ಎಪ್ಸ್ಟೀನ್ ಕಡತಗಳ ಸ್ಫೋಟ | ಬಿಲ್ ಗೇಟ್ಸ್ ವಿರುದ್ಧ ಗಂಭೀರ ಆರೋಪ.. ಪಟ್ಟಿಯಲ್ಲಿ ಮೀರಾ ನಾಯರ್ ಹೆಸರು!

ನ್ಯೂಯಾರ್ಕ್ : ಅಮೆರಿಕದ ಕುಖ್ಯಾತ ಲೈಂಗಿಕ ಅಪರಾಧಿ ಜೆಫ್ರಿ ಎಪ್ಸ್ಟೀನ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಮೆರಿಕದ ನ್ಯಾಯಾಂಗ ಇಲಾಖೆಯು ಬಿಡುಗಡೆ ಮಾಡಿರುವ ಹೊಸ ಕಡತಗಳು ಜಗತ್ತಿನಾದ್ಯಂತ ಸಂಚಲನ ಮೂಡಿಸಿವೆ. ಈ ಸ್ಫೋಟಕ ದಾಖಲೆಗಳಲ್ಲಿ ಮೈಕ್ರೋಸಾಫ್ಟ್ ಸಹ-ಸ್ಥಾಪಕ ಬಿಲ್ ಗೇಟ್ಸ್ ಮತ್ತು ಭಾರತೀಯ ಮೂಲದ ಖ್ಯಾತ ಚಲನಚಿತ್ರ ನಿರ್ದೇಶಕಿ ಮೀರಾ ನಾಯರ್ ಸೇರಿದಂತೆ ಹಲವು ಗಣ್ಯರ ಹೆಸರುಗಳು ಕೇಳಿಬಂದಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಎಪ್ಸ್ಟೀನ್ ಪ್ರಕರಣದ ಇತ್ತೀಚಿನ ಕಡತಗಳಲ್ಲಿ ಬಿಲ್ ಗೇಟ್ಸ್ ಅವರ ಹೆಸರನ್ನು ಉಲ್ಲೇಖಿಸಲಾಗಿದ್ದು, ರಷ್ಯಾದ ಯುವತಿಯೊಬ್ಬಳ ಜೊತೆಗಿನ ಅಕ್ರಮ ಸಂಬಂಧವನ್ನು ಮುಚ್ಚಿಹಾಕಲು ಅವರು ಪ್ರಯತ್ನಿಸಿದ್ದರು ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಎಪ್ಸ್ಟೀನ್ ಈ ಮಾಹಿತಿಯನ್ನು ಬಳಸಿಕೊಂಡು ಗೇಟ್ಸ್ ಅವರನ್ನು ಬ್ಲ್ಯಾಕ್‌ಮೇಲ್ ಮಾಡಲು ಯತ್ನಿಸಿದ್ದ ಎನ್ನಲಾಗಿದೆ. 2010ರಲ್ಲಿ ರಷ್ಯಾದ ಬ್ರಿಡ್ಜ್ ಆಟಗಾರ್ತಿಯೊಬ್ಬಳ ಪರಿಚಯವಾಗಿದ್ದ ಬಿಲ್ ಗೇಟ್ಸ್, ಆಕೆಯ ಸಂಬಂಧದ ವೇಳೆ ಲೈಂಗಿಕವಾಗಿ ಹರಡುವ ಕಾಯಿಲೆಗೆ (STD) ತುತ್ತಾಗಿದ್ದರು ಮತ್ತು ಈ ವಿಚಾರ ಹೊರಬರದಂತೆ ಎಪ್ಸ್ಟೀನ್ ನೆರವು ಪಡೆದಿದ್ದರು ಎಂಬ ಅಂಶಗಳು ದಾಖಲೆಯಲ್ಲಿವೆ ಎಂದು ವರದಿಯಾಗಿದೆ. ಈ ಹಿಂದೆಯೂ ಗೇಟ್ಸ್ ಮತ್ತು ಎಪ್ಸ್ಟೀನ್ ನಡುವಿನ ಭೇಟಿಗಳ ಬಗ್ಗೆ ಸುದ್ದಿಯಾಗಿದ್ದರೂ, ಈ ಹೊಸ ಆರೋಪಗಳು ಗೇಟ್ಸ್ ಅವರ ವ್ಯಕ್ತಿತ್ವಕ್ಕೆ ದೊಡ್ಡ ಧಕ್ಕೆ ತಂದಿವೆ.

ನ್ಯೂಯಾರ್ಕ್ ಮೇಯರ್ ತಾಯಿ ಮೀರಾ ನಾಯರ್ ಹೆಸರು

ಮತ್ತೊಂದೆಡೆ, ಅಮೆರಿಕದ ನ್ಯಾಯಾಂಗ ಇಲಾಖೆ ಬಿಡುಗಡೆ ಮಾಡಿದ ನೂರಾರು ಹೆಸರುಗಳ ಪಟ್ಟಿಯಲ್ಲಿ ಭಾರತೀಯ ಮೂಲದ ಖ್ಯಾತ ನಿರ್ದೇಶಕಿ ಮೀರಾ ನಾಯರ್ ಅವರ ಹೆಸರು ಕೂಡ ಕಾಣಿಸಿಕೊಂಡಿದೆ. ನ್ಯೂಯಾರ್ಕ್ ನಗರದ ಮೇಯರ್ ಜೊಹ್ರಾನ್ ಮಮ್ದಾನಿ ಅವರ ತಾಯಿ ಮೀರಾ ನಾಯರ್ ಹೆಸರು ಎಪ್ಸ್ಟೀನ್ ಸಂಪರ್ಕಿತರ ಪಟ್ಟಿಯಲ್ಲಿರುವುದು ಕುತೂಹಲ ಮೂಡಿಸಿದೆ. ಆದರೆ, ಈ ಪಟ್ಟಿಯಲ್ಲಿ ಹೆಸರಿರುವ ಎಲ್ಲರೂ ಅಪರಾಧಗಳಲ್ಲಿ ಭಾಗಿಯಾಗಿದ್ದಾರೆ ಎಂದು ಅರ್ಥವಲ್ಲ. ಎಪ್ಸ್ಟೀನ್ ಜೊತೆ ಕೇವಲ ಸಾಮಾಜಿಕ ಸಂಬಂಧ ಹೊಂದಿದ್ದವರು ಅಥವಾ ಆತನ ವಿಮಾನದಲ್ಲಿ ಪ್ರಯಾಣಿಸಿದವರ ಹೆಸರುಗಳೂ ಇದರಲ್ಲಿ ಸೇರಿವೆ ಎಂದು ಕಾನೂನು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಮುಂದುವರಿದ ಎಪ್ಸ್ಟೀನ್ ಕಳಂಕದ ತನಿಖೆ

ಜೆಫ್ರಿ ಎಪ್ಸ್ಟೀನ್‌ನ ದ್ವೀಪದಲ್ಲಿ ನಡೆಯುತ್ತಿದ್ದ ಲೈಂಗಿಕ ದೌರ್ಜನ್ಯ ಮತ್ತು ಕಳ್ಳಸಾಗಣೆ ಜಾಲದ ತನಿಖೆಯ ಭಾಗವಾಗಿ ಈ ಕಡತಗಳನ್ನು ಬಿಡುಗಡೆ ಮಾಡಲಾಗುತ್ತಿದೆ. ಈ ಪಟ್ಟಿಯಲ್ಲಿ ಈ ಹಿಂದೆ ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್, ಬ್ರಿಟನ್ ರಾಜಮನೆತನದ ಪ್ರಿನ್ಸ್ ಆಂಡ್ರ್ಯೂ ಅವರಂತಹ ಪ್ರಭಾವಿಗಳ ಹೆಸರುಗಳು ಸಹ ಉಲ್ಲೇಖವಾಗಿದ್ದವು. ಈಗ ಬಿಡುಗಡೆಯಾಗಿರುವ ಸಾವಿರಾರು ಪುಟಗಳ ಈ ದಾಖಲೆಗಳು ವಿಶ್ವದ ಶ್ರೀಮಂತರು ಮತ್ತು ಪ್ರಭಾವಿಗಳ ಕರಾಳ ಮುಖವನ್ನು ಅನಾವರಣಗೊಳಿಸುತ್ತಿದ್ದು, ಮುಂದಿನ ದಿನಗಳಲ್ಲಿ ಈ ಪ್ರಕರಣವು ಇನ್ನಷ್ಟು ತಿರುವುಗಳನ್ನು ಪಡೆಯುವ ಸಾಧ್ಯತೆಯಿದೆ.

ಇದನ್ನೂ ಓದಿ : ಕಿಚ್ಚ ಸುದೀಪ್‌ ಸಿನಿ ಪಯಣಕ್ಕೆ 30 ವರ್ಷ | ಅಭಿಮಾನಿಗಳಿಗೆ ಭಾವುಕ ಪತ್ರ ಬರೆದ ‘ಅಭಿನಯ ಚಕ್ರವರ್ತಿ’.. ಹೇಳಿದ್ದೇನು?