ಪದವಿ ಕನಸು ಕಂಡವರಿಗೆ ಗಡಿಪಾರು ಭೀತಿ : ಜರ್ಮನಿಯಲ್ಲಿ ಭಾರತೀಯ ವಿದ್ಯಾರ್ಥಿಗಳ ಅತಂತ್ರ ಸ್ಥಿತಿ

ನವದೆಹಲಿ/ಬರ್ಲಿನ್: ಉನ್ನತ ಶಿಕ್ಷಣಕ್ಕಾಗಿ ಜರ್ಮನಿಗೆ ತೆರಳಿದ್ದ ನೂರಾರು ಭಾರತೀಯ ವಿದ್ಯಾರ್ಥಿಗಳ ಭವಿಷ್ಯ ಇದೀಗ ಅತಂತ್ರ ಸ್ಥಿತಿಗೆ ತಲುಪಿದೆ. ಜಾಗತಿಕ ಮನ್ನಣೆ ಇರುವ ಪದವಿ ಮತ್ತು ಉತ್ತಮ ಉದ್ಯೋಗದ ಕನಸು ಹೊತ್ತು ಬರ್ಲಿನ್‌ನ ಇಂಟರ್‌ನ್ಯಾಷನಲ್ ಯೂನಿವರ್ಸಿಟಿಗೆ (IU) ಸೇರಿದ್ದ ವಿದ್ಯಾರ್ಥಿಗಳು, ವೀಸಾ ನಿಯಮಗಳ ಗೊಂದಲದಿಂದಾಗಿ ಗಡಿಪಾರು ಭೀತಿಯನ್ನು ಎದುರಿಸುತ್ತಿದ್ದಾರೆ.

ಲಕ್ಷಾಂತರ ಹಣ ಸುರಿದು ಸಂಕಷ್ಟಕ್ಕೆ

ವಿದ್ಯಾರ್ಥಿಗಳು ಶಿಕ್ಷಣ ಸಾಲ ಮಾಡಿ, ಲಕ್ಷಾಂತರ ರೂಪಾಯಿ ಶುಲ್ಕ ಪಾವತಿಸಿ ಜರ್ಮನಿಗೆ ತೆರಳಿದ್ದರು. ಯುರೋನ್ಯೂಸ್ ವರದಿಯ ಪ್ರಕಾರ, ಈ ವಿದ್ಯಾರ್ಥಿಗಳು ಯಾವುದೇ ಕಾನೂನು ಉಲ್ಲಂಘನೆ ಮಾಡಿಲ್ಲ. ಆದರೆ, ಅವರು ದಾಖಲಾಗಿರುವ ‘ಹೈಬ್ರಿಡ್ ಕೋರ್ಸ್’ಗಳನ್ನು (Hybrid Courses) ವಲಸೆ ಅಧಿಕಾರಿಗಳು ಈಗ ಭಿನ್ನವಾಗಿ ಅರ್ಥೈಸುತ್ತಿರುವುದರಿಂದ ಸಮಸ್ಯೆ ಉಂಟಾಗಿದೆ. ಮುಖಾಮುಖಿ ತರಗತಿಗಳ (Face-to-face study) ಮಾನದಂಡಗಳನ್ನು ಈ ಕೋರ್ಸ್‌ಗಳು ಪೂರೈಸುತ್ತಿಲ್ಲ ಎಂಬ ಕಾರಣ ನೀಡಿ, ವಿದ್ಯಾರ್ಥಿಗಳಿಗೆ ದೇಶ ತೊರೆಯುವಂತೆ ಸೂಚಿಸಲಾಗುತ್ತಿದೆ.

ವ್ಯವಸ್ಥೆಯ ವೈಫಲ್ಯಕ್ಕೆ ವಿದ್ಯಾರ್ಥಿಗಳು ಬಲಿಪಶು

ಈ ಬಿಕ್ಕಟ್ಟಿಗೆ ಪ್ರಮುಖ ಕಾರಣ, ಶಿಕ್ಷಣದ ಮಾದರಿ ಮತ್ತು ವೀಸಾ ನಿಯಮಗಳ ನಡುವಿನ ತಾಳಮೇಳದ ಕೊರತೆ. ವಿದ್ಯಾರ್ಥಿಗಳು ಕಾನೂನುಬದ್ಧವಾಗಿಯೇ ಜರ್ಮನಿಯನ್ನು ಪ್ರವೇಶಿಸಿದ್ದರು ಮತ್ತು ತಾವು ಮಾನ್ಯತೆ ಪಡೆದ ಕೋರ್ಸ್‌ಗೆ ಸೇರುತ್ತಿದ್ದೇವೆ ಎಂದು ನಂಬಿದ್ದರು. ಆದರೆ, ಈಗ ವಲಸೆ ಅಧಿಕಾರಿಗಳು ಕೋರ್ಸ್‌ಗಳ ಸಿಂಧುತ್ವವನ್ನೇ ಪ್ರಶ್ನಿಸುತ್ತಿದ್ದಾರೆ. ಯೂನಿವರ್ಸಿಟಿ ಲಿವಿಂಗ್‌ನ ಸಹ-ಸ್ಥಾಪಕ ಮಯಾಂಕ್ ಮಹೇಶ್ವರಿ ಅವರ ಪ್ರಕಾರ, “ಅಂತರರಾಷ್ಟ್ರೀಯ ಶಿಕ್ಷಣದಲ್ಲಿ ಶಿಕ್ಷಣ ಸಂಸ್ಥೆಗಳು ಮತ್ತು ವಲಸೆ ಇಲಾಖೆಯ ನಡುವೆ ಸಮನ್ವಯದ ಕೊರತೆಯಿದ್ದು, ಇದರ ನೇರ ಪರಿಣಾಮವನ್ನು ವಿದ್ಯಾರ್ಥಿಗಳು ಎದುರಿಸುವಂತಾಗಿದೆ”.

ಆನ್‌ಲೈನ್ ಮೂಲಕ ಕೋರ್ಸ್ ಮುಗಿಸುವಂತೆ ಸೂಚನೆ?

ಸುಮಾರು 20,000 ಯುರೋ (ಅಂದಾಜು 18 ಲಕ್ಷ ರೂ.) ವರೆಗೆ ಶುಲ್ಕ ಪಾವತಿಸಿರುವ ವಿದ್ಯಾರ್ಥಿಗಳಿಗೆ, ಕ್ಯಾಂಪಸ್ ಶಿಕ್ಷಣದ ಬದಲಿಗೆ ಭಾರತದಿಂದಲೇ ಆನ್‌ಲೈನ್ ಮೂಲಕ ಕೋರ್ಸ್ ಪೂರ್ಣಗೊಳಿಸುವಂತೆ ಸೂಚಿಸುವ ಸಾಧ್ಯತೆಗಳಿವೆ. ಅಂತಿಮ ವರ್ಷದ ಪ್ರಬಂಧ ಮಂಡಿಸಬೇಕಾದ ಸಮಯದಲ್ಲಿ, ವಿದ್ಯಾರ್ಥಿಗಳು ತಮ್ಮ ಕಾನೂನು ಹೋರಾಟದಲ್ಲಿ ಮತ್ತು ವೀಸಾ ಉಳಿಸಿಕೊಳ್ಳುವ ಪರದಾಟದಲ್ಲಿ ಮುಳುಗುವಂತಾಗಿದೆ.

ಭಾರತೀಯ ಪೋಷಕರಿಗೆ ಎಚ್ಚರಿಕೆ ಗಂಟೆ

ಜರ್ಮನಿಯು ಶಿಕ್ಷಣಕ್ಕಾಗಿ ಸುರಕ್ಷಿತ ಮತ್ತು ಕೈಗೆಟುಕುವ ತಾಣ ಎಂಬ ನಂಬಿಕೆಗೆ ಈ ಘಟನೆ ಪೆಟ್ಟು ನೀಡಿದೆ. ವಿದೇಶಿ ಶಿಕ್ಷಣಕ್ಕೆ ಮಕ್ಕಳನ್ನು ಕಳುಹಿಸುವ ಮುನ್ನ ಕೇವಲ ಪ್ರವೇಶಾತಿ ಮತ್ತು ಶುಲ್ಕದ ಬಗ್ಗೆ ಮಾತ್ರವಲ್ಲದೆ, ಕೋರ್ಸ್‌ನ ಮಾನ್ಯತೆ, ಬೋಧನಾ ವಿಧಾನ ಮತ್ತು ವೀಸಾ ನಿಯಮಗಳ ಬಗ್ಗೆಯೂ ಕೂಲಂಕಷವಾಗಿ ಪರಿಶೀಲಿಸಬೇಕು ಎಂದು ತಜ್ಞರು ಎಚ್ಚರಿಸಿದ್ದಾರೆ. ಹೈಬ್ರಿಡ್ ಮತ್ತು ಆನ್‌ಲೈನ್ ಕೋರ್ಸ್‌ಗಳು ಹೆಚ್ಚಾಗುತ್ತಿರುವ ಈ ಕಾಲಘಟ್ಟದಲ್ಲಿ, ಹಳೆಯ ವೀಸಾ ನಿಯಮಗಳು ವಿದ್ಯಾರ್ಥಿಗಳ ಪಾಲಿಗೆ ಮುಳ್ಳಾಗುತ್ತಿವೆ.

ಇದನ್ನೂ ಓದಿ: ಸತ್ಯ ನಡೆಲ್ಲಾ, ಸುಂದರ್ ಪಿಚೈ ಹಿಂದಿಕ್ಕಿದ ಜಯಶ್ರೀ ಉಲ್ಲಾಲ್ | ಇವರೇ ಈಗ ವಿಶ್ವದ ಅತ್ಯಂತ ಶ್ರೀಮಂತ ಭಾರತೀಯ ಸಿಇಒ!