ಸ್ಪ್ಯಾಮ್ ಕರೆಗಳಿಂದ ಸ್ಮಾರ್ಟ್ ಸಾಧನಗಳವರೆಗೆ: ನಿಮ್ಮ ಖಾಸಗಿತನವನ್ನು ಹೇಗೆ ರಕ್ಷಿಸಲಿದೆ ಹೊಸ ಡೇಟಾ ಕಾನೂನು?

ನವದೆಹಲಿ: ಅಂಗಡಿಯಲ್ಲಿ ಏನನ್ನಾದರೂ ಖರೀದಿಸುವಾಗ ಫೋನ್ ನಂಬರ್ ನೀಡುವುದರಿಂದ ಹಿಡಿದು, ನೀವು ಭೇಟಿ ನೀಡುವ ಪ್ರತಿಯೊಂದು ವೆಬ್‌ಪುಟದಲ್ಲಿ ‘ಕುಕೀಸ್’ ಮೂಲಕ ನಿಮ್ಮ ಡೇಟಾವನ್ನು ಟ್ರ್ಯಾಕ್ ಮಾಡುವವರೆಗೆ, ನಮ್ಮ ವೈಯಕ್ತಿಕ ಮಾಹಿತಿಯು ನಿರಂತರವಾಗಿ ಸಂಗ್ರಹಿಸಲ್ಪಡುತ್ತಿದೆ. ಈ ಡೇಟಾವನ್ನು ಕಂಪನಿಗಳು ತಮ್ಮ ಉತ್ಪನ್ನಗಳ ಪ್ರಚಾರಕ್ಕೆ, ಜಾಹೀರಾತುಗಳಿಗಾಗಿ ಅಥವಾ ಗ್ರಾಹಕರ ಸಂಶೋಧನೆಗಾಗಿ ಮಾರಾಟ ಮಾಡುತ್ತವೆ. ಎಷ್ಟೇ ಸ್ಪ್ಯಾಮ್ ಬ್ಲಾಕರ್‌ಗಳನ್ನು ಬಳಸಿದರೂ, ಅನಗತ್ಯ ಮಾರಾಟ ಮತ್ತು ಜಾಹೀರಾತು ಕರೆಗಳು ನಿಲ್ಲುವುದೇ ಇಲ್ಲ. ಆದರೆ, ಭಾರತದ ಹೊಸ ಡಿಜಿಟಲ್ ವೈಯಕ್ತಿಕ ಡೇಟಾ ಸಂರಕ್ಷಣಾ ಕಾಯ್ದೆ, 2023 (DPDP Act) ಜಾರಿಗೆ ಬಂದ ನಂತರ ಈ ಎಲ್ಲಾ ಸಮಸ್ಯೆಗಳಿಗೆ ಕಡಿವಾಣ ಬೀಳುವ ನಿರೀಕ್ಷೆಯಿದೆ.

ಏನಿದು ಹೊಸ ಡೇಟಾ ಸಂರಕ್ಷಣಾ ಕಾಯ್ದೆ?

ಆಗಸ್ಟ್ 2023ರಲ್ಲಿ ಸಂಸತ್ತಿನಲ್ಲಿ ಅಂಗೀಕಾರಗೊಂಡ ಈ ಕಾಯ್ದೆಯು ಭಾರತದ ಮೊದಲ ಸಮಗ್ರ ಡೇಟಾ ಸಂರಕ್ಷಣಾ ಚೌಕಟ್ಟಾಗಿದೆ. ಇದು ವ್ಯಕ್ತಿಗಳ ವೈಯಕ್ತಿಕ ಡೇಟಾವನ್ನು ರಕ್ಷಿಸುವ ಹಕ್ಕನ್ನು ಗುರುತಿಸುವುದರ ಜೊತೆಗೆ, ಕಾನೂನುಬದ್ಧ ಉದ್ದೇಶಗಳಿಗಾಗಿ ಡೇಟಾವನ್ನು ಬಳಸುವ ಅಗತ್ಯವನ್ನು ಸಮತೋಲನಗೊಳಿಸುತ್ತದೆ. ಈ ಕಾಯ್ದೆಯ ಜಾರಿಗಾಗಿ ಕರಡು ನಿಯಮಗಳನ್ನು ಈಗಾಗಲೇ ಈ ವರ್ಷದ ಜನವರಿಯಲ್ಲಿ ಸಾರ್ವಜನಿಕವಾಗಿ ಪ್ರಕಟಿಸಲಾಗಿದ್ದರೂ, ಅಂತಿಮ ನಿಯಮಗಳು ಇನ್ನೂ ಅಧಿಸೂಚನೆಗೊಳ್ಳಬೇಕಿದೆ.

ಹೊಸ ಕಾನೂನಿನ ಪ್ರಮುಖ ಲಕ್ಷಣಗಳೇನು?

ಹೊಸ ಕಾನೂನು ನಿಮ್ಮ ಸಂಪರ್ಕ ವಿವರಗಳು, ಆನ್‌ಲೈನ್ ಬ್ರೌಸಿಂಗ್ ಇತಿಹಾಸ, ಖರೀದಿ ಇತಿಹಾಸ ಮತ್ತು ನೀವು ಹಂಚಿಕೊಳ್ಳುವ ಯಾವುದೇ ಡೇಟಾದ ಮೇಲೆ ಉತ್ತಮ ಮೇಲ್ವಿಚಾರಣೆ ಮತ್ತು ಕಠಿಣ ನಿಯಂತ್ರಣವನ್ನು ಹೊಂದುವ ನಿರೀಕ್ಷೆಯಿದೆ.

• ಡೇಟಾ ಫಿಡ್ಯೂಷಿಯರಿಗಳ (Data Fiduciaries) ಗುರುತಿಸುವಿಕೆ: ನಿಮ್ಮ ಡೇಟಾವನ್ನು ಸಂಗ್ರಹಿಸುವ ಅಥವಾ ಬಳಸುವ ಖಾಸಗಿ ಮತ್ತು ಸರ್ಕಾರಿ ಸೇರಿದಂತೆ ಎಲ್ಲಾ ಕಂಪನಿಗಳು, ವೆಬ್‌ಸೈಟ್‌ಗಳು ಮತ್ತು ಘಟಕಗಳನ್ನು ‘ಡೇಟಾ ಫಿಡ್ಯೂಷಿಯರಿ’ ಎಂದು ಗುರುತಿಸಲಾಗುತ್ತದೆ.
• ನಿರ್ದಿಷ್ಟ ಸಮ್ಮತಿ (Specific Consent): ಈ ಕಂಪನಿಗಳು ನಿಮ್ಮ ಡೇಟಾವನ್ನು ಬಳಸುವ ಮೊದಲು ನಿಮ್ಮಿಂದ ನಿರ್ದಿಷ್ಟ ಸಮ್ಮತಿಯನ್ನು ಪಡೆಯುವುದು ಕಡ್ಡಾಯ. ಭವಿಷ್ಯದ ಮಾರಾಟಕ್ಕಾಗಿ ನಿಮ್ಮನ್ನು ಸಂಪರ್ಕಿಸಬೇಕೇ, ಆನ್‌ಲೈನ್ ಜಾಹೀರಾತುಗಳನ್ನು ರೂಪಿಸಲು ನಿಮ್ಮ ಡೇಟಾವನ್ನು ಬಳಸಬೇಕೇ ಅಥವಾ ಸಂಶೋಧನೆಗೆ ಬಳಸಬೇಕೇ ಎಂಬುದಕ್ಕೆಲ್ಲ ಪ್ರತ್ಯೇಕ ಸಮ್ಮತಿ ಬೇಕಾಗುತ್ತದೆ.
• ಸಮ್ಮತಿ ನಿರ್ವಾಹಕರು (Consent Managers): ‘ಸಮ್ಮತಿ ನಿರ್ವಾಹಕ’ ಎಂಬ ಹೊಸ ವ್ಯವಸ್ಥೆಯನ್ನು ರಚಿಸಲಾಗುತ್ತದೆ. ಇದರ ಮೂಲಕ, ನಿಮ್ಮ ಡೇಟಾವನ್ನು ಯಾವುದಕ್ಕೆಲ್ಲಾ ಬಳಸಬಹುದು ಎಂಬುದನ್ನು ನೀವು ನೋಡಬಹುದು ಮತ್ತು ಅದನ್ನು ಹಂಚಿಕೊಳ್ಳಬೇಕೇ ಅಥವಾ ಬೇಡವೇ ಎಂಬುದನ್ನು ಆಯ್ಕೆ ಮಾಡಬಹುದು.
• ಡೇಟಾ ಉಲ್ಲಂಘನೆಗೆ ದಂಡ: ಯಾವುದೇ ಕಂಪನಿಯಿಂದ ಡೇಟಾ ಸೋರಿಕೆಯಾದರೆ, ಅದನ್ನು ಕಡ್ಡಾಯವಾಗಿ ಡೇಟಾ ಸಂರಕ್ಷಣಾ ಮಂಡಳಿಗೆ (Data Protection Board) ವರದಿ ಮಾಡಬೇಕು. ತಪ್ಪಿದಲ್ಲಿ, 200 ಕೋಟಿ ರೂಪಾಯಿಯವರೆಗೆ ದಂಡ ವಿಧಿಸಬಹುದು. ಡೇಟಾವನ್ನು ರಕ್ಷಿಸಲು ಸೂಕ್ತ ಭದ್ರತಾ ಕ್ರಮಗಳನ್ನು ತೆಗೆದುಕೊಳ್ಳದಿದ್ದರೆ 250 ಕೋಟಿ ರೂಪಾಯಿವರಗೆ ದಂಡ ವಿಧಿಸುವ ಅವಕಾಶವಿದೆ.
• ಮಕ್ಕಳ ಸುರಕ್ಷತೆ: ಆನ್‌ಲೈನ್‌ನಲ್ಲಿ ಮಕ್ಕಳಿಗೆ ಸೂಕ್ತವಲ್ಲದ ವಿಷಯಗಳಿಗೆ ಒಡ್ಡಿಕೊಳ್ಳುವುದನ್ನು ತಡೆಯಲು ರಕ್ಷಣಾತ್ಮಕ ಕ್ರಮಗಳನ್ನು ಈ ಕಾನೂನು ಒಳಗೊಂಡಿದೆ.
  
  ಸ್ಮಾರ್ಟ್ ಸಾಧನಗಳ ಮೇಲೂ ನಿಯಂತ್ರಣ
  ಮನೆಗಳಲ್ಲಿರುವ ಗೂಗಲ್ ಮತ್ತು ಅಲೆಕ್ಸಾದಂತಹ ಸ್ಮಾರ್ಟ್ ಸಾಧನಗಳು ನಿರಂತರವಾಗಿ ನಮ್ಮ ಮಾತುಗಳನ್ನು ಕೇಳಿಸಿಕೊಳ್ಳುತ್ತಿರುತ್ತವೆ. ಅವುಗಳು ಸೆರೆಹಿಡಿಯುವ ಡೇಟಾ ಕೂಡ ಈ ಹೊಸ ಕಾನೂನಿನ ವ್ಯಾಪ್ತಿಗೆ ಬರುತ್ತದೆ.
  
  ಹೊಸ ನಿಯಮಗಳು ಇನ್ನೂ ಅಂತಿಮಗೊಂಡಿಲ್ಲವಾದರೂ, ಇದು ಜಾರಿಗೆ ಬಂದ ನಂತರ ಗ್ರಾಹಕರ ಡೇಟಾದ ಅನಧಿಕೃತ ಬಳಕೆಗೆ ಕಡಿವಾಣ ಬೀಳಲಿದೆ ಮತ್ತು ಸ್ಪ್ಯಾಮ್ ಕರೆಗಳ ಹಾವಳಿ ಕಡಿಮೆಯಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.

ಇದನ್ನೂ ಓದಿ: ಭಾರತ-ಅಮೆರಿಕ ನಡುವೆ 10 ವರ್ಷಗಳ ರಕ್ಷಣಾ ಒಪ್ಪಂದಕ್ಕೆ ಸಹಿ: ‘ಮೇಕ್ ಇನ್ ಇಂಡಿಯಾ’ಗೆ ಮತ್ತಷ್ಟು ಬಲ