್‌ಗಳನ್ನು ಬಳಸಿ ಪಾದಚಾರಿಗಳ ಜೀವಕ್ಕೆ ಸಂಚಕಾರ ತರುತ್ತಿದ್ದಾರೆ. ಅಜ್ಜಿಯ ಈ ಧೈರ್ಯದ ನಡೆ ಇತರರಿಗೆ ಮಾದರಿಯಾಗಿದೆ ಎಂದು ನೆಟ್ಟಿಗರು ಕೊಂಡಾಡುತ್ತಿದ್ದಾರೆ. “ಬದಲಾವಣೆ ತರಲು ಒಬ್ಬರು ಧೈರ್ಯ ಮಾಡಿದರೆ ಸಾಕು, ಇಡೀ ವ್ಯವಸ್ಥೆ ಸರಿಹೋಗುತ್ತದೆ” ಎಂಬ ಅಭಿಪ್ರಾಯಗಳು ಕೂಡ ವ್ಯಕ್ತವಾಗುತ್ತಿವೆ.

ಇದನ್ನೂ ಓದಿ : ಕೋಲಾರ | ಕಂದಾಯ ನಿರೀಕ್ಷಕರ ಮೇಲೆ ಚಪ್ಪಲಿಯಿಂದ ಹಲ್ಲೆಗೆ ಯತ್ನ