ಬೆಂಗಳೂರು : ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) 8 ಕೋಟಿ ಸದಸ್ಯರಿಗೆ ಗುಡ್ ನ್ಯೂಸ್ ದೊರೆತಿದೆ. ಪಿಎಫ್ ನಿಧಿಯಿಂದ ಸದಸ್ಯರು ಸುಲಭವಾಗಿ ಹಣ ವಿತ್ ಡ್ರಾ ಮಾಡುವ ವ್ಯವಸ್ಥೆಯು ಇದೇ ಏಪ್ರಿಲ್ ನಿಂದ ಜಾರಿಗೆ ಬರಲಿದೆ. ಅದರಲ್ಲೂ, ಬಹುದಿನಗಳಿಂದ ಕಾಯುತ್ತಿರುವ ಎಟಿಎಂ ಮೂಲಕ ಹಾಗೂ ಯುಪಿಐ ಮೂಲಕ ಹಣ ವಿತ್ ಡ್ರಾ ಮಾಡುವ ವ್ಯವಸ್ಥೆ ಜಾರಿಗೆ ಬರಲಿದೆ.
ಎರಡೂ ವ್ಯವಸ್ಥೆಗಳನ್ನು ಜಾರಿಗೆ ತರಲು ಇಪಿಎಫ್ಒ ಪ್ರಾಯೋಗಿಕ ಹಂತದಲ್ಲಿ ಚಾಲನೆ ನೀಡಿದೆ. 100 ನಕಲಿ ಖಾತೆಗಳ ಮೂಲಕ ಹಣ ವಿತ್ ಡ್ರಾ ಮಾಡುವ ಪ್ರಯೋಗ ನಡೆಸುತ್ತಿದೆ. ಎಲ್ಲ ಪ್ರಯೋಗಗಳು ಮುಗಿದ ಕೂಡಲೇ ಅಂದರೆ, ಏಪ್ರಿಲ್ ನಲ್ಲಿ ಯೋಜನೆಯು ಜಾರಿಗೆ ಬರಲಿದೆ ಎಂದು ಉನ್ನತ ಮೂಲಗಳು ತಿಳಿಸಿವೆ.
ಯುಪಿಐ ಮೂಲಕ ಸದಸ್ಯರು ಪಿಎಫ್ ಹಣವನ್ನು ಉಳಿತಾಯ ಖಾತೆಗೆ ರವಾನಿಸಬಹುದು. ಇದಕ್ಕಾಗಿ ಹೊಸದೊಂದು ಆ್ಯಪ್ ಬಿಡುಗಡೆ ಮಾಡಲಾಗುತ್ತದೆ. ಅದರ ಮೂಲಕ ಯುಪಿಐಗೆ ಲಿಂಕ್ ಆಗಿರುವ ಖಾತೆಗೆ ಪಿಎಫ್ ಮೊತ್ತವನ್ನು ವರ್ಗಾವಣೆ ಮಾಡಿಕೊಳ್ಳಬಹುದು. ಆರಂಭಿಕ ಹಂತದಲ್ಲಿ 25 ಸಾವಿರ ರೂಪಾಯಿ ವರ್ಗಾವಣೆ ಮಾಡಿಕೊಳ್ಳಲು ಅವಕಾಶ ನೀಡಲಾಗುತ್ತದೆ ಎಂದು ಹೇಳಲಾಗುತ್ತದೆ.
ಯುಪಿಐ ಮೂಲಕವಾಗಲಿ, ಎಟಿಎಂ ಮೂಲಕವಾಗಲಿ, ಎಲ್ಲ ಹಣವನ್ನು ವಿತ್ ಡ್ರಾ ಮಾಡಲು ಆಗುವುದಿಲ್ಲ. ಪಿಎಫ್ ನಿಧಿಯ ಶೇ.25ರಷ್ಟು ಮೊತ್ತವನ್ನು ಲಾಕ್ ಮಾಡಲಾಗಿರುತ್ತದೆ. ಅಂದರೆ, ಇಪಿಎಫ್ಒ ಸದಸ್ಯ ನಿವೃತ್ತರಾಗುವವರೆಗೆ ಆ ಮೊತ್ತವನ್ನು ಪಡೆಯಲು ಆಗುವುದಿಲ್ಲ. ಇದುವರೆಗೆ ಪಿಎಫ್ ಸದಸ್ಯರು ಇಪಿಎಫ್ಒ ವೆಬ್ ಸೈಟ್ ಗೆ ಭೇಟಿ ನೀಡಿ ಕ್ಲೇಮ್ ಅರ್ಜಿ ಸಲ್ಲಿಸಬೇಕಿತ್ತು. ಇದಕ್ಕೆ 2-3 ದಿನ ಬೇಕಾಗುತ್ತಿತ್ತು. ಆದರೆ, ಹೊಸ ವ್ಯವಸ್ಥೆಯಿಂದ ಕ್ಷಣ ಮಾತ್ರದಲ್ಲಿ ಸದಸ್ಯರು ಪಿಎಫ್ ಹಣವನ್ನು ವಿತ್ ಡ್ರಾ ಮಾಡಬಹುದಾಗಿದೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ : ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದಲ್ಲಿ 6 ಹುದ್ದೆಗಳ ನೇಮಕಾತಿ | 2.18 ಲಕ್ಷ ರೂಪಾಯಿ ಸಂಬಳ
