ಬೆಂಗಳೂರು: ತಂದೆ-ತಾಯಿಗೆ ನಾವು ಹೊರೆಯಾಗಬಾರದು, ಮನೆಯಲ್ಲಿ ಬಡತನ ಇದೆ, ವಿದೇಶದಲ್ಲಿ ಉನ್ನತ ಶಿಕ್ಷಣ ಪಡೆಯಬೇಕು… ಹೀಗೆ ಹತ್ತಾರು ಕನಸುಗಳನ್ನು ಹೊತ್ತುಕೊಂಡವರು ಎಜುಕೇಶನ್ ಲೋನ್ ಪಡೆಯುತ್ತಾರೆ. ಬ್ಯಾಂಕುಗಳು ಕೂಡ ವಿದ್ಯಾರ್ಥಿಗಳ ಪೋಷಕರ ಸಾಮರ್ಥ್ಯಕ್ಕೆ ಅನುಗುಣವಾಗಿ 1 ಲಕ್ಷ ರೂಪಾಯಿಯಿಂದ 1 ಕೋಟಿ ರೂ.ವರೆಗೆ (ಇದಕ್ಕಿಂತಲೂ ಹೆಚ್ಚು ನೀಡುವ ಬ್ಯಾಂಕುಗಳಿವೆ) ಶೈಕ್ಷಣಿಕ ಸಾಲ ನೀಡುತ್ತವೆ.
ಶೈಕ್ಷಣಿಕ ಸಾಲ ಪಡೆಯುವವರು ಹಾಗೂ ವಿದ್ಯಾರ್ಥಿಗಳ ಪೋಷಕರು ಕೆಲವೊಂದು ಅಂಶಗಳನ್ನು ಗಮನದಲ್ಲಿಟ್ಟುಕೊಳ್ಳಬೇಕಾಗಿದೆ. ಯಾವ ಬ್ಯಾಂಕುಗಳು ಕಡಿಮೆ ಬಡ್ಡಿದರಕ್ಕೆ ಸಾಲ ನೀಡುತ್ತವೆ, ಯಾವ ಬ್ಯಾಂಕುಗಳಲ್ಲಿ ಸಾಲ ನೀಡುವ ಪ್ರೊಸೆಸಿಂಗ್ ಫೀ ಕಡಿಮೆ ಇದೆ, ಯಾವ ಬ್ಯಾಂಕುಗಳಲ್ಲಿ ಹಿಡನ್ ಶುಲ್ಕಗಳು ಇಲ್ಲ ಎಂಬುದನ್ನು ಗಮನದಲ್ಲಿಟ್ಟುಕೊಂಡು ಸಾಲಕ್ಕೆ ಅರ್ಜಿ ಸಲ್ಲಿಸಬೇಕಾಗುತ್ತದೆ. ಇದರಿಂದ ಹಣ ಉಳಿಯುತ್ತದೆ. ಬ್ಯಾಂಕುಗಳಿಗೆ ಭೇಟಿ ನೀಡಿ ಅಥವಾ ಬ್ಯಾಂಕುಗಳ ವೆಬ್ ಸೈಟ್ ನಲ್ಲಿ ಸಾಲಕ್ಕೆ ಅರ್ಜಿ ಸಲ್ಲಿಸಬಹುದಾಗಿದೆ.
ವಿದ್ಯಾಭ್ಯಾಸ ಮುಗಿದ ನಂತರ ಆರು ತಿಂಗಳಿನಿಂದ, ಹನ್ನೆರೆಡು ತಿಂಗಳವರೆಗೆ ಕೆಲಸ ಹುಡುಕಿಕೊಳ್ಳಲು ಕೂಡ ಸಮಯ ನೀಡಲಾಗುತ್ತದೆ. ಸಾಲ ಮರು ವಾಪಸಾತಿ ಶುರುವಾಗುವುದು ಕೆಲಸ ಸಿಕ್ಕ ನಂತರ ಅಥವಾ ಕೋರ್ಸ್ ಮುಗಿದ 6/12 ತಿಂಗಳ ಬಳಿಕ ಸಾಲ ವಸೂಲಿ ಮಾಡಲಾಗುತ್ತದೆ. ಅಂದರೆ ಓದು ಮುಗಿದ ನಂತರ ಕೇವಲ ಎರಡು ತಿಂಗಳಲ್ಲಿ ಕೆಲಸ ಸಿಕ್ಕರೆ ಸಾಲ ಮರುಪಾವತಿ ಕೆಲಸ ಸಿಕ್ಕ ತಿಂಗಳಿಂದ ಶುರುವಾಗುತ್ತದೆ. ಕೆಲಸ ಸಿಗದೇ ಹೋದರೂ ಕೂಡ ಗರಿಷ್ಟ 12 ತಿಂಗಳ ಕಾಲಾವಕಾಶವಿರುತ್ತದೆ. ಇದು ಮುಗಿದ ನಂತರ ಸಾಲ ವಾಪಸಾತಿ ಪ್ರಕ್ರಿಯೆ ಶುರುವಾಗುತ್ತದೆ.
ಪಿಯುಸಿ ನಂತರ ಪದವಿ ಶಿಕ್ಷಣ ಪಡೆಬೇಕು, ಪದವಿ ನಂತರ ಮಾಸ್ಟರ್ಸ್ ಪದವಿ ಪಡೆಯಬೇಕು ಎನ್ನುವವರಿಗೆ ಎಜುಕೇಷನ್ ಲೋನ್ ನೀಡಲಾಗುತ್ತದೆ. ವೃತ್ತಿಪರ ಕೋರ್ಸ್ ಪಡೆಯುವವರಿಗೆ ಸುಲಭವಾಗಿ ಸಾಲ ಸಿಗುತ್ತದೆ. ವಿದೇಶದಲ್ಲಿ ಉನ್ನತ ಶಿಕ್ಷಣ ಪಡೆಯಲು ಇಚ್ಛಿಸುವವರಿಗೂ ಸಾಲ ನೀಡಲಾಗುತ್ತದೆ.
ಬರೋಬ್ಬರಿ 1 ಕೋಟಿವರೆಗೂ ಎಜುಕೇಷನ್ ಲೋನ್ ಸಿಗುತ್ತದೆ. ಜತೆಗೆ ಸಾಲವನ್ನು ಮರು ಪಾವತಿ ಮಾಡಲು ನೀಡುವ ಅವಧಿ ಕೂಡ 15 ರಿಂದ 20 ವರ್ಷದ ವರೆಗೂ ನೀಡಲಾಗುತ್ತದೆ. ಹೀಗೆ ಪಡೆದ ಸಾಲದ ಮೊತ್ತವನ್ನು ಕೆಳಗಿನ ಖರ್ಚುಗಳಿಗೆ ಬಳಸಿಕೊಳ್ಳಬಹುದು. ಬೇರೆ ರೀತಿಯ ಖರ್ಚಿಗೆ ಅನುಮತಿ ಇರುವುದಿಲ್ಲ.
