ನವದೆಹಲಿ: ಖಗೋಳಾಸಕ್ತರಿಗೆ ರಸದೌತಣ ಉಣಬಡಿಸುವ ಮತ್ತೊಂದು ಖಗೋಳ ಕೌತುಕ ಇಂದು ಘಟಿಸಲಿದೆ. 2025ನೇ ಸಾಲಿನ ಕೊನೆಯ ಸೂರ್ಯಗ್ರಹಣವು ಇಂದು (ಭಾನುವಾರ, ಸೆಪ್ಟೆಂಬರ್ 21) ರಾತ್ರಿ ಸಂಭವಿಸಲಿದೆ. ಇದು ಭಾಗಶಃ ಸೂರ್ಯಗ್ರಹಣವಾಗಿದ್ದು, ಭೂಮಿ, ಚಂದ್ರ ಮತ್ತು ಸೂರ್ಯನ ಸ್ಥಾನದಲ್ಲಿನ ಸಣ್ಣ ಬದಲಾವಣೆಯಿಂದಾಗಿ ಚಂದ್ರನು ಸೂರ್ಯನ ಒಂದು ಭಾಗವನ್ನು ಮಾತ್ರ ಮರೆಮಾಚಲಿದ್ದಾನೆ.
ಗ್ರಹಣದ ಸಮಯ ಮತ್ತು ಅವಧಿ
ಭಾರತೀಯ ಕಾಲಮಾನದ ಪ್ರಕಾರ, ಈ ಗ್ರಹಣವು ಇಂದು ರಾತ್ರಿ 10:59ಕ್ಕೆ ಆರಂಭವಾಗಲಿದೆ. ಸುಮಾರು ನಾಲ್ಕು ಗಂಟೆಗಳಿಗೂ ಹೆಚ್ಚು ಕಾಲ ನಡೆಯುವ ಈ ಗ್ರಹಣವು ತಡರಾತ್ರಿ 01:11ಕ್ಕೆ ಗರಿಷ್ಠ ಮಟ್ಟ ತಲುಪಿ, ನಾಳೆ ಬೆಳಗಿನ ಜಾವ ಅಂದಾಜು 03:23ಕ್ಕೆ ಕೊನೆಗೊಳ್ಳಲಿದೆ.
ಎಲ್ಲೆಲ್ಲಿ ಗ್ರಹಣ ಗೋಚರ?
ಈ ಭಾಗಶಃ ಸೂರ್ಯಗ್ರಹಣವು ಮುಖ್ಯವಾಗಿ ದಕ್ಷಿಣ ಗೋಳಾರ್ಧದ ದೇಶಗಳಲ್ಲಿ ಗೋಚರಿಸಲಿದೆ. ಆಸ್ಟ್ರೇಲಿಯಾ, ನ್ಯೂಜಿಲೆಂಡ್, ಅಂಟಾರ್ಕ್ಟಿಕಾದ ಕೆಲವು ಭಾಗಗಳು ಮತ್ತು ಪೆಸಿಫಿಕ್ ದ್ವೀಪಸಮೂಹಗಳಲ್ಲಿನ ಜನರು ಈ ಖಗೋಳ ವಿದ್ಯಮಾನವನ್ನು ವೀಕ್ಷಿಸಬಹುದು. ಫುನಾಫುಟಿ (ತುವಾಲು), ಅಪಿಯಾ (ಸಮೋವಾ), ಸುವಾ (ಫಿಜಿ), ಆಕ್ಲೆಂಡ್ (ನ್ಯೂಜಿಲೆಂಡ್), ವೆಲ್ಲಿಂಗ್ಟನ್ (ನ್ಯೂಜಿಲೆಂಡ್), ಸಿಡ್ನಿ (ಆಸ್ಟ್ರೇಲಿಯಾ), ಕ್ಯಾನ್‌ಬೆರಾ (ಆಸ್ಟ್ರೇಲಿಯಾ), ಮತ್ತು ಹೋಬಾರ್ಟ್ (ಆಸ್ಟ್ರೇಲಿಯಾ) ಸೇರಿದಂತೆ ಹಲವು ನಗರಗಳಲ್ಲಿ ಗ್ರಹಣ ಗೋಚರಿಸಲಿದೆ.
ಭಾರತದಲ್ಲಿ ಕಾಣಿಸುವುದೇ?
ದುರದೃಷ್ಟವಶಾತ್, ಈ ಭಾಗಶಃ ಸೂರ್ಯಗ್ರಹಣವು ಭಾರತ ಸೇರಿದಂತೆ ಉತ್ತರ ಗೋಳಾರ್ಧದ ಹೆಚ್ಚಿನ ಭಾಗಗಳಲ್ಲಿ ಗೋಚರಿಸುವುದಿಲ್ಲ. ಗ್ರಹಣದ ಸಮಯ ಮತ್ತು ಅದರ ವೀಕ್ಷಣಾ ಪಥವು ಇದಕ್ಕೆ ಕಾರಣವಾಗಿದೆ.
ವೀಕ್ಷಣೆಗೆ ಎಚ್ಚರಿಕೆ
ಖಗೋಳ ವಿಜ್ಞಾನಿಗಳು, ಗ್ರಹಣವನ್ನು ಬರಿಗಣ್ಣಿನಿಂದ ನೋಡಬಾರದು ಎಂದು ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದ್ದಾರೆ. ಭಾಗಶಃ ಗ್ರಹಣದ ಸಂದರ್ಭದಲ್ಲೂ ಸೂರ್ಯನ ಕಿರಣಗಳು ಕಣ್ಣಿಗೆ ತೀವ್ರ ಹಾನಿ ಉಂಟುಮಾಡುವ ಸಾಧ್ಯತೆ ಇರುತ್ತದೆ. ಇದನ್ನು ವೀಕ್ಷಿಸಲು ಸೂಕ್ತವಾದ ಸೋಲಾರ್ ಕನ್ನಡಕಗಳನ್ನೇ ಬಳಸಬೇಕು. ಸಾಮಾನ್ಯ ಸನ್‌ಗ್ಲಾಸ್‌ಗಳು ಸುರಕ್ಷಿತವಲ್ಲ ಎಂದು ತಜ್ಞರು ಸ್ಪಷ್ಟಪಡಿಸಿದ್ದಾರೆ.
