ಆರ್‌ಸಿಬಿ ಚಾಂಪಿಯನ್: ಇಂದು ಬೆಂಗಳೂರಿನಲ್ಲಿ ಭವ್ಯ ವಿಜಯೋತ್ಸವ ಪರೇಡ್ ಭರವಸೆ ನೀಡಿದ ವಿರಾಟ್ ಕೊಹ್ಲಿ!

ಬೆಂಗಳೂರು,: 18 ವರ್ಷಗಳ ಸುದೀರ್ಘ ಕಾಯುವಿಕೆಗೆ ತೆರೆ ಎಳೆದು ಐತಿಹಾಸಿಕ ಐಪಿಎಲ್ 2025 ಟ್ರೋಫಿ ಗೆದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡದ ಸಂಭ್ರಮ ಮುಗಿಲು ಮುಟ್ಟಿದೆ. ಈ ಐತಿಹಾಸಿಕ ಗೆಲುವಿನ ನಂತರ, ಆರ್‌ಸಿಬಿಯ ಶಕ್ತಿ ವಿರಾಟ್ ಕೊಹ್ಲಿ ಅವರು ಬುಧವಾರ, ಜೂನ್ 4 ರಂದು ಬೆಂಗಳೂರಿನಲ್ಲಿ ಭವ್ಯ ವಿಜಯೋತ್ಸವ ಪರೇಡ್ ಆಯೋಜಿಸುವ ಭರವಸೆ ನೀಡಿದ್ದಾರೆ. ಅಹಮದಾಬಾದ್‌ನಲ್ಲಿ ಐಪಿಎಲ್ ಟ್ರೋಫಿ ಗೆದ್ದ ಕೆಲವೇ ಕ್ಷಣಗಳಲ್ಲಿ, ಅಭಿಮಾನಿಗಳೊಂದಿಗಿನ ತಮ್ಮ ಅಖಂಡ ಸಂಬಂಧವನ್ನು ನೆನಪಿಸಿಕೊಂಡ ಕೊಹ್ಲಿ, ಈ ವಿಶೇಷ ಆಚರಣೆಗೆ ಅಭಿಮಾನಿಗಳನ್ನು ಆಹ್ವಾನಿಸಿದ್ದಾರೆ.

ಭಾವನಾತ್ಮಕ ಕ್ಷಣಗಳು, ಐತಿಹಾಸಿಕ ಗೆಲುವು
ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ 6 ರನ್‌ಗಳ ರೋಚಕ ಗೆಲುವು ಸಾಧಿಸಿ ಆರ್‌ಸಿಬಿ ಕಪ್ ಗೆಲ್ಲುತ್ತಿದ್ದಂತೆ, ಕೊನೆಯ ಎಸೆತಕ್ಕೂ ಮುನ್ನವೇ ವಿರಾಟ್ ಕೊಹ್ಲಿ ಭಾವುಕರಾಗಿ ಕಣ್ಣೀರಿನಲ್ಲಿ ಮುಳುಗಿದ್ದರು. ಗೆಲುವಿನ ನಂತರ, ಕೊಹ್ಲಿ ತಮ್ಮ ಹಳೆಯ ಆರ್‌ಸಿಬಿ ಸಹ ಆಟಗಾರರಾದ ಎಬಿ ಡಿವಿಲಿಯರ್ಸ್ ಮತ್ತು ಕ್ರಿಸ್ ಗೇಲ್ ಜೊತೆಗೂಡಿ ಸಂಭ್ರಮಿಸಿದರು. ಫ್ರಾಂಚೈಸಿಯನ್ನು ಬೆಳೆಸಿದ ಈ ದಂತಕಥೆಗಳಿಗೆ ಗೌರವ ಸಲ್ಲಿಸಿದ ಕೊಹ್ಲಿ, ಡಿವಿಲಿಯರ್ಸ್ ಜೊತೆ ಭಾವುಕ ಆಲಿಂಗನ ಹಂಚಿಕೊಂಡರು. ನಂತರ ತಮ್ಮ ಪತ್ನಿ ಅನುಷ್ಕಾ ಶರ್ಮಾ ಅವರನ್ನು ಅಪ್ಪಿಕೊಂಡು ಸಂತಸಪಟ್ಟರು.

ಬೆಂಗಳೂರಿನಲ್ಲಿ ಸಂಭ್ರಮಾಚರಣೆಗೆ ಕೊಹ್ಲಿ ಉತ್ಸುಕ
ಜಿಯೋಸ್ಟಾರ್‌ಗೆ ನೀಡಿದ ಸಂದರ್ಶನದಲ್ಲಿ, ಕೊಹ್ಲಿ ಬೆಂಗಳೂರಿನಲ್ಲಿ ಅಭಿಮಾನಿಗಳೊಂದಿಗೆ ಆಚರಣೆಗೆ ಕಾತರದಿಂದ ಕಾಯುತ್ತಿರುವುದಾಗಿ ತಿಳಿಸಿದರು. ಆರ್‌ಸಿಬಿ ಗೆದ್ದ ನಂತರ ಬೆಂಗಳೂರಿನಾದ್ಯಂತ ಪಟಾಕಿಗಳು ಸಿಡಿಸಿ, ಸಂಭ್ರಮ ಪಡುತ್ತಿರುವ ವಿಡಿಯೋಗಳನ್ನು ನೋಡಿ ಅಚ್ಚರಿಗೊಂಡಿದ್ದಾಗಿ ಹೇಳಿದರು.

“ಇದು ಖಂಡಿತವಾಗಿಯೂ ವಿಶೇಷವಾಗಿರಲಿದೆ” ಎಂದು ಹೇಳಿದ ಕೊಹ್ಲಿ, ಡಿವಿಲಿಯರ್ಸ್ ಮತ್ತು ಗೇಲ್ ಅವರನ್ನು ಕೂಡ ಈ ಆಚರಣೆಯಲ್ಲಿ ಭಾಗಿಯಾಗುವಂತೆ ಆಹ್ವಾನಿಸಿದರು. ಕ್ರಿಸ್ ಗೇಲ್ ಕೂಡ ಬುಧವಾರ ಬೆಂಗಳೂರಿನಲ್ಲಿ ವಿಜಯೋತ್ಸವ ಪರೇಡ್ ಆಯೋಜಿಸಲಾಗುವುದು ಎಂದು ದೃಢಪಡಿಸಿದರು.

ಅಭಿಮಾನಿಗಳ ಬದ್ಧತೆಗೆ ಕೊಹ್ಲಿ ಗೌರವ
“ನಗರ ಕಾಯುತ್ತಿದೆ. ದೇವರೇ, ಅಭಿಮಾನಿಗಳು ಈಗ ಏನು ಅನುಭವಿಸುತ್ತಿರಬಹುದು ಎಂದು ಯೋಚಿಸುತ್ತಿದ್ದೇನೆ. ಯಾರೋ ಒಂದು ವೀಡಿಯೊ ಕಳುಹಿಸಿದ್ದಾರೆ. ಇಡೀ ನಗರ ಫಟಾಕಿಗಳಿಂದ ತುಂಬಿದೆ. ಇದು ತುಂಬಾ ವಿಶೇಷ. ನನ್ನ ಭಾವನೆಗಳನ್ನು ವ್ಯಕ್ತಪಡಿಸಲು ಸಾಧ್ಯವಿಲ್ಲ. ನಾನು ಇದನ್ನು ಅನುಭವಿಸಬೇಕು,” ಎಂದು ಕೊಹ್ಲಿ ಅಭಿಮಾನಿಗಳೊಂದಿಗಿನ ತಮ್ಮ ಆಳವಾದ ಬಾಂಧವ್ಯವನ್ನು ಸ್ಮರಿಸಿದರು. 18 ವರ್ಷಗಳಿಂದ ಆರ್‌ಸಿಬಿಯೊಂದಿಗೆ ಇರುವ ಏಕೈಕ ಆಟಗಾರನಾಗಿರುವ ಕೊಹ್ಲಿ, ಕಠಿಣ ಕಾಲದಲ್ಲೂ ಅಭಿಮಾನಿಗಳು ತಂಡದೊಂದಿಗೆ ನಿಷ್ಠರಾಗಿ ನಿಂತಿದ್ದೇ ತಾವು ಆರ್‌ಸಿಬಿಯನ್ನು ಬಿಟ್ಟು ಹೋಗದಿರಲು ಕಾರಣ ಎಂದು ಹೇಳಿದರು.

ಈ ಗೆಲುವು ನಮಗಿಂತ ಅಭಿಮಾನಿಗಳಿಗೆ ಹೆಚ್ಚು. ಕೆಟ್ಟ ಋತುಗಳಲ್ಲೂ, ಉತ್ತಮ ಋತುಗಳಲ್ಲೂ ಅಭಿಮಾನಿಗಳು ಆರ್‌ಸಿಬಿಯೊಂದಿಗೆ ಇದ್ದಾರೆ. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಪ್ರತಿ ಬಾರಿಯೂ ಅವರು ತಂಡವನ್ನು ಬೆಂಬಲಿಸಿದ್ದಾರೆ. ಇಂತಹ ನಿಷ್ಠೆಯನ್ನು ನಾನು ಎಲ್ಲಿಯೂ ನೋಡಿಲ್ಲ. ಇದೇ ಕಾರಣಕ್ಕೆ ನಾನು ಆರ್‌ಸಿಬಿಯಿಂದ ಎಂದಿಗೂ ಬೇರೆಯಾಗಲಿಲ್ಲ. ಈ ಗೆಲುವು ಇದಕ್ಕಾಗಿಯೇ ವಿಶೇಷವಾಗಿದೆ,” ಎಂದು ಕೊಹ್ಲಿ ಭಾವುಕವಾಗಿ ನುಡಿದರು.

ಟೀಕೆಗಳಿಂದ ಬಲಿಷ್ಠವಾದ ತಂಡದ ಬಾಂಧವ್ಯ
ವರ್ಷಗಳಿಂದ ತಂಡ ಮತ್ತು ಅಭಿಮಾನಿಗಳು ಎದುರಿಸಿದ ಟ್ರೋಲಿಂಗ್‌ಗಳು ಮತ್ತು ಗೇಲಿಗಳು ತಂಡದ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸಿತು ಎಂದು ಕೊಹ್ಲಿ ತಿಳಿಸಿದರು. “ನಾನು ಸಾಕಷ್ಟು ಒತ್ತಡವನ್ನು ಎದುರಿಸಿದ್ದೇನೆ. ‘ಆರ್‌ಸಿಬಿ ಇದು, ಆರ್‌ಸಿಬಿ ಅದು’ ಎಂಬ ಟೀಕೆಗಳನ್ನು ಕೇಳಿದ್ದೇನೆ. ಇದೆಲ್ಲವೂ ಪಯಣದ ಭಾಗವಾಗಿತ್ತು. ಜನರು ನಮ್ಮನ್ನು ಟ್ರೋಲ್ ಮಾಡಿದ್ದಾರೆ, ಗೇಲಿ ಮಾಡಿದ್ದಾರೆ. ಆದರೆ ಇದು ನಮ್ಮನ್ನು ಬಲಿಷ್ಠಗೊಳಿಸಿತು.

ತಂಡವಾಗಿ, ಫ್ರಾಂಚೈಸಿಯಾಗಿ ನಮ್ಮನ್ನು ಹತ್ತಿರವಾಗಿಸಿತು. ಅಭಿಮಾನಿಗಳು ಮತ್ತು ಆರ್‌ಸಿಬಿಯ ನಡುವಿನ ಚಿನ್ನದ ಬಾಂಧವ್ಯವು ಈ ಸವಾಲುಗಳ ಮೂಲಕ ರೂಪುಗೊಂಡಿತು. ಇಂದು ರಾತ್ರಿ, ನಾನು ಶಾಂತಿಯಿಂದ ನಿದ್ದೆ ಮಾಡುವೆ. ಇದು ರಾತ್ರಿಯಿಡೀ ಪಾರ್ಟಿಯ ರಾತ್ರಿಯಲ್ಲ, ಕೇವಲ ಶಾಂತಿಯ ರಾತ್ರಿ,” ಎಂದು ಕೊಹ್ಲಿ ಹೇಳಿಕೊಂಡರು.

ಈ ಸಲ ಕಪ್ ನಮ್ದು!”
ಜೂನ್ 4 ರಂದು ಬೆಂಗಳೂರಿನ ಬೀದಿಗಳಲ್ಲಿ ನಡೆಯಲಿರುವ ವಿಜಯೋತ್ಸವ ಪರೇಡ್‌ನಲ್ಲಿ, ಆರ್‌ಸಿಬಿ ತನ್ನ ಅಸಂಖ್ಯಾತ ಅಭಿಮಾನಿಗಳೊಂದಿಗೆ ಈ ಐತಿಹಾಸಿಕ ಕ್ಷಣವನ್ನು ಆಚರಿಸಲಿದೆ. “ಈ ಸಲ ಕಪ್ ನಮ್ದೇ” ಎಂಬ ವರ್ಷಗಳ ಘೋಷಣೆ ಈಗ “ಈ ಸಲ ಕಪ್ ನಮ್ದು” ಎಂಬ ವಾಸ್ತವಕ್ಕೆ ತಿರುಗಿದೆ.