ಅಹಮದಾಬಾದ್ : ಹದಿನಾರನೇ ಆವೃತ್ತಿಯ ಐಪಿಎಲ್ ಆರಂಭಕ್ಕೆ ಕೇವಲ ಕೆಲವೇ ವಾರಗಳು ಬಾಕಿ ಇರುವಂತೆ, ಗುಜರಾತ್ ಟೈಟಾನ್ಸ್ ತಂಡದ ಸ್ಟಾರ್ ಬ್ಯಾಟರ್ ಸಾಯಿ ಸುದರ್ಶನ್ ಅವರ ಆಟದ ಶೈಲಿ ಕುರಿತು ಕ್ರಿಕೆಟ್ ವಲಯದಲ್ಲಿ ಚರ್ಚೆ ಆರಂಭವಾಗಿದೆ. ಭಾರತ ತಂಡದ ಮಾಜಿ ಆರಂಭಿಕ ಆಟಗಾರ ಸಡಗೋಪನ್ ರಮೇಶ್ ಅವರು ಸುದರ್ಶನ್ ಅವರ ಬ್ಯಾಟಿಂಗ್ ಕುರಿತು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದು, ಅವರ ಸ್ಫೋಟಕ ಸಾಮರ್ಥ್ಯದ ಬಗ್ಗೆ ಅಚ್ಚರಿಯ ಮಾತುಗಳನ್ನಾಡಿದ್ದಾರೆ.
ಜಿಯೋ ಹಾಟ್ಸ್ಟಾರ್ನೊಂದಿಗೆ ಮಾತನಾಡಿದ ರಮೇಶ್, “ಸಾಯಿ ಸುದರ್ಶನ್ ಅವರ ಬ್ಯಾಟಿಂಗ್ ಶೈಲಿಯು ಟೀಮ್ ಇಂಡಿಯಾದ ಮಾಜಿ ಆಟಗಾರ ಶಿಖರ್ ಧವನ್ ಅವರನ್ನು ನೆನಪಿಸುತ್ತದೆ. ಧವನ್ ಹೇಗೆ ಪ್ರತಿ ಸೀಸನ್ನಲ್ಲಿ ಸದ್ದಿಲ್ಲದೆ 500 ರನ್ ಗಳಿಸುತ್ತಿದ್ದರೂ ಅವರ ಆಟ ಹೆಚ್ಚು ಸುದ್ದಿಯಾಗುತ್ತಿರಲಿಲ್ಲವೋ, ಹಾಗೆಯೇ ಸುದರ್ಶನ್ ಕೂಡ ಗಮನ ಸೆಳೆಯದೆಯೇ ರನ್ ಮಳೆ ಹರಿಸುತ್ತಾರೆ. ಅವರ ಬ್ಯಾಟಿಂಗ್ ವೈಭವ್ ಸೂರ್ಯವಂಶಿಯವರಂತೆ ಆರಂಭದಿಂದಲೇ ಸ್ಫೋಟಕವಾಗಿ ಕಾಣದಿರಬಹುದು, ಆದರೆ ನಿರಂತರವಾಗಿ ಬೌಂಡರಿ ಬಾರಿಸುವ ಮೂಲಕ ಅವರು ಇನಿಂಗ್ಸ್ ಕಟ್ಟುತ್ತಾರೆ” ಎಂದು ವಿಶ್ಲೇಷಿಸಿದ್ದಾರೆ.
ಸ್ಥಿರತೆಯೇ ಇವರ ಅತಿ ದೊಡ್ಡ ಬಲ :
2025ರ ಐಪಿಎಲ್ ಸೀಸನ್ನಲ್ಲಿ 759 ರನ್ ಗಳಿಸುವ ಮೂಲಕ ‘ಆರೆಂಜ್ ಕ್ಯಾಪ್’ ಮುಡಿಗೇರಿಸಿಕೊಂಡಿದ್ದ ಸಾಯಿ ಸುದರ್ಶನ್, ‘ಎಮರ್ಜಿಂಗ್ ಪ್ಲೇಯರ್ ಆಫ್ ದಿ ಇಯರ್’ ಪ್ರಶಸ್ತಿಗೂ ಭಾಜನರಾಗಿದ್ದರು. ಅವರ ಈ ಅದ್ಭುತ ಪ್ರದರ್ಶನವು ಅವರಿಗೆ ಭಾರತೀಯ ಏಕದಿನ, ಟೆಸ್ಟ್ ಮತ್ತು ಟಿ20 ತಂಡಗಳಲ್ಲಿ ಸ್ಥಾನ ಕಲ್ಪಿಸಿಕೊಟ್ಟಿತ್ತು. ಸದ್ಯ 3 ಏಕದಿನ ಹಾಗೂ 6 ಟೆಸ್ಟ್ ಪಂದ್ಯಗಳನ್ನು ಆಡಿರುವ ಅವರು, ಸ್ಥಿರವಾಗಿ ರನ್ ಗಳಿಸುವ ಕಲೆ ಮೈಗೂಡಿಸಿಕೊಂಡಿದ್ದಾರೆ.
ಬದಲಾಗಬೇಕಿದೆ ಬ್ಯಾಟಿಂಗ್ ತಂತ್ರ:
ಭಾರತ ತಂಡವು ಪ್ರಸ್ತುತ ಟಿ20 ಕ್ರಿಕೆಟ್ನಲ್ಲಿ ಅನುಸರಿಸುತ್ತಿರುವ ‘ಹೈ ರಿಸ್ಕ್, ಹೈ ರಿವಾರ್ಡ್’ (ಹೆಚ್ಚಿನ ಅಪಾಯ, ಹೆಚ್ಚಿನ ಪ್ರತಿಫಲ) ತಂತ್ರಕ್ಕೆ ಹೊಂದಿಕೊಳ್ಳಲು ಸುದರ್ಶನ್ ತಮ್ಮ ಆಟಕ್ಕೆ ಸ್ವಲ್ಪ ಹೆಚ್ಚಿನ ‘ಪವರ್’ ಸೇರಿಸಿಕೊಳ್ಳಬೇಕೆಂದು ರಮೇಶ್ ಸಲಹೆ ನೀಡಿದ್ದಾರೆ. ಭಾರತ ತಂಡದ ಆರಂಭಿಕ ಸ್ಥಾನಕ್ಕೆ ಭಾರಿ ಪೈಪೋಟಿ ಇದ್ದು, 180 ರಿಂದ 200ರ ಸ್ಟ್ರೈಕ್ ರೇಟ್ನಲ್ಲಿ ಆಡುವ ಬ್ಯಾಟರ್ಗಳ ನಡುವೆ ಗುರುತಿಸಿಕೊಳ್ಳಲು ಸುದರ್ಶನ್ ತಮ್ಮ ಸ್ಟ್ರೈಕ್ ರೇಟ್ ಹೆಚ್ಚಿಸಿಕೊಳ್ಳುವುದು ಅನಿವಾರ್ಯವಾಗಿದೆ. ಮುಂಬರುವ ಮಾರ್ಚ್ 31 ರಂದು ಪಂಜಾಬ್ ಕಿಂಗ್ಸ್ ವಿರುದ್ಧ ನಡೆಯಲಿರುವ ಪಂದ್ಯದಲ್ಲಿ ಸಾಯಿ ಸುದರ್ಶನ್ ಕಣಕ್ಕಿಳಿಯಲಿದ್ದಾರೆ. ಕ್ಲಾಸಿಕ್ ಬ್ಯಾಟಿಂಗ್ ಜೊತೆಗೆ ಸ್ಫೋಟಕ ಆಟವನ್ನು ಅವರು ರೂಢಿಸಿಕೊಳ್ಳುತ್ತಾರೆಯೇ ಎಂಬುದನ್ನು ಕಾದು ನೋಡಬೇಕಿದೆ.
ಇದನ್ನೂ ಓದಿ : ಧಾರವಾಡದಲ್ಲಿ ಆಶಾ ಕಾರ್ಯಕರ್ತೆಯರ ವಜಾಗೊಳಿಸುವಿಕೆ ಖಂಡಸಿ ಪ್ರತಿಭಟನೆ
