ಟೆಹ್ರಾನ್: ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಜಂಟಿ ವೈಮಾನಿಕ ದಾಳಿಯಲ್ಲಿ ಇರಾನ್ನ ಪರಮೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ (86) ಅವರು ಹತರಾಗಿದ್ದಾರೆ. ಈ ಮಹತ್ವದ ಬೆಳವಣಿಗೆಯನ್ನು ಇರಾನ್ನ ಅಧಿಕೃತ ಸರ್ಕಾರಿ ಮಾಧ್ಯಮಗಳು ಇಂದು ಖಚಿತಪಡಿಸಿವೆ. ಸರ್ವೋಚ್ಚ ನಾಯಕನ ಸಾವಿನ ಹಿನ್ನೆಲೆಯಲ್ಲಿ ಇರಾನ್ ಆಡಳಿತವು 40 ದಿನಗಳ ಶೋಕಾಚರಣೆ ಘೋಷಿಸಿದೆ. ಶನಿವಾರ ಮುಂಜಾನೆ ಟೆಹ್ರಾನ್ನಲ್ಲಿರುವ ಅವರ ಕಚೇರಿಯ ಮೇಲೆ ನಡೆದ ಭೀಕರ ದಾಳಿಯಲ್ಲಿ ಅವರು ಮೃತಪಟ್ಟಿದ್ದು, ದಶಕಗಳ ಬಳಿಕ ಇರಾನ್ ಮೇಲೆ ನಡೆದ ಅತಿದೊಡ್ಡ ಹಾಗೂ ಅತ್ಯಂತ ನಿರ್ಣಾಯಕ ದಾಳಿ ಇದಾಗಿದೆ.
“ಇರಾನ್ನ ಪರಮೋಚ್ಚ ನಾಯಕ ಹುತಾತ್ಮರಾಗಿದ್ದಾರೆ” ಎಂದು ಇರಾನ್ನ ಸರ್ಕಾರಿ ಪ್ರಸಾರ ಕೇಂದ್ರ ಐಆರ್ಐಬಿ (IRIB) ವರದಿ ಮಾಡಿದೆ. ‘ಜಾಗತಿಕ ಅಹಂಕಾರ’ದ ವಿರುದ್ಧ ಕೊನೆಯವರೆಗೂ ಹೋರಾಡುತ್ತಲೇ, ತಮ್ಮ ಹೊಣೆಗಾರಿಕೆಯ ಅತ್ಯುನ್ನತ ಘಟ್ಟದಲ್ಲಿ ಅವರು ಪ್ರಾಣಾರ್ಪಣೆ ಮಾಡಿದ್ದಾರೆ ಎಂದು ಸರ್ಕಾರಿ ಟಿವಿ ಬಣ್ಣಿಸಿದೆ. ಇತ್ತ ಇಸ್ರೇಲ್ ಮೂಲಗಳ ಪ್ರಕಾರ, ಶನಿವಾರ ಬೆಳಗ್ಗೆ ಟೆಹ್ರಾನ್ನಲ್ಲಿರುವ ಖಮೇನಿ ಅವರ ಕಚೇರಿ ಮತ್ತು ನಿವಾಸದ ಮೇಲೆ ನಡೆಸಿದ ನಿಖರ ದಾಳಿಯಲ್ಲಿ ಖಮೇನಿಯನ್ನು ಕೊಲ್ಲಲಾಗಿದೆ. ದಾಳಿಯಲ್ಲಿ ಕಟ್ಟಡ ಸಂಪೂರ್ಣ ಧ್ವಂಸವಾಗಿದೆ. ಅಲ್ಲದೆ, ಅವರ ಮೃತದೇಹವನ್ನು ಪತ್ತೆಹಚ್ಚಲಾಗಿದ್ದು, ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರಿಗೆ ಖಮೇನಿ ಮೃತದೇಹದ ಚಿತ್ರವನ್ನು ತೋರಿಸಲಾಗಿದೆ ಎಂದು ಇಸ್ರೇಲ್ನ ಮಾಧ್ಯಮಗಳು ವರದಿ ಮಾಡಿವೆ.
ಟ್ರಂಪ್ ಘೋಷಣೆ
ಈ ಜಂಟಿ ಕಾರ್ಯಾಚರಣೆಯ ಬಗ್ಗೆ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ಸಾಮಾಜಿಕ ಜಾಲತಾಣ ಖಾತೆಗಳಲ್ಲಿ ಹಂಚಿಕೊಂಡಿದ್ದಾರೆ. “ಇರಾನ್ ಜನರು ತಮ್ಮ ದೇಶವನ್ನು ಮರಳಿ ಪಡೆಯಲು ಸಿಕ್ಕಿರುವ ಅತಿ ದೊಡ್ಡ ಅವಕಾಶವಿದು” ಎಂದು ಅವರು ಬಣ್ಣಿಸಿದ್ದಾರೆ. ಅತ್ಯಾಧುನಿಕ ಗುಪ್ತಚರ ಮತ್ತು ಟ್ರ್ಯಾಕಿಂಗ್ ವ್ಯವಸ್ಥೆಗಳ ಮೂಲಕ ಖಮೇನಿ ಅವರ ಚಲನವಲನಗಳನ್ನು ನಿಖರವಾಗಿ ಗಮನಿಸಿ ಈ ಕಾರ್ಯಾಚರಣೆ ನಡೆಸಲಾಗಿದೆ. ಮಧ್ಯಪ್ರಾಚ್ಯದಲ್ಲಿ ಸಂಪೂರ್ಣ ಶಾಂತಿ ನೆಲೆಸುವವರೆಗೂ ಇಂತಹ ನಿಖರ ಹಾಗೂ ತೀವ್ರತರವಾದ ದಾಳಿಗಳು ಮುಂದುವರಿಯಲಿವೆ ಎಂದು ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ. ಈ ಮಧ್ಯೆ, ಖಮೇನಿ ಅವರ ಅಧಿಕೃತ ಎಕ್ಸ್ (X) ಖಾತೆಯಲ್ಲಿ “ನಾಮಿ ಹೈದರ್ ಹೆಸರಿನಲ್ಲಿ” ಎಂಬ ನಿಗೂಢ ಸಂದೇಶವೊಂದು ಪ್ರಕಟವಾಗಿ ಕೆಲಕಾಲ ಗೊಂದಲ ಮೂಡಿಸಿತ್ತು.
ಇರಾನ್ ಪ್ರತಿದಾಳಿ
ಈ ಭೀಕರ ದಾಳಿಯಲ್ಲಿ ಕೇವಲ ಖಮೇನಿ ಮಾತ್ರವಲ್ಲದೆ, ಇರಾನ್ನ ಹಲವು ಉನ್ನತ ನಾಯಕರು ಬಲಿಯಾಗಿದ್ದಾರೆ. ಇರಾನ್ ರಕ್ಷಣಾ ಸಚಿವ ಅಮೀರ್ ನಾಸಿರ್ಜಾದೆ, ಕ್ರಾಂತಿಕಾರಿ ಗಾರ್ಡ್ಸ್ (IRGC) ಕಮಾಂಡರ್ ಮೊಹಮ್ಮದ್ ಪಾಕ್ಪೋರ್, ಖಮೇನಿ ಅವರ ಸಲಹೆಗಾರ ಅಲಿ ಶಮ್ಖಾನಿ ಸೇರಿದಂತೆ ಹಲವು ಹಿರಿಯ ಸೇನಾ ಕಮಾಂಡರ್ಗಳು ಹತ್ಯೆಯಾಗಿದ್ದಾರೆ. ಅಲ್ಲದೆ, ಖಮೇನಿ ಅವರ ಪುತ್ರಿ, ಮೊಮ್ಮಗು ಹಾಗೂ ಇತರ ಕುಟುಂಬ ಸದಸ್ಯರೂ ಈ ದಾಳಿಯಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಈ ಬೆಳವಣಿಗೆಯಿಂದ ಕೆರಳಿರುವ ಇರಾನ್, ಈ ದಾಳಿಯನ್ನು ಅಕ್ರಮ ಹಾಗೂ ಪ್ರಚೋದನಕಾರಿ ಎಂದು ಖಂಡಿಸಿದೆ. ಅಲ್ಲದೆ, ಇಸ್ರೇಲ್ ಹಾಗೂ ಅಮೆರಿಕದ ಸೇನಾ ನೆಲೆಗಳಿರುವ ಗಲ್ಫ್ ರಾಷ್ಟ್ರಗಳತ್ತ ಕ್ಷಿಪಣಿಗಳನ್ನು ಉಡಾಯಿಸುವ ಮೂಲಕ ತನ್ನ ಪ್ರತಿದಾಳಿಯನ್ನು ಆರಂಭಿಸಿದೆ.
ಯಾರಿವರು ಖಮೇನಿ?
1989ರಲ್ಲಿ ಇರಾನ್ನ ಮೊದಲ ಪರಮೋಚ್ಚ ನಾಯಕ ಆಯತೊಲ್ಲಾ ರುಹೊಲ್ಲಾ ಖೊಮೇನಿ ನಿಧನದ ನಂತರ 86 ವರ್ಷದ ಆಯತೊಲ್ಲಾ ಅಲಿ ಖಮೇನಿ ಅಧಿಕಾರ ವಹಿಸಿಕೊಂಡಿದ್ದರು. ದೇಶದ ಸೇನೆ, ನ್ಯಾಯಾಂಗ ಹಾಗೂ ಸರ್ಕಾರದ ಮೇಲೆ ಸಂಪೂರ್ಣ ಹಿಡಿತ ಹೊಂದಿದ್ದ ಇವರು, ಪಾಶ್ಚಿಮಾತ್ಯ ವಿರೋಧಿ ನಿಲುವಿಗೆ ಹೆಸರಾಗಿದ್ದರು. ಅಮೆರಿಕ ಮತ್ತು ಇಸ್ರೇಲ್ ವಿರುದ್ಧ ಸದಾ ಕಠಿಣ ನಿಲುವು ತಳೆಯುತ್ತಿದ್ದ ಖಮೇನಿ, ದೇಶದೊಳಗಿನ ಪ್ರತಿಭಟನೆಗಳನ್ನೂ ಕಠಿಣವಾಗಿ ಹತ್ತಿಕ್ಕಿದ್ದರು. ಪ್ರಸ್ತುತ ಖಮೇನಿ ಅವರಿಗೆ ಯಾವುದೇ ಅಧಿಕೃತ ಉತ್ತರಾಧಿಕಾರಿ ಇಲ್ಲದಿರುವುದರಿಂದ, ಇರಾನ್ನ ಭವಿಷ್ಯ ಅತಂತ್ರವಾಗಿದೆ. ನಾಯಕತ್ವದ ನಿರ್ವಾತ ಹಾಗೂ ಇರಾನ್ನ ಪ್ರತಿಕಾರದ ಬೆದರಿಕೆಗಳಿಂದಾಗಿ ಮಧ್ಯಪ್ರಾಚ್ಯದಲ್ಲಿ ಮತ್ತೊಂದು ಸುದೀರ್ಘ ಹಾಗೂ ಭೀಕರ ಯುದ್ಧದ ಕಾರ್ಮೋಡ ಕವಿದಿದೆ.
ಇದನ್ನೂ ಓದಿ : ಇರಾನ್ ಶಾಲೆ ಮೇಲೆ ದಾಳಿ.. ವಿದ್ಯಾರ್ಥಿಗಳು ಸೇರಿ 40 ಜನ ಬಲಿ
