ಬೆಂಗಳೂರು : ನೀವು ಪಂಜಾಬ್ ನ್ಯಾಷನಲ್ ಬ್ಯಾಂಕ್ನಲ್ಲಿ ಖಾತೆ ಹೊಂದಿದ್ದೀರಾ? ಅದರಲ್ಲಿ ಹಣವನ್ನೂ ಇಟ್ಟಿದ್ದೀರಾ? ಹಾಗಾದರೆ, ಈ ಸುದ್ದಿ ನಿಮಗಾಗಿ. ಪಂಜಾಬ್ ನ್ಯಾಷನಲ್ ಬ್ಯಾಂಕ್ನಲ್ಲಿ ಖಾತೆ ಹೊಂದಿದವರು ಏಪ್ರಿಲ್ 15ರೊಳಗೆ ಕೆವೈಸಿ ಅಪ್ಡೇಟ್ ಮಾಡಬೇಕು. ಇಲ್ಲದಿದ್ದರೆ, ಅಂತಹ ಖಾತೆಗಳನ್ನು ನಿಷ್ಕ್ರಿಯಗೊಳಿಸಲಾಗುತ್ತದೆ ಎಂದು ಬ್ಯಾಂಕ್ ಆಡಳಿತ ಮಂಡಳಿಯು ಎಚ್ಚರಿಕೆ ನೀಡಿದೆ. ಹಾಗಾಗಿ, ಖಾತೆದಾರರು ನಿಗದಿತ ಗಡುವಿನೊಳಗೆ ಕೆವೈಸಿ ಪ್ರಕ್ರಿಯೆ ಮುಗಿಸಬೇಕಿದೆ.
ನೀವು ಕಳೆದ 3ಕ್ಕೂ ಹೆಚ್ಚು ವರ್ಷಗಳಿಂದ ಪಂಜಾಬ್ ನ್ಯಾಷನಲ್ ಬ್ಯಾಂಕಿನ ನಿಮ್ಮ ಖಾತೆಯಲ್ಲಿ ಯಾವುದೇ ವ್ಯವಹಾರ ಮಾಡದಿದ್ದರೆ, ಅಂತಹ ಖಾತೆಗಳನ್ನು ‘ಇನ್ ಆಪರೇಟಿವ್’ (Inoperative) ಎಂದು ಪರಿಗಣಿಸಲಾಗುತ್ತದೆ. ಯಾವ ಖಾತೆಗಳಲ್ಲಿ ಕಳೆದ 3 ವರ್ಷಗಳಿಂದ ಯಾವುದೇ ವ್ಯವಹಾರ ನಡೆದಿಲ್ಲವೋ ಮತ್ತು ಬ್ಯಾಲೆನ್ಸ್ ಶೂನ್ಯ (Zero Balance) ಇದೆಯೋ ಅಂತಹ ಖಾತೆಗಳನ್ನು ಏಪ್ರಿಲ್ 16ರಿಂದ ರದ್ದುಗೊಳಿಸಲಾಗುವುದು ಎಂದು ಬ್ಯಾಂಕ್ ತಿಳಿಸಿದೆ.
ನಿಮಗೆ ಆ ಖಾತೆ ಮುಂದುವರಿಸಲು ಇಷ್ಟವಿದ್ದರೆ, ಏಪ್ರಿಲ್ 15 ರ ಒಳಗೆ ಕಡ್ಡಾಯವಾಗಿ KYC ಅಪ್ ಡೇಟ್ ಮಾಡಬೇಕು ಅಥವಾ ಕನಿಷ್ಠ ಒಂದು ವ್ಯವಹಾರ (ಹಣ ಜಮಾ ಅಥವಾ ಡ್ರಾ) ಮಾಡಬೇಕು ಎಂದು ಬ್ಯಾಂಕ್ ತಿಳಿಸಿದೆ. ಹಾಗಾಗಿ, ಬ್ಯಾಂಕ್ ನಲ್ಲಿ ಖಾತೆ ಹೊಂದಿದವರು ಕೆವೈಸಿ ಪೂರ್ಣಗೊಳಿಸಬೇಕು. ಒಂದು ವೇಳೆ ನೀವು ಸ್ವತಃ ನಿಮ್ಮ ಖಾತೆಯನ್ನು ಶಾಶ್ವತವಾಗಿ ಮುಚ್ಚಲು ಬಯಸಿದರೆ, ಈ ಕೆಳಗಿನ ಕ್ರಮಗಳನ್ನು ಅನುಸರಿಸಬೇಕು.
- ಬ್ಯಾಂಕ್ ಗೆ ಭೇಟಿ ನೀಡಿ : ಖಾತೆ ಮುಚ್ಚುವ ಪ್ರಕ್ರಿಯೆ ಆನ್ ಲೈನ್ ನಲ್ಲಿ ಲಭ್ಯವಿಲ್ಲ. ನಿಮ್ಮ ‘ಹೋಮ್ ಬ್ರಾಂಚ್’ಗೆ (ಖಾತೆ ಇರುವ ಶಾಖೆ) ಹೋಗಬೇಕು.
- ಅರ್ಜಿ ಸಲ್ಲಿಸಿ : ಬ್ಯಾಂಕ್ನಲ್ಲಿ ಸಿಗುವ ‘Account Closure Form’ ಭರ್ತಿ ಮಾಡಿ ಸಲ್ಲಿಸಿ.
- ದಾಖಲೆಗಳು : ನಿಮ್ಮ ಆಧಾರ್ ಕಾರ್ಡ್ ಅಥವಾ ಪಾನ್ ಕಾರ್ಡ್ ಪ್ರತಿ ನೀಡಿ.
- ಸಲ್ಲಿಕೆ : ನಿಮ್ಮ ಬಳಿ ಇರುವ ಚೆಕ್ ಬುಕ್, ಪಾಸ್ ಬುಕ್ ಮತ್ತು ಡೆಬಿಟ್ ಕಾರ್ಡ್ ಅನ್ನು ಬ್ಯಾಂಕ್ ಗೆ ವಾಪಸ್ ನೀಡಬೇಕಾಗುತ್ತದೆ.
ಇದನ್ನೂ ಓದಿ : ಅಸ್ಸಾಂ ಸಿಎಂ ಪತ್ನಿ ವಿರುದ್ಧ ಪಾಸ್ಪೋರ್ಟ್ ಆರೋಪ – ಕಾಂಗ್ರೆಸ್ ನಾಯಕ ಪವನ್ ಖೇರಾ ನಿವಾಸಕ್ಕೆ ಪೊಲೀಸರ ಲಗ್ಗೆ!
