ನವದೆಹಲಿ (ಫೆ. 17) : ಟಿ20 ವಿಶ್ವಕಪ್ 2026ರ ಸೂಪರ್-8 ಹಂತದ ಪಂದ್ಯದಲ್ಲಿ ಭಾರತ ಮತ್ತು ದಕ್ಷಿಣ ಆಫ್ರಿಕಾ ಮುಖಾಮುಖಿಯಾಗಲು ಸಜ್ಜಾಗಿವೆ. ಆದರೆ, ಈ ಪಂದ್ಯ ಮಾರ್ಕೆಲ್ ಕುಟುಂಬದಲ್ಲಿ ಧರ್ಮಸಂಕಟವನ್ನು ತಂದೊಡ್ಡಿದೆ. ಫೆಬ್ರವರಿ 22 ರಂದು ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಈ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಸಹೋದರರಾದ ಅಲ್ಬಿ ಮಾರ್ಕೆಲ್ ಮತ್ತು ಮಾರ್ನೆ ಮಾರ್ಕೆಲ್ ಎದುರಾಳಿ ಪಾಳಯದಲ್ಲಿದ್ದಾರೆ.
ಹೌದು, ದಕ್ಷಿಣ ಆಫ್ರಿಕಾದ ಮಾಜಿ ಆಟಗಾರ ಅಲ್ಬಿ ಮಾರ್ಕೆಲ್ ಪ್ರಸ್ತುತ ಹರಿಣಗಳ ಪಡೆಯ ಕನ್ಸಲ್ಟೆಂಟ್ ಕೋಚ್ ಆಗಿದ್ದರೆ, ಅವರ ಕಿರಿಯ ಸಹೋದರ ಮಾರ್ನೆ ಮಾರ್ಕೆಲ್ ಟೀಂ ಇಂಡಿಯಾದ ಬೌಲಿಂಗ್ ಕೋಚ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಹೀಗಾಗಿ, ತಾಯಿ ಮರಿಯಾನಾ ಮಾರ್ಕೆಲ್ ಯಾರನ್ನು ಬೆಂಬಲಿಸಬೇಕು ಎಂಬ ಗೊಂದಲದಲ್ಲಿದ್ದಾರೆ.
ನಾವು ಪರಸ್ಪರ ಮಾತಾಡಲ್ಲ: ಅಲ್ಬಿ ಮಾರ್ಕೆಲ್
ಯುಎಇ ವಿರುದ್ಧದ ಪಂದ್ಯಕ್ಕೂ ಮುನ್ನ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅಲ್ಬಿ ಮಾರ್ಕೆಲ್, ತಮ್ಮ ಸಹೋದರನೊಂದಿಗಿನ ಪ್ರಸ್ತುತ ಸಂಬಂಧದ ಬಗ್ಗೆ ತಮಾಷೆಯಾಗಿ ಉತ್ತರಿಸಿದರು. “ನಾವು ಪರಸ್ಪರ ಮಾತನಾಡುವುದಿಲ್ಲ. ನನಗನಿಸುವಂತೆ ನಮಗಿಂತ ಹೆಚ್ಚು ಚಿಂತೆ ನಮ್ಮಮ್ಮನಿಗೆ ಇದೆ. ಭಾರತಕ್ಕೆ ಬೆಂಬಲಿಸಬೇಕೋ ಅಥವಾ ದಕ್ಷಿಣ ಆಫ್ರಿಕಾಗೆ ಬೆಂಬಲಿಸಬೇಕೋ ಎಂಬುದು ಅವರಿಗೆ ತಿಳಿಯುತ್ತಿಲ್ಲ,” ಎಂದು ಅಲ್ಬಿ ಮಾರ್ಕೆಲ್ ಹೇಳಿದರು.
ನಿಜವಾದ ವಿಶ್ವಕಪ್ ಈಗ ಶುರು
ವಿಶ್ವಕಪ್ನ ಸೂಪರ್-8 ಹಂತದಲ್ಲಿ ದಕ್ಷಿಣ ಆಫ್ರಿಕಾ ತಂಡವು ಭಾರತ, ವೆಸ್ಟ್ ಇಂಡೀಸ್ ಮತ್ತು ಜಿಂಬಾಬ್ವೆ ವಿರುದ್ಧ ಸೆಣಸಾಡಲಿದೆ. “ನಮ್ಮ ಪಾಲಿಗೆ ನಿಜವಾದ ವಿಶ್ವಕಪ್ ಈಗಷ್ಟೇ ಆರಂಭವಾಗಿದೆ. ಕಠಿಣ ಗುಂಪಿನಲ್ಲಿ ನಾವಿದ್ದೇವೆ. ಇನ್ನುಮುಂದೆ ಎದುರಾಗುವ ಪ್ರತಿಯೊಂದು ಪಂದ್ಯವೂ ಸವಾಲಿನದ್ದಾಗಿರುತ್ತದೆ. ಆದರೆ, ನಮ್ಮ ಆಟಗಾರರು ಐಪಿಎಲ್ ಮತ್ತು ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಒತ್ತಡ ನಿಭಾಯಿಸುವುದನ್ನು ಕಲಿತಿದ್ದಾರೆ. ಹೀಗಾಗಿ, ತಂಡದ ಪ್ರದರ್ಶನದ ಬಗ್ಗೆ ನನಗೆ ವಿಶ್ವಾಸವಿದೆ,” ಎಂದು ಅಲ್ಬಿ ಮಾರ್ಕೆಲ್ ತಿಳಿಸಿದರು. ಒಟ್ಟಿನಲ್ಲಿ, ಮೈದಾನದಲ್ಲಿ ಭಾರತ ಮತ್ತು ದಕ್ಷಿಣ ಆಫ್ರಿಕಾ ಆಟಗಾರರ ಕಾದಾಟ ಒಂದೆಡೆಯಾದರೆ, ಡಗೌಟ್ನಲ್ಲಿ ಮಾರ್ಕೆಲ್ ಸಹೋದರರ ರಣತಂತ್ರಗಳ ಜಿದ್ದಾಜಿದ್ದಿ ಕುತೂಹಲ ಮೂಡಿಸಿದೆ.
ಇದನ್ನೂ ಓದಿ : ಬೆಂಗಳೂರಿನಲ್ಲಿ ಹಾಡಹಗಲೇ ಹೊತ್ತಿ ಉರಿದ ಬಸ್.. ಬೆಚ್ಚಿಬಿದ್ದ ಜನ!
