ಬೆಂಗಳೂರು: ಭಾರತ ರಾಷ್ಟ್ರೀಯ ಕ್ರಿಕೆಟ್ ತಂಡವು ಇಂಗ್ಲೆಂಡ್ ವಿರುದ್ಧದ ಐದು ಪಂದ್ಯಗಳ ರೋಚಕ ಟೆಸ್ಟ್ ಸರಣಿಗೆ ತಯಾರಿ ನಡೆಸುತ್ತಿದ್ದು, ಎಲ್ಲರ ಗಮನವೂ ವೇಗದ ಬೌಲರ್ ಜಸ್ಪ್ರೀತ್ ಬೂಮ್ರಾ ಅವರ ಮೇಲಿದೆ. ಜೂನ್ 20 ರಂದು ಹೆಡಿಂಗ್ಲಿಯಲ್ಲಿ ಆರಂಭವಾಗಲಿರುವ ಮೊದಲ ಟೆಸ್ಟ್‌ಗೆ ಮುನ್ನ ತಂಡವು ಬೆಕನ್‌ಹ್ಯಾಮ್‌ನಲ್ಲಿ ತರಬೇತಿ ಪಡೆಯುತ್ತಿದೆ.
ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಟೆಸ್ಟ್ ಕ್ರಿಕೆಟ್‌ನಿಂದ ನಿವೃತ್ತರಾಗಿರುವ ಕಾರಣ, ಭಾರತ ತಂಡವು ಯುವ ನಾಯಕ ಶುಭಮನ್ ಗಿಲ್ ನೇತೃತ್ವದಲ್ಲಿ ಹೊಸ ಅಧ್ಯಾಯ ಪ್ರಾರಂಭಿಸಲಿದೆ. ಈ ಸರಣಿಯಲ್ಲಿ ಜಸ್ಪ್ರೀತ್ ಬೂಮ್ರಾ ಚೆಂಡಿನೊಂದಿಗೆ ದಾಳಿಯನ್ನು ಮುನ್ನಡೆಸಲಿದ್ದಾರೆ.
ಬೆಕನ್‌ಹ್ಯಾಮ್‌ನಲ್ಲಿ ಬೂಮ್ರಾ ಬೆಂಕಿಯಾಟ
ಕೆಂಟ್‌ನ ಬೆಕನ್‌ಹ್ಯಾಮ್ ಮೈದಾನದಲ್ಲಿ ನಡೆದ ಭಾರತದ ಅಭ್ಯಾಸ ಸೆಷನ್‌ನಲ್ಲಿ ಬೂಮ್ರಾ ತಮ್ಮ ವೇಗದ ಬೌಲಿಂಗ್‌ನಿಂದ ಎಲ್ಲರ ಗಮನ ಸೆಳೆದರು. 31 ವರ್ಷದ ಈ ವೇಗಿ, ಪಿಚ್‌ನ ಸಹಾಯವಿಲ್ಲದೆಯೇ ಭಾರತೀಯ ಬ್ಯಾಟರ್‌ಗಳಿಗೆ ಸವಾಲು ಒಡ್ಡಿದರು. ಸರಿಯಾದ ಲೈನ್ ಎಸೆತಗಳು ನಿಖರ ಯಾರ್ಕರ್‌ಗಳೊಂದಿಗೆ ಬೂಮ್ರಾ ತಾನೇಕೆ ವಿಶ್ವದ ಅತ್ಯಂತ ಭಯಂಕರ ವೇಗಿ ಎಂದು ಮತ್ತೊಮ್ಮೆ ಸಾಬೀತುಪಡಿಸಿದರು.
ಇಎಸ್‌ಪಿಎನ್‌ಕ್ರಿಕ್‌ಇನ್ಫೋ ವರದಿಯ ಪ್ರಕಾರ, ಬೂಮ್ರಾ ತಮ್ಮ ಬೌಲಿಂಗ್ ಕೋಚ್ ಮೊರ್ನೆ ಮೊರ್ಕೆಲ್ ಜೊತೆಗೆ 2018ರಲ್ಲಿ ಟ್ರೆಂಟ್ ಬ್ರಿಡ್ಜ್‌ನಲ್ಲಿ ತಾವು ತೋರಿದ ಐದು ವಿಕೆಟ್‌ಗಳ ಗೊಂಚಲನ ಬಗ್ಗೆ ಚರ್ಚಿಸಿದರು. ಆಗ ಡ್ಯೂಕ್ಸ್ ಚೆಂಡು ಸ್ವಿಂಗ್ ಮತ್ತು ಸೀಮ್‌ಗೆ ಸಹಕಾರಿಯಾಗಿತ್ತು ಎಂದು ಅವರು ನೆನಪಿಸಿಕೊಂಡರು. ಆದರೆ, ನಂತರದ ಪ್ರವಾಸಗಳಲ್ಲಿ ಚೆಂಡು ಕಡಿಮೆ ಪರಿಣಾಮಕಾರಿಯಾಗಿತ್ತು ಎಂದು ಅವರು ಹೇಳಿದರು.
ಗಾಯದ ಕಾಳಜಿಯೊಂದಿಗೆ ಕಾರ್ಯನಿರ್ವಹಣೆ
ಬೂಮ್ರಾ ಉತ್ತಮ ಲಯದಲ್ಲಿದ್ದರೂ, ಐದು ಟೆಸ್ಟ್‌ಗಳ ಸರಣಿಯಲ್ಲಿ ಅವರ ಕೆಲಸದ ಹೊರೆಯನ್ನು ಭಾರತ ತಂಡದ ನಿರ್ವಹಣೆ ಎಚ್ಚರಿಕೆಯಿಂದ ನಿಯಂತ್ರಿಸಲಿದೆ. ಇತ್ತೀಚೆಗೆ, ಭಾರತದ ಮುಖ್ಯ ಸೆಲೆಕ್ಟರ್ ಅಜಿತ್ ಅಗರ್ಕರ್, ಬೂಮ್ರಾ ಸತತ ಟೆಸ್ಟ್‌ಗಳನ್ನು ಆಡದಿರಲು ತೀರ್ಮಾನಿಸಲಾಗಿದೆ ಎಂದು ದೃಢಪಡಿಸಿದ್ದಾರೆ. ಇದು ಅವರ ಬೆನ್ನು ಗಾಯದ ಮರುಕಳಿಸುವಿಕೆಯ ಅಪಾಯವನ್ನು ತಪ್ಪಿಸಲು ಮಾಡಲಾದ ಕ್ರಮವಾಗಿದೆ.
ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಗಾಯದಿಂದಾಗಿ ಬೂಮ್ರಾ ಎಸ್‌ಸಿಜಿ ಟೆಸ್ಟ್ ಮತ್ತು 2025ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯನ್ನು ತಪ್ಪಿಸಿಕೊಂಡಿದ್ದರು. ಆದರೆ, ಐಪಿಎಲ್ 2025ರಲ್ಲಿ ಮುಂಬೈ ಇಂಡಿಯನ್ಸ್‌ಗಾಗಿ ಆಡುವಾಗ ಬೂಮ್ರಾ ಉತ್ತಮ ಲಯದಲ್ಲಿದ್ದರು. ಆದಾಗ್ಯೂ, ಯಾವ ಟೆಸ್ಟ್‌ಗಳನ್ನು ಅವರು ಆಡಲಿದ್ದಾರೆ ಎಂಬುದನ್ನು ಭಾರತ ಇನ್ನೂ ನಿರ್ಧರಿಸಿಲ್ಲ.
ಇಂಗ್ಲೆಂಡ್ ಟೆಸ್ಟ್‌ನಲ್ಲಿ ಬೂಮ್ರಾಗೆ ಎರಡು ಮೈಲಿಗಲ್ಲುಗಳ ಸಾಧನೆಯ ಆಸೆ
ಇದೇ ವೇಳೆ, ಬೂಮ್ರಾ ಏಷ್ಯಾದ ಬೌಲರ್‌ಗಳಲ್ಲಿ ಸೆನಾ ದೇಶಗಳಲ್ಲಿ (ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್, ನ್ಯೂಜಿಲೆಂಡ್, ಆಸ್ಟ್ರೇಲಿಯಾ) ಅತಿ ಹೆಚ್ಚು ವಿಕೆಟ್ ಪಡೆದವರಾಗಲು ಕೇವಲ ಎರಡು ವಿಕೆಟ್‌ಗಳ ಅಂತರದಲ್ಲಿದ್ದಾರೆ. 145 ವಿಕೆಟ್‌ಗಳೊಂದಿಗೆ, ಬೂಮ್ರಾ ಪಾಕಿಸ್ತಾನದ ದಂತಕಥೆ ವಾಸಿಮ್ ಅಕ್ರಮ್ (146) ಅವರನ್ನು ಮೀರಿಸಲು ಸಜ್ಜಾಗಿದ್ದಾರೆ. ವಾಸಿಮ್ ಅಕ್ರಮ್ ಪ್ರಸ್ತುತ ಸೆನಾ ದೇಶಗಳಲ್ಲಿ ಅತ್ಯಂತ ಯಶಸ್ವಿ ಏಷ್ಯನ್ ಟೆಸ್ಟ್ ಬೌಲರ್ ಆಗಿದ್ದಾರೆ. ಅವರ ನಂತರ ಅನಿಲ್ ಕುಂಬ್ಳೆ (141), ಇಶಾಂತ್ ಶರ್ಮಾ (130), ಮತ್ತು ಮುತ್ತಯ್ಯ ಮುರಳೀಧರನ್ (125) ಇದ್ದಾರೆ.
ಇದರ ಜೊತೆಗೆ, ಬೂಮ್ರಾ ಮತ್ತೊಂದು ದೊಡ್ಡ ಮೈಲಿಗಲ್ಲಿನ ಸನಿಹದಲ್ಲಿದ್ದಾರೆ. ಸೆನಾ ದೇಶಗಳಲ್ಲಿ 150 ಟೆಸ್ಟ್ ವಿಕೆಟ್‌ಗಳನ್ನು ಕಬಳಿಸಿದ ಮೊದಲ ಏಷ್ಯನ್ ಬೌಲರ್ ಆಗಲು ಅವರಿಗೆ ಕೇವಲ ಐದು ವಿಕೆಟ್‌ಗಳ ಅಗತ್ಯವಿದೆ. ಸಾಂಪ್ರದಾಯಿಕವಾಗಿ, ಸೆನಾ ಪಿಚ್‌ಗಳು ಉಪಖಂಡದ ಬೌಲರ್‌ಗಳಿಗೆ ಕಠಿಣವಾಗಿವೆ. ಆದರೆ, ಬೂಮ್ರಾ ಇಲ್ಲಿ ಯಶಸ್ವಿಯಾಗಿದ್ದಾರೆ. ಇಂಗ್ಲೆಂಡ್‌ನಲ್ಲಿ ಕೇವಲ 9 ಟೆಸ್ಟ್‌ಗಳಲ್ಲಿ 64 ವಿಕೆಟ್‌ಗಳನ್ನು 17.16ರ ಅದ್ಭುತ ಸರಾಸರಿಯಲ್ಲಿ ಪಡೆದಿರುವ ಅವರು, ಈ ಸರಣಿಯಲ್ಲಿ ಪ್ರಮುಖ ಪಾತ್ರವನ್ನು ನಿರೀಕ್ಷಿಸಲಾಗಿದೆ.
