ನಾಯಿ ಮಾಂಸ’ ವಿವಾದ: ಅಫ್ರಿದಿ ಹೇಳಿಕೆಗೆ ಇರ್ಫಾನ್ ಪಠಾಣ್ ತಿರುಗೇಟು 

ನವದೆಹಲಿ: ಭಾರತ ಮತ್ತು ಪಾಕಿಸ್ತಾನದ ಮಾಜಿ ಕ್ರಿಕೆಟಿಗರಾದ ಇರ್ಫಾನ್ ಪಠಾಣ್ ಮತ್ತು ಶಾಹಿದ್ ಅಫ್ರಿದಿ ನಡುವಿನ ವಾಕ್ಸಮರ ಮತ್ತಷ್ಟು ತೀವ್ರಗೊಂಡಿದೆ. 2006ರ ಪ್ರವಾಸದ ವೇಳೆ ನಡೆದ ‘ನಾಯಿ ಮಾಂಸ’ ಘಟನೆಯ ಕುರಿತ ಇರ್ಫಾನ್ ಹೇಳಿಕೆಯನ್ನು ‘ಸುಳ್ಳು’ ಎಂದು ಕರೆದಿದ್ದ ಅಫ್ರಿದಿ, “ಪಠಾಣ್ ಒಬ್ಬ ನಿಜವಾದ ಪುರುಷನಲ್ಲ, ಬೆನ್ನ ಹಿಂದೆ ಮಾತನಾಡುತ್ತಾರೆ,” ಎಂದು ವಾಗ್ದಾಳಿ ನಡೆಸಿದ್ದರು. ಇದಕ್ಕೆ ಇದೀಗ ಇರ್ಫಾನ್ ಪಠಾಣ್ ತಮ್ಮದೇ ಶೈಲಿಯಲ್ಲಿ ತಿರುಗೇಟು ನೀಡಿದ್ದಾರೆ.

ತಮ್ಮ ‘ಎಕ್ಸ್’ ಖಾತೆಯಲ್ಲಿ ಪೋಸ್ಟ್ ಮಾಡಿರುವ ಇರ್ಫಾನ್, “ನೀವೆಲ್ಲರೂ ಸರಿಯಾಗಿಯೇ ಹೇಳುತ್ತೀರಿ: ‘ಈ ನೆರೆಯ ದೇಶದ ಮಾಜಿ ಆಟಗಾರರು ಮತ್ತು ಮಾಧ್ಯಮದವರು ಇರ್ಫಾನ್ ಪಠಾಣ್ ಹೆಸರಿನ ಗೀಳಿನಲ್ಲಿದ್ದಾರೆ’ (Aap Log sahi kehte hain: ‘Ye padosi X players aur media Irfan Pathan ke naam se obsessed hain.’),” ಎಂದು ಬರೆದುಕೊಂಡಿದ್ದಾರೆ.

ವಾದದ ಹಿನ್ನೆಲೆ ಏನು?

ಈ ವಿವಾದವು ಆಗಸ್ಟ್ 2025ರಲ್ಲಿ ಆರಂಭವಾಯಿತು. ‘ಲಲ್ಲನ್‌ಟಾಪ್’ಗೆ ನೀಡಿದ ಸಂದರ್ಶನವೊಂದರಲ್ಲಿ ಇರ್ಫಾನ್ ಪಠಾಣ್, 2006ರ ಪಾಕಿಸ್ತಾನ ಪ್ರವಾಸದ ಘಟನೆಯೊಂದನ್ನು ನೆನಪಿಸಿಕೊಂಡಿದ್ದರು. ಕರಾಚಿಯಿಂದ ಲಾಹೋರ್‌ಗೆ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದಾಗ, ಶಾಹಿದ್ ಅಫ್ರಿದಿ ತಮ್ಮ ಬಳಿ ಬಂದು, ತಲೆಯನ್ನು ಕೆದಕಿ, ‘ಹೇಗಿದ್ದೀಯಾ ಹುಡುಗ?’ ಎಂದು ಕಿಚಾಯಿಸಿದ್ದರು ಎಂದು ಪಠಾಣ್ ಹೇಳಿದ್ದರು.

ಇದರಿಂದ ಸಿಟ್ಟಾದ ಪಠಾಣ್, ತಮ್ಮ ಪಕ್ಕದಲ್ಲೇ ಕುಳಿತಿದ್ದ ಅಬ್ದುಲ್ ರಜಾಕ್‌ಗೆ, “ಇಲ್ಲಿ ಯಾವ ರೀತಿಯ ಮಾಂಸ ಲಭ್ಯವಿದೆ?” ಎಂದು ಕೇಳಿ, ನಂತರ “ನಾಯಿ ಮಾಂಸ ಸಿಗುತ್ತದೆಯೇ?” ಎಂದು ಪ್ರಶ್ನಿಸಿದ್ದರು. ರಜಾಕ್ ಆಶ್ಚರ್ಯಚಕಿತರಾದಾಗ, ಪಠಾಣ್ ಅವರು ಅಫ್ರಿದಿ ಕಡೆಗೆ ತೋರಿಸಿ, “ಅವನು (ಅಫ್ರಿದಿ) ನಾಯಿ ಮಾಂಸ ತಿಂದಿದ್ದಾನೆ, ಅದಕ್ಕೇ ತುಂಬಾ ಹೊತ್ತಿನಿಂದ ಬೊಗಳುತ್ತಿದ್ದಾನೆ,” ಎಂದು ಹೇಳಿದ್ದರು. ಇದರಿಂದ ಅಫ್ರಿದಿ ವಿಮಾನ ಪ್ರಯಾಣದುದ್ದಕ್ಕೂ ಮೌನವಾಗಿದ್ದರು ಎಂದು ಇರ್ಫಾನ್ ಆ ಸಂದರ್ಶನದಲ್ಲಿ ಹೇಳಿದ್ದರು.

ಅಫ್ರಿದಿ ಪ್ರತಿಕ್ರಿಯೆ

ಇರ್ಫಾನ್ ಅವರ ಈ ಹೇಳಿಕೆಗೆ ಇತ್ತೀಚೆಗೆ ಪ್ರತಿಕ್ರಿಯಿಸಿದ್ದ ಅಫ್ರಿದಿ, “ಮುಖಾಮುಖಿ ಮಾತನಾಡುವವರನ್ನು ನಾನು ಪುರುಷ ಎಂದು ಪರಿಗಣಿಸುತ್ತೇನೆ. ಅವನು ನನ್ನ ಬೆನ್ನ ಹಿಂದೆ ಮಾತನಾಡುತ್ತಾನೆ. ಅವನ ಸುಳ್ಳಿಗೆ ನಾನೇನು ಪ್ರತಿಕ್ರಿಯಿಸಲಿ?” ಎಂದು ಸವಾಲು ಹಾಕಿದ್ದರು. ಅಲ್ಲದೆ, ಅಬ್ದುಲ್ ರಜಾಕ್ ಕೂಡ ಇಂತಹ ಯಾವುದೇ ಘಟನೆ ನಡೆದಿಲ್ಲ ಎಂದು ಹೇಳಿದ್ದಾರೆ ಎಂದು ಅಫ್ರಿದಿ ವಾದಿಸಿದ್ದರು.

ಏಷ್ಯಾ ಕಪ್ 2025ರ ಸಮಯದಲ್ಲಿ ಭಾರತ ಮತ್ತು ಪಾಕಿಸ್ತಾನ ತಂಡಗಳ ನಡುವೆ ಉದ್ವಿಗ್ನತೆ ಹೆಚ್ಚುತ್ತಿರುವ ಸಂದರ್ಭದಲ್ಲೇ, ಈ ಇಬ್ಬರು ಮಾಜಿ ಆಟಗಾರರ ವಾಕ್ಸಮರವೂ ತಾರಕಕ್ಕೇರಿದೆ. ಈಗಾಗಲೇ ಗ್ರೂಪ್ ಹಂತದ ಪಂದ್ಯದ ನಂತರ ‘ಹ್ಯಾಂಡ್‌ಶೇಕ್’ ವಿವಾದದಿಂದ ಎರಡೂ ದೇಶಗಳ ಕ್ರಿಕೆಟ್ ವಲಯದಲ್ಲಿ ಬಿರುಕು ಮೂಡಿದೆ. ಇದೀಗ, ಸೆಪ್ಟೆಂಬರ್ 21ರಂದು ದುಬೈನಲ್ಲಿ ನಡೆಯಲಿರುವ ಸೂಪರ್ ಫೋರ್ ಪಂದ್ಯದಲ್ಲಿ ಉಭಯ ತಂಡಗಳು ಮತ್ತೊಮ್ಮೆ ಮುಖಾಮುಖಿಯಾಗಲಿವೆ.