ನವದೆಹಲಿ, ಜನವರಿ 18: ಇಲ್ಲಿನ ಇಂದಿರಾ ಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲಿ ಶನಿವಾರ (ಜನವರಿ 18) ನಡೆದ ಖೋ ಖೋ ವಿಶ್ವಕಪ್ 2025ರ ಸೆಮಿಫೈನಲ್ ಪಂದ್ಯದಲ್ಲಿ ಸ್ಫೂರ್ತಿದಾಯಕ ಪ್ರದರ್ಶನ ತೋರಿದ ಭಾರತ ಮಹಿಳಾ ಖೋ ಖೋ ತಂಡವು 66-16 ಅಂಕಗಳಿಂದ ದಕ್ಷಿಣ ಆಫ್ರಿಕಾವನ್ನು ಮಣಿಸಿ ಫೈನಲ್ ಪ್ರವೇಶಿಸಿದೆ. ಇದೇ ವೇಳೆ ಇಲ್ಲಿನ ಪುರುಷರ ತಂಡ 62-42 ಅಂಕಗಳಿಂದ ದಕ್ಷಿಣ ಆಫ್ರಿಕಾ ತಂಡದ ಸವಾಲನ್ನು ಮೆಟ್ಟಿನಿಂತು ಫೈನಲ್ ಪ್ರವೇಶಿಸಿತು.
ದಾಳಿ ಮತ್ತು ಡಿಫೆನ್ಸ್ ಎರಡರಲ್ಲೂ ಗಮನಾರ್ಹ ಪ್ರದರ್ಶನ ತೋರಿದ ವುಮೆನ್ ಇನ್ ಬ್ಲೂ ತಂಡ ನೇಪಾಳದೊಂದಿಗೆ ಫೈನಲ್ ಪಂದ್ಯಕ್ಕೆ ವೇದಿಕೆ ಸಜ್ಜುಗೊಳಿಸಿಕೊಂಡಿದೆ.
ನಾಜಿಯಾ ಬೀಬಿ ಮತ್ತು ನಿರ್ಮಲಾ ಭಾಟಿ ಡಿಫೆಂಡರ್ ಗಳಿಂದ ಸಿಕ್ಕಿಬಿದ್ದ ನಂತರವೂ ಚೈತ್ರಾ .ಬಿ ಅವರ ಡ್ರೀಮ್ ರನ್ ಸಾಹಸದಿಂದ ವುಮೆನ್ ಇನ್ ಬ್ಲೂ ತನ್ನದೇ ಶೈಲಿಯಲ್ಲಿ ಮಿಂಚಿತು.
ಮತ್ತೊಂದು ಸೆಮಿಫೈನಲ್ ಪಂದ್ಯದಲ್ಲಿ ಉಗಾಂಡಾವನ್ನು 89-18 ಅಂಕಗಳಿಂದ ಮಣಿಸಿದ ನೇಪಾಳ ಮಹಿಳಾ ತಂಡ ಖೋ ಖೋ ವಿಶ್ವಕಪ್ 2025ರ ಮಹಿಳಾ ವಿಭಾಗದಲ್ಲಿ ಫೈನಲ್ ಗೆ ಅರ್ಹತೆ ಪಡೆಯಿತು.
ಪುರುಷರಿಗೂ ನೇಪಾಳ ಸವಾಲು
ಪುರುಷರ ತಂಡವು ಸೆಮಿಫೈನಲ್ ಪಂದ್ಯದ ನಿರ್ಣಾಯಕ ಅಂತಿಮ ಅವಧಿಯಲ್ಲಿ ಮೇಲುಗೈ ಸಾಧಿಸುವ ಮೂಲಕ ಗೆಲುವು ಸಾಧಿಸಿತು. ಆಕಾಶ್ ಕುಮಾರ್ ಖೋಜಾ ಮತ್ತು ಮೆಹುಲ್ ಅವರು ನಾಲ್ಕನೇ ಅವಧಿಯಲ್ಲಿ ಮಿಂಚುವ ಮೂಲಕ ಭಾರತಕ್ಕೆ ಹೊಸ ಹುರುಪು ತಂದರು. ಪಂದ್ಯ ಮುಕ್ತಾಯಕ್ಕೆ 5 ನಿಮಿಷ 10 ಸೆಕೆಂಡುಗಳು ಉಳಿದಿರುವಾಗ, ಸ್ಕೋರ್ ವ್ಯತ್ಯಾಸವು ಕೇವಲ 4 ಅಂಕಗಳಿಗೆ ತಗ್ಗಿತು, ಆದರೆ ನಾಯಕ ಮತ್ತು ವಜೀರ್ ಪ್ರತೀಕ್ ವೈಕರ್ ಅಸಾಧಾರಣ ಸ್ಕೈ ಡೈವ್ ಮೂಲಕ ಗೆಲುವು ತಂದರು.
ಜನವರಿ 19 ರಂದು ಇಂದಿರಾ ಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯಲಿರುವ ಫೈನಲ್ ನಲ್ಲಿ ಭಾರತ ತಂಡ ನೇಪಾಳವನ್ನು ಎದುರಿಸಲಿದೆ.
ಖೋ ಖೋ ವಿಶ್ವಕಪ್ 2025 ರ ಪುರುಷರ ವಿಭಾಗದ ಸೆಮಿಫೈನಲ್ ಪಂದ್ಯದಲ್ಲಿ ನೇಪಾಳ ಪುರುಷರು ಐಆರ್ ಇರಾನ್ ತಂಡವನ್ನು 72-29 ಅಂಕಗಳಿಂದ ಸೋಲಿಸಿ ಫೈನಲ್ ಗೆ ಅರ್ಹತೆ ಪಡೆದರು.
