ನವದೆಹಲಿ : ಭಾರತ ಮತ್ತು ಪಾಕಿಸ್ತಾನ ನಡುವಿನ ಹೈವೋಲ್ಟೇಜ್ ಪಂದ್ಯಕ್ಕೂ ಮುನ್ನವೇ ವಾಕ್ಸಮರ ಜೋರಾಗಿದೆ. ಪಾಕಿಸ್ತಾನದ ಮಾಜಿ ವೇಗಿ ಮೊಹಮ್ಮದ್ ಅಮೀರ್, ಟೀಮ್ ಇಂಡಿಯಾದ ಸ್ಪೋಟಕ ಆರಂಭಿಕ ಆಟಗಾರ ಅಭಿಷೇಕ್ ಶರ್ಮಾ ವಿರುದ್ಧ ಕಟುವಾದ ಟೀಕೆಗಳನ್ನು ಮಾಡಿದ್ದು, ಅವರನ್ನು ಕೇವಲ ‘ಸ್ಲಾಗರ್’ (ಕಣ್ಮುಚ್ಚಿ ಬೀಸುವವ) ಎಂದು ಜರೆದಿದ್ದಾರೆ.
ಅಮೀರ್ ಹೇಳಿದ್ದೇನು?
‘ಹಸ್ನಾ ಮನಾ ಹೈ’ (Hasna Mana Hain) ಎಂಬ ಕಾರ್ಯಕ್ರಮದಲ್ಲಿ ಮಾತನಾಡಿದ ಎಡಗೈ ವೇಗಿ ಮೊಹಮ್ಮದ್ ಅಮೀರ್, ಅಭಿಷೇಕ್ ಶರ್ಮಾ ಅವರ ಬ್ಯಾಟಿಂಗ್ ಶೈಲಿಯ ಬಗ್ಗೆ ವ್ಯಂಗ್ಯವಾಡಿದ್ದಾರೆ. “ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಆತ ಕೇವಲ ಸ್ಲಾಗರ್ ಅಷ್ಟೇ. ಆತನ ಆಟದಲ್ಲಿ ವೈಫಲ್ಯದ ಸಾಧ್ಯತೆಗಳೇ ಹೆಚ್ಚು. ಆತ ತಾಂತ್ರಿಕವಾಗಿ (Technically) ಸದೃಢ ಬ್ಯಾಟ್ಸ್ಮನ್ ಅಲ್ಲ,” ಎಂದು ಅಮೀರ್ ಹೇಳಿಕೆ ನೀಡಿದ್ದಾರೆ.
ಅಷ್ಟೇ ಅಲ್ಲದೆ, ಅಭಿಷೇಕ್ ಅವರನ್ನು ಕಟ್ಟಿಹಾಕುವುದು ಹೇಗೆ ಎಂಬುದರ ಬಗ್ಗೆಯೂ ಅಮೀರ್ ಪಾಕ್ ಬೌಲರ್ಗಳಿಗೆ ಸಲಹೆ ನೀಡಿದ್ದಾರೆ. “ಇಂತಹ ಬ್ಯಾಟ್ಸ್ಮನ್ಗಳನ್ನು ಎದುರಿಸುವುದು ಕಷ್ಟವೇನಲ್ಲ. ಬಾಡಿ ಲೈನ್ (ದೇಹಕ್ಕೆ ಗುರಿಯಿಟ್ಟು) ಬೌಲಿಂಗ್ ಮಾಡಿದರೆ ಅಥವಾ ನಿಧಾನಗತಿಯ ಎಸೆತಗಳನ್ನು (Slow balls) ಹಾಕಿದರೆ ಆತ ಪರದಾಡುತ್ತಾನೆ,” ಎಂದು ಅಭಿಷೇಕ್ ಅವರ ದೌರ್ಬಲ್ಯವನ್ನು ತೆರೆದಿಟ್ಟಿದ್ದಾರೆ.
ಅಭಿಷೇಕ್ ಅಂಕಿ-ಅಂಶ ಏನು ಹೇಳುತ್ತದೆ?
ಅಮೀರ್ ಟೀಕೆಯ ಹೊರತಾಗಿಯೂ, ಅಂಕಿ-ಅಂಶಗಳು ಅಭಿಷೇಕ್ ಪರವಾಗಿಯೇ ಇವೆ. 2024ರ ಟಿ20 ವಿಶ್ವಕಪ್ ನಂತರ ಭಾರತದ ಪರ ಆರಂಭಿಕನಾಗಿ ಕಣಕ್ಕಿಳಿದು ಅತ್ಯಧಿಕ ಸ್ಟ್ರೈಕ್ ರೇಟ್ (194.45) ಹೊಂದಿರುವ ಬ್ಯಾಟರ್ ಇವರಾಗಿದ್ದಾರೆ. ಒಟ್ಟು 38 ಟಿ20 ಪಂದ್ಯಗಳಲ್ಲಿ 195ರ ಸ್ಟ್ರೈಕ್ ರೇಟ್ನಲ್ಲಿ 1,297 ರನ್ ಸಿಡಿಸಿರುವ ಇವರು, ಪಾಕಿಸ್ತಾನದ ವಿರುದ್ಧ ಈ ಹಿಂದೆ ಆಡಿದ ಮೂರು ಪಂದ್ಯಗಳಲ್ಲಿ 189.65ರ ಸ್ಟ್ರೈಕ್ ರೇಟ್ನಲ್ಲಿ 110 ರನ್ ಬಾರಿಸಿ ಪಂದ್ಯದ ಗತಿಯನ್ನೇ ಬದಲಿಸಿದ್ದರು.
ಪಾಕ್ ಪಂದ್ಯಕ್ಕೆ ಲಭ್ಯತೆ ಅನುಮಾನ?
ಅಮೆರಿಕ ವಿರುದ್ಧದ ಮೊದಲ ಪಂದ್ಯದಲ್ಲಿ ಗೋಲ್ಡನ್ ಡಕ್ ಆಗಿದ್ದ ಅಭಿಷೇಕ್, ನಂತರ ಹೊಟ್ಟೆನೋವಿನ ಸಮಸ್ಯೆಯಿಂದಾಗಿ (Stomach issue) ಆಸ್ಪತ್ರೆ ಸೇರಿದ್ದರು. ಕೋಚ್ ಗೌತಮ್ ಗಂಭೀರ್ ಏರ್ಪಡಿಸಿದ್ದ ಔತಣಕೂಟದ ವೇಳೆ ಅಸ್ವಸ್ಥರಾಗಿದ್ದ ಅವರು, ಚಿಕಿತ್ಸೆಯ ನಂತರ ಸುಮಾರು 2 ಕೆ.ಜಿ ತೂಕ ಕಳೆದುಕೊಂಡಿದ್ದಾರೆ. ಪ್ರಸ್ತುತ ಬಿಸಿಸಿಐ ವೈದ್ಯಕೀಯ ತಂಡದ ಕಟ್ಟುನಿಟ್ಟಿನ ನಿಗಾದಲ್ಲಿರುವ ಅವರು, ಫೆಬ್ರವರಿ 15ರಂದು ಕೊಲಂಬೊದಲ್ಲಿ ನಡೆಯಲಿರುವ ಪಾಕಿಸ್ತಾನ ವಿರುದ್ಧದ ನಿರ್ಣಾಯಕ ಪಂದ್ಯಕ್ಕೆ ಲಭ್ಯರಾಗುವರೇ ಎಂಬುದು ಇನ್ನೂ ಖಚಿತವಾಗಿಲ್ಲ. ಒಂದು ವೇಳೆ ಅಭಿಷೇಕ್ ಫಿಟ್ ಆಗಿ ಕಣಕ್ಕಿಳಿದರೆ, ಶ್ರೀಲಂಕಾದ ಸ್ಪಿನ್ ಪಿಚ್ಗಳಲ್ಲಿ ಅವರ ಬ್ಯಾಟಿಂಗ್ ಮಾತ್ರವಲ್ಲದೆ, ಎಡಗೈ ಸ್ಪಿನ್ ಬೌಲಿಂಗ್ ಕೂಡ ಭಾರತಕ್ಕೆ ಪ್ರಮುಖ ಅಸ್ತ್ರವಾಗಲಿದೆ.
ಇದನ್ನೂ ಓದಿ : ಸರ್ಕಾರಿ ನೌಕರರೇ ಗಮನಿಸಿ | ನಿಮ್ಮ ಸಂಬಳ ಹೆಚ್ಚಾಗಲು ಮೊದಲು ಈ ಕೆಲಸ ಮಾಡಿ
