ನವದೆಹಲಿ: ಭಾರತದ ವಿರುದ್ಧ ನಿರಂತರವಾಗಿ ಭಯೋತ್ಪಾದಕ ಚಟುವಟಿಕೆಗಳನ್ನು ನಡೆಸುತ್ತಿರುವ ಲಷ್ಕರ್-ಎ-ತೈಬಾ ಸಂಘಟನೆಯ ಉನ್ನತ ನಾಯಕ ಸೈಫುಲ್ಲಾ ಕಸೂರಿ, ಪಾಕಿಸ್ತಾನದ ಶಾಲೆಯೊಂದರಲ್ಲಿ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡುವಾಗ ಭಾರತದ ವಿರುದ್ಧ ಪ್ರಚೋದನಕಾರಿ ಹೇಳಿಕೆಗಳನ್ನು ನೀಡಿದ್ದಾನೆ ಎಂದು ಹೇಳಲಾಗಿದೆ. ಪಹಲ್ಗಾಮ್ ದಾಳಿಯ ಸಂಚುಕೋರನಾಗಿರುವ ಈತ, ಪಾಕಿಸ್ತಾನ ಸೇನೆ ಮತ್ತು ಭಯೋತ್ಪಾದಕರ ನಡುವಿನ ನಿಕಟ ಸಂಬಂಧವನ್ನು ಬಹಿರಂಗವಾಗಿ ಒಪ್ಪಿಕೊಂಡಿದ್ದಾನೆ. ತನ್ನ ಉಪಸ್ಥಿತಿಯಿಂದಾಗಿ ಭಾರತವು ಭಯಗೊಂಡಿದೆ ಎಂಬ ಉದ್ಧಟತನದ ಹೇಳಿಕೆಯನ್ನೂ ಆತ ನೀಡಿದ್ದಾನೆ.
ಪಾಕ್ ಸೇನೆಯ ಅಧಿಕೃತ ಆಹ್ವಾನದ ಬಗ್ಗೆ ಬಹಿರಂಗ ಒಪ್ಪಿಗೆ
ಪಾಕಿಸ್ತಾನದ ಶಾಲೆಯೊಂದರಲ್ಲಿ ಆಯೋಜಿಸಲಾಗಿದ್ದ ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತಿರುವ ಸೈಫುಲ್ಲಾ ಕಸೂರಿಯ ವಿಡಿಯೋ ಇದೀಗ ಹೊರಬಿದ್ದಿದೆ. ಆ ವಿಡಿಯೋದಲ್ಲಿ ಆತ, “ಪಾಕಿಸ್ತಾನದ ಸೇನೆಯು ನನಗೆ ಅಧಿಕೃತವಾಗಿ ಆಹ್ವಾನಗಳನ್ನು ಕಳುಹಿಸುತ್ತದೆ. ಅವರ ಸೇನಾ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲು ಮತ್ತು ಮೃತ ಸೈನಿಕರ ಅಂತಿಮ ನಮಾಜ್ ಅಥವಾ ಅಂತ್ಯಕ್ರಿಯೆಯ ಪ್ರಾರ್ಥನೆಯ ನೇತೃತ್ವ ವಹಿಸಲು ಸೇನೆಯು ನನ್ನನ್ನು ಆಹ್ವಾನಿಸುತ್ತದೆ” ಎಂದು ಹೇಳಿಕೊಂಡಿದ್ದಾನೆ. ಭಯೋತ್ಪಾದನೆಯ ವಿರುದ್ಧ ಹೋರಾಡುತ್ತಿರುವುದಾಗಿ ಜಾಗತಿಕ ವೇದಿಕೆಗಳಲ್ಲಿ ಸುಳ್ಳು ಹೇಳುವ ಪಾಕಿಸ್ತಾನದ ಮುಖವಾಡವನ್ನು ಈ ಹೇಳಿಕೆಯು ಸಂಪೂರ್ಣವಾಗಿ ಕಳಚಿದೆ.
ಸಭೆಯಲ್ಲಿ ಸೇರಿದ ಶಾಲಾ ಮಕ್ಕಳ ಮುಂದೆ ತಾನೊಬ್ಬ ದೊಡ್ಡ ವೀರ ಎಂಬಂತೆ ಬಿಂಬಿಸಿಕೊಂಡಿರುವ ಕಸೂರಿ, “ಭಾರತಕ್ಕೆ ನನ್ನ ಕಂಡರೆ ಎಷ್ಟು ಭಯವಿದೆ ಎಂಬುದು ನಿಮಗೆ ಗೊತ್ತೇ?” ಎಂದು ಪ್ರಶ್ನಿಸಿದ್ದಾನೆ. ಪಹಲ್ಗಾಮ್ ದಾಳಿಯ ಮಾಸ್ಟರ್ಮೈಂಡ್ ಎಂದು ನನ್ನ ಹೆಸರನ್ನು ಇಡೀ ಜಗತ್ತೇ ಗುರುತಿಸುತ್ತಿದೆ ಎಂದು ಆತ ಹೆಮ್ಮೆಯಿಂದ ಹೇಳಿಕೊಂಡಿದ್ದಾನೆ. ಇದೇ ಸಂದರ್ಭದಲ್ಲಿ ಭಾರತದ ವಿರುದ್ಧ ಪ್ರಚೋದನಕಾರಿ ಬೆದರಿಕೆಗಳನ್ನು ಹಾಕಿರುವ ಆತ, ಕಾಶ್ಮೀರವನ್ನು ವಶಪಡಿಸಿಕೊಳ್ಳುವ ತನ್ನ ಸಂಘಟನೆಯ ಗುರಿಯಿಂದ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ ಎಂದು ಘೋಷಿಸಿದ್ದಾನೆ.
ಭಯೋತ್ಪಾದಕ ಗುಂಪುಗಳ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುತ್ತಿರುವುದಾಗಿ ಪಾಕಿಸ್ತಾನ ಸರ್ಕಾರವು ಅಂತಾರಾಷ್ಟ್ರೀಯ ಸಮುದಾಯಕ್ಕೆ ನೀಡುತ್ತಿರುವ ಭರವಸೆಗಳು ಎಷ್ಟು ಟೊಳ್ಳು ಎಂಬುದನ್ನು ಕಸೂರಿಯ ಈ ಸಾರ್ವಜನಿಕ ಭಾಷಣ ಸಾಬೀತುಪಡಿಸಿದೆ. ನಿಷೇಧಿತ ಸಂಘಟನೆಯ ನಾಯಕನೊಬ್ಬ ದೇಶದ ಸೇನೆಯೊಂದಿಗೆ ತನಗಿರುವ ಸಂಬಂಧವನ್ನು ಬಹಿರಂಗವಾಗಿ ಹಂಚಿಕೊಳ್ಳುತ್ತಿರುವುದು ಆ ದೇಶದ ಆಂತರಿಕ ಪರಿಸ್ಥಿತಿ ಮತ್ತು ಸೇನೆ-ಉಗ್ರರ ನಂಟನ್ನು ಜಗತ್ತಿಗೆ ತೋರಿಸಿದೆ.
ಇದನ್ನೂ ಓದಿ; 2010ರಲ್ಲಿ ಆರ್ಡರ್ ಮಾಡಿದ್ದ ನೋಕಿಯಾ ಫೋನ್ಗಳು ತಲುಪಿದ್ದು 2026ರಲ್ಲಿ! ಇದು ಲಿಬಿಯಾ ವ್ಯಾಪಾರಿಯ ಕಥೆ!
