ವ್ಯಾಪಾರ ಸಮರಕ್ಕೆ ನಾಂದಿ ಹಾಡಿದ ಮೆಕ್ಸಿಕೋ : ಸುಂಕ ಏರಿಕೆಗೆ ಭಾರತದ ಖಡಕ್ ತಿರುಗೇಟು, ‘ತಕ್ಕ ಶಾಸ್ತಿ’ ಮಾಡುವ ಎಚ್ಚರಿಕೆ!

ನವದೆಹಲಿ/ಮೆಕ್ಸಿಕೋ ಸಿಟಿ: ಜಾಗತಿಕ ವ್ಯಾಪಾರ ವಲಯದಲ್ಲಿ ಮತ್ತೊಂದು ಸಂಘರ್ಷದ ಕಾರ್ಮೋಡ ಕವಿದಿದೆ. ಉತ್ತರ ಅಮೆರಿಕದ ಪ್ರಮುಖ ರಾಷ್ಟ್ರವಾದ ಮೆಕ್ಸಿಕೋ, ಮುಕ್ತ ವ್ಯಾಪಾರ ಒಪ್ಪಂದವಿಲ್ಲದ ದೇಶಗಳಿಂದ ಆಮದಾಗುವ ಸರಕುಗಳ ಮೇಲಿನ ಸುಂಕವನ್ನು ದಿಢೀರನೆ ಶೇ.50 ರವರೆಗೆ ಹೆಚ್ಚಿಸುವ ಮೂಲಕ ಅಚ್ಚರಿ ಮೂಡಿಸಿದೆ. ಈ ಏಕಪಕ್ಷೀಯ ನಿರ್ಧಾರಕ್ಕೆ ಭಾರತ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದು, ನಿರ್ಧಾರ ಹಿಂಪಡೆಯದಿದ್ದರೆ “ತಕ್ಕ ಕ್ರಮ” ಕೈಗೊಳ್ಳುವುದಾಗಿ ಮೆಕ್ಸಿಕೋ ಸರ್ಕಾರಕ್ಕೆ ಖಡಕ್ ಎಚ್ಚರಿಕೆ ರವಾನಿಸಿದೆ.

ದಿಢೀರ್ ನಿರ್ಧಾರ, ಏಷ್ಯನ್ ದೇಶಗಳಿಗೆ ಪೆಟ್ಟು:

ಮೆಕ್ಸಿಕೋ ಸರ್ಕಾರದ ಈ ನಿರ್ಧಾರವು ಏಷ್ಯಾದ ಪ್ರಮುಖ ಆರ್ಥಿಕ ಶಕ್ತಿಗಳಾದ ಭಾರತ, ಚೀನಾ, ದಕ್ಷಿಣ ಕೊರಿಯಾ, ಥೈಲ್ಯಾಂಡ್ ಮತ್ತು ಇಂಡೋನೇಷ್ಯಾ ದೇಶಗಳ ರಫ್ತು ವಹಿವಾಟಿನ ಮೇಲೆ ನೇರ ಬ್ರಹ್ಮಾಸ್ತ್ರವಾಗಿದೆ.

ಒಟ್ಟು 1,463 ಉತ್ಪನ್ನಗಳ ಮೇಲಿನ ಸುಂಕವನ್ನು ಪರಿಷ್ಕರಿಸಲಾಗಿದೆ. ಬಹುತೇಕ ವಸ್ತುಗಳಿಗೆ ಶೇ.35ರಷ್ಟು ಸುಂಕ ವಿಧಿಸಿದ್ದರೆ, ಆಯ್ದ ಕೆಲವು ಉತ್ಪನ್ನಗಳಿಗೆ ಬರೋಬ್ಬರಿ ಶೇ.50ರವರೆಗೆ ಸುಂಕ ಹೇರಲಾಗಿದೆ. ಈ ಹಿಂದೆ ಈ ಪ್ರಸ್ತಾವನೆಯನ್ನು ಆಗಸ್ಟ್ 2026ರವರೆಗೆ ಮುಂದೂಡಲಾಗಿತ್ತು. ಆದರೆ, ಡಿಸೆಂಬರ್ 3 ರಂದು ಮೆಕ್ಸಿಕೋ ಆರ್ಥಿಕ ಸಚಿವಾಲಯ ಯಾವುದೇ ಮುನ್ಸೂಚನೆ ಇಲ್ಲದೆ ದಿಢೀರನೆ ಇದನ್ನು ಮರುಜಾರಿಗೊಳಿಸಿರುವುದು ಜಾಗತಿಕ ವಲಯದಲ್ಲಿ ಅಸಮಾಧಾನಕ್ಕೆ ಕಾರಣವಾಗಿದೆ.

ಭಾರತದ ಆಕ್ಷೇಪವೇನು?

ಭಾರತದ ವಾಣಿಜ್ಯ ಸಚಿವಾಲಯ ಈ ಬೆಳವಣಿಗೆಯನ್ನು ಗಂಭೀರವಾಗಿ ಪರಿಗಣಿಸಿದೆ. ವಾಣಿಜ್ಯ ಕಾರ್ಯದರ್ಶಿ ರಾಜೇಶ್ ಅಗರವಾಲ್ ಅವರು ಈಗಾಗಲೇ ಮೆಕ್ಸಿಕೋದ ಉಪ ಆರ್ಥಿಕ ಸಚಿವ ಲೂಯಿಸ್ ರೊಸೆಂಡೋ ಅವರೊಂದಿಗೆ ತುರ್ತು ಮಾತುಕತೆ ನಡೆಸಿದ್ದಾರೆ.

“ಮೆಕ್ಸಿಕೋ ಸರ್ಕಾರದ ಈ ನಿರ್ಧಾರದ ಹಿಂದೆ ನೇರವಾಗಿ ಭಾರತವನ್ನು ಗುರಿಯಾಗಿಸುವ ಉದ್ದೇಶವಿಲ್ಲದಿರಬಹುದು. ಆದರೆ, ದೀರ್ಘಕಾಲದ ಮಿತ್ರರಾಷ್ಟ್ರವಾಗಿ ಯಾವುದೇ ಮುನ್ಸೂಚನೆ ಇಲ್ಲದೆ ಹೀಗೆ ಏಕಾಏಕಿ ಸುಂಕ ಏರಿಕೆ ಮಾಡುವುದು ಎರಡು ದೇಶಗಳ ನಡುವಿನ ಸಹಕಾರ ಮತ್ತು ವಿಶ್ವಾಸದ ತತ್ವಕ್ಕೆ ಸಂಪೂರ್ಣ ವಿರುದ್ಧವಾಗಿದೆ,” ಎಂದು ಭಾರತೀಯ ಹಿರಿಯ ಅಧಿಕಾರಿಯೊಬ್ಬರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಅಮೆರಿಕದ ‘ಒತ್ತಡ ತಂತ್ರ’ ಕಾರಣವೇ?

ಮೆಕ್ಸಿಕೋ ಸರ್ಕಾರವು ತನ್ನ ಸ್ಥಳೀಯ ಉತ್ಪಾದನೆಯನ್ನು ಉತ್ತೇಜಿಸಲು ಮತ್ತು ವ್ಯಾಪಾರ ಕೊರತೆಯನ್ನು ನೀಗಿಸಲು ಈ ಕ್ರಮ ಕೈಗೊಂಡಿದೆ ಎಂದು ಸಮರ್ಥಿಸಿಕೊಳ್ಳುತ್ತಿದೆ. ಆದರೆ, ಅಂತರರಾಷ್ಟ್ರೀಯ ರಾಜಕೀಯ ವಿಶ್ಲೇಷಕರ ಪ್ರಕಾರ, ಇದರ ಹಿಂದೆ ದೊಡ್ಡಣ್ಣ ಅಮೆರಿಕದ ಒತ್ತಡವಿದೆ.

ಅಮೆರಿಕ, ಮೆಕ್ಸಿಕೋ ಮತ್ತು ಕೆನಡಾ ನಡುವಿನ ಒಪ್ಪಂದದ ಪರಿಶೀಲನೆ ಸದ್ಯದಲ್ಲೇ ನಡೆಯಲಿದೆ. ಚೀನಾದ ಸರಕುಗಳು ಮೆಕ್ಸಿಕೋ ಮೂಲಕ ಅಮೆರಿಕ ಮಾರುಕಟ್ಟೆಗೆ ಸುಲಭವಾಗಿ ಪ್ರವೇಶಿಸುವುದನ್ನು ತಡೆಯಲು ಅಮೆರಿಕ ಈ ತಂತ್ರ ಹೂಡಿದೆ ಎನ್ನಲಾಗಿದೆ. ಚೀನಾವನ್ನು ಕಟ್ಟಿಹಾಕುವ ಭರದಲ್ಲಿ ಭಾರತದಂತಹ ಇತರೆ ರಾಷ್ಟ್ರಗಳಿಗೂ ಇದರ ಬಿಸಿ ತಟ್ಟಿದೆ.

ಮುಂದೇನು? ಭಾರತದ ನಡೆ:

ಈ ಸುಂಕ ಏರಿಕೆಯಿಂದ ಭಾರತೀಯ ಸರಕುಗಳ ಮೇಲೆ, ವಿಶೇಷವಾಗಿ ಆಟೋಮೊಬೈಲ್, ಫಾರ್ಮಾ ಮತ್ತು ಜವಳಿ ವಲಯದ ಮೇಲೆ ಎಷ್ಟು ಪರಿಣಾಮ ಬೀರಲಿದೆ ಎಂಬುದನ್ನು ಭಾರತದ ವಾಣಿಜ್ಯ ಇಲಾಖೆ ಕೂಲಂಕಷವಾಗಿ ಪರಿಶೀಲಿಸುತ್ತಿದೆ.

“ನಾವು ರಾಜತಾಂತ್ರಿಕ ಮಾತುಕತೆಯ ಮೂಲಕವೇ ಸಮಸ್ಯೆ ಬಗೆಹರಿಸಿಕೊಳ್ಳಲು ಬದ್ಧರಾಗಿದ್ದೇವೆ. ಆದರೆ, ಪರಿಸ್ಥಿತಿ ಸುಧಾರಿಸದಿದ್ದರೆ ಮತ್ತು ನಮ್ಮ ರಫ್ತುದಾರರಿಗೆ ಅನ್ಯಾಯವಾಗುವುದಾದರೆ, ನಾವೂ ಕೂಡ ಪ್ರತಿತಂತ್ರ ರೂಪಿಸುವ ಹಕ್ಕನ್ನು ಕಾಯ್ದಿರಿಸಿಕೊಂಡಿದ್ದೇವೆ,” ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಅಂದರೆ, ಭಾರತವೂ ಮೆಕ್ಸಿಕೋದಿಂದ ಬರುವ ಸರಕುಗಳ ಮೇಲೆ ಇದೇ ರೀತಿಯ ಸುಂಕ ವಿಧಿಸುವ ಅಥವಾ ಇತರೆ ಕಠಿಣ ಕ್ರಮಗಳನ್ನು ಕೈಗೊಳ್ಳುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ.

ಇದನ್ನೂ ಓದಿ:‘ಮೆಸ್ಸಿ ಮೇನಿಯಾ’ ಮುಖಭಂಗ : ಅಭಿಮಾನಿಗಳ ಹಣಕ್ಕೆ ಬೆಲೆ ಇಲ್ಲ, ವಿಐಪಿಗಳಿಗೇ ಮಣೆ