ಮುಂಬೈ: ಕಿಯಾ ಇಂಡಿಯಾ ತನ್ನ ಹೊಸದಾಗಿ ಬಿಡುಗಡೆ ಮಾಡಿರುವ ಕಾರೆನ್ಸ್ ಕ್ಲಾವಿಸ್ ಮತ್ತು ಕಾರೆನ್ಸ್ ಕ್ಲಾವಿಸ್ ಇವಿ ಮಾದರಿಗಳು ಕೇವಲ ನಾಲ್ಕು ತಿಂಗಳಲ್ಲಿ ಒಟ್ಟು 21,000ಕ್ಕೂ ಹೆಚ್ಚು ಬುಕಿಂಗ್ಗಳನ್ನು ಪಡೆದಿವೆ ಎಂದು ಪ್ರಕಟಿಸಿದೆ. ಇದು ಪೆಟ್ರೋಲ್/ಡೀಸೆಲ್ ಮತ್ತು ಮೊದಲ ‘ಮೇಡ್-ಇನ್-ಇಂಡಿಯಾ’ ಎಲೆಕ್ಟ್ರಿಕ್ ವಾಹನಕ್ಕೆ ಭಾರತದಲ್ಲಿ ದೊಡ್ಡ ಮಟ್ಟದ ಬೇಡಿಕೆ ಇರುವುದನ್ನು ತೋರಿಸುತ್ತದೆ.
ಕಿಯಾ ಕಾರೆನ್ಸ್ ಕ್ಲಾವಿಸ್ ಮಾದರಿಯು 20,000ಕ್ಕೂ ಹೆಚ್ಚು ಬುಕಿಂಗ್ಗಳನ್ನು ಪಡೆದಿದ್ದರೆ, ಅದರ ಎಲೆಕ್ಟ್ರಿಕ್ ಆವೃತ್ತಿಯಾದ ಕ್ಲಾವಿಸ್ ಇವಿ 1,000ಕ್ಕೂ ಹೆಚ್ಚು ಆರ್ಡರ್ಗಳನ್ನು ಪಡೆದುಕೊಂಡಿದೆ.
ಈ ಯಶಸ್ಸಿನ ಬಗ್ಗೆ ಮಾತನಾಡಿದ ಕಿಯಾ ಇಂಡಿಯಾದ ಮುಖ್ಯ ಮಾರಾಟ ಅಧಿಕಾರಿ ಜೂನ್ಸು ಚೋ, “ಕಾರೆನ್ಸ್ ಕ್ಲಾವಿಸ್ ಮತ್ತು ಕ್ಲಾವಿಸ್ ಇವಿ ಮಾದರಿಗಳಿಗೆ ದೊರೆತ ಉತ್ತಮ ಪ್ರತಿಕ್ರಿಯೆಯಿಂದ ನಮಗೆ ಸಂತೋಷವಾಗಿದೆ. ಇದು ನಮ್ಮ ವಾಹನಗಳ ಮೇಲಿರುವ ಗ್ರಾಹಕರ ನಂಬಿಕೆಯನ್ನು ತೋರಿಸುತ್ತದೆ. ನಾವಿನ್ಯತೆ, ಸುರಕ್ಷತೆ ಮತ್ತು ಸೌಕರ್ಯವನ್ನು ಒದಗಿಸಲು ನಾವು ಬದ್ಧರಾಗಿದ್ದೇವೆ. ICE ಮತ್ತು EV ಎರಡೂ ಮಾದರಿಗಳು ಭಾರತೀಯ ಗ್ರಾಹಕರನ್ನು ತಲುಪುತ್ತಿರುವುದು ನಮಗೆ ಹೆಮ್ಮೆಯ ವಿಷಯ” ಎಂದು ಹೇಳಿದ್ದಾರೆ.
ಪ್ರೀಮಿಯಂ ಫೀಚರ್ಗಳು ಮತ್ತು ಎಂಜಿನ್ ಆಯ್ಕೆಗಳು
ಕಾರೆನ್ಸ್ ಕ್ಲಾವಿಸ್ ಮಾದರಿಯು ಎಸ್ಯುವಿಯ ಶಕ್ತಿ ಮತ್ತು ಎಂಪಿವಿಯ ಸೌಕರ್ಯವನ್ನು ಹೊಂದಿದೆ. ಇದು ಎರಡನೇ ಸಾಲಿನ ಸೀಟುಗಳನ್ನು ಸುಲಭವಾಗಿ ಸರಿಹೊಂದಿಸುವ ಆಯ್ಕೆ, ಥರ್ಡ್ ರೋಗೆ ಹೋಗಲು ಸುಲಭವಾದ ‘ಒನ್-ಟಚ್ ಎಲೆಕ್ಟ್ರಿಕ್ ಟಂಬಲ್’ ಮತ್ತು ‘ಬಾಸ್ ಮೋಡ್’ ನಂತಹ ಫೀಚರ್ಗಳನ್ನು ಒಳಗೊಂಡಿದೆ. ಕ್ಯಾಬಿನ್ನಲ್ಲಿ ಡ್ಯುಯಲ್ 12.3-ಇಂಚಿನ ಪನೋರಮಿಕ್ ಡಿಸ್ಪ್ಲೇ, ಬೋಸ್ 8-ಸ್ಪೀಕರ್ ಆಡಿಯೊ, 64-ಬಣ್ಣದ ಆಂಬಿಯೆಂಟ್ ಲೈಟಿಂಗ್ ಮತ್ತು ಡ್ಯುಯಲ್ ಡ್ಯಾಶ್ಕ್ಯಾಮ್ನಂತಹ ಪ್ರೀಮಿಯಂ ಫೀಚರ್ಗಳಿವೆ.
ಕ್ಲಾವಿಸ್, ಕಾರೆನ್ಸ್ನ ಎರಡು ಇಂಜಿನ್ ಆಯ್ಕೆಗಳನ್ನು ಉಳಿಸಿಕೊಂಡಿದೆ. ಗ್ರಾಹಕರು 1.5-ಲೀಟರ್ ಟರ್ಬೊ-ಪೆಟ್ರೋಲ್ (160bhp), 1.5-ಲೀಟರ್ ನ್ಯಾಚುರಲಿ ಆಸ್ಪಿರೇಟೆಡ್ ಪೆಟ್ರೋಲ್ (115bhp), ಮತ್ತು 1.5-ಲೀಟರ್ ಡೀಸೆಲ್ (116bhp) ಎಂಜಿನ್ ಆಯ್ಕೆ ಮಾಡಬಹುದು. 6-ಸ್ಪೀಡ್ ಮ್ಯಾನುವಲ್, 6-ಸ್ಪೀಡ್ iMT, 6-ಸ್ಪೀಡ್ ಆಟೋಮ್ಯಾಟಿಕ್ ಮತ್ತು 7-ಸ್ಪೀಡ್ DCT ಸೇರಿದಂತೆ ಹಲವು ಟ್ರಾನ್ಸ್ಮಿಷನ್ ಆಯ್ಕೆಗಳು ಲಭ್ಯವಿದೆ.
ಕ್ಲಾವಿಸ್ ಇವಿ: ಬ್ಯಾಟರಿ ಮತ್ತು ಸುರಕ್ಷತೆ
ಕ್ಲಾವಿಸ್ ಇವಿ ಎರಡು ಬ್ಯಾಟರಿ ಆಯ್ಕೆಗಳೊಂದಿಗೆ ಲಭ್ಯವಿದೆ: 42kWh (404 ಕಿ.ಮೀ. ರೇಂಜ್) ಮತ್ತು 51.4kWh (490 ಕಿ.ಮೀ. ರೇಂಜ್). ಇದು 100kW ಡಿಸಿ ಫಾಸ್ಟ್ ಚಾರ್ಜಿಂಗ್ ಬೆಂಬಲಿಸುವುದರಿಂದ ಕೇವಲ 39 ನಿಮಿಷಗಳಲ್ಲಿ 10-80% ಚಾರ್ಜ್ ಆಗುತ್ತದೆ. ಇದರ ಎರಡು ಮೋಟಾರ್ ಆಯ್ಕೆಗಳು (99kW ಮತ್ತು 126kW) 255Nm ಟಾರ್ಕ್ ಅನ್ನು ನೀಡುತ್ತವೆ. ದೊಡ್ಡ ಬ್ಯಾಟರಿ ಮಾದರಿಯು ಕೇವಲ 8.4 ಸೆಕೆಂಡುಗಳಲ್ಲಿ 0-100 ಕಿ.ಮೀ. ವೇಗವನ್ನು ತಲುಪುತ್ತದೆ.
ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದ್ದು, ಎರಡೂ ಮಾದರಿಗಳಲ್ಲಿ ಲೆವೆಲ್ 2 ADAS (20ಕ್ಕೂ ಹೆಚ್ಚು ಫೀಚರ್ಗಳೊಂದಿಗೆ), 6 ಏರ್ಬ್ಯಾಗ್ಗಳು, ESC ಮತ್ತು 360-ಡಿಗ್ರಿ ಕ್ಯಾಮೆರಾ ವ್ಯವಸ್ಥೆ ಇದೆ. ಈ ವಾಹನಗಳ ಮೂಲಕ ಕಿಯಾ ಭಾರತದ ಮಾಸ್-ಪ್ರೀಮಿಯಂ ವಿಭಾಗದಲ್ಲಿ ತನ್ನ ಸ್ಥಾನವನ್ನು ಮತ್ತಷ್ಟು ಬಲಪಡಿಸುವ ಗುರಿ ಹೊಂದಿದೆ.
