ಕರಾಚಿ: ಶತೃ ರಾಷ್ಟ್ರ ಪಾಕ್ ಆರ್ಥಿಕವಾಗಿ ದಿವಾಳಿಯಾಗಿದೆ. ಅಲ್ಲಿನ ಜನರು ಹೊಟ್ಟೆ-ಬಟ್ಟೆಗೆ ಪರಿತಪಿಸುತ್ತಿದ್ದಾರೆ. ಈ ಮಧ್ಯೆ ಬೃಹತ್ ಬಟ್ಟೆ ಮಾರಾಟ ಮಳಿಗೆಯನ್ನು ಉದ್ಘಾಟನೆಯಾದ ಕೆಲವೇ ಗಂಟೆಗಳಲ್ಲಿ ಅಲ್ಲಿನ ಜನರು ಗೂಡಿಸಿ ಗುಂಡಾಂತರ ಮಾಡಿರುವ ಘಟನೆ ನಡೆದಿದೆ.
ಕರಾಚಿಯ ಗುಲಿಸ್ತಾನ್ ಎ ಜೋಹರ್ ಎಂಬ ಸ್ಥಳದಲ್ಲಿ ಈ ಘಟನೆ ನಡೆದಿದೆ. ಡ್ರೀಮ್ ಬಜಾರ್ ಶುಕ್ರವಾರ ಉದ್ಘಾಟನೆಯಾಗಿತ್ತು. ಉದ್ಘಾಟನೆಯಾದ ಮೊದಲ ದಿನ ಪಾಕಿಸ್ತಾನದ ಕರೆನ್ಸಿಯ 50 ರೂ.ಗೂ ಕಡಿಮೆ ದರದಲ್ಲಿ ಬಟ್ಟೆಗಳನ್ನು ಮಾರಾಟ ಮಾಡುವುದಾಗಿ ಈ ಮಾಲ್ ಹೇಳಿತ್ತು. ಆದರೆ, ಈ ವೇಳೆ ಗದ್ದಲ ಉಂಟಾಗಿ, ಅಂಗಡಿಯನ್ನು ದೋಚಲಾಗಿದೆ.
ಪಾಕಿಸ್ತಾನದ ಮೊದಲ ಮಿತವ್ಯಯದ ಮೆಗಾ ಮಳಿಗೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ‘ಡ್ರೀಮ್ ಬಜಾರ್’ ಕುರಿತು ವ್ಯಾಪಕ ಪ್ರಚಾರ ನಡೆಸಲಾಗಿತ್ತು. ತನಗೆ ಸರಿಸಾಟಿಯಿಲ್ಲದ ದರದಲ್ಲಿ ಉಡುಪುಗಳು, ಸಾಧನ ಸಲಕರಣೆಗಳು ಮತ್ತು ಗೃಹೋಪಯೋಗಿ ಉತ್ಪನ್ನಗಳನ್ನು ಮಾರಾಟ ಮಾಡಲಾಗುವುದು ಎಂದು ಹೇಳಿತ್ತು. ಹೀಗಾಗಿ ಆಪಾರ ಸಂಖ್ಯೆಯಲ್ಲಿ ಜನರು ಉದ್ಘಾಟನೆಯ ದಿನ ಆಗಮಿಸಿದ್ದರು. ತಳ್ಳಾಟ- ನೂಕಾಟಗಳ ನಡುವೆ ಜನರನ್ನು ನಿಯಂತ್ರಿಸಲು ಸಾಧ್ಯವಾಗದೆ ಮಾಲ್ ನಿರ್ವಹಣಾ ಮಂಡಳಿ ಕಂಗಾಲಾಗಿ ನಿಂತಿತ್ತು. ಇದನ್ನೇ ಬಂಡವಾಳ ಮಾಡಿಕೊಂಡ ಜನರು ಕಳ್ಳತನ ಮಾಡಿದ್ದಾರೆ ಎನ್ನಲಾಗಿದೆ.
ಜನರ ಗುಂಪು ಕಂಡು ಗಾಬರಿಗೊಂಡ ಮಾಲ್ ಸಿಬ್ಬಂದಿ, ಅದರ ದ್ವಾರಗಳನ್ನು ಮುಚ್ಚಲು ಯತ್ನಿಸಿದ್ದರು. ದೊಣ್ಣೆಗಳನ್ನು ಬೀಸುತ್ತಾ ಬಂದ ಕೆಲವರು, ಅದರ ಗಾಜಿನ ಪ್ರವೇಶ ದ್ವಾರ ಪುಡಿಗಟ್ಟಿದ್ದರು ಎಂದು ಎಆರ್‌ವೈ ನ್ಯೂಸ್ ವರದಿಯಲ್ಲಿ ಹೇಳಿದೆ.
ಒಳಗೆ ನುಗ್ಗಿದ ಜನರು ಕೈಗೆ ಸಿಕ್ಕ ವಸ್ತುಗಳನ್ನು ದೋಚಿದ್ದಾರೆ. ಜತೆಗೆ ಅಲ್ಲಿದ್ದ ಪೀಠೋಪಕರಣಗಳು ಮತ್ತು ಸಾಮಗ್ರಿಗಳನ್ನು ಧ್ವಂಸಗೊಳಿಸಿದ್ದಾರೆ. ನೂರಾರು ಜನರು ಕಟ್ಟಡದ ಗಾಜುಗಳನ್ನು ಒಡೆದು ಒಳಗೆ ನುಗ್ಗುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ಕೇವಲ ಅರ್ಧ ಗಂಟೆಯಲ್ಲಿ ಅದರಲ್ಲಿದ್ದ ವಸ್ತುಗಳೆಲ್ಲ ಲೂಟಿಯಾಗಿವೆ. ಕೆಲವರು ಲೂಟಿ ಮಾಡುತ್ತಲೇ ತಮ್ಮ ಸಾಹಸವನ್ನು ಮೊಬೈಲ್ ಕ್ಯಾಮೆರಾಗಳಲ್ಲಿ ಚಿತ್ರೀಕರಿಸಿದ್ದಾರೆ. ವಿದೇಶದಲ್ಲಿದ್ದ ಪಾಕ್ ಮೂಲದ ಉದ್ಯಮಿಯೊಬ್ಬರು ಈ ಮಾಲ್ ನ್ನು ನಿರ್ಮಿಸಿದ್ದರು. ಆದರೆ, ಇಷ್ಟೊಂದು ಅಹಿತಕರ ಘಟನೆ ನಡೆದಿದ್ದರೂ ಪೊಲೀಸರು ಮಾತ್ರ ಅಲ್ಲಿಗೆ ಬಂದಿಲ್ಲ ಎಂದು ಹಲವರು ದೂರಿದ್ದಾರೆ.
