ಬೆಂಗಳೂರು: ನಿಸ್ಸಾನ್ ಇಂಡಿಯಾ 2026ರ ಆರಂಭದಲ್ಲಿ ಬಿಡುಗಡೆಗೊಳ್ಳಲಿರುವ ತನ್ನ ಹೊಸ 7-ಸೀಟರ್ ಬಿ-ಸೆಗ್ಮೆಂಟ್ ಎಂಪಿವಿಗೆ ‘ಗ್ರಾವೈಟ್’ ಎಂಬ ಹೆಸರು ನೀಡಿದೆ. ಈ ಹೊಸ ಮಾದರಿ ಕಂಪನಿಯ ಭಾರತದಲ್ಲಿನ ಹೊಸ ಅಧ್ಯಾಯದ ಆರಂಭವನ್ನು ಸೂಚಿಸುವ ಮೊದಲ ಪ್ರಮುಖ ಹೆಜ್ಜೆಯಾಗಿದೆ.
ನಿಸ್ಸಾನ್ ಪ್ರಕಾರ, ಗ್ರಾವೈಟ್ ಅನ್ನು ಭಾರತೀಯ ಕುಟುಂಬಗಳ ಅವಶ್ಯಕತೆಗನುಸಾರ ವಿನ್ಯಾಸಗೊಳಿಸಲಾಗಿದ್ದು, ಅನೇಕ ಸೌಲಭ್ಯಗಳೊಂದಿಗೆ ಬಹುಮುಖ ಪ್ರಯಾಣಕ್ಕೆ ತಕ್ಕಂತಿದೆ. ಕಂಪನಿಯು ಕಳೆದ ವರ್ಷ ಘೋಷಿಸಿದ್ದ ಹೊಸ ಉತ್ಪನ್ನ ಪೋರ್ಟ್ಫೋಲಿಯ ಕೆಲವು ಪ್ರಮುಖ ಮಾದರಿಗಳಲ್ಲಿ ಇದು ಎರಡನೆಯದಾಗಿದೆ. ಗ್ರಾವೈಟ್ ಬಳಿಕ 2026ರ ಮಧ್ಯದಲ್ಲಿ ‘ಟೆಕ್ಟಾನ್’ ಮತ್ತು 2027ರ ಆರಂಭದಲ್ಲಿ ಹೊಸ 7-ಸೀಟರ್ ಸಿ-ಎಸ್ಯುವಿ ಬಿಡುಗಡೆಗೊಳ್ಳಲಿದೆ.
ಗುರುತ್ವಾಕರ್ಷಣೆಯಿಂದ ಸ್ಫೂರ್ತಿ ಪಡೆದ ಹೆಸರು
‘ಗ್ರಾವೈಟ್’ ಎಂಬ ಹೆಸರು ‘ಗ್ರಾವಿಟಿ’ ಪದದಿಂದ ಪ್ರೇರಿತವಾಗಿದ್ದು, ಅದು ಸಮತೋಲನ, ಆಂತರಿಕ ಸ್ಥಿರತೆ ಮತ್ತು ಆಕರ್ಷಣೆಯನ್ನು ಸೂಚಿಸುತ್ತದೆ ಎಂದು ನಿಸ್ಸಾನ್ ತಿಳಿಸಿದೆ. ಭಾರತೀಯ ವೈವಿಧ್ಯತೆಯನ್ನು ಪ್ರತಿಬಿಂಬಿಸುವ ರೀತಿಯಲ್ಲಿ ವಿನ್ಯಾಸಗೊಂಡಿರುವ ಈ ಮಾದರಿ 1.4 ಬಿಲಿಯನ್ ಜನರ ಅಗತ್ಯತೆಗಳನ್ನು ಗಮನದಲ್ಲಿಟ್ಟುಕೊಂಡಿದೆ.
ಒಳಾಂಗಣ ಮತ್ತು ವಿನ್ಯಾಸ
ಗ್ರಾವೈಟ್ ವಿಶಾಲ ಕ್ಯಾಬಿನ್ ಹಾಗೂ ವಿಭಾಗದಲ್ಲೇ ಅತಿ ಹೆಚ್ಚು ಸ್ಟೋರೇಜ್ ವ್ಯವಸ್ಥೆಯನ್ನು ಹೊಂದಿದ್ದು, ಅಲ್ಟ್ರಾ-ಮಾಡ್ಯುಲರ್ ಸೀಟಿಂಗ್ ವಿನ್ಯಾಸದಿಂದ ಪ್ರಯಾಣಿಕರು ಮತ್ತು ಸರಕು ಸಾಗಾಣಿಕೆಯ ಅವಶ್ಯಕತೆಗಳಿಗನುಗುಣವಾಗಿ ಬದಲಾಯಿಸಿಕೊಳ್ಳಬಹುದು. ಸೊಗಸು ಮತ್ತು ಉಪಯುಕ್ತತೆಯ ಸಮನ್ವಯದಿಂದ, ದೈನಂದಿನ ಪ್ರಯಾಣದಿಂದ ಕೌಟುಂಬಿಕ ಪ್ರವಾಸಗಳವರೆಗೆ ಎಲ್ಲಕ್ಕೂ ಇದು ಸೂಕ್ತ ಎನ್ನಲಾಗಿದೆ.
ಹೊಸ ಗ್ರಾವೈಟ್ ನಿಸ್ಸಾನ್ನ ಜಾಗತಿಕ ವಿನ್ಯಾಸ ಶೈಲೆಗೆ ಅನುಗುಣವಾಗಿದ್ದು, ಸಿ-ಆಕಾರದ ಫ್ರಂಟ್ ಗ್ರಿಲ್, ದಿಟ್ಟ ನಿಲುವು, ಮತ್ತು ವಿಶಿಷ್ಟ ಹಿಂಭಾಗದ ಬ್ಯಾಡ್ಜಿಂಗ್ನಿಂದ ಅದ್ದೂರಿ ಲುಕ್ ನೀಡಲಿದೆ.
ಚೆನ್ನೈನಲ್ಲೇ ಉತ್ಪಾದನೆ
ಗ್ರಾವೈಟ್ನ ಉತ್ಪಾದನೆ ನಿಸ್ಸಾನ್ನ ಚೆನ್ನೈ ಘಟಕದಲ್ಲಿ ನಡೆಯಲಿದೆ. ಸ್ಥಳೀಯ ಉತ್ಪಾದನೆಯ ಈ ತೀರ್ಮಾನವು ಭಾರತೀಯ ಮಾರುಕಟ್ಟೆಗೆ ತಕ್ಕ ರೀತಿಯ ವಾಹನಗಳನ್ನು ಒದಗಿಸುವ ಕಂಪನಿಯ ಬದ್ಧತೆಯನ್ನು ವಲಯಿಸುತ್ತದೆ ಎಂದು ಕಂಪನಿ ತಿಳಿಸಿದೆ.
ಎಎಂಐಇಓ (ಆಫ್ರಿಕಾ, ಮಧ್ಯಪ್ರಾಚ್ಯ, ಭಾರತ, ಯೂರೋಪ್ ಮತ್ತು ಓಷಿಯಾನಿಯಾ) ವಿಭಾಗದ ಚೇರ್ಪರ್ಸನ್ ಮ್ಯಾಸಿಮಿಲಿಯಾನೋ ಮೆಸ್ಸಿನಾ ಹೇಳಿದರು:
“ಭಾರತವು ನಿಸ್ಸಾನ್ನ ಜಾಗತಿಕ ಬೆಳವಣಿಗೆಗೆ ಪ್ರಮುಖ ಕೇಂದ್ರವಾಗಿದೆ. ಸ್ಥಳೀಯವಾಗಿ ಅಭಿವೃದ್ಧಿಪಡಿಸಿರುವ ಈ ಹೊಸ ಮಾದರಿಗಳು ದೇಶದಿಂದ ಅನೇಕ ಅಂತಾರಾಷ್ಟ್ರೀಯ ಮಾರುಕಟ್ಟೆಗಳಿಗೆ ರಫ್ತು ಆಗಲಿವೆ,” ಎಂದರು.
ನಿಸ್ಸಾನ್ ಮೋಟಾರ್ ಇಂಡಿಯಾದ ಮ್ಯಾನೇಜಿಂಗ್ ಡೈರೆಕ್ಟರ್ ಸೌರಭ್ ವತ್ಸಾ ಹೇಳಿದರು:
“ಹೊಸ ಗ್ರಾವೈಟ್ ನಿಸ್ಸಾನ್ನ ಭಾರತೀಯ ಗ್ರಾಹಕರ ಅವಶ್ಯಕತೆಗನುಗುಣವಾದ ದೃಷ್ಟಿಯನ್ನು ಹೇಳುತ್ತದೆ. ಇದು ನಮ್ಮ ಹೊಸ ಅಧ್ಯಾಯದ ಪ್ರಮುಖ ಹೆಜ್ಜೆಯಾಗಿದೆ,” ಎಂದು ಅವರು ಹೇಳಿದರು.
ಮುಂದಿನ ತಂತ್ರಜ್ಞಾನದ ಕಡೆಗೆ ನಿಸ್ಸಾನ್
ನಿಸ್ಸಾನ್ ಮ್ಯಾಗ್ನೈಟ್ ಮಾದರಿ ಈಗಾಗಲೇ 65 ಕ್ಕೂ ಹೆಚ್ಚು ದೇಶಗಳಿಗೆ ರಫ್ತು ಆಗುತ್ತಿದ್ದು, ಅದರ ಯಶಸ್ಸು ಭಾರತದ ರಫ್ತು ಕೇಂದ್ರದ ಪಾತ್ರವನ್ನು ಬಲಪಡಿಸಿದೆ.
2025ರ ಅಕ್ಟೋಬರ್ನಲ್ಲಿ ಕಂಪನಿಯು ತೆರೆದಿಟ್ಟ ‘ಟೆಕ್ಟಾನ್’ ಪ್ರೀಮಿಯಂ ಎಸ್ಯುವಿಯೂ ಇದೇ ಹೊಸ ಪೀಳಿಗೆಯ ಉತ್ಪನ್ನ ಸಾಲಿನ ಭಾಗವಾಗಲಿದೆ. ಗ್ರಾವೈಟ್ನ ತಾಂತ್ರಿಕ ವಿವರಗಳು ಹಾಗೂ ಬೆಲೆ ಕುರಿತಂತೆ ಹೆಚ್ಚಿನ ಮಾಹಿತಿಯನ್ನು ಕಂಪನಿ ಮುಂದಿನ ಘೋಷಣೆಯಲ್ಲಿ ಹಂಚಿಕೊಳ್ಳಲಿದೆ.
ಇದನ್ನೂ ಓದಿ: ಜಾಗತಿಕ ಮಾರುಕಟ್ಟೆಗೆ ನಿಸ್ಸಾನ್ ‘ಕೈಟ್’ ಎಂಟ್ರಿ: ಬ್ರೆಜಿಲ್ನಲ್ಲಿ ಉತ್ಪಾದನೆ ಆರಂಭ
