ಬೆಂಗಳೂರು: ಬೆಂಗಳೂರಿನ ಹಲಸೂರಿನಲ್ಲಿರುವ ಸೌತ್ ಯುನೈಟೆಡ್ ಫುಟ್ಬಾಲ್ ಕ್ಲಬ್ (SUFC) ತನ್ನ ನೂತನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ (CEO) ಭಾರತೀಯ ಫುಟ್ಬಾಲ್ ಕ್ಷೇತ್ರದಲ್ಲಿ ಅಪಾರ ಅನುಭವ ಹೊಂದಿರುವ ಮೊಹಮ್ಮದ್ ರಫೀಕ್ ಅವರನ್ನು ನೇಮಕ ಮಾಡಿದೆ. (Football)
14 ವರ್ಷಗಳಿಗೂ ಹೆಚ್ಚು ಕಾಲ ಭಾರತೀಯ ಫುಟ್ಬಾಲ್‌ನಲ್ಲಿ ಸಕ್ರಿಯರಾಗಿರುವ ಮೊಹಮ್ಮದ್ ರಫೀಕ್, ತಳಮಟ್ಟದಿಂದ ಹಿರಿಯ ವೃತ್ತಿಪರ ತಂಡಗಳವರೆಗೆ ವಿವಿಧ ಹಂತದ ನಿರ್ವಹಣೆಯಲ್ಲಿ ಕೆಲಸ ಮಾಡಿದ್ದಾರೆ. FIFA, AIFF (ಅಖಿಲ ಭಾರತ ಫುಟ್ಬಾಲ್ ಫೆಡರೇಶನ್) ಮತ್ತು ಸರ್ಕಾರದ ಸಂಸ್ಥೆಗಳ ಸಹಯೋಗದೊಂದಿಗೆ ವಿಶೇಷ ಯೋಜನೆಗಳನ್ನು ರೂಪಿಸಿ ಕಾರ್ಯಗತಗೊಳಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದಾರೆ.
ರಫೀಕ್ ಅವರು ಈ ಹಿಂದೆ ಇಂಡಿಯನ್ ಸೂಪರ್ ಲೀಗ್ (ISL) ತಂಡದ ಫುಟ್ಬಾಲ್ ನಿರ್ದೇಶಕರಾಗಿ, ಕೇರಳ ಬ್ಲಾಸ್ಟರ್ಸ್ ಎಫ್‌ಸಿ ಮತ್ತು ಬೆಂಗಳೂರಿನ ಓಜೋನ್ ಎಫ್‌ಸಿಯ ಸಿಇಒ ಸೇರಿದಂತೆ ಹಲವು ಪ್ರಮುಖ ನಾಯಕತ್ವದ ಹುದ್ದೆಗಳನ್ನು ನಿರ್ವಹಿಸಿದ್ದಾರೆ. ಅವರ ನೇತೃತ್ವದಲ್ಲಿ ಕೇರಳ ಬ್ಲಾಸ್ಟರ್ಸ್ ತಂಡ ISL ಮತ್ತು ರಿಲಯನ್ಸ್ ಫುಟ್ಬಾಲ್ ಡೆವಲಪ್ಮೆಂಟ್ ಲೀಗ್ (RFDL) ಫೈನಲ್ಸ್‌ಗೆ ತಲುಪಿತ್ತು. ಅಲ್ಲದೆ, ಓಝೋನ್ FC ಬೆಂಗಳೂರು ತಂಡವು BDFA ಸೂಪರ್ ಡಿವಿಷನ್‌ನಲ್ಲಿ ಎರಡು ಬಾರಿ (2015-16 ಮತ್ತು 2017-18) ಚಾಂಪಿಯನ್ ಆಗಿತ್ತು. ನಾರೋಮ್ ಮಹೇಶ್ ಸಿಂಗ್, ಕೆ.ಪಿ. ರಾಹುಲ್, ವಿಭಿನ್ ಮೊಹನನ್ ಅವರಂತಹ ಆಟಗಾರರು ISL ನಿಂದ ರಾಷ್ಟ್ರೀಯ ತಂಡದವರೆಗೆ ಬೆಳೆಯಲು ಅವರು ಮಾರ್ಗದರ್ಶನ ನೀಡಿದ್ದಾರೆ.
ಸೌತ್ ಯುನೈಟೆಡ್ ಫುಟ್ಬಾಲ್ ಕ್ಲಬ್‌ನ ಸಿಇಒ ಆಗಿ ನೇಮಕಗೊಂಡಿರುವ ಬಗ್ಗೆ ಸಂತಸ ವ್ಯಕ್ತಪಡಿಸಿರುವ ರಫೀಕ್, ಈ ಜವಾಬ್ದಾರಿಯನ್ನು ನಿಭಾಯಿಸಲು ತಾನು ಉತ್ಸುಕನಾಗಿರುವುದಾಗಿ ತಿಳಿಸಿದ್ದಾರೆ. ತಮ್ಮ ಅನುಭವ ಮತ್ತು ಸಂಪರ್ಕಗಳನ್ನು ಬಳಸಿಕೊಂಡು ಯುವ ಆಟಗಾರರ ಪ್ರಗತಿಗೆ ಮಾರ್ಗ ನಿರ್ಮಿಸುವುದಾಗಿ ಅವರು ಹೇಳಿದ್ದಾರೆ.
ಇದನ್ನೂ ಓದಿ: ಫುಟ್ಬಾಲ್ ಕನಸು ಹೊತ್ತ ಮಕ್ಕಳಿಗೆ ಹೊಸ ಅವಕಾಶ;ಎಸ್ಯುಎಫ್ಸಿಯಿಂದ ಟ್ರಯಲ್ಸ್
ಪ್ಯಾನ್-ಇಂಡಿಯಾ ಟ್ಯಾಲೆಂಟ್ ಸ್ಕೌಟಿಂಗ್ ಮಾದರಿ ಅಭಿವೃದ್ಧಿ, AIFF ಗೆ GOAL FIFA ಪ್ರಾಜೆಕ್ಟ್ ಅಡಿಯಲ್ಲಿ ನೆರವು ಹಾಗೂ ಯುವ ಮತ್ತು ತಳಮಟ್ಟದ ಫುಟ್ಬಾಲ್ ನೀತಿಗಳನ್ನು ರೂಪಿಸುವಲ್ಲಿ ರಫೀಕ್ ಸಕ್ರಿಯರಾಗಿದ್ದಾರೆ. ಕೆಎನ್‌ವಿಬಿ (ಡಚ್ ಫುಟ್ಬಾಲ್ ಅಸೋಸಿಯೇಷನ್), ಯುರೋಪಿನ ಹಲವು ಪ್ರಮುಖ ಕ್ಲಬ್‌ಗಳು ಮತ್ತು ರಾಷ್ಟ್ರೀಯ ಫುಟ್ಬಾಲ್ ಸಂಘಗಳೊಂದಿಗೆ ಅವರಿಗೆ ಸಂಪರ್ಕವಿದೆ. 2022 FIFA ವಿಶ್ವಕಪ್‌ನ ಭಾಗವಾಗಿಯೂ ಅವರು ಕಾರ್ಯನಿರ್ವಹಿಸಿದ್ದರು. ಭಾರತೀಯ ಫುಟ್ಬಾಲ್ ಕೊಡುಗೆಗಾಗಿ ಅವರಿಗೆ CSR ಪ್ರಶಸ್ತಿಯೂ ಲಭಿಸಿದೆ.
ರಫೀಕ್ ಅವರ ಅನುಭವ ಮತ್ತು ಜಾಗತಿಕ ಸಂಪರ್ಕಗಳು ಸೌತ್ ಯುನೈಟೆಡ್ ಫುಟ್ಬಾಲ್ ಕ್ಲಬ್‌ಗೆ ಹೊಸ ಅವಕಾಶಗಳನ್ನು ತರಲಿವೆ ಎಂದು ಕ್ಲಬ್ ವಿಶ್ವಾಸ ವ್ಯಕ್ತಪಡಿಸಿದೆ. ರಫೀಕ್ ನೇತೃತ್ವದಲ್ಲಿ ಕ್ಲಬ್ ಮುನ್ನಡೆಯಲು ಮತ್ತು ವಸತಿ ಅಕಾಡೆಮಿ ಯೋಜನೆಯನ್ನು ಮುಂದುವರೆಸಲು ಬದ್ಧವಾಗಿದೆ ಎಂದು ಕ್ಲಬ್ ತಿಳಿಸಿದೆ.
