ಕೊಲಂಬಿಯಾ: ಕೊಲಂಬಿಯಾದ(Colombia) ಬುಗಾ ಎಂಬ ಪಟ್ಟಣದಲ್ಲಿ ಕಂಡುಬಂದ ರಹಸ್ಯಮಯ ಲೋಹದ ಗೋಳವೊಂದು ಜಗತ್ತಿನ ಗಮನ ಸೆಳೆದಿದೆ. ಈ ಗೋಳವು ಆಕಾಶದಲ್ಲಿ ಕಾಣಿಸಿಕೊಂಡು, ನಂತರ ಕೊಲಂಬಿಯಾದಲ್ಲಿ ಭೂಮಿಗೆ ಇಳಿದಿದೆ ಎಂದು ಸಾಮಾಜಿಕ ಜಾಲತಾಣದ ಬಳಕೆದಾರರು ವಾದಿಸಿದ್ದಾರೆ. ಈ ಘಟನೆಯು ಹಾರುವ ತಟ್ಟೆ (ಅನ್‌ಐಡೆಂಟಿಫೈಡ್ ಫ್ಲೈಯಿಂಗ್ ಆಬ್ಜೆಕ್ಟ್) ಎಂದು ಭಾವಿಸಲಾದ ವಸ್ತುವಿಗೆ(UFO Sighting) ಸಂಭವಿಸಿದ್ದೇ ಎಂಬ ಚರ್ಚೆಗೆ ಕಾರಣವಾಗಿದೆ. ಈ ಗೋಳದ ವಿಶಿಷ್ಟ ರಚನೆ, ಲೋಹದ ಮೇಲ್ಮೈ ಹಾಗೂ ಪುರಾತನ ಶೈಲಿಯ ಗುರುತುಗಳು ವಿಜ್ಞಾನಿಗಳು ಮತ್ತು ಸಾರ್ವಜನಿಕರ ಕುತೂಹಲವನ್ನು ಕೆರಳಿಸಿವೆ.
ಈ ಗೋಳವು ಬುಗಾದ ಆಕಾಶದಲ್ಲಿ ಜಿಗ್-ಜಾಗ್ ಚಲನೆಯಲ್ಲಿ ಚಲಿಸುತ್ತಿರುವುದನ್ನು ಸ್ಥಳೀಯರು ಗಮನಿಸಿದ್ದಾರೆ. ಕೆಲವು ವರದಿಗಳ ಪ್ರಕಾರ, ಈ ವಸ್ತುವಿನ ಚಲನೆಯು ವಿಶಿಷ್ಟ ಹಾಗೂ ವಿಶೇಷವಾಗಿದ್ದು, ಸಾಂಪ್ರದಾಯಿಕ ವಿಮಾನ ಅಥವಾ ಡ್ರೋನ್‌ಗಿಂತ ಭಿನ್ನವಾಗಿತ್ತು ಎನ್ನಲಾಗಿದೆ. ಗೋಳವು ಅಂತಿಮವಾಗಿ ಭೂಮಿಗೆ ಬಿದ್ದಿದೆ. ಈ ಗೋಳವು ಮೂರು ಲೋಹದ ಪದರಗಳನ್ನು ಹೊಂದಿದ್ದು, ಯಾವುದೇ ವೆಲ್ಡ್‌ಗಳಿಲ್ಲದೇ ತಯಾರಾದಂತಿದೆ ಎಂದು ಸಂಶೋಧಕ ಜೋಸ್ ಲೂಯಿಸ್ ವೆಲಾಸ್ಕ್ವೆಜ್ ಗುರುತಿಸಿದ್ದಾರೆ. ಇದು ಮಾನವ ನಿರ್ಮಿತ ವಸ್ತುವಿನ ಲಕ್ಷಣಗಳಿಗಿಂತ ಭಿನ್ನವಾಗಿದೆ ಎಂದು ಅವರು ತಿಳಿಸಿದ್ದಾರೆ, ಇದರಿಂದಾಗಿ ಇದು ಅನ್ಯಗ್ರಹದ್ದಿರಬಹುದೇ ಎಂಬ ಊಹಾಪೋಹಗಳು ಉದ್ಭವಿಸಿವೆ.
ಗೋಳದ ಮೇಲ್ಮೈಯಲ್ಲಿ ಕಂಡುಬಂದಿರುವ ಕೆತ್ತನೆಗಳು ಮತ್ತು ಶಾಸನಗಳು ಪುರಾತನ ರೂನ್‌ಗಳು, ಒಘಮ್, ಮತ್ತು ಮೆಸೊಪಟೇಮಿಯನ್ ಲಿಪಿಗಳಿಗೆ ಹೋಲಿಕೆಯಾಗಿವೆ ಎಂದು ಕೆಲವು ಸಂಶೋಧಕರು ಗಮನಿಸಿದ್ದಾರೆ. ಇದರ ಜೊತೆಗೆ, ಗೋಳದ ಒಳಗೆ 18 ಸೂಕ್ಷ್ಮ ಗೋಳಗಳು ಮತ್ತು ಕೇಂದ್ರದಲ್ಲಿ ಕ್ವಾಂಟಮ್ ಚಿಪ್‌ನಂತೆ ಕಾಣುವ ಒಂದು ಘಟಕವೂ ಇದೆ ಎಂದು ಕೆಲವು ವರದಿಗಳು ತಿಳಿಸಿವೆ. ಈ ವಿಶಿಷ್ಟ ಗುಣಲಕ್ಷಣಗಳು ವಿಜ್ಞಾನಿಗಳಿಗೆ ಇದು ಸಾಮಾನ್ಯವಾದ ವಸ್ತುವಲ್ಲ ಎಂಬ ಭಾವನೆಯನ್ನು ಮೂಡಿಸಿವೆ.
ವೈಜ್ಞಾನಿಕ ಪರಿಶೀಲನೆ
ಜರ್ಮನಿಯ ವಿದ್ಯುತ್ಕಾಂತೀಯ ಶೋಧನಾ ಕಂಪನಿಯ ತಂಡವು ಈ ಗೋಳದ ಪರಿಶೀಲನೆ ಆರಂಭಿಸಿದೆ. ಆರಂಭದಲ್ಲಿ ಗೋಳವು ಸುಮಾರು 2 ಕೆ.ಜಿ. ತೂಕ ಹೊಂದಿತ್ತು. ಆದರೆ ಪ್ರಯೋಗಾಲಯದಲ್ಲಿ ಕ್ಯಾಲಿಬ್ರೇಟೆಡ್ ಸ್ಕೇಲ್‌ನಲ್ಲಿ ಇದನ್ನು ತೂಕ ಮಾಡಿದಾಗ ಅದರ ತೂಕವು 10 ಕೆ.ಜಿ.ಗೆ ಏರಿತು. ಈ ಅಸಾಮಾನ್ಯ ಬದಲಾವಣೆಯು ಗೋಳದ ಒಳಗಿನ ಲೆವಿಟೇಶನ್ ವ್ಯವಸ್ಥೆ ಇನ್ನೂ ಭಾಗಶಃ ಸಕ್ರಿಯವಾಗಿರಬಹುದು ಎಂಬ ಊಹೆಗೆ ಕಾರಣವಾಗಿದೆ.
ಪ್ರಸಿದ್ಧ ಯುಎಫ್‌ಒ ಸಂಶೋಧಕ ಮತ್ತು ಪತ್ರಕರ್ತ ಜೈಮೆ ಮೌಸ್ಸಾನ್ ಈ ಗೋಳದ ಬಗ್ಗೆ ವ್ಯಾಪಕವಾಗಿ ವರದಿ ಮಾಡಿದ್ದಾರೆ. ಗೋಳವನ್ನು ಮೊದಲು ಪತ್ತೆಹಚ್ಚಿದವರಲ್ಲಿ ಒಬ್ಬರಾದ ಡೇವಿಡ್ ವೆಲೆಜ್ ಎಲ್ ಪೊಟ್ರೊ, ಈ ವಸ್ತುವು ನಿಜವಾದುದು ಎಂದು ಒತ್ತಿಹೇಳಿದ್ದಾರೆ. ಅಲ್ಲದೇ ಗೋಳವನ್ನು ಮುಟ್ಟಿದ ವ್ಯಕ್ತಿಯಾದ ಜೋಸ್‌ಗೆ ದಿನಗಟ್ಟಲೆ ಅನಾರೋಗ್ಯ ಕಾಡಿತು ಎಂದೂ ಅವರು ತಿಳಿಸಿದ್ದಾರೆ. ಇದರ ಜೊತೆಗೆ, ಗೋಳದ ಮೇಲೆ ನೀರು ಸುರಿದಾಗ ಅದು ಆವಿಯಾಗಿ, ಗೋಳವು ಧೂಮವನ್ನು ಹೊರಸೂಸಿತು ಎಂದೂ ವೆಲೆಜ್ ಹೇಳಿದ್ದಾರೆ.
ವಿಜ್ಞಾನಿಗಳ ವಿಭಿನ್ನ ದೃಷ್ಟಿಕೋನ
ವಿಜ್ಞಾನಿಗಳ ನಡುವೆ ಈ ಗೋಳದ ಮೂಲದ ಬಗ್ಗೆ ತೀವ್ರ ಚರ್ಚೆ ನಡೆಯುತ್ತಿದೆ. ದಿ ಇನ್‌ಸ್ಟಿಟ್ಯೂಟ್ ಫಾರ್ ಲವ್ ಅಂಡ್ ಟೈಮ್ (TILT) ಸಂಸ್ಥೆಯ ಸಂಸ್ಥಾಪಕಿ ಮತ್ತು ಸ್ಯಾನ್ ಡಿಯಾಗೊ ವಿಶ್ವವಿದ್ಯಾಲಯದ ಭೌತಶಾಸ್ತ್ರಜ್ಞೆ ಜೂಲಿಯಾ ಮಾಸ್‌ಬ್ರಿಡ್ಜ್, ಈ ಗೋಳವು ಬಾಹ್ಯಗ್ರಹದ ವಸ್ತು ಎಂದು ಕರೆಯುವ ಮೊದಲು ಎಚ್ಚರಿಕೆಯಿಂದ ಪರಿಶೀಲನೆ ನಡೆಸಬೇಕಾದ ಅಗತ್ಯವಿದೆ ಎಂದು ಸಲಹೆ ನೀಡಿದ್ದಾರೆ. ಇದು ಕಲಾತ್ಮಕ ಕೃತಿಯಾಗಿರಲೂಬಹುದು ಎಂದೂ ಅವರು ಶಂಕಿಸಿದ್ದಾರೆ. “ಯಾವುದೇ ವಸ್ತುವನ್ನು ಅಸಾಮಾನ್ಯ ಅಥವಾ ಯುಎಫ್‌ಒ ಎಂದು ಗುರುತಿಸುವ ಮೊದಲು, ಅದನ್ನು ಗೆಲಿಲಿಯೊ ಪ್ರಾಜೆಕ್ಟ್‌ನಂತಹ ತಂಡಕ್ಕೆ ತೋರಿಸಬೇಕು” ಎಂದು ಅವರು ಹೇಳಿದ್ದಾರೆ. ಗೆಲಿಲಿಯೊ ಪ್ರಾಜೆಕ್ಟ್ ಎಂಬುದು ಹಾರ್ವರ್ಡ್ ವಿಶ್ವವಿದ್ಯಾಲಯದ ಖಗೋಳ ಭೌತಶಾಸ್ತ್ರಜ್ಞ ಏವಿ ಲೊಯೆಬ್ ಸ್ಥಾಪಿಸಿದ ಅಂತರರಾಷ್ಟ್ರೀಯ ಸಂಶೋಧನಾ ಯೋಜನೆಯಾಗಿದ್ದು, ಇದು ಸಂಭಾವ್ಯ ಅನ್ಯಗ್ರಹ ವಸ್ತುಗಳನ್ನು ಕಟ್ಟುನಿಟ್ಟಾದ ವೈಜ್ಞಾನಿಕ ಸಂಶೋಧನೆಯ ಮೂಲಕ ಪರಿಶೀಲಿಸುವ ಗುರಿಯನ್ನು ಹೊಂದಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ
ಈ ಘಟನೆಯು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಹಾರುವ ತಟ್ಟೆಗಳ ಕುರಿತು ಚರ್ಚಿಸುವ ಉತ್ಸಾಹಿಗಳು ಈ ಗೋಳವನ್ನು ಅನ್ಯಗ್ರಹದ ಸಂಪರ್ಕದ ಸಂಕೇತವೆಂದು ಹೇಳಿಕೊಳ್ಳತೊಡಗಿದ್ದಾರೆ. ಬುಗಾ ಗೋಳವು ಇತಿಹಾಸದಲ್ಲಿ ಕಂಡುಬಂದ ಇತರ ರಹಸ್ಯಮಯ ಗೋಳಗಳನ್ನು ಜನರಿಗೆ ನೆನಪಿಸಿದೆ. ಬೆಟ್ಜ್ ಗೋಳ, ಜಿಮ್ ಮಾರ್ಲಿನ್‌ನ ಗೋಳ, ಮತ್ತು ಜುವಾನಿಟೊ ಜುವಾನ್ ಗೋಳದಂತಹ ಘಟನೆಗಳು ಈ ಗೋಳದೊಂದಿಗೆ ಹೋಲಿಕೆಯಾಗಿವೆ. ಈ ಗೋಳಗಳು ಕೂಡ ತಮ್ಮ ವಿಶಿಷ್ಟ ಗುಣಲಕ್ಷಣಗಳಿಂದಾಗಿ ಯುಎಫ್‌ಒ ಊಹಾಪೋಹಗಳಿಗೆ ಕಾರಣವಾಗಿದ್ದವು.
ಸರ್ಕಾರದ ಪ್ರತಿಕ್ರಿಯೆ
ಕೊಲಂಬಿಯಾ ಸರ್ಕಾರವು ಈ ಗೋಳವನ್ನು ತಮ್ಮ ವಶಕ್ಕೆ ತೆಗೆದುಕೊಳ್ಳಲು ಪ್ರಯತ್ನಿಸಿದೆ ಎಂದು ವೆಲೆಜ್ ಎಲ್ ಪೊಟ್ರೊ ಆರೋಪಿಸಿದ್ದಾರೆ. ಆದರೆ ಅವರು ಅದನ್ನು ಸರ್ಕಾರಕ್ಕೆ ಹಸ್ತಾಂತರಿಸಲು ನಿರಾಕರಿಸಿದ್ದಾರೆ. ಸರ್ಕಾರವು ಇದನ್ನು ಮರೆಮಾಚುವ ಸಾಧ್ಯತೆಯಿದೆ ಎನ್ನುವುದು ಅವರ ವಾದ. ಅಮೆರಿಕ ಸರ್ಕಾರವು ಯುಎಫ್‌ಒ ವರದಿಗಳನ್ನು ರಾಷ್ಟ್ರೀಯ ಭದ್ರತೆಯ ದೃಷ್ಟಿಯಿಂದ ತನಿಖೆ ಮಾಡುತ್ತಿದೆ ಎಂದು ಕೆಲವು ವರದಿಗಳು ತಿಳಿಸಿವೆ.
