ನವದೆಹಲಿ: ದೇಶದ ರಾಜಧಾನಿಯಲ್ಲಿ ರೇಬಿಸ್ ರೋಗದಿಂದ ಸಂಭವಿಸುವ ಸಾವುಗಳನ್ನು ಶೂನ್ಯಕ್ಕಿಳಿಸಲು ದೆಹಲಿ ಸರ್ಕಾರವು ಮಹತ್ವದ ನಿರ್ಧಾರ ಕೈಗೊಂಡಿದೆ. ಇನ್ನು ಮುಂದೆ ಮಾನವ ರೇಬಿಸ್ ರೋಗವನ್ನು ‘ನೋಟಿಫೈಯಬಲ್ ಡಿಸೀಸ್’ (ಅಧಿಸೂಚಿತ ಕಾಯಿಲೆ) ಅಂದರೆ ‘ಕಡ್ಡಾಯವಾಗಿ ವರದಿ ಮಾಡಬೇಕಾದ ಕಾಯಿಲೆ’ ಎಂದು ಘೋಷಿಸಲು ಸರ್ಕಾರ ಸಿದ್ಧತೆ ನಡೆಸಿದೆ.
‘ಸಾಂಕ್ರಾಮಿಕ ರೋಗಗಳ ಕಾಯ್ದೆ’ಯಡಿ ಈ ಬದಲಾವಣೆ ತರಲಾಗುತ್ತಿದೆ. ಇದರ ಅನ್ವಯ, ದೆಹಲಿಯ ಯಾವುದೇ ಸರ್ಕಾರಿ ಅಥವಾ ಖಾಸಗಿ ಆಸ್ಪತ್ರೆಗಳು, ಕ್ಲಿನಿಕ್ಗಳು ಅಥವಾ ವೈದ್ಯರು ತಮ್ಮ ಬಳಿ ಬರುವ ರೇಬಿಸ್ ಶಂಕಿತ ಅಥವಾ ದೃಢಪಟ್ಟ ಪ್ರಕರಣಗಳ ಮಾಹಿತಿಯನ್ನು ತಕ್ಷಣವೇ ಆರೋಗ್ಯ ಇಲಾಖೆಗೆ ನೀಡಬೇಕು. ಈ ಹಿಂದೆ ಕ್ಷಯ ಮತ್ತು ಕೋವಿಡ್-19 ರೋಗಗಳಿಗೆ ಇಂತಹುದೇ ನಿಯಮವನ್ನು ಜಾರಿ ಮಾಡಲಾಗಿತ್ತು.
ಏಕೆ ಈ ನಿರ್ಧಾರ?
ರೇಬಿಸ್ ಲಕ್ಷಣಗಳು ಒಮ್ಮೆ ಕಾಣಿಸಿಕೊಂಡರೆ ಸಾವು ಬಹುತೇಕ ಖಚಿತ. ಆದರೆ, ನಾಯಿ ಕಚ್ಚಿದ ತಕ್ಷಣ ಸರಿಯಾದ ಚಿಕಿತ್ಸೆ ಪಡೆದರೆ ಇದನ್ನು ಶೇ.100ರಷ್ಟು ತಡೆಯಬಹುದು. ಜಗತ್ತಿನ ರೇಬಿಸ್ ಸಾವುಗಳಲ್ಲಿ ಭಾರತದ ಪಾಲು ದೊಡ್ಡದಿದೆ. ದೇಶದಲ್ಲಿ ವಾರ್ಷಿಕವಾಗಿ ಸುಮಾರು 18,000ದಿಂದ 20,000 ಜನರು ಈ ರೋಗಕ್ಕೆ ಬಲಿಯಾಗುತ್ತಿದ್ದಾರೆ. ಅನೇಕ ಪ್ರಕರಣಗಳು ವರದಿಯಾಗದ ಕಾರಣ, ರೋಗ ತಡೆಗಟ್ಟಲು ಸರ್ಕಾರಕ್ಕೆ ಸರಿಯಾದ ಯೋಜನೆ ರೂಪಿಸಲು ಸಾಧ್ಯವಾಗುತ್ತಿರಲಿಲ್ಲ. ಈಗ ಕಡ್ಡಾಯ ವರದಿಯಿಂದಾಗಿ ನಿಖರ ಮಾಹಿತಿ ಲಭ್ಯವಾಗಲಿದೆ.
ಇದರಿಂದ ಆಗುವ ಲಾಭಗಳೇನು?
ಪ್ರಕರಣ ವರದಿಯಾದ ಕೂಡಲೇ ರೋಗಿಗೆ ಅಗತ್ಯವಿರುವ ಪೋಸ್ಟ್-ಎಕ್ಸ್ಪೋಸರ್ ಪ್ರೊಫಿಲ್ಯಾಕ್ಸಿಸ್ (PEP) ಮತ್ತು ಇಮ್ಯುನೊಗ್ಲೋಬ್ಯುಲಿನ್ ಚಿಕಿತ್ಸೆ ಸಿಗುವಂತೆ ನೋಡಿಕೊಳ್ಳಬಹುದು. ಯಾವ ಪ್ರದೇಶಗಳಲ್ಲಿ ನಾಯಿ ಕಚ್ಚುವ ಪ್ರಕರಣಗಳು ಹೆಚ್ಚಿವೆ ಎಂಬುದನ್ನು ಪತ್ತೆಹಚ್ಚಿ, ಅಲ್ಲಿನ ಬೀದಿ ನಾಯಿಗಳಿಗೆ ಲಸಿಕೆ ಹಾಕುವ ಕಾರ್ಯಕ್ರಮವನ್ನು ಚುರುಕುಗೊಳಿಸಬಹುದು. ಎಲ್ಲಿ ಲಸಿಕೆಗಳ ಕೊರತೆ ಇದೆ ಎಂಬುದನ್ನು ಅರಿತು, ಅಲ್ಲಿಗೆ ಹೆಚ್ಚಿನ ಔಷಧ ಪೂರೈಕೆ ಮಾಡಲು ಸಹಕಾರಿಯಾಗುತ್ತದೆ.
ದೆಹಲಿಯಲ್ಲಿ ಸದ್ಯದ ಸಿದ್ಧತೆ ಹೇಗಿದೆ?
ದೆಹಲಿ ಸರ್ಕಾರವು ಈಗಾಗಲೇ ರೇಬಿಸ್ ತಡೆಗೆ ವ್ಯಾಪಕ ಸಿದ್ಧತೆ ಮಾಡಿಕೊಂಡಿದೆ. ನಗರದ 59 ಆರೋಗ್ಯ ಕೇಂದ್ರಗಳಲ್ಲಿ ರೇಬಿಸ್ ನಿಗ್ರಹ ಲಸಿಕೆ (ಎಆರ್ವಿ) ಲಭ್ಯವಿದೆ. 33 ಆಸ್ಪತ್ರೆಗಳಲ್ಲಿ ರೇಬಿಸ್ ಇಮ್ಯುನೊಗ್ಲೋಬ್ಯುಲಿನ್ ಚಿಕಿತ್ಸೆಯ ವ್ಯವಸ್ಥೆ ಇದೆ. ಪ್ರಾಣಿ ಸಂಗೋಪನಾ ಇಲಾಖೆಯೊಂದಿಗೆ ಸೇರಿ ನಾಯಿಗಳ ಸಂತಾನಶಕ್ತಿಹರಣ ಮತ್ತು ಲಸಿಕಾ ಅಭಿಯಾನಕ್ಕೆ ಚಾಲನೆ ನೀಡಲಾಗಿದೆ.
ಇದನ್ನೂ ಓದಿ: “ರಷ್ಯಾ ತೈಲ ಆಮದು ಮುಂದುವರಿದರೆ ಭಾರತಕ್ಕೆ ತೆರಿಗೆ ಹೆಚ್ಚಳ” | ಟ್ರಂಪ್ ಎಚ್ಚರಿಕೆ
