ಕಾಲ ಬದಲಾದಂತೆಲ್ಲ ಹೂಡಿಕೆಯ ಮಾದರಿಯೂ ಬದಲಾಗಿದೆ. ಬ್ಯಾಂಕ್ ಗಳಲ್ಲಿ ಎಫ್ ಡಿ, ಪೋಸ್ಟ್ ಆಫೀಸ್ ಆರ್ ಡಿಯಂತಹ ಶೇ.7-8ರಷ್ಟು ರಿಟರ್ನ್ಸ್ ಕೊಡುವ ಯೋಜನೆಗಳ ಬದಲಾಗಿ ಜನ ಬೇರೆ ಮಾರ್ಗಗಳಲ್ಲಿ ಹೂಡಿಕೆ ಮಾಡ್ತಿದಾರೆ. ಅದ್ರಲ್ಲೂ, ಸಿಸ್ಟಮ್ಯಾಟಿಕ್ ಇನ್ವೆಸ್ಟ್ ಮೆಂಟ್ ಪ್ಲಾನ್ (ಎಸ್ ಐಪಿ)ನಂತಹ ಯೋಜನೆಗಳಲ್ಲಿ ಹೆಚ್ಚು ಹೂಡಿಕೆ ಮಾಡುತ್ತಿದ್ದಾರೆ. ಹೀಗೆ ಎಸ್ಐಪಿಯಲ್ಲಿ ತಿಂಗಳಿಗೆ 6 ಸಾವಿರ ರೂಪಾಯಿ ಉಳಿಸಿದರೂ ಸಾಕು, 20 ವರ್ಷಗಳಲ್ಲಿ ಅದು 40 ಲಕ್ಷ ರೂ. ಆಗಲಿದೆ. ಹೇಗಂತೀರಾ? ಈ ಸ್ಟೋರಿ ನೋಡಿ.
ಆಧುನಿಕ ಹೂಡಿಕೆಗೆ ಎಸ್ಐಪಿ ವರದಾನ
ತಿಂಗಳಿಗೆ 6 ಸಾವಿರ ರೂ. ಹೂಡಿಕೆ ಮಾಡಿ ಸಾಕು
20 ವರ್ಷಗಳಲ್ಲಿ ಅದಾಗಲಿದೆ 40 ಲಕ್ಷ ರೂಪಾಯಿ
ಹೌದು, ಎಸ್ಐಪಿಯಲ್ಲಿ ಸ್ವಲ್ಪ ರಿಸ್ಕ್ ಇದ್ದರೂ, ಕಳೆದ ಕೆಲ ವರ್ಷಗಳ ರಿಟರ್ನ್ಸ್ ನೋಡಿದರೆ ಲಾಭ ಖಂಡಿತ ಎಂಬಂತಾಗಿದೆ. ನೀವೊಂದು ವೇಳೆ ತಿಂಗಳಿಗೆ 6 ಸಾವಿರ ರೂ. ಎಸ್ಐಪಿ ಮಾಡಿದರೆ, 20 ವರ್ಷಗಳಲ್ಲಿ ಅದು 40.79 ಲಕ್ಷ ರೂ. ಆಗಲಿದೆ. 20 ವರ್ಷದಲ್ಲಿ ನೀವು 14.40 ಲಕ್ಷ ರೂ. ಹೂಡಿಕೆ ಮಾಡಿರುತ್ತೀರಿ. ಇದಕ್ಕೆ ಶೇ.12ರಷ್ಟು ರಿಟರ್ನ್ಸ್ ಎಂದರೂ ಅದು 40.79 ಲಕ್ಷ ರೂಪಾಯಿ ಆಗಲಿದೆ. ನಾವು ಸ್ವಲ್ಪ ಹಣ ಹೂಡಿಕೆ ಮಾಡಿದರೂ, ಅದು ದೀರ್ಘಾವಧಿ ದೃಷ್ಟಿಯಿಂದ ಹೆಚ್ಚಿನ ರಿಟರ್ನ್ಸ್ ನೀಡುತ್ತದೆ.
ದೀರ್ಘಾವಧಿ ಹೂಡಿಕೆಯೇ ತಜ್ಞರ ಶಿಫಾರಸು
30 ವರ್ಷ ಹೂಡಿಕೆ ಮಾಡಿದರೆ ನೀವು ಕೋಟ್ಯಧೀಶ
ಕಡಿಮೆ ವಯಸ್ಸಲ್ಲೇ ಹೂಡಿಕೆ ಆರಂಭಿಸೋನೇ ಜಾಣ
ಮ್ಯೂಚುವಲ್ ಫಂಡ್ ಎಸ್ಐಪಿಯಲ್ಲಿ ಸುದೀರ್ಘ ಅವಧಿಗೆ ಹೂಡಿಕೆ ಮಾಡುವುದು, ಉದ್ಯೋಗಕ್ಕೆ ಸೇರಿದ ಕೂಡಲೇ ಹೂಡಿಕೆ ಆರಂಭಿಸುವುದು ಜಾಣತನ ಎಂದು ತಜ್ಞರು ಹೇಳುತ್ತಾರೆ. ಇದಕ್ಕೆ ನಿದರ್ಶನ ಎಂಬಂತೆ, ನೀವು ಮಾಸಿಕ 6 ಸಾವಿರ ರೂಪಾಯಿ ಎಸ್ಐಪಿಯನ್ನು 30 ವರ್ಷಗಳವರೆಗೆ ಕಟ್ಟಿದರೆ ನೀವು ಹೂಡಿಕೆ ಮಾಡಿದ 21.6 ಲಕ್ಷ ರೂಪಾಯಿಗೆ, 1.63 ಕೋಟಿ ರೂ. ಲಭಿಸುತ್ತದೆ. ಇದು ದೀರ್ಘಾವಧಿಯ ಹೂಡಿಕೆ ನೀಡುವ ಮಹತ್ವದ ಲಾಭವಾಗಿದೆ.
ಯಾವ ಮಾದರಿಯ ಹೂಡಿಕೆ ಲಾಭದಾಯಕ?
ಯಾವ ಫಂಡ್ ಗಳಲ್ಲಿ ಇನ್ವೆಸ್ಟ್ ಮಾಡಬಹುದು?
ಯಾವಾಗ ಬೇಕಾದರೂ ಹೂಡಿಕೆ ಮಾಡಬಹುದೇ?
ಎಸ್ಐಪಿಯಲ್ಲೇ ಹಲವು ಫಂಡ್ ಗಳಿವೆ. ಸ್ಮಾಲ್ ಕ್ಯಾಪ್, ಮಿಡ್ ಕ್ಯಾಪ್, ಲಾರ್ಜ್ ಕ್ಯಾಪ್ ಫಂಡ್ ಗಳಿವೆ. ಆದರೆ, ದೀರ್ಘಾವಧಿಯ ಹೂಡಿಕೆಯನ್ನು ಗಮನದಲ್ಲಿಟ್ಟುಕೊಂಡು ನೋಡುವುದಾದರೆ, ಲಾರ್ಜ್ ಕ್ಯಾಪ್ ಫಂಡ್ ಗಳು ಉತ್ತಮ ಎನ್ನುತ್ತಾರೆ ತಜ್ಞರು. ಲಾರ್ಜ್ ಕ್ಯಾಪ್ ಗಳಲ್ಲಿ ವಿದೇಶಿ ಹೂಡಿಕೆ ಹೆಚ್ಚಿರುವುದರಿಂದ, ಇವುಗಳ ರಿಟರ್ನ್ಸ್ ಉತ್ತಮ ಎಂದು ತಜ್ಞರು ಸಲಹೆ ನೀಡುತ್ತಾರೆ. ಮಿಡ್ ಕ್ಯಾಪ್ ಫಂಡ್ ಗಳೂ ಕೂಡ ಉತ್ತಮ ರಿಟರ್ನ್ಸ್ ನೀಡೋದ್ರಲ್ಲಿ ಅನುಮಾನ ಬೇಡ ಅನ್ನೋದು ತಜ್ಞರ ಅಂಬೋಣವಾಗಿದೆ.
ಒಟ್ಟಿನಲ್ಲಿ, ಬದಲಾದ ಕಾಲಘಟ್ಟದಲ್ಲಿ ನಾವು ದುಡಿಯುವ ಜತೆಗೆ, ದುಡಿದ ಹಣವನ್ನೂ ದುಡಿಸುವುದು ಪ್ರಮುಖ ಸಂಗತಿಯಾಗಿದೆ. ಅದರಲ್ಲೂ, ಸಣ್ಣ ವ್ಯಾಪಾರಿಗಳು, ಸಂಬಳದಾರರು ಮಾಸಿಕವಾಗಿ ಇಂತಿಷ್ಟು ಹಣ ಅಂತ ಹಣವನ್ನು ಉಳಿಸಿ, ಅದನ್ನು ಸರಿಯಾದ ರೀತಿಯಲ್ಲಿ ಹೂಡಿಕೆ ಮಾಡಿದರೆ ಮಾತ್ರ ಹಣಕಾಸು ಗುರಿಗಳನ್ನು ಸಾಧಿಸಬಹುದಾಗಿದೆ.
Disclaimer:
ಮ್ಯೂಚುವಲ್ ಫಂಡ್ ಎಸ್ಐಪಿಗಳು ಹೆಚ್ಚಿನ ರಿಟರ್ನ್ಸ್ ನೀಡಿದರೂ, ಇವು ಮಾರುಕಟ್ಟೆಯ ಏರಿಳಿತಗಳನ್ನು ಅವಲಂಬಿಸಿರುತ್ತವೆ. ನಮ್ಮ ಉದ್ದೇಶ ನಿಮಗೆ ಹೂಡಿಕೆಯ ಮಾಹಿತಿ ನೀಡುವುದಷ್ಟೇ ಆಗಿದೆ. ನಾವು ನಿಮಗೆ ಹೂಡಿಕೆಯ ಶಿಫಾರಸು ಮಾಡುತ್ತಿಲ್ಲ;. ಹಾಗಾಗಿ, ಯಾವುದೇ ಮಾದರಿಯ ಹೂಡಿಕೆಗೂ ಮೊದಲು ತಜ್ಞರ ಸಲಹೆ-ಸೂಚನೆಗಳನ್ನು ಪಡೆಯಬೇಕು.
