ಮುಂಬೈ : ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಟಿ20 ವಿಶ್ವಕಪ್ 2026ರ ಸೆಮಿಫೈನಲ್ ಪಂದ್ಯವು ಕೇವಲ ಟೀಮ್ ಇಂಡಿಯಾದ ವಿಜಯೋತ್ಸವಕ್ಕೆ ಮಾತ್ರವಲ್ಲದೆ, ಇಂಗ್ಲೆಂಡ್ನ ಯುವ ಆಟಗಾರ ಜೇಕಬ್ ಬೆಥೆಲ್ ಅವರ ಐತಿಹಾಸಿಕ ಹಾಗೂ ಕೆಚ್ಚೆದೆಯ ಬ್ಯಾಟಿಂಗ್ಗೂ ಸಾಕ್ಷಿಯಾಯಿತು.
ಭಾರತ ನೀಡಿದ್ದ 254 ರನ್ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಿದ ಇಂಗ್ಲೆಂಡ್ ಅಂತಿಮವಾಗಿ ಸೋಲು ಕಂಡರೂ, ಬೆಥೆಲ್ ಮಾತ್ರ ತಮ್ಮ ಸ್ಫೋಟಕ ಶತಕದ ಮೂಲಕ ವಿಶ್ವ ಕ್ರಿಕೆಟ್ನ ಗಮನ ಸೆಳೆದಿದ್ದಾರೆ. ಇದು ಟಿ20 ವಿಶ್ವಕಪ್ ಇತಿಹಾಸದಲ್ಲಿ ದಾಖಲಾದ ಎರಡನೇ ಅತಿ ವೇಗದ ಶತಕವಾಗಿದೆ. ಕೇವಲ ಒಂದು ದಿನದ ಹಿಂದಷ್ಟೇ ದಕ್ಷಿಣ ಆಫ್ರಿಕಾ ವಿರುದ್ಧ ನ್ಯೂಜಿಲೆಂಡ್ನ ಫಿನ್ ಅಲೆನ್ (33 ಎಸೆತಗಳಲ್ಲಿ) ಅತಿ ವೇಗದ ಶತಕ ಸಿಡಿಸಿದ್ದರು.
ಕಳಪೆ ಫಾರ್ಮ್ನಿಂದ ಸಿಡಿದೆದ್ದ ಜೇಕಬ್ ಬೆಥೆಲ್
ಸೂಪರ್ 8 ಹಂತದಲ್ಲಿ ಕೇವಲ 3, 8 ಮತ್ತು 21 ರನ್ ಗಳಿಸಿ ತೀವ್ರ ನಿರಾಸೆ ಮೂಡಿಸಿದ್ದ ಜೇಕಬ್ ಬೆಥೆಲ್ ಅವರನ್ನು ಮಹತ್ವದ ಸೆಮಿಫೈನಲ್ ಪಂದ್ಯದಿಂದ ಕೈಬಿಡಬೇಕು ಎಂಬ ಕೂಗು ಕೇಳಿಬಂದಿತ್ತು. ಅವರ ಬದಲಿಗೆ ಉತ್ತಮ ಫಾರ್ಮ್ನಲ್ಲಿದ್ದ ಆಲ್ ರೌಂಡರ್ ರೆಹಾನ್ ಅಹ್ಮದ್ ಅವರನ್ನು ಕಣಕ್ಕಿಳಿಸುವ ಬಗ್ಗೆಯೂ ಚರ್ಚೆಗಳು ನಡೆದಿದ್ದವು. ಆದರೆ ಇಂಗ್ಲೆಂಡ್ ತಂಡದ ಮ್ಯಾನೇಜ್ಮೆಂಟ್ ಬೆಥೆಲ್ ಮೇಲೆ ನಂಬಿಕೆ ಇಟ್ಟು ಆಡುವ ಬಳಗದಲ್ಲಿ ಅವಕಾಶ ನೀಡಿತು. ಭಾರತದ ಬ್ಯಾಟರ್ಗಳು ಇಂಗ್ಲೆಂಡ್ ಬೌಲರ್ಗಳಾದ ಜೋಫ್ರಾ ಆರ್ಚರ್ (61 ರನ್) ಮತ್ತು ಸ್ಯಾಮ್ ಕರ್ರನ್ (53 ರನ್) ಅವರನ್ನು ಬೆಂಡೆತ್ತಿ 253 ರನ್ ಗಳಿಸಿದಾಗ, ಈ ಮೊತ್ತವನ್ನು ಬೆನ್ನಟ್ಟುವುದು ಇಂಗ್ಲೆಂಡ್ಗೆ ಅಸಾಧ್ಯ ಎಂದೇ ಭಾವಿಸಲಾಗಿತ್ತು. ಆದರೆ, ಛಲ ಬಿಡದ ಬೆಥೆಲ್ ಒಂಟಿ ಸಲಗದಂತೆ ಹೋರಾಡಿದರು.
ಸ್ಪಿನ್ನರ್ ವರುಣ್ ಚಕ್ರವರ್ತಿ ಮೇಲೆರಗಿದ ಆಂಗ್ಲ ಬ್ಯಾಟರ್
ಬೆಥೆಲ್ ಅವರ ಈ ಐತಿಹಾಸಿಕ ಇನ್ನಿಂಗ್ಸ್ಗೆ ಅತಿ ಹೆಚ್ಚು ಬಲಿಯಾದವರು ಭಾರತದ ಮಿಸ್ಟರಿ ಸ್ಪಿನ್ನರ್ ವರುಣ್ ಚಕ್ರವರ್ತಿ. ವರುಣ್ ಎಸೆದ ಮೊದಲ ಮೂರು ಎಸೆತಗಳಿಗೂ ಬೆಥೆಲ್ ಸತತ ಮೂರು ಭರ್ಜರಿ ಸಿಕ್ಸರ್ ಸಿಡಿಸಿ ಅಬ್ಬರಿಸಿದರು. ಬ್ಯಾಕ್ವರ್ಡ್ ಪಾಯಿಂಟ್ನತ್ತ ಅವರು ಬಾರಿಸಿದ ರಿವರ್ಸ್ ಸ್ವೀಪ್ ಹೊಡೆತವಂತೂ ಪ್ರೇಕ್ಷಕರನ್ನು ದಂಗಾಗುವಂತೆ ಮಾಡಿತ್ತು. ಹಾರ್ದಿಕ್ ಪಾಂಡ್ಯ ಅವರ ಓವರ್ನಲ್ಲೂ ರನ್ ಕಲೆಹಾಕಿದ ಬೆಥೆಲ್, ಸೂರ್ಯಕುಮಾರ್ ಯಾದವ್ ಅವರು ಮತ್ತೆ ವರುಣ್ ಚಕ್ರವರ್ತಿಯವರನ್ನು ಬೌಲಿಂಗ್ಗೆ ಇಳಿಸಿದಾಗ ಸತತ ನಾಲ್ಕು ಬೌಂಡರಿಗಳನ್ನು ಚಚ್ಚಿದರು. ಒಟ್ಟಾರೆಯಾಗಿ ವರುಣ್ ಚಕ್ರವರ್ತಿ ಅವರ 13 ಎಸೆತಗಳನ್ನು ಎದುರಿಸಿದ ಬೆಥೆಲ್ ಬರೋಬ್ಬರಿ 43 ರನ್ ಕೊಳ್ಳೆ ಹೊಡೆದರು. ಜಸ್ಪ್ರೀತ್ ಬುಮ್ರಾ ಮತ್ತು ಅರ್ಶ್ದೀಪ್ ಸಿಂಗ್ ಅವರ ಓವರ್ಗಳನ್ನು ಅತ್ಯಂತ ಎಚ್ಚರಿಕೆಯಿಂದ ಆಡಿದ ಬೆಥೆಲ್, ವರುಣ್ ಮತ್ತು ಅಕ್ಷರ್ ಪಟೇಲ್ ಅವರನ್ನು ಗುರಿಯಾಗಿಸಿಕೊಂಡು ರನ್ ಮಳೆ ಸುರಿಸಿದರು.
ದಾಖಲೆಗಳ ಸರಮಾಲೆ ಮತ್ತು ಭಾರತಕ್ಕೆ ಒಲಿದ ರೋಚಕ ಜಯ
ಈ ಅಮೋಘ ಇನ್ನಿಂಗ್ಸ್ನ ಹಾದಿಯಲ್ಲಿ 22 ವರ್ಷದ ಜೇಕಬ್ ಬೆಥೆಲ್ ಕೇವಲ 19 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಇದು ಟಿ20 ವಿಶ್ವಕಪ್ ನಾಕೌಟ್ ಪಂದ್ಯಗಳಲ್ಲಿ ಅತಿ ವೇಗದ ಅರ್ಧಶತಕದ ದಾಖಲೆಯಾಗಿದ್ದು, ಫಿನ್ ಅಲೆನ್ ನಿರ್ಮಿಸಿದ್ದ ದಾಖಲೆಯನ್ನು ಇವರು ಸರಿಗಟ್ಟಿದರು. ಅಲ್ಲದೆ, ವಿಲ್ ಜಾಕ್ಸ್ ಅವರ ಹೆಸರಿನಲ್ಲಿದ್ದ ಇಂಗ್ಲೆಂಡ್ ಪರ ಟಿ20 ವಿಶ್ವಕಪ್ನ ಅತಿ ವೇಗದ ಅರ್ಧಶತಕದ ದಾಖಲೆಯನ್ನೂ ಇವರು ಅಳಿಸಿಹಾಕಿದರು. ತಮ್ಮ ಅಬ್ಬರದ ಬ್ಯಾಟಿಂಗ್ ಮುಂದುವರಿಸಿದ ಬೆಥೆಲ್ ಕೇವಲ 45 ಎಸೆತಗಳಲ್ಲಿ ಶತಕ ಸಿಡಿಸುವ ಮೂಲಕ ಟಿ20 ವಿಶ್ವಕಪ್ ಇತಿಹಾಸದಲ್ಲಿ ಎರಡನೇ ಅತಿ ವೇಗದ ಶತಕದ ಸರದಾರನಾದರು. ಅಂತಿಮವಾಗಿ ಇಂಗ್ಲೆಂಡ್ ಗೆಲುವಿಗೆ 11 ಎಸೆತಗಳಲ್ಲಿ 33 ರನ್ಗಳ ಅವಶ್ಯಕತೆಯಿದ್ದಾಗ ಭಾರತೀಯ ಬೌಲರ್ಗಳು ಕರಾರುವಾಕ್ ದಾಳಿ ಸಂಘಟಿಸಿದರು. 48 ಎಸೆತಗಳಲ್ಲಿ 105 ರನ್ ಗಳಿಸಿ ಬೆಥೆಲ್ ಪೆವಿಲಿಯನ್ ಸೇರುವುದರೊಂದಿಗೆ ಇಂಗ್ಲೆಂಡ್ ತಂಡದ ಗೆಲುವಿನ ಆಸೆಯೂ ಕಮರಿತು. ಆದರೂ, ಅವರ ಈ ಸಾಹಸಮಯ ಇನ್ನಿಂಗ್ಸ್ ಟಿ20 ವಿಶ್ವಕಪ್ ಇತಿಹಾಸದಲ್ಲಿ ಸುವರ್ಣಾಕ್ಷರಗಳಲ್ಲಿ ಬರೆದಿಡುವಂತದ್ದಾಗಿದೆ.
ಇದನ್ನೂ ಓದಿ : ವಾಂಖೆಡೆಯಲ್ಲಿ ದಿಗ್ಗಜರ ಸಂಗಮ.. ಧೋನಿ-ರೋಹಿತ್ ಪುನರ್ಮಿಲನಕ್ಕೆ ಸಾಕ್ಷಿಯಾದ ಟಿ20 ವಿಶ್ವಕಪ್ ಸೆಮಿಫೈನಲ್
