ಬೆಂಗಳೂರು: ದೇಶದಲ್ಲಿ ಬಹುತೇಕ ಮಂದಿ ಬ್ಯಾಂಕ್ ಖಾತೆ ಹೊಂದಿದ್ದಾರೆ. ಆದರೆ, ಉಳಿತಾಯ ಖಾತೆಯಲ್ಲಿ ಎಷ್ಟು ಹಣ ಇಟ್ಟುಕೊಳ್ಳಬಹುದು? ಖಾತೆಗೆ ಏಕಾಏಕಿ ಲಕ್ಷಾಂತರ ರೂ. ಜಮೆಯಾದರೆ ಏನಾಗುತ್ತದೆ ಎಂಬುದು ಗೊತ್ತಿರುವುದಿಲ್ಲ. ಒಬ್ಬ ವ್ಯಕ್ತಿಯು ಉಳಿತಾಯ ಖಾತೆಯಲ್ಲಿ ಎಷ್ಟು ಹಣ ಇಟ್ಟುಕೊಳ್ಳಬಹುದು? ನಿಯಮಗಳು ಏನು ಹೇಳುತ್ತವೆ? ಏಕಾಏಕಿ ಲಕ್ಷಾಂತರ ರೂಪಾಯಿ ಜಮೆಯಾದರೆ ಮುಂದೇನಾಗುತ್ತದೆ? ಇಲ್ಲಿದೆ ಮಾಹಿತಿ.
ತಿಳಿಯಲೇಬೇಕಾದ ನಿಯಮಗಳು
• ಒಂದು ಹಣಕಾಸು ವರ್ಷದಲ್ಲಿ ಉಳಿತಾಯ ಖಾತೆಯಲ್ಲಿನ ಒಟ್ಟು ನಗದು ಠೇವಣಿ ಅಥವಾ ಹಿಂಪಡೆಯುವಿಕೆ 10 ಲಕ್ಷ ರೂಪಾಯಿ ಮೀರಬಾರದು.
• ಒಂದೇ ದಿನದಲ್ಲಿ ಒಂದೇ ವಹಿವಾಟಿನಲ್ಲಿ ಅಥವಾ ಒಂದೇ ದಿನದಲ್ಲಿ ಒಬ್ಬ ವ್ಯಕ್ತಿಯಿಂದ 2 ಲಕ್ಷ ರೂ. ಅಥವಾ ಅದಕ್ಕಿಂತ ಹೆಚ್ಚಿನ ಮೊತ್ತವನ್ನು ನಗದು ರೂಪದಲ್ಲಿ ಸ್ವೀಕರಿಸಲಾಗುವುದಿಲ್ಲ.
• ಒಂದು ದಿನದಲ್ಲಿ 1 ಲಕ್ಷ ಕ್ಕಿಂತ ಹೆಚ್ಚು ನಗದು ಠೇವಣಿ ಮಾಡಿದರೆ ಬ್ಯಾಂಕ್ ಆ ವ್ಯವಹಾರದ ವಿವರವನ್ನು ತೆರಿಗೆ ಇಲಾಖೆಗೆ ವರದಿ ಮಾಡಬೇಕು.
• 50 ಸಾವಿರಕ್ಕಿಂತ ಹೆಚ್ಚಿನ ಠೇವಣಿ ಮಾಡಲು ಪ್ಯಾನ್ ಕಾರ್ಡ್ ಕಡ್ಡಾಯವಾಗಿದೆ.
• ವಾರ್ಷಿಕವಾಗಿ 10 ಲಕ್ಷಕ್ಕೂ ಹೆಚ್ಚಿನ ಹಣ ಠೇವಣಿ ಮಾಡುವುದಾದರೆ ಬ್ಯಾಂಕ್ ನಿಮ್ಮ ವಿವರಗಳನ್ನು ತೆರಿಗೆ ಇಲಾಖೆಗೆ ವರದಿ ಮಾಡುತ್ತದೆ.
• 21 ಲಕ್ಷಕ್ಕಿಂತ ಹೆಚ್ಚಿನ ಹಣವನ್ನು ಒಂದೇ ದಿನದಲ್ಲಿ ಠೇವಣಿ ಮಾಡಬೇಕಾದರೆ ಪ್ಯಾನ್ ಕಾರ್ಡ್ ಮಾತ್ರವಲ್ಲದೇ ನಿಮ್ಮ ಹಣದ ಮೂಲ ತಿಳಿಸಬೇಕು.
ವರ್ಷದ ಠೇವಣಿ ವಿವರ ಇಲ್ಲಿದೆ
ಒಂದು ವರ್ಷದಲ್ಲಿ 10 ಲಕ್ಷ ರೂಪಾಯಿಗಿಂತ ಹೆಚ್ಚಿನ ಹಣವನ್ನು ಸೇವಿಂಗ್ ಅಕೌಂಟ್ನಲ್ಲಿ ಠೇವಣಿ ಮಾಡಿದರೆ ತೆರಿಗೆ ಇಲಾಖೆ ನಿಮ್ಮ ಹಣದ ಮೂಲವನ್ನು ಕೇಳುತ್ತದೆ. ಈ ವೇಳೆ ನೀವು ಸರಿಯಾಗಿ ಹಣದ ಮೂಲಕ ತಿಳಿಸಿದರೆ ಸಮಸ್ಯೆ ಇರುವುದಿಲ್ಲ. ಅದೇ ಏನಾದರೂ ಹಣದ ಮೂಲ ಸರಿಯಾಗಿ ವಿವರ ನೀಡದಿದ್ದರೆ, ತೆರಿಗೆ ಇಲಾಖೆ ದಂಡ ಅಥವಾ ಕ್ರಮಕೈಗೊಳ್ಳಲಿದೆ.
ಹಾಗೆ ನೋಡಿದರೆ, ಉಳಿತಾಯ ಖಾತೆಯಲ್ಲಿ ಇಷ್ಟು ಹಣವನ್ನು ಇರಿಸಬಾರದು ಎಂಬುದಕ್ಕೆ ಯಾವುದೇ ನಿಯಮವಿಲ್ಲ. ಆದರೆ, ದಿಢೀರನೆ ಲಕ್ಷಾಂತರ ರೂ. ಜಮೆಯಾದರೆ, ಹೆಚ್ಚಿನ ಹಣವನ್ನು ಠೇವಣಿ ಮಾಡಿದರೆ ದಾಖಲೆ ನೀಡಬೇಕಾಗುತ್ತದೆ. ಒಂದು ಹಣಕಾಸು ವರ್ಷದಲ್ಲಿ ಅಂದರೆ ಏಪ್ರಿಲ್ 1ರಿಂದ ಮಾರ್ಚ್ 31ರ ವರೆಗೆ ನಿಮ್ಮ ಎಲ್ಲ ಉಳಿತಾಯ ಖಾತೆಗಳಲ್ಲಿ 10 ಲಕ್ಷ ರೂಪಾಯಿ ಮೀರಿದ ಯಾವುದೇ ನಗದು ಠೇವಣಿಯನ್ನು ಆದಾಯ ತೆರಿಗೆ ಇಲಾಖೆಗೆ ವರದಿ ಮಾಡಬೇಕು. ಬಹು ಖಾತೆಗಳಲ್ಲಿ ವಹಿವಾಟುಗಳು ನಡೆದರೂ ಬ್ಯಾಂಕುಗಳು ಅಂತಹ ವಹಿವಾಟುಗಳನ್ನು ಬಹಿರಂಗಪಡಿಸಬೇಕು ಎಂಬ ನಿಯಮಗಳಿವೆ.
