ನಾಗ್ಪುರ: ಭಾರತೀಯ(India) ಕ್ರಿಕೆಟ್ ತಂಡ ಇಂಗ್ಲೆಂಡ್ (England) ವಿರುದ್ಧ ಗೆಲುವಿನ ಸವಾರಿ ಮುಂದುವರೆಸಿದೆ. ಈಗಾಗಲೇ ಟಿ20 ಸರಣಿ ಗೆದ್ದಿರುವ ಭಾರತ ತಂಡ, ಮೊದಲ ಏಕದಿನ ಪಂದ್ಯವನ್ನೂ ಗೆದ್ದು ಬೀಗಿದೆ.
ಶುಭಮನ್‌ ಗಿಲ್, ಶ್ರೇಯಸ್‌ ಅಯ್ಯರ್‌, ಅಕ್ಷರ್‌ ಪಟೇಲ್‌ ಅವರ ಅರ್ಧಶತಕ ಹಾಗೂ ಹರ್ಷಿತ್‌ ರಾಣಾ, ರವೀಂದ್ರ ಜಡೇಜಾ ಅವರ ಬಿಗಿ ಬೌಲಿಂಗ್ ನಿಂದಾಗಿ ಭಾರತೀಯ ತಂಡ ಇಂಗ್ಲೆಂಡ್ ವಿರುದ್ಧ ಸುಲಭ ಜಯ ಸಾಧಿಸಿದೆ. ಈ ಪಂದ್ಯವನ್ನು ಭಾರತ ತಂಡ (Team India) 4 ವಿಕೆಟ್ ಗಳಿಂದ ಗೆದ್ದು, ಮೂರು ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.
ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ತಂಡ 47.4 ಓವರ್‌ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 248 ರನ್ ಮಾತ್ರ ಗಳಿಸಿತು. ಬ್ಯಾಟಿಂಗ್ ಮುಂದುವರೆಸಿದ ಭಾರತ ತಂಡ 38.4 ಓವರ್‌ ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 251 ರನ್ ಗಳಿಸಿ ಗೆಲುವು ಸಾಧಿಸಿತು.
ಭಾರತಕ್ಕೆ ಕೂಡ ಉತ್ತಮ ಆರಂಭ ಸಿಗಲಿಲ್ಲ. ತಂಡದ ಮೊತ್ತ ಕೇವಲ 19 ರನ್ ಆಗುವಷ್ಟರಲ್ಲಿ ಆರಂಭಿಕರು ಫೆವಲಿಯನ್ ಸೇರಿದರು. ರೋಹಿತ್ ಶರ್ಮಾ (2 ರನ್), ಯಶಸ್ವಿ ಜೈಸ್ವಾಲ್‌(15 ರನ್) ಗಳಿಸಿ ಔಟ್ ಆದರು. ಈ ವೇಳೆ ಶ್ರೇಯಸ್‌ ಅಯ್ಯರ್‌ (Shreyas Iyer) ಮತ್ತು ಶುಭಮನ್‌ ಗಿಲ್ (Shubman Gill ) 64 ಎಸೆತಗಳಲ್ಲಿ 94 ರನ್ ಗಳ ಜೊತೆಯಾಟ ನೀಡಿ, ತಂಡಕ್ಕೆ ಗೆಲುವಿನ ಮುನ್ಸೂಚನೆ ನೀಡಿದರು.
ನಂತರ ಶ್ರೇಯಸ್‌ ಅಯ್ಯರ್‌ 59 ರನ್ (36 ಎಸೆತ, 9 ಬೌಂಡರಿ, 2 ಸಿಕ್ಸ್‌ ) ಸಿಡಿಸಿ ಔಟಾದರು. ಅಕ್ಷರ್‌ ಪಟೇಲ್‌ (Axar Patel) ಇಂಗ್ಲೆಂಡ್ ಬೌಲರ್‌ಗಳನ್ನು ದಂಡಿಸಿದರು. ನಾಲ್ಕನೇ ವಿಕೆಟ್ ಗೆ ಶುಭಮನ್‌ ಗಿಲ್ ಮತ್ತು ಅಕ್ಷರ್‌ 107 ಎಸೆತಗಳಲ್ಲಿ 108 ರನ್ ಗಳ ಜೊತೆಯಾಟ ನೀಡಿ, ಗೆಲುವನ್ನು ಖಚಿತ ಪಡಿಸಿದರು. ಮೊತ್ತ 221 ರನ್ ಆಗಿದ್ದಾಗ ಅಕ್ಷರ್‌ ಪಟೇಲ್‌ 52 ರನ್ (47 ಎಸೆತ, 6 ಬೌಂಡರಿ, 1 ಸಿಕ್ಸರ್‌) ಸಿಡಿಸಿ ಔಟಾದರು. ಉತ್ತಮವಾಗಿ ಆಡಿದ್ದ ಶುಭಮನ್‌ ಗಿಲ್ ಶುಭಮನ್‌ ಗಿಲ್ 87 ರನ್(96 ಎಸೆತ, 14 ಬೌಂಡರಿ) ಗಳಿಸಿ ಔಟ್ ಆದರು.
ಇದಕ್ಕೂ ಮುನ್ನ ಬ್ಯಾಟಿಂಗ್ ನಡೆಸಿದ್ದ ಇಂಗ್ಲೆಂಡ್ ಪರ ಫಿಲ್‌ ಸಾಲ್ಟ್‌ 43, ಬೆನ್‌ ಡಕಟ್‌ 32, ಜೋಸ್ಟ್‌ ಬಟ್ಲರ್‌ 52, ಜಾಕೋಬ್‌ ಬೆತ್‌ಹೆಲ್‌ 51 ರನ್ ಗಳಿಸಿ ತಂಡದ ಮೊತ್ತ ಹೆಚ್ಚಿಸಲು ಆಸರೆಯಾದರು. ಹರ್ಷಿತ್‌ ರಾಣಾ ಮತ್ತು ಜಡೇಜಾ ತಲಾ 3 ವಿಕೆಟ್ ಪಡೆದು ಮಿಂಚಿದರು.
