ಇದು ಯಾಕೋ ಹಾವೂ ಸಾಯ್ತಿಲ್ಲ, ಕೋಲೂ ಮುರೀತಿಲ್ಲ ಎನ್ನುವಂಥಾಗಿದೆ. ಇತ್ತ ಇರಾನ್ ಶರಣಾಗ್ತಿಲ್ಲ. ಅತ್ತ ಇಸ್ರೇಲ್ ಬೆಂಕಿಯುಂಡೆ ಕಾರುವುದನ್ನು ನಿಲ್ಲಿಸುತ್ತಿಲ್ಲ. ಸಾಲದ್ದಕ್ಕೀಗ ವಿಶ್ವದ ಹಿರಿಯಣ್ಣ ಅಮೆರಿಕ ಎಂಟ್ರಿ ಕೊಟ್ಟಿರೋದು, ಜಗತ್ತಿನ ಮೂರನೇ ಮಹಾಯುದ್ಧದ ನಗಾರಿ ಬಾರಿಸಿದೆ.
ಯೆಸ್, ಇರಾನ್-ಇಸ್ರೇಲ್ ನಡುವಿನ ಕಲಹವೀಗ ಜಾಗತಿಕವಾಗಿ ಪರಿವರ್ತನೆಯಾಗಿದೆ. ಎರಡು ದೇಶಕ್ಕೆ ಸೀಮಿತವಾಗಿದ್ದ ಕದನದಲ್ಲೀಗ ಮೂರನೇ ಶಕ್ತಿಯ ಪ್ರವೇಶದೊಂದಿಗೆ ಜಗತ್ತಿನ ಚಿತ್ರಣವನ್ನೇ ಬದಲಿಸೋ ಸುಳಿವು ನೀಡುತ್ತಿದೆ.
ಶರಣಾಗಿ ಇಲ್ಲದಿದ್ರೆ ನಾನೇನು ಮಾಡ್ತಿನೋ ನನಗೇ ಗೊತ್ತಿಲ್ಲ
ಖಮೇನಿಗೆ ಕಟ್ಟ ಕಡೆಯ ಸಂದೇಶ ರವಾನಿಸಿದ ಟ್ರಂಪ್
ಮೊನ್ನೆಯವರೆಗೂ ಒಂದು ಲೆಕ್ಕ, ನಿನ್ನೆಯಿಂದಲೇ ಹೊಸ ಲೆಕ್ಕ ಎನ್ನುವಂತಾಗಿದೆ ಇಸ್ರೇಲ್-ಇರಾನ್ ಕದನದ ಕಹಾನಿ. ತನ್ನ ಸಾಕು ಮಗನಂತಿರುವ ಇಸ್ರೇಲ್ ನ್ನು ಬಿಟ್ಟು ಕೊಡಲು ಅಮೆರಿಕ ಸುತಾರಾಮ್ ತಯಾರಿಲ್ಲ. ಮಧ್ಯ ಪ್ರಾಚ್ಯದಲ್ಲಿ ಅಮೆರಿಕದ ಕಣ್ಣಾಗಿ ದುಡಿಯುತ್ತಿರುವ ಇಸ್ರೇಲ್ ಪರ ಅಮೆರಿಕ ನಿಲ್ಲಬೇಕಿರುವುದು ಅದರ ರಾಜಧರ್ಮ.
ಹೀಗಾಗಿಯೇ ಇರಾನಿಗಳಿಗೆ ಸ್ಪಷ್ಟ ಸಂದೇಶ ನೀಡಿದ್ದ ಟ್ರಂಪ್ ಬೇಷರತ್ ಶರಣಾಗುವಂತೆ ಶರಾ ಬರೆದಿದ್ದರು. ಆದರೆ ಇದಕ್ಕೊಪ್ಪದ ಇರಾನ್ ಸರ್ವೋಚ್ಚ ನಾಯಕ ಖಮೇನಿ, ನಮ್ಮನ್ನು ಹೆದರಿಸುವ ತಪ್ಪು ಮಾಡದಿರಿ, ಆ ತಪ್ಪಿಗೆ ನೀವೂ ಬೆಲೆತೆರಬೇಕಾದೀತು ಅಂತಾ ನೇರವಾಗಿ ಅಮೆರಿಕಗೇ ಠಕ್ಕರ್ ನೀಡಿದ್ದಾರೆ. ಇದರಿಂದ ಕೆರಳಿರುವ ದೊಡ್ಡಣ್ಣ ಟ್ರಂಪ್, ನಾಳೆ ನಾನೇನು ಮಾಡ್ತೀನಿ ಅಂತಾ ನನಗೇ ಗೊತ್ತಿಲ್ಲ. ಆಟ ನಿಲ್ಲಿಸಿ ಇಲ್ಲದಿದ್ರೆ ಖೇಲ್ ಖತಂ ಅಂತಾ ಅಂತಿಮ ಚರಣದ ಮೊದಲ ಅಧ್ಯಾಯ ಬರೆದಿದ್ದಾರೆ.
14 ಸಾವಿರ ಕೆಜಿ ಬಾಂಬ್ ಟೆಹ್ರಾನ್ ಉಡೀಸ್ ಮಾಡುತ್ತಾ
ಇರಾನ್ ಸರ್ವನಾಶಕ್ಕೆ ಸ್ಫೋಟಿಸಲಿದೆಯಾ ಅಣ್ವಸ್ತ್ರ
ಇಸ್ರೇಲ್ ಸಾರಿರುವ ಸಮರ ಟ್ರಂಪ್ ಆಗಮನದೊಟ್ಟಿಗೆ ಬೇರೆಯದ್ದೇ ತಿರುವನ್ನು ಪಡೆದಿದೆ. ಇರಾನ್ ಇತಿಹಾಸದ ಪುಟದಿಂದಲೇ ಗಾಯಬ್ ಆಗಿಬಿಡುತ್ತಾ ಅನ್ನೋ ಪ್ರಶ್ನೆಯೊಂದು ಮೂಡುತ್ತಿದೆ. ಈಗಾಗಲೇ ಇಸ್ರೇಲ್ ಕೂಡ ಅಮೆರಿಕದಿಂದ 14 ಸಾವಿರ ಕೆಜಿ ಸಾಮೂಹಿಕ ವಿನಾಶದ ಅಸ್ತ್ರಕ್ಕೆ ಡಿಮ್ಯಾಂಡ್ ಮಾಡಿದೆ. ಇನ್ನೊಂದೆಡೆ ಟ್ರಂಪ್ ನೇರವಾಗಿ ಇರಾನಿಗಳಿಗೆ ಟೆಹ್ರಾನ್ ತೊರೆಯಿರಿ ಅಂತಾ ಕಟ್ಟಪ್ಪಣೆ ಮಾಡಿದ್ದಾರೆ. ಹಾಗಿದ್ರೆ ಎರಡನೇ ವಿಶ್ವಯುದ್ಧದ ಚಹರೆಯನ್ನೇ ಬದಲಿಸಿ ಜಪಾನಿಯರು ಮಂಡಿಯೂರುವಂತೆ ಮಾಡಿದ್ದ ಅಣ್ವಸ್ತ್ರ ಈ ಬಾರಿ ಇರಾನ್ ಗೆ ಮರಣಶಯ್ಯೆ ಬರೆಯುತ್ತಾ ಅನ್ನೋ ಗುಮಾನಿ ಕೂಡಾ ಇದೇ.
ಅಂದು ಸದ್ದಾ ಹುಸೇನ್, ಇಂದು ಖಮೇನಿ
ಈ ಇರಾನ್-ಇರಾಕ್ ಕಾರಣವಲ್ಲದ ಕಾರಣಕ್ಕೆ ಜಗತ್ತಿನ ಮುಂದೆ ಹಟಕ್ಕೆ ಬಿದ್ದು ತಮ್ಮತನದಲ್ಲಿ ಬೆತ್ತಲಾದವರೇ. ಅಂದು ಇರಾಕ್ ನ ಸರ್ವಾಧಿಕಾರಿ ಸದ್ದಾಹುಸೇನ್ ಕೂಡಾ ಅಮೆರಿಕವನ್ನು ಎದುರು ಹಾಕಿಕೊಂಡು ಸಾಮ್ರಾಜ್ಯಶಾಹಿತ್ವ ನಡೆಸಲು ಹೋಗಿ ಬೀದಿ ಹೆಣವಾಗಿದ್ದು ಇತಿಹಾಸ. ರಾಜಾಧಿರಾಜನಂತೆ ಮೆರೆದ ಸದ್ದಾಂ ತನ್ನ ಕಡೆಯ ದಿನಗಳನ್ನ ಹೆಗ್ಗಣದಂತೆ ಬಿಲದಲ್ಲಿ ಕಳೆದು, ತೀರಾ ಹೀನಾತಿ ಹೀನ ರೀತಿಯಲ್ಲಿ ಸಾವನಪ್ಪಿದ್ದು ಓರ್ವ ಸರ್ವಾಧಿಕಾರತ್ವದ ಮನುಷ್ಯನ ಅಂತ್ಯದ ಧ್ಯೋತಕವಾಗಿದೆ. ಅದೇ ಮಾದರಿಯಲ್ಲೇ ಇದೀಗ ಇರಾನಿನ ಸುಪ್ರೀಂ ಲೀಡರ್ ಖಮೇನಿ ಬದುಕೂ ಇನ್ನಿಲ್ಲದಾಗುತ್ತಾ.
ಹಠಕ್ಕೆ ಬಿದ್ದು ಕಾಳಗಕ್ಕಿಳಿದಿರುವ ಖಮೇನಿ ಸದ್ಯಕ್ಕೆ ಚೀನಾ,ಪಾಕಿಸ್ತಾನ, ರಷ್ಯಾದ ಆಂತರಿಕ ಬೆಂಬಲದ ನಿರೀಕ್ಷೆಯಲ್ಲಿದ್ದಾನೆ. ಒಂದೊಮ್ಮೆ ಇರಾನ್ ಪರ ಅನ್ಯರು ಬೆಂಬಲಕ್ಕೆ ನಿಂತ್ರೆ, ಆಗ ಅಮೆರಿಕದ ನಡೆ ತೀವ್ರ ಕುತೂಹಲ ಮೂಡಿಸುತ್ತೆ. ಅಷ್ಟೇ ಅಲ್ಲಾ ಇಸ್ರೇಲ್ ಸಾರಿರುವ ಸಮರ ಜಾಗತಿಕ ಸಮರವಾಗಿ ಮಾರ್ಮಾಡಾಗೋ ಮೂಲಕ ಕ್ಷಿತಿಜಯದಲ್ಲಿ ಮೂರನೇ ವಿಶ್ವ ಯುದ್ಧದ ಕಾರ್ಮೋಡವನ್ನು ಆವರಿಸುವಂತೆ ಮಾಡಲಿದೆ, ಅಲ್ಲಿಗೆ, ಹಠಕ್ಕೆ ಬಿದ್ದವರ ಹಪಹಪಿ ಮತ್ತೊಮ್ಮೆ ಲಕ್ಷಾಂತರ ಅಮಾಯಕ ಜೀವಗಳನ್ನು ಬಲಿಪೀಠಕ್ಕೇರಿಸೋ ಕಾಲ ಸನ್ನಿಹಿತವಾಗ್ತಿದೆ.
