ಬೆಂಗಳೂರು : ಭಾರತ ಮತ್ತು ಬಾಂಗ್ಲಾದೇಶದ ನಡುವಿನ ರಾಜತಾಂತ್ರಿಕ ಸಂಬಂಧ ಹದಗೆಟ್ಟಿರುವ ಹಿನ್ನೆಲೆಯಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ತಂಡದಿಂದ ಬಿಡುಗಡೆಯಾಗಿದ್ದ ಬಾಂಗ್ಲಾದೇಶದ ಸ್ಟಾರ್ ವೇಗಿ ಮುಸ್ತಫಿಜುರ್ ರೆಹಮಾನ್, ಇದೀಗ ಪಾಕಿಸ್ತಾನ ಸೂಪರ್ ಲೀಗ್ (PSL) ಸೇರಿಕೊಂಡಿದ್ದಾರೆ. ಐಪಿಎಲ್ನಲ್ಲಿ ಕೋಟಿ ಕೋಟಿ ಸಂಪಾದಿಸುವ ಅವಕಾಶ ಕಳೆದುಕೊಂಡಿರುವ ‘ದಿ ಫಿಜ್’, ಪಿಎಸ್ಎಲ್ನಲ್ಲಿ ತೀರಾ ಕಡಿಮೆ ಮೊತ್ತಕ್ಕೆ ಒಪ್ಪಂದ ಮಾಡಿಕೊಳ್ಳುವ ಮೂಲಕ ದೊಡ್ಡ ಆರ್ಥಿಕ ನಷ್ಟ ಅನುಭವಿಸಿದ್ದಾರೆ.
ಕೆಕೆಆರ್ ಬಿಟ್ಟ ಬೆನ್ನಲ್ಲೇ ಲಾಹೋರ್ ಕಲಂದರ್ಸ್ ಪಾಲು
ಮುಂಬರುವ ಐಪಿಎಲ್ ಆವೃತ್ತಿಗೂ ಮುನ್ನ ಬಿಸಿಸಿಐ ನಿರ್ದೇಶನದ ಮೇರೆಗೆ ಕೆಕೆಆರ್ ಫ್ರಾಂಚೈಸಿಯು ಮುಸ್ತಫಿಜುರ್ ರೆಹಮಾನ್ ಅವರನ್ನು ತಂಡದಿಂದ ಬಿಡುಗಡೆ ಮಾಡಿತ್ತು. ಈ ಆಘಾತದ ಬೆನ್ನಲ್ಲೇ, ಪಿಎಸ್ಎಲ್ನ 11ನೇ ಆವೃತ್ತಿಗಾಗಿ ಲಾಹೋರ್ ಕಲಂದರ್ಸ್ ತಂಡವು ಮುಸ್ತಫಿಜುರ್ ಅವರನ್ನು ನೇರ ಒಪ್ಪಂದದ ಮೂಲಕ ತಂಡಕ್ಕೆ ಸೇರಿಸಿಕೊಂಡಿದೆ. ಈ ಹಿಂದೆ 2016 ಮತ್ತು 2018ರ ಸೀಸನ್ನಲ್ಲಿ ಲಾಹೋರ್ ಪರ ಆಡಿದ್ದ ಮುಸ್ತಫಿಜುರ್, ಇದೀಗ ಮತ್ತೆ ಹಳೆಯ ತಂಡಕ್ಕೆ ಮರಳಿದ್ದಾರೆ.
ಐಪಿಎಲ್ಗೆ ಹೋಲಿಸಿದರೆ ಶೇ.77ರಷ್ಟು ಕಡಿಮೆ ಸಂಭಾವನೆ!
ಮುಸ್ತಫಿಜುರ್ ರೆಹಮಾನ್ ಐಪಿಎಲ್ ಮತ್ತು ಪಿಎಸ್ಎಲ್ ಒಪ್ಪಂದಗಳ ನಡುವಿನ ಹಣಕಾಸಿನ ವ್ಯತ್ಯಾಸ ಊಹೆಗೂ ನಿಲುಕದಂತಿದೆ. ಕೆಕೆಆರ್ ತಂಡದಲ್ಲಿ ಮುಂದುವರಿದಿದ್ದರೆ ಮುಸ್ತಫಿಜುರ್ ಅವರಿಗೆ ಬರೋಬ್ಬರಿ 9.2 ಕೋಟಿ ರೂಪಾಯಿ ಸಂಭಾವನೆ ಸಿಗುತ್ತಿತ್ತು. ಆದರೆ, ಈಗ ಲಾಹೋರ್ ಕಲಂದರ್ಸ್ ಜೊತೆ ಮಾಡಿಕೊಂಡಿರುವ ಒಪ್ಪಂದದ ಮೊತ್ತ ಕೇವಲ 6.44 ಕೋಟಿ ಪಾಕಿಸ್ತಾನಿ ರೂಪಾಯಿ. ಇದನ್ನು ಭಾರತೀಯ ರೂಪಾಯಿಗೆ ಪರಿವರ್ತಿಸಿದರೆ ಸರಿಸುಮಾರು 2 ಕೋಟಿ ರೂಪಾಯಿ ಆಗುತ್ತದೆ. ಅಂದರೆ, ಐಪಿಎಲ್ನಲ್ಲಿ ಸಿಗುತ್ತಿದ್ದ ಮೊತ್ತಕ್ಕಿಂತ ಶೇಕಡಾ 77ರಷ್ಟು ಕಡಿಮೆ ಹಣಕ್ಕೆ ಅವರು ಪಾಕಿಸ್ತಾನ ಲೀಗ್ನಲ್ಲಿ ಆಡಲಿದ್ದಾರೆ. ಐಪಿಎಲ್ನ ಆರ್ಥಿಕ ಸಾಮರ್ಥ್ಯಕ್ಕೆ ಹೋಲಿಸಿದರೆ ಪಿಎಸ್ಎಲ್ನ ವೇತನ ಶ್ರೇಣಿ ತುಂಬಾ ಕಡಿಮೆಯಿರುವುದೇ ಇದಕ್ಕೆ ಕಾರಣ.
ಐಪಿಎಲ್ನಿಂದ ಹೊರಬೀಳಲು ಕಾರಣವೇನು?
ಭಾರತ ಮತ್ತು ಬಾಂಗ್ಲಾದೇಶದ ನಡುವಿನ ರಾಜತಾಂತ್ರಿಕ ಬಿಕ್ಕಟ್ಟು ಕ್ರಿಕೆಟ್ ಅಂಗಳಕ್ಕೂ ವ್ಯಾಪಿಸಿದೆ. ‘ಇತ್ತೀಚಿನ ಬೆಳವಣಿಗೆಗಳ’ ಹಿನ್ನೆಲೆಯಲ್ಲಿ ಬಿಸಿಸಿಐ ನೀಡಿದ ಸೂಚನೆಯ ಮೇರೆಗೆ ಕೆಕೆಆರ್ ಮುಸ್ತಫಿಜುರ್ ಅವರನ್ನು ಬಿಡುಗಡೆ ಮಾಡಿದೆ ಎಂದು ವರದಿಯಾಗಿದೆ. ಅಷ್ಟೇ ಅಲ್ಲದೆ, ಭದ್ರತಾ ಕಾರಣಗಳನ್ನು ಮುಂದಿಟ್ಟುಕೊಂಡು ಬಾಂಗ್ಲಾದೇಶವು ಮುಂಬರುವ ಟಿ20 ವಿಶ್ವಕಪ್ನಿಂದ ಹಿಂದೆ ಸರಿದಿದೆ. ಬಾಂಗ್ಲಾದೇಶದ ಈ ನಿರ್ಧಾರಕ್ಕೆ ಬೆಂಬಲ ಸೂಚಿಸಿರುವ ಪಾಕಿಸ್ತಾನ ಕೂಡ, ಭಾರತದ ವಿರುದ್ಧದ ಪಂದ್ಯವನ್ನು ಆಡದಿರಲು ನಿರ್ಧರಿಸಿದೆ. ಈ ಎಲ್ಲಾ ರಾಜಕೀಯ ಮತ್ತು ಕ್ರಿಕೆಟ್ ಜಟಾಪಟಿಯ ನಡುವೆ ಮುಸ್ತಫಿಜುರ್ ರೆಹಮಾನ್ ಐಪಿಎಲ್ ಅವಕಾಶ ಕಳೆದುಕೊಂಡು ದೊಡ್ಡ ಆರ್ಥಿಕ ನಷ್ಟ ಅನುಭವಿಸುವಂತಾಗಿದೆ.
ಇದನ್ನೂ ಓದಿ : ರೀಲ್ಸ್ ನೋಡ್ಕೊಂಡೇ ಬಸ್ ಚಾಲನೆ.. ಮಂಡ್ಯ KSRTC ಡ್ರೈವರ್ ನಿರ್ಲಕ್ಷ್ಯಕ್ಕೆ ಪ್ರಯಾಣಿಕರ ಆಕ್ರೋಶ!
