ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಉದ್ಯಮಿ ಎಲಾನ್ ಮಸ್ಕ್ ನಡುವಿನ ಸಂಬಂಧದಲ್ಲಿ ಬಿರುಕು ಮೂಡಿರುವ ವದಂತಿಗೆ ಪುಷ್ಟಿ ನೀಡುವಂತೆ, “ನಾನು ಇಲ್ಲದೇ ಇರುತ್ತಿದ್ದರೆ ಟ್ರಂಪ್ 2024ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಗೆಲ್ಲುತ್ತಲೇ ಇರಲಿಲ್ಲ” ಎಂಬ ಅಚ್ಚರಿಯ ಹೇಳಿಕೆಯನ್ನು ಮಸ್ಕ್ ನೀಡಿದ್ದಾರೆ.
ಟ್ರಂಪ್ ಘೋಷಿಸಿರುವ “ಒನ್ ಬಿಗ್ ಬ್ಯೂಟಿಫುಲ್ ಬಿಲ್” ಎಂಬ ತೆರಿಗೆ ಮತ್ತು ವೆಚ್ಚದ ಮಸೂದೆಯ ಕುರಿತು ಇಬ್ಬರು ನಡುವೆ ಆರಂಭವಾಗಿರುವ ಭಿನ್ನಾಭಿಪ್ರಾಯದ ಬೆನ್ನಲ್ಲೇ ಟ್ರಂಪ್ ಮತ್ತು ಮಸ್ಕ್ ನಡುವೆ ವಾಗ್ವಾದ ತಾರಕಕ್ಕೇರಿದೆ. ಈ ಮಸೂದೆಯು ತೆರಿಗೆ ಕಡಿತಗಳು ಮತ್ತು ರಾಷ್ಟ್ರೀಯ ಸಾಲದ ಮಿತಿಯನ್ನು ಏರಿಸುವಂತಹ ಅಂಶಗಳನ್ನು ಒಳಗೊಂಡಿದೆ. ಈ ಮಸೂದೆಯನ್ನು ಮಸ್ಕ್ ಕಟು ಪದಗಳಿಂದ ವಿರೋಧಿಸಿದ್ದಾರೆ. ಆದರೆ, ಟ್ರಂಪ್ ಈ ನೀತಿಯನ್ನು ಸಮರ್ಥಿಸಿಕೊಂಡು ಬಂದಿದ್ದಾರೆ.
ವಿವಾದದ ಹಿನ್ನೆಲೆ
ಡೊನಾಲ್ಡ್ ಟ್ರಂಪ್ ಅವರು ಜರ್ಮನ್ ಚಾನ್ಸೆಲರ್ ಫ್ರೆಡ್ರಿಕ್ ಮೆರ್ಜ್ರೊಂದಿಗಿನ ಮಾತುಕತೆ ವೇಳೆ, ಈ ಮಸೂದೆ ಕುರಿತು ಎಲಾನ್ ಮಸ್ಕ್ರವರ ಟೀಕೆಯ ಬಗ್ಗೆ ಪ್ರಸ್ತಾಪಿಸಿದ್ದಾರೆ. “ನಾನು ಎಲಾನ್ಗೆ ಬಹಳ ಸಹಾಯ ಮಾಡಿದ್ದೇನೆ. ಆದರೆ ಈಗ ಅವರು ಈ ಮಸೂದೆಯ ವಿಚಾರದಲ್ಲಿ ನನ್ನನ್ನು ಟೀಕಿಸತೊಡಗಿದ್ದಾರೆ. ಈ ಮಸೂದೆಯಿಂದ ಎಲೆಕ್ಟ್ರಿಕ್ ವಾಹನ (EV) ತೆರಿಗೆ ಕ್ರೆಡಿಟ್ಗಳನ್ನು ಕಡಿತಗೊಳಿಸಿರುವುದು ಮಸ್ಕ್ರ ಟೆಸ್ಲಾ ಕಂಪನಿಗೆ ದೊಡ್ಡ ಹೊಡೆತವಾಗಿದೆ” ಎಂದು ಟ್ರಂಪ್ ಹೇಳಿದ್ದಾರೆ. ಅಲ್ಲದೇ, ಎಲಾನ್ ಅವರು ಶಿಫಾರಸು ಮಾಡಿದ್ದ ಜಾರೆಡ್ ಐಸಾಕ್ಮನ್ರನ್ನು ನಾನು ನಾಸಾದ ಮುಖ್ಯಸ್ಥ ಸ್ಥಾನಕ್ಕೆ ನೇಮಕ ಮಾಡದಿರುವುದು ಕೂಡ ಮಸ್ಕ್ ಅವರ ಸಿಟ್ಟಿಗೆ ಕಾರಣ ಎಂದೂ ಟ್ರಂಪ್ ಟೀಕಿಸಿದ್ದಾರೆ.
ಮಸ್ಕ್ ತಿರುಗೇಟು
ಟ್ರಂಪ್ ಅವರಿಂದ ಈ ಹೇಳಿಕೆ ಹೊರಬೀಳುತ್ತಿದ್ದಂತೆಯೇ ಸಿಟ್ಟಾದ ಮಸ್ಕ್, ತಕ್ಷಣವೇ ತಮ್ಮ ಎಕ್ಸ್ ಖಾತೆಯಲ್ಲಿ ಟ್ರಂಪ್ರ ಆರೋಪಗಳಿಗೆ ಪ್ರತಿಕ್ರಿಯಿಸಿದ್ದಾರೆ. “ನಾನು ಇಲ್ಲದೇ ಇರುತ್ತಿದ್ದರೆ ಟ್ರಂಪ್ 2024ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸೋಲುಣ್ಣುತ್ತಿದ್ದರು. ಅಮೆರಿಕದ ಸಂಸತ್ನ ನಿಯಂತ್ರಣವು ಡೆಮಾಕ್ರಾಟ್ಗಳ ಕೈಗೆ ಹೋಗುತ್ತಿತ್ತು. ರಿಪಬ್ಲಿಕನ್ಗಳು ಸೆನೆಟ್ನಲ್ಲಿ 51-49ರ ಬಹುಮತವನ್ನು ಹೊಂದಿರುತ್ತಿದ್ದರು,” ಎಂದು ಮಸ್ಕ್ ಬರೆದುಕೊಂಡಿದ್ದಾರೆ. ಜತೆಗೆ “ಟ್ರಂಪ್ ಒಬ್ಬ ಕೃತಘ್ನ ವ್ಯಕ್ತಿ!” ಎಂದೂ ಅವರು ಟೀಕಿಸಿದ್ದಾರೆ. ನಾನು 2024ರ ಚುನಾವಣೆಯಲ್ಲಿ ಟ್ರಂಪ್ ಅವರನ್ನು ಬೆಂಬಲಿಸಿ ಸುಮಾರು 290 ಮಿಲಿಯನ್ ಡಾಲರ್ ಗಿಂತಲೂ ಹೆಚ್ಚಿನ ಹಣವನ್ನು ಖರ್ಚು ಮಾಡಿದ್ದೇನೆ. ಇದು ಚುನಾವಣೆಯ ಫಲಿತಾಂಶದ ಮೇಲೆ ದೊಡ್ಡ ರೀತಿಯಲ್ಲಿ ಪರಿಣಾಮ ಬೀರಿತ್ತು ಎಂದೂ ಮಸ್ಕ್ ವಾದಿಸಿದ್ದಾರೆ.
ಅಲ್ಲದೇ, ಟ್ರಂಪ್ ತಂದಿರುವ ಈ ಮಸೂದೆಯನ್ನು “ಅಸಹ್ಯಕರ ದುರಂತ” ಎಂದು ಬಣ್ಣಿಸಿರುವ ಮಸ್ಕ್, ಇದು ರಾಷ್ಟ್ರೀಯ ಸಾಲವನ್ನು $2.4 ಟ್ರಿಲಿಯನ್ನಷ್ಟು ಹೆಚ್ಚಿಸುತ್ತದೆ ಎಂದು ಎಚ್ಚರಿಸಿದ್ದಾರೆ. “ಈ ಮಸೂದೆಯನ್ನು ಟ್ರಂಪ್ ನನಗೆ ಒಮ್ಮೆಯೂ ತೋರಿಸಲಿಲ್ಲ, ಇದನ್ನು ರಾತ್ರೋರಾತ್ರಿ ತ್ವರಿತವಾಗಿ ಅಂಗೀಕರಿಸಲಾಯಿತು. ಯಾರಿಗೂ ಓದಲು ಸಮಯವೂ ಇರಲಿಲ್ಲ,” ಎಂದೂ ಆರೋಪಿಸಿದ್ದಾರೆ.
ಇದರ ಬೆನ್ನಲ್ಲೇ ಟ್ರಂಪ್ ತಮ್ಮ ಟ್ರೂತ್ ಸೋಶಿಯಲ್ ಮೀಡಿಯಾದಲ್ಲಿ ಮಸ್ಕ್ ಅವರನ್ನು ” ಹುಚ್ಚ” (ಕ್ರೇಜಿ) ಎಂದು ಕರೆದಿದ್ದಲ್ಲದೆ, “ನಾನು ಎಲಾನ್ ಮಸ್ಕ್ ಅವರಿಗೆ ನೀಡಿರುವ ಸರ್ಕಾರಿ ಸಬ್ಸಿಡಿಗಳು ಮತ್ತು ಒಪ್ಪಂದಗಳನ್ನು ಕೊನೆಗೊಳಿಸಿದರೆ, ದೇಶದ ಬಜೆಟ್ನಲ್ಲಿ ಬಿಲಿಯನ್ಗಟ್ಟಲೆ ಡಾಲರ್ಗಳನ್ನು ಉಳಿಸಬಹುದು,” ಎಂದು ಬೆದರಿಕೆ ಹಾಕುವ ರೀತಿ ಹೇಳಿದ್ದಾರೆ. ಇದಕ್ಕೆ ಮಸ್ಕ್, “ಇದು ಇನ್ನೂ ರೋಚಕವಾಗುತ್ತಿದೆ, ಮಾಡಿ ತೋರಿಸಿ!” ಎಂದು ತಿರುಗೇಟು ನೀಡಿದ್ದಾರೆ. ಇವರಿಬ್ಬರ ಜಗಳವು ಮುಂದೆ ಎಲ್ಲಿಗೆ ಹೋಗಿ ನಿಲ್ಲುತ್ತದೆ ಎನ್ನುವುದು ಕುತೂಹಲಕ್ಕೆ ಕಾರಣವಾಗಿದೆ.
