ಟೆಲ್ ಅವಿವ್ : ಪ್ರಧಾನಿ ನರೇಂದ್ರ ಮೋದಿ ಅವರ ಇಸ್ರೇಲ್ ಪ್ರವಾಸವು ಕೇವಲ ರಾಜತಾಂತ್ರಿಕ ಕಾರಣಗಳಿಗಷ್ಟೇ ಅಲ್ಲದೆ, ಉಭಯ ನಾಯಕರ ನಡುವಿನ ಆತ್ಮೀಯ ಒಡನಾಟದಿಂದಾಗಿಯೂ ಜಾಗತಿಕ ಗಮನ ಸೆಳೆದಿದೆ. ವಿಮಾನ ನಿಲ್ದಾಣದಲ್ಲಿ ಪ್ರಧಾನಿ ಮೋದಿಯವರನ್ನು ಬರಮಾಡಿಕೊಂಡ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಮತ್ತು ಅವರ ಪತ್ನಿ ಸಾರಾ ನೆತನ್ಯಾಹು, ಅತ್ಯಂತ ಆತ್ಮೀಯವಾಗಿ ಸ್ವಾಗತಿಸಿದರು. ಈ ಸಂದರ್ಭದಲ್ಲಿ ಇಬ್ಬರು ನಾಯಕರ ವಸ್ತ್ರವಿನ್ಯಾಸದ ನಡುವಿನ ಸಾಮ್ಯತೆಯು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಸಾರಾ ವಸ್ತ್ರಕ್ಕೆ ಮೋದಿ ಪಾಕೆಟ್ ಸ್ಕ್ವೇರ್ ಮ್ಯಾಚಿಂಗ್!
ಸಾಂಪ್ರದಾಯಿಕ ಬಿಳಿ ಕುರ್ತಾ, ಪೈಜಾಮಾ ಮತ್ತು ಜಾಕೆಟ್ ಧರಿಸಿದ್ದ ಪ್ರಧಾನಿ ಮೋದಿ, ಕೇಸರಿ ಬಣ್ಣದ ಪಾಕೆಟ್ ಸ್ಕ್ವೇರ್ (Pocket Square) ಧರಿಸಿದ್ದರು. ವಿಶೇಷವೆಂದರೆ, ನೆತನ್ಯಾಹು ಅವರ ಪತ್ನಿ ಸಾರಾ ಅವರು ಕೂಡ ಅದೇ ಬಣ್ಣದ ಜಾಕೆಟ್ ಧರಿಸಿದ್ದರು. ಇದನ್ನು ಗಮನಿಸಿದ ನೆತನ್ಯಾಹು, “ನನ್ನ ಪತ್ನಿ ಏನು ಧರಿಸಿದ್ದಾರೆ ನೋಡಿ” ಎಂದು ಮೋದಿಯವರಿಗೆ ತಮಾಷೆಯಾಗಿ ತೋರಿಸಿದರು. ಇದಕ್ಕೆ ನಗುಮುಖದಿಂದಲೇ ಪ್ರತಿಕ್ರಿಯಿಸಿದ ಮೋದಿ, “ಹೌದು, ಇದು ಕೇಸರಿ ಬಣ್ಣ” ಎಂದು ಉತ್ತರಿಸಿದರು. ಈ ವಿಡಿಯೋ ಕ್ಲಿಪ್ ಈಗ ಇಂಟರ್ನೆಟ್ನಲ್ಲಿ ವೈರಲ್ ಆಗಿದ್ದು, ಉಭಯ ದೇಶಗಳ ನಡುವಿನ ಸ್ನೇಹಕ್ಕೆ ಈ ‘ಕೇಸರಿ ಬಣ್ಣ’ ಸಾಕ್ಷಿಯಾಗಿದೆ ಎಂದು ನೆಟ್ಟಿಗರು ಬಣ್ಣಿಸುತ್ತಿದ್ದಾರೆ.
ಭಾರತೀಯ ಉಡುಪಿನಲ್ಲಿ ಮಿಂಚಿದ ಇಸ್ರೇಲ್ ಪ್ರಧಾನಿ
ಮೋದಿ ಅವರ ಗೌರವಾರ್ಥ ಏರ್ಪಡಿಸಲಾಗಿದ್ದ ಭೋಜನಕೂಟಕ್ಕೂ ಮುನ್ನ ನೆತನ್ಯಾಹು ಅವರು ಮತ್ತೊಂದು ಅಚ್ಚರಿ ನೀಡಿದರು. ಅವರು ಸ್ವತಃ ಭಾರತೀಯ ಸಾಂಪ್ರದಾಯಿಕ ಉಡುಪನ್ನು ಧರಿಸಿ ಪ್ರಧಾನಿ ಮೋದಿಯವರನ್ನು ಬರಮಾಡಿಕೊಂಡರು. ಈ ಕುರಿತು ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ವಿಡಿಯೋ ಹಂಚಿಕೊಂಡ ನೆತನ್ಯಾಹು, “ನನ್ನ ಗೆಳೆಯ ಮೋದಿಯವರಿಗಾಗಿ ನಾನು ಭಾರತೀಯ ಉಡುಪು ಧರಿಸಿ ಅಚ್ಚರಿ ಮೂಡಿಸಿದೆ” ಎಂದು ಬರೆದುಕೊಂಡಿದ್ದಾರೆ. ಈ ‘ವಸ್ತ್ರ ರಾಜತಾಂತ್ರಿಕತೆ’ (Dress Diplomacy) ಉಭಯ ನಾಯಕರ ನಡುವಿನ ಗಾಢವಾದ ‘ಬ್ರೋಮ್ಯಾನ್ಸ್’ ಅನ್ನು ಜಗತ್ತಿಗೆ ಸಾರಿದೆ.
ಇಸ್ರೇಲ್ ಪ್ರಧಾನಿ ಖುದ್ದಾಗಿ ವಿಮಾನ ನಿಲ್ದಾಣಕ್ಕೆ ಬಂದು ಸ್ವಾಗತಿಸಿದ್ದು ಮತ್ತು ಭಾರತೀಯ ಸಂಸ್ಕೃತಿಗೆ ಗೌರವ ನೀಡಿದ್ದು ಭಾರತೀಯರ ಮನ ಗೆದ್ದಿದೆ. “ಕೇಸರಿ ನಾಡಿನಿಂದ ನಾವೀನ್ಯತೆಯ ನಾಡಿಗೆ ಬಂದ ನಾಯಕರು” ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಬಳಕೆದಾರರು ಈ ಭೇಟಿಯನ್ನು ಶ್ಲಾಘಿಸಿದ್ದಾರೆ. ಸಾರಾ ನೆತನ್ಯಾಹು ಅವರು ಕೂಡ ಭಾರತವು ಅದ್ಭುತ ದೇಶವಾಗಿದ್ದು, ಮತ್ತೊಮ್ಮೆ ಅಲ್ಲಿಗೆ ಭೇಟಿ ನೀಡುವ ಹಂಬಲವಿದೆ ಎಂದು ಹೇಳಿದ್ದಾರೆ.
ಇದನ್ನೂ ಓದಿ : ಮೈದಾನದಲ್ಲೇ ಕರ್ನಾಟಕದ ಆಟಗಾರನಿಗೆ ‘ಹೆಡ್ಬಟ್’ ಮಾಡಿದ ಪಾರಸ್ ಡೋಗ್ರಾಗೆ ದಂಡ
