ನವದೆಹಲಿ : ಭಾರತ ಮತ್ತು ಅಮೆರಿಕದ ನಡುವಿನ ವ್ಯಾಪಾರ ಒಪ್ಪಂದವನ್ನು ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಅಂತಿಮಗೊಳಿಸಿದ್ದು, ಇಂದು ಪ್ರಧಾನಿ ಮೋದಿ ಇದನ್ನು ಅಧಿಕೃತವಾಗಿ ಘೋಷಿಸಿದ್ದಾರೆ. ಈ ಒಪ್ಪಂದವು ಉಭಯ ದೇಶಗಳ ನಡುವಿನ ದ್ವಿಪಕ್ಷೀಯ ಸಂಬಂಧದಲ್ಲಿ ಹೊಸ ಅಧ್ಯಾಯವನ್ನು ಬರೆದಿದೆ. ಇತ್ತೀಚೆಗಷ್ಟೇ ಒಪ್ಪಂದದ ಕುರಿತು ಟ್ರಂಪ್ ತಮ್ಮ ಟ್ರುಥ್ ಸೋಷಿಯಲ್ ಖಾತೆಯಲ್ಲಿ ಮೊದಲ ಬಾರಿಗೆ ಮಾಹಿತಿ ನೀಡಿದ್ದರು. ಇದೀಗ ಸ್ವತಃ ಪ್ರಧಾನಿ ಮೋದಿಯವರೇ ಈ ಬಗ್ಗೆ ಅಧಿಕೃತವಾಗಿ ಪ್ರಕಟಿಸಿದ್ದಾರೆ.
ಈ ಮಹತ್ವದ ಒಪ್ಪಂದದ ಅನ್ವಯ ಅಮೆರಿಕವು ಭಾರತೀಯ ಉತ್ಪನ್ನಗಳ ಮೇಲಿದ್ದ ಸುಂಕವನ್ನು ಶೇ.18ಕ್ಕೆ ಇಳಿಕೆ ಮಾಡಿದ್ದು, ಈ ಹಿಂದೆ ವಿಧಿಸಲಾಗಿದ್ದ ಹೆಚ್ಚುವರಿ ಶೇಕಡಾ 25ರಷ್ಟು ಸುಂಕವನ್ನು ಹಿಂಪಡೆದಿದೆ. ಮುಂದಿನ ಐದು ವರ್ಷಗಳಲ್ಲಿ 500 ಬಿಲಿಯನ್ ಡಾಲರ್ ಮೊತ್ತದ ವಹಿವಾಟು ನಡೆಸುವ ಗುರಿಯನ್ನು ಈ ಒಪ್ಪಂದ ಒಳಗೊಂಡಿದೆ.
ರಫ್ತುದಾರರಿಗೆ ಬಂಪರ್ ಕೊಡುಗೆ: ಶೇ.18ಕ್ಕೆ ಇಳಿದ ಸುಂಕ
ಈ ಹೊಸ ಒಪ್ಪಂದದ ಅಡಿಯಲ್ಲಿ ಭಾರತದ ಪ್ರಮುಖ ರಫ್ತು ಕ್ಷೇತ್ರಗಳಿಗೆ ಭಾರಿ ಲಾಭವಾಗಲಿದೆ. ವಿಶೇಷವಾಗಿ ಜವಳಿ ಮತ್ತು ಉಡುಪು, ಚರ್ಮದ ಉತ್ಪನ್ನಗಳು, ಪಾದರಕ್ಷೆಗಳು, ಪ್ಲಾಸ್ಟಿಕ್, ರಬ್ಬರ್, ಸಾವಯವ ರಾಸಾಯನಿಕಗಳು ಮತ್ತು ಕರಕುಶಲ ವಸ್ತುಗಳ ಮೇಲೆ ಅಮೆರಿಕ ಇನ್ನು ಮುಂದೆ ಕೇವಲ ಶೇ.18ರಷ್ಟು ಸುಂಕವನ್ನು ಮಾತ್ರ ವಿಧಿಸಲಿದೆ. ಅಷ್ಟೇ ಅಲ್ಲದೆ, ವಿಮಾನದ ಬಿಡಿಭಾಗಗಳ ಮೇಲಿನ ಸುಂಕವನ್ನು ಅಮೆರಿಕ ಸಂಪೂರ್ಣವಾಗಿ ತೆಗೆದುಹಾಕಿದೆ. ಒಂದು ವೇಳೆ ಈ ಮಧ್ಯಂತರ ಒಪ್ಪಂದವು ಪೂರ್ಣಪ್ರಮಾಣದಲ್ಲಿ ಜಾರಿಯಾದರೆ, ಜೆನೆರಿಕ್ ಔಷಧಗಳು, ವಜ್ರ ಮತ್ತು ಆಭರಣಗಳ ಮೇಲಿನ ಸುಂಕವನ್ನೂ ರದ್ದುಪಡಿಸಲು ಅಮೆರಿಕ ಸಮ್ಮತಿಸಿದೆ.
ಅಮೆರಿಕದ ಕೃಷಿ ಮತ್ತು ತಂತ್ರಜ್ಞಾನಕ್ಕೆ ಭಾರತದ ಮುಕ್ತ ದ್ವಾರ
ಪ್ರತಿಯಾಗಿ ಭಾರತವು ಅಮೆರಿಕದ ಕೈಗಾರಿಕಾ ಉತ್ಪನ್ನಗಳು ಮತ್ತು ಕೃಷಿ ಪದಾರ್ಥಗಳ ಮೇಲಿನ ಸುಂಕವನ್ನು ಗಣನೀಯವಾಗಿ ಇಳಿಕೆ ಮಾಡಲಿದೆ. ಸೋಯಾಬೀನ್ ಎಣ್ಣೆ, ಒಣಗಿದ ಧಾನ್ಯಗಳು, ಬಾದಾಮಿ-ಅಕ್ರೋಟುಗಳಂತಹ ಟ್ರೀ ನಟ್ಸ್, ಸೇಬು ಸೇರಿದಂತೆ ಹಣ್ಣುಗಳು ಹಾಗೂ ವೈನ್ ಮತ್ತು ಸ್ಪಿರಿಟ್ಗಳ ಆಮದಿಗೆ ಭಾರತ ಹಸಿರು ನಿಶಾನೆ ತೋರಿಸಿದೆ. ಇದಲ್ಲದೇ ಐಟಿ ಕ್ಷೇತ್ರಕ್ಕೆ ಸಂಬಂಧಿಸಿದ ಐಸಿಟಿ (ICT) ಉತ್ಪನ್ನಗಳ ಮೇಲಿದ್ದ ನಿರ್ಬಂಧಿತ ಪರವಾನಗಿ ನಿಯಮಗಳನ್ನು ಸಡಿಲಗೊಳಿಸಲು ಭಾರತ ಒಪ್ಪಿಕೊಂಡಿದೆ.
500 ಬಿಲಿಯನ್ ಡಾಲರ್ ಖರೀದಿ ಮತ್ತು ತಂತ್ರಜ್ಞಾನ ಸಹಕಾರ
ಈ ಒಪ್ಪಂದದ ಅತಿ ದೊಡ್ಡ ಆಕರ್ಷಣೆಯೆಂದರೆ ಭಾರತವು ಮುಂದಿನ ಐದು ವರ್ಷಗಳಲ್ಲಿ ಅಮೆರಿಕದಿಂದ ಸುಮಾರು 500 ಶತಕೋಟಿ ಡಾಲರ್ ಮೌಲ್ಯದ ಸರಕುಗಳನ್ನು ಖರೀದಿಸುವ ಯೋಜನೆಯನ್ನು ಹೊಂದಿದೆ. ಇದರಲ್ಲಿ ಪ್ರಮುಖವಾಗಿ ಇಂಧನ, ವಿಮಾನಗಳು, ಅಮೂಲ್ಯ ಲೋಹಗಳು ಮತ್ತು ತಾಂತ್ರಿಕ ಉತ್ಪನ್ನಗಳು ಸೇರಿವೆ. ವಿಶೇಷವಾಗಿ ಡೇಟಾ ಸೆಂಟರ್ಗಳಿಗೆ ಅಗತ್ಯವಿರುವ ಗ್ರಾಫಿಕ್ಸ್ ಪ್ರೊಸೆಸಿಂಗ್ ಯೂನಿಟ್ (GPU) ಗಳ ವ್ಯಾಪಾರಕ್ಕೆ ಮತ್ತು ತಂತ್ರಜ್ಞಾನ ಸಹಕಾರಕ್ಕೆ ಎರಡೂ ದೇಶಗಳು ಹೆಚ್ಚಿನ ಒತ್ತು ನೀಡಿವೆ.
ಎಲ್ಲ ಅಡೆತಡೆಗಳ ನಿವಾರಣೆ
ಉಭಯ ದೇಶಗಳ ವ್ಯಾಪಾರಕ್ಕೆ ಅಡ್ಡಿಯಾಗುತ್ತಿದ್ದ ತಾಂತ್ರಿಕ ಮತ್ತು ಸುಂಕೇತರ ಅಡೆತಡೆಗಳನ್ನು ನಿವಾರಿಸಲು ಉಭಯ ದೇಶಗಳು ನಿರ್ಧರಿಸಿವೆ. ವೈದ್ಯಕೀಯ ಉಪಕರಣಗಳ ಮಾರಾಟಕ್ಕೆ ಭಾರತದಲ್ಲಿದ್ದ ದೀರ್ಘಕಾಲದ ಸಮಸ್ಯೆಗಳನ್ನು ಬಗೆಹರಿಸಲಾಗುವುದು ಎಂದು ಭಾರತ ಭರವಸೆ ನೀಡಿದೆ. ಈ ಮಧ್ಯಂತರ ಒಪ್ಪಂದವು ಕೇವಲ ಆರಂಭವಾಗಿದ್ದು, ಮುಂದಿನ ದಿನಗಳಲ್ಲಿ ಪೂರ್ಣ ಪ್ರಮಾಣದ ‘ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದ’ ಕುರಿತು ಮಾತುಕತೆಗಳು ಮುಂದುವರಿಯಲಿವೆ. ಆ ಸಂದರ್ಭದಲ್ಲಿ ಭಾರತದ ಮನವಿಯ ಮೇರೆಗೆ ಸುಂಕವನ್ನು ಇನ್ನಷ್ಟು ಕಡಿತಗೊಳಿಸುವ ಬಗ್ಗೆ ಅಮೆರಿಕ ಪರಿಗಣಿಸಲಿದೆ
ಇದನ್ನೂ ಓದಿ : ಜಿಬಿಎ ಚುನಾವಣೆ | 5 ಪಾಲಿಕೆಯಲ್ಲೂ ಬಿಜೆಪಿ ಗೆದ್ದೇ ಗೆಲ್ಲುತ್ತೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ ಬಿ.ವೈ ವಿಜಯೇಂದ್ರ
