ಪರಮಾಣು ಸಮರಕ್ಕೆ ನಾಂದಿ ಹಾಡುತ್ತಾ ಪಹಲ್ಗಾಮ್? ಭಾರತವೇ ಶಕ್ತಿಶಾಲಿ ಸೇನಾಧಿಪತಿ!

ಕೆಟ್ಟರೂ ಬುದ್ಧಿ ಬರಲಿಲ್ಲ ಎನ್ನುವ ಮಾತಿದೆ. ಆದರೆ ಈ ಮಾತು ಪದೇ ಪದೇ ಕೆಡುತ್ತಲೇ ಇದ್ದರೂ ಬುದ್ಧಿ ಬರುವುದಿಲ್ಲ ಅಂತಾ ಪಾಕ್ ಗೆ ಅನ್ವಯವಾಗುವಂತೆ ಬದಲಿಸಬೇಕು ಅನ್ನಿಸುತ್ತೆ. ಉಗ್ರವಾದವನ್ನು ಸಾಕಿ, ಸಲುಹಿ ಪೋಷಿಸಿದ ಪಾಪಕ್ಕೀಗ ಪಾಕಿಸ್ಥಾನದ ಅಸ್ಥಿತ್ವವೇ ಸರ್ವನಾಶವಾಗುವಂತಹ ಹಂತಕ್ಕೆ ತಂದು ನಿಲ್ಲಿಸಿದೆ.

26 ಪ್ರವಾಸಿಗರ ಸಾವಿಗೆ ಮುಯ್ಯಿ ತೀರಿಸಿಕೊಳ್ಳಲು ಭಾರತ ಮುಂದಾದರೆ ಪಾಕ್ ಸುಧಾರಿಕೊಳ್ಳುವ ಮಟ್ಟದಲ್ಲಂತೂ ಇಲ್ಲ. ಆರ್ಥಿಕವಾಗಿ ಕಂಗಾಲಾಗಿರುವ ದೇಶ. ಸೇನೆ, ಯುದ್ಧ, ತನ್ನ ಜನರನ್ನು ಸಂಭಾಳಿಸುವ ಶಕ್ತಿ ಹೊಂದಿಲ್ಲ. ಆದರೆ ಪಾಕ್ ತನ್ನ ಅಸ್ತಿತ್ವ ಉಳಿಸಿಕೊಳ್ಳಲು ತನ್ನ ಬತ್ತಳಿಕೆಯಲ್ಲಿರುವ ಕಟ್ಟಕಡೆಯ ಅಸ್ತ್ರ ಪರಮಾಣು ಬಾಂಬ್ ಪ್ರಯೋಗದ ಬಗ್ಗೆ ಚಿಂತಿಸಬಹುದು. ಯಾಕೆಂದರೆ ಇದಕ್ಕೆ ಕುತಂತ್ರಿ ಚೀನೀಯರ ಕುಮ್ಮಕ್ಕಿದೆ.

ಭಾರತ-ಪಾಕ್ ಹೇಗಿದೆ ಪರಮಾಣು ಬಲಾಬಲ
ಹಾಗೆ ನೋಡಿದರೆ ಎರಡು ಪರಮಾಣು ಶಕ್ತಿ ಹೊಂದಿರುವ ದೇಶಗಳೊಂದಿಗೆ ಗಡಿ ಹಂಚಿಕೊಂಡ ದೇಶದ ಖ್ಯಾತಿ ಭಾರತದ್ದು. ಒಂದೆಡೆ, ಪಾಕ್ ಇನ್ನೊಂದೆಡೆ ಚೀನಾ. ಇನ್ನು ಪರಮಾಣು ಬಲಾಬಲವನ್ನು ನೋಡುವುದಾದರೆ ಈ ವಿಚಾರದಲ್ಲಿ ಪಾಕ್ ಸ್ವಲ್ಪ ಹೆಚ್ಚು ಶಕ್ತ ಅನ್ನಬಹುದು. ಹೌದು! ಪಾಕಿಸ್ಥಾನದ ಬಳಿ 140 ರಿಂದ 150 ಪರಮಾಣು ಅಸ್ತ್ರಗಳಿವೆ. ಭಾರತದ ಬಳಿ 130ರಿಂದ 140 ಅಸ್ತ್ರಗಳಿವೆ.

ಇನ್ನು ಪಾಕ್ ಬಳಿ ಪರಮಾಣು ಅಸ್ತ್ರ ಹೊತ್ತು ಸಾಗಲು ಶಾಹೀನ್ ಹೆಸರಿನ ಕ್ಷಿಪಣಿಯಿದ್ದರೆ ಭಾರತದ ಬಳಿ ಅಗ್ನಿ ಪರಾಕ್ರಮ ಮೆರೆಯುವ ಶಕ್ತಿ ಇದೆ. ವಾಯು ದಾಳಿ ಮೂಲಕ ಅಣು ಬಾಂಬ್ ಸಿಡಿಸಲು ಭಾರತದ ಬಳಿ ಮಿರಾಜ್ 2000, ರಫೇಲ್ ಇದೆ. ಪಾಕ್ ಎಫ್ 16ಎಸ್, ಬಾಬರ್ ನನ್ನು ಹೊಂದಿದೆ. ನೌಕಾಪಡೆಯಲ್ಲಿ ಹಿಂದೂಸ್ಥಾನದ ಐಎನ್ ಎಸ್ ಅರಿಹಂತ್ ಇದ್ದರೆ ಪಾಕ್ ಈ ವಿಚಾರದಲ್ಲಿನ್ನೂ ಪ್ರಯೋಗದಲ್ಲೇ ತೊಡಗಿದೆ.

ಸೇನಾ ಬಲಾಬಲದಲ್ಲಿ ಯಾರು ಬಲ ಭೀಮ
ಯುದ್ಧಕ್ಕೆ ನಿಂತರೆ ಯಾರು ಪರಾಕ್ರಮಿ ಎನ್ನುವುದನ್ನು ಅವರ ಬತ್ತಳಿಕೆಯಲ್ಲಿರುವ ಅಸ್ತ್ರಗಳು ನಿರ್ಧರಿಸುತ್ತವೆ. ಹಾಗಿದ್ದರೆ ಭಾರತದ ಬಳಿ ಬರೋಬ್ಬರಿ 4,614 ಯುದ್ಧ ಟ್ಯಾಂಕರ್ ಗಳಿದ್ದರೆ ಪಾಕ್ 3742 ಟ್ಯಾಂಕರ್ ಗಳನ್ನು ಹೊಂದಿದೆ. ಭಾರತದ ಬಳಿ 1 ಲಕ್ಷದ 51 ಸಾವಿರದ 248 ಶಸ್ತ್ರಸಜ್ಜಿತ ವಾಹನಗಳಿದ್ದರೆ, ಪಾಕ್ ಬಳಿ 50 ಸಾವಿರ ವಾಹನಗಳಿವೆ. ಉಳಿದಂತೆ ಭಾರತದಲ್ಲಿ 9,719 ಆರ್ಟಿಲರಿ ವಾಹನಗಳಿದ್ದರೆ, ಪಾಕ್ ನಲ್ಲಿ 4,472 ವಾಹನಗಳಿವೆ.

ಇದರೊಟ್ಟಿಗೆ ಭಾರತದಲ್ಲಿ ತಕ್ಕ ಪ್ರತ್ಯುತ್ತರ ನೀಡಲು ಸ್ಪೆಷಲ್ ಪ್ಯಾರ ಫೋರ್ಸ್, ಘಾತಕ್ ಫೋರ್ಸ್, ಹಾಗೂ ಮರಾಕೋಸ್ ಟೀಂಗಳಿವೆ. ಇತ್ತ ಪಾಕಿಸ್ಥಾನದಲ್ಲಿ ಸ್ಪೆಷಲ್ ಸರ್ವೀಸ್ ಗ್ರೂಪ್, ಎಸ್ ಎಸ್ ಜಿ ನೌಕಾಪಡೆ ಮತ್ತು ಸ್ಪೆಷಲ್ ಸರ್ವೀಸಸ್ ವಿಂಗ್ ಕೂಡಾ ಇದೆ.

ಆಗಸದಲ್ಲಿ ಯಾರು ಪರಮ ಶಕ್ತಿಶಾಲಿ ಜಟಾಯು
ಆಗಸದಲ್ಲೇ ಸಮರ ಇತ್ಯರ್ಥವಾಗುವುದಾದರೆ ಯಾರು ಎಷ್ಟು ಬಲಶಾಲಿ? ಭಾರತದಲ್ಲಿ 2,229 ಯುದ್ಧ ವಿಮಾನಗಳಿವೆ. ಪಾಕಿಸ್ಥಾನದಲ್ಲಿ 1,399ರಿಂದ 1434 ಯುದ್ಧ ವಿಮಾನಗಳಿವೆ. ಭಾರತದ ಬಳಿ ಸುಖೋಯ್ ಯುದ್ಧ ವಿಮಾನ, ರಫೇಲ್, ತೇಜಸ್, ಮಿಗ್, ಮಿರಾಜ್, ಅಪಾಚಿ 64ಇ, ಚಿನೋಕ್ ಹೆಲಿಕಾಫ್ಟರ್ ಗಳಿವೆ. ಪಾಕಿಸ್ಥಾನದಲ್ಲಿ ಎಫ್ 16, ಜೆ ಎಫ್ 17, ಮಿರಾಜ್ ಯುದ್ಧ ವಿಮಾನಗಳಿವೆ.

ಆರ್ಭಟಿಸುವ ಅಲೆಗಳ ಮೇಲೆ ಯಾರು ಕಿಂಗ್
ನೌಕಾಪಡೆ ವಿಚಾರದಲ್ಲೂ ಪಾಕ್ ಭಾರತಕ್ಕಿಂತಾ ಹಿಂದೆ ಬಿದ್ದಿದೆ. ಭಾರತೀಯ ನೌಕಾ ಪಡೆಯಲ್ಲಿ 67,700 ಮಂದಿ ಇದ್ದರೆ ಪಾಕ್ ನಲ್ಲಿ 23,800 ಯೋಧರಿದ್ದಾರೆ. ಭಾರತದಲ್ಲಿ 294 ನೌಕೆಗಳಿದ್ದರೆ, 2 ಯುದ್ಧ ನೌಕೆ ಹೊತ್ತು ಸಾಗಬಲ್ಲ ಕ್ಯಾರಿಯರ್ ಗಳಿವೆ. 18 ಸಬ್ ಮರೀನ್ ಗಳಿವೆ. ಪಾಕ್ ಬಳಿ 121 ನೌಕೆಗಳಿದ್ದರೆ, 8 ಸಬ್ ಮರೀನ್ ಗಳಿವೆ.

ಮೇಲ್ನೋಟಕ್ಕೆ ಭಾರತವೇ ಶಕ್ತಿಶಾಲಿ ಸೇನಾಧಿಪತಿ. ವಿಶ್ವದ ಐದನೇ ಬಲಶಾಲಿ ಸೇನೆ ಎನ್ನುವ ಕೀರ್ತಿ ಭಾರತಕ್ಕಿದೆ. ಅದೇ ಪಾಕ್ ಈ ಪಟ್ಟಿಯಲ್ಲಿ 29ನೇ ಸ್ಥಾನದಲ್ಲಿದೆ.